Inatsisartut inatsisaanni nr. 4, 3. juni 2016-imeersumi, Inatsisartut inatsisaanni nr. 27, 17. november 2017-imeersumi, Inatsisartut inatsisaanni nr. 21, 1. december 2021-meersumi aamma Inatsisartut inatsisaanni nr. 61, 25. november 2024-meersumi allannguutit ilanngullugit matumuuna Nunami inuussutissarsiutinut tunngatillugu inuussutissarsiornermik siuarsaaneq pillugu Inatsisartut inatsisaat nr. 20, 3. decembari 2012-imeersoq nalunaarutigineqarpoq.

 

Kapitali 1

Atuunneqarfia

 

  § 1.  Aningaasanik immikkoortitsineqassaaq inuussutissarsiornermi pilersaarutinut inuiaqatigiit aningaasarsiorneranni iluaqusiisinnaasutut nalilerneqartunut, assersuutigalugu tunisassiornerunermik suliffissanillu amerlanerulersitsinernik kinguneqartut, tapiissuteqarfigineqarnissaat siunertaralugu tapiissutitigut aaqqiissutinik aningaasalersuisussanik.

  Imm. 2. Ingerlatsinermut namminermut tapiissuteqartoqarsinnaanngilaq.

 

  § 1a.  Aallarnisaasunik ineriartortitsinermik ingerlataqarnerit piffissamut killiligaasut, tassaasut aallarnisaasunut aalajangersimasunut pikkorissaanerit aamma siunnersuineq, aammalu assersuutigalugu amerlanerusunik imaluunniit annertunerusunik inuussutissarsiornermi ingerlataqalerluni imaluunniit inuussutissarsiornermut suliffeqarfimmi sulisunut suliffissaqartitsinerulerluni inuiaqatigiit aningaasaqarnerannut iluaqutissartaqartitsilersussatut nalilerneqartut, tapersiivigineqartarnissaat siunertaralugu, aallarnisaasunik ineriartortitsinermut aaqqissuussanik aningaasalersuinissamut aningaasaliissutinik ataatsimoortunik pilersitsisoqarsinnaavoq.

 

  § 1b. Suliffeqarfiit minnerusut aningaasalersuutissarsiniartarnerisa ajornannginnerulersinnissaa siunertaralugu, annikitsunik taarsigassarsititsisarnermik aaqqissuussinermut aningaasalersuutissanik, aningaasaliissutinik ataatsimoortunik pilersitsisoqassaaq.

  Imm. 2. Kommunit aningaasalersueqataallutik annikitsunik taarsigassarsititsisarnermut aaqqissuussinermi peqataanissamut periarfissaqarput. Aningaasalersueqataanissamut atugassarititaasut Naalakkersuisut aamma kommunit ataasiakkaat akornanni isumaqatigiissummi aalajangersarneqassapput.

 

  § 2.  Inatsisartut inatsisaanni nalinginnaasumik inuussutissarsiutinut tapersiisarneq pineqartunut ilaatinneqarpoq.

  Imm. 2. natsisartut inatsisaat manna malillugu siunertanut inatsisit allat malillugit tapiissuteqartarnermi aaqqiissutinut ilaareersunut tapiissuteqartoqarsinnaanngilaq.

  § 3.  Aallaavittut inuussutissarsiornermi ingerlatanut Kalaallit Nunaanni isumagineqartunut taamaallaat tapiissuteqartoqarsinnaavoq. Taamaattorli pikkorissarnernut imaluunniit atortussanik pisiortornernut Kalaallit Nunaanni neqeroorutaasinnaanngitsunut tapiissuteqartoqarsinnaalluni.

 

Kapitali 2

Inuussutissarsiornermut tapiissutit aningaasatillu immikkut ittut

 

  § 4.  Aningaasat ukiumoortumik aningaasanut inatsimmi immikkoortinneqartut iluanni tapiissuteqartoqartassaaq.

 

  § 5.  Tapiissutit qinnuteqareernermi tunniunneqassapput, makkununngalu atatillugu aningaasartuutit uppernarsaasernerini utertinnissaannut neriorsuinikkut:

1)  pilersitsineq amma alliliineq,

2)  tunisassianik suleriaatsinillu ineriartortitsineq,

3)  niuerfissanik pilersitsineq imaluunniit

4)  pilersaarusiorneq.

  Imm. 2.  Taamattaaq tapiissutit tunniunneqarsinnaapput aningaasat inuussutissarsiuteqartunik siunnersorneqarnermut atugassanik aningaasat amerlassusii aalajangersimasut neriorsuutiginerisigut, soorlu inatsisilerituumit imaluunniit kukkunersiuisunit ikiorneqarneq.

  Imm. 3. Imm. 1 aamma 2 malillugit tapiiffigineqarnissamik qinnuteqaat qinnuteqarnissamut immersugassaq Naalakkersuisunit suliarineqarsimasoq atorlugu suliarineqassaaq, paasissutissanillu tassani piumasaqaatigineqartunik imaqassalluni.

  Imm. 4.  Imm. 1 aamma 2 malillugit tapiiffigineqarnissamik qinnuteqaat qinnuteqarnissamut  immersugassaq Naalakkersuisunit suliarineqarsimasoq atorlugu suliarineqassaaq, paasissutissanillu tassani piumasaqaatigineqartunik imaqassalluni.

 

  § 5a.  Tapersiineq aamma aallarnisaasunik ineriartortitsinermut ingerlatanut tunniussivigineqassaaq.

  Imm. 2.  Imm. 1 naapertorlugu aallarnissaasunik ineriartortitsinermut ingerlatat tassaapput pikkorissaalluni aamma siunnersuilluni ingerlataqarnerit piffissamut killiligaasut, aallarnisaasunut aallarnisarnerup immikkoortuaniittunut, aammalu aallarnisaasunut suliffeqarfiutiminni Kalaallit Nunaanni qaammatinit 12-init sivikinnerusumik nalunaarsorsimasimasunut, ikiorsiissutigineqarsinnaasut.

  Imm. 3. Aallarnisaasunik ineriartortitsinermut ingerlatanut tapersiissutit piffissamut qaammatit 24-it ikillugit sivisussusilimmut tunniunneqarsinnaapput.

  Imm. 4.  Naalakkersuisut aallarnisaasunik ineriartortitsinermut ingerlatanut aalajangersakkanik erseqqinnerusunik aalajangersaasinnaapput, ilanngullugit tapersiissutinik tunniussinissamut atugassarititaasut.”

 

  § 5b.  Qinnuteqartoqareerneratigut taarsigassarsititsisoqarsinnaavoq § 5, imm. 1-imi siunertanut nalunaarsorneqartunut imaluunniit aningaasaliissutitut sulisitassatut.

  Imm. 2. aalakkersuisullu aalajangersagaliorsimappata inuussutissarsiutini ingerlatanut imaluunniit suliffeqarfinnut aalajangersimasunut tapersiissuteqartarniarlutik § 6 naapertorlugu, aamma taarsigassarsititsisoqarsinnaavoq inuussutissarsiutini ingerlatanut pineqartunut suliffeqarfinnulluunniit aalajangersimasunut.

 

  § 6.  Suliaqarfinnut aalajangersimasunut imaluunniit suliffeqarfinnut immikkut ittunut tapiissuteqartarneq pillugu Naalakkersuisut maleruagassanik aalajangersaasinnaapput, tamakkununnga ilaallutik aningaasaatit aalajangersimasut ilaat ukiumoortumik aningaasanut inatsimmi immikkoortinneqartut tamakkununnga inniminneerneqartassallutik kiisalu suliaqarfinnut imaluunniit suliffeqarfinnut tamakkununnga tapiissuteqarnissaq pillugu neriorsuinissamut piumasaqaatit erseqqinnerusut aalajangersarlugit.

 

Kapitali 3

Piumasaqaatit nalinginnaasut

 

  § 7.  Inuussutissarsiornermi suliffeqarfinnut pilersaarutinullu namminersortunut, piffissap sivisuup ingerlanerani aningaasarsiornikkut sinneqartooruteqarnissamik siunertaqartunut taamaallaat tapiissuteqartoqarsinnaavoq.

  Imm. 2. Tapiiffigineqarnissamik neriorsuut allanut tunniunneqarsinnaanngilaq imaluunniit eqqartuussutitigut malersuinissamut peqquteqartitsisinnaanani.

  Imm. 3. Pilersaarutinut imaluunniit ingerlatanut pisortat aningaasaataannit allanit tapiissutinik imaluunniit aningaasalersuinermi pissarsisanngitsunut taamaallaat tapiissuteqartoqarsinnaavoq.

  Imm. 4. Tapiissuteqarnissamik neriorsuineq qinnuteqaammi ingerlatsinikkut inuiaqatigiinnilu aningaasarsiornerup nalilersorneqarnera tunngavigalugu tunniunneqartassaaq. Ingerlatsinermi aningaasaqarnikkut nalilersuinermi qinnuteqartup sulianut aqutsinermullu piukkunnassuseqarnerinik, qinnuteqartup aningaasaqarneranik aammalu ingerlatsinissamut pilersaarutip aalajangersimasup attanneqarsinnaaneranik nalilersuineq ilaatigut ilaatinneqassaaq, taamaattoq takuuk imm. 5.

  Imm. 5.  Tapersiinissaq annikitsunik taarsigassarsititsinertut ittoq pillugu neriorsuuteqarneq, qinnuteqaatip ingerlatsinermut aningaasaqarnikkut inuiaqatigiillu aningaasaqarnerannut nalilersorneqarnera tunngavigalugu tunniunneqassaaq. Ingerlatsinermi aningaasaqarnermut nalilersuinermi, ingerlatsinissamut pilersaarutip aalajangersimasup attanneqarsinnaassusaanik nalilersuineq, taamaallaat ilaatinneqassaaq.

 

  § 8. Tapiiffigineqarnissamik neriorsuineq inunnut imaluunniit suliffeqarfinnut tigussaasunut Kalaallit Nunaanni najugaqartunut imaluunniit nalunaarsorsimasunut kiisalu Kalaallit Nunaanni tamakkiisumik akileraartussaatitaasunut taamaallaat tunniunneqarsinnaavoq.

  Imm. 2.  Tapiiffigineqarnissamik neriorsuummik tunniussisoqarsinnaanngilaq, pissarsisussaq imaluunniit pisortaaneqarfimmi siulersuisuniluunniit inuit aqutsisuusut akileraartarnermi inatsimmik annertuumik unioqqutitsisimasutut imaluunniit Kalaallit Nunaanni pinerluttulerinermi inatsimmi aningaasarsiornermi pinerluuteqarnermut aalajangersakkanik unioqqutitsisimasutut pineqaatissinneqarsimappata imaluunniit pisortanut akiitsoqarpata annertuunik akiligassanngorsimasunik, taamaattoq takuuk imm. 3.

  Imm. 3.  Annikitsunik taarsigassarsititsinissaq pillugu neriorsuuteqarnermi, qinnuteqartoq pisortanut annertuunik akiitsoqarnersoq, isiginiarneqassanngilaq.

  Imm. 4.  Neriorsuineq tapiiffigineqarnerlu pillugit qinnuteqartumut Naalakkersuisut qaavatigut piumasaqaateqarsinnaapput atugassaqartinneqarlutillu, kiisalu tamakku pillugit maleruagassanik erseqqinnerusunik aalajangersaasinnaallutik.

 

Kapitali 4

Tapiissutit annertussusiat aamma sivisussusiat il.il.

 

  § 9.  Tapiissuteqarnissamut neriorsuinermi taaneqassaaq, tapiissuteqarsinnaanermut aningaasat amerlanerpaaffissaat qanoq amerlatigissanersut, kiisalu aningaasat taakku killissaasa iluini anigaasartuutit uppernarsaaserneqarsimasut procentiisa qanoq amerlassuseqarneri utertinneqarsinnaanersut.

Tapiissutit tunniunneqarnissaannut piumasaqaataavoq aningaasartuutit pilersaarummut toqqaannartumik tunngatinneqarsinnaappata, pilersaarutillu isumagineqarnissaanut pisariaqartinneqarpata. Taamattaaq piumasaqaataavoq aningaasartuutit piffissap neriorsuiffiusup aalajangikkap iluani akilerneqartussaasut.

  Imm. 2. § 5, imm. 1 malillugu tapiissuteqarnermi pilersaarutip nassuiarneqarnera, tapiiffigineqarnissamik neriorsuinermut tunngaviusimasoq, malillugu aningaasartuutissatut uppernarsaataasut amerlanerpaamik 50 %-iisa amerlaqataat akilerneqarsinnaapput.

  Imm. 3.  Tapiissutit amerlassusissai neriorsuinerullu sivisussusissaa pillugit Naalakkersuisut maleruagassanik erseqqinnerusunik aalajangersaasinnaapput.

 

  § 9a.  Taarsigassarsititsinissamut neriorsuummi § 5 b naapertorlugu nalunaarneqassaaq taarsigassarsiarititassat annertussusiat, 20.000 kr.-nit 100.000 kr.-nut annertussuseqarsinnaasut, taamaattoq tak. imm. 7.

  Imm. 2.  Taarsigassarsititsinissamik neriorsuinermi atugassarititaavoq aningaasartuutissatut missingersuusiat suliniummut toqqaannartumik attaveqarneri imaluunniit aningaasaliissutitut sulisitassatut, taarsigassarsiassanut tunngasumik.

  Imm. 3.  Aningaasat taarsigassarsiaritinneqartussat 1-imik imaluunniit arlalinnut agguarlugit tunniunneqarsinnaapput.

  Imm. 4.  Aningaasat taarsigassarsiaritinneqartussat annerpaamik aningaasartuutissatut missingersuusiaasut 75 pct.-erisinnaavaat suliniummik allaaserinninneq naapertorlugu suliaasut, qinnuteqarnermilu tunngaviusut. Taamaattoq aningaasat taarsigassarsiaritinneqartussat annerpaamik 25 pct.-iusinnaapput, taarsigassarsitinneqarnissamut qinnuteqaammi inatsisip tapiissuteqartarnermut periarfissatut aaqqissuussai allat ilanngullugit atorneqarpata, takukkit § 5, imm. 1 aamma § 6, imaluunniit aningaasartuutissatut missingersuusiaasut 50 pct.-ii, aningaasaliissutit sulisitassat pineqarpata.

  Imm. 5 Taarsigassarsititsineq pisassaaq niuernermi atugassarititaasut tunngavigalugit, tamatumani aamma erniat, akilersuineq, akitsuutit aamma taarsigassarsititsinermut aningaasartuutit eqqarsaatigalugit atugassarititaasuni, taarsigassarsisup aamma taarsigassarsititsinermi allaffissornikkut sullissisuusup akornanni isumaqatigiissutaasumi, tak. taamaattoq imm. 4.

  Imm. 6. Taarsigassarsiaritinneqartunut qularnaveeqqusiisoqartassanngilaq, taarsigassarsitinneqartussallu nalilerneqarnerani taarsigassarsititsisarnerup siunertaa isiginiarneqartassaaq, tak. § 1 b.

  Imm. 7.  Naalakkersuisut taarsigassarsititsisarnermik aaqqissuussineq pillugu ersarinnerusunik aalajangersagaliorsinnaapput, tamatumani aamma aningaasat pineqartut killissaannik.”

 

Kapitali 5

Aqutsineq, nalunaarusiortarneq, atorunnaarsitsineq aamma maalaaruteqarneq

 

Aqutsineq aamma sulianik suliarinnittarneq

 

  § 10. Naalakkersuisut allaffissornikkut tapiissuteqartarnermi suliassat §§-ini 5, 5 a aamma 5 b suliassat pillugit kommunalbestyrelsimut imaluunniit allaffissornikkut ingerlatsivimmut isumaqatigiissuteqarsinnaapput.

  Imm. 2.  Imm.  1 malillugu suliffeqarfimmik allaffissornermik ingerlataqartumik isumaqatigiissusiortoqarpat, pisortat ingerlatsineranni sulianik suliarinnittarneq pillugu inatsisartut inatsisaat aamma ingerlatsinermi ammasuunissaq pillugu inatsisartut inatsisaat suliffeqarfiup allaffissornermik ingerlataqartup inatsisartut inatsisaat manna malillugu suliaminik isumaginninnera pillugu atuutsinneqassapput.

 

Nalunaarusiortarneq aamma paasissutissat pillugit nalunaaruteqartarneq

 

  § 11.  Nalakkersuisut inunnit imaluunniit suliffeqarfinnit tapiiffigineqarnissamik neriorsorneqarsimasunit paasissutissat, uppernarsaatit, takussutissat naatsorsuutillu tapiissutinik akiliinissamut aalajangerniarnermi pisariaqarsinnaasutut nalilerneqartut tamaasa tunniuteqqullugit piumasaqarsinnaapput.

  Imm. 2. Naatsorsuutinik saqqummiussisarneq, kukkunersiuineq, nakkutilliineq misissuisarnerlu pillugit maleruagassanik erseqqinnerusunik Naalakkersuisut aalajangersaasinnaapput.

 

Neriorsuinerup atorunnaarsinnera aamma tapiissutinik utertitsisarneq

 

  § 12.  Tapiissuteqarnissamik neriorsuinerup atorunnaarsinnissaa imaluunniit tapiissutinik utertitsinissaq pillugu Naalakkersuisut aalajangiisinnaapput, tapiissuteqarfigineqartoq pisussaatitaanani inatsisartut inatsisaat manna malillugu tapiiffigineqarsimappat imaluunniit tapiiffigineqarnissamik neriorsuummik angusaqarsimappat imaluunniit neriorsuummik pissarsisimappat imaluunniit tapiiffigineqarsimappat.

  Imm. 2.  Ima pisoqarsimatillugu utertitsinissaq piumasaqaatigineqarsinnaavoq:

1)  Tapiissuteqarfigineqartoq piaaraluni imaluunniit annertuumik mianersuaalliornikkut paasissutissanik tapiissutinik pissarsinissamut pingaaruteqartunik eqqunngitsunik imaluunniit pututitsiniutinik tunniussaqarsimappat.

2)  Tapiissutinik pissarsinissamut piumasaqaatit pigisimanngippagit.

  Imm. 3.  Inuit imaluunniit suliffeqarfiit tapiissuteqarfigineqarnissamik neriorsorneqarsimasut, aningaasarsiornermi pissutsinilu allani tapiiffigineqarnissamik neriorsuisimanerup atorunnaarsinneqarnissaanut Naalakkersuisut naliliinissaannut pingaaruteqarsinnaasut annertuumik allanngornerini pillugit Naalakkersuisut nalunaarfigissallugit pisussaaffeqarput.

  Imm. 4.  Qinnuteqartoq imaluunniit suliffeqarfik ima iliorsimatillugu tapiiffigineqarnissamik neriorsorneqarneq imminut isumagisumik atorunnaassaaq:

1)  naatsorsuutinik imaluunniit uppernarsaatinik allanik § 11, imm. 1 malillugu Naalakkersuisut piumasarisimasaannik, tassani piffissamut killiliussap allassimasup iluani nassiussinngippat, imaluunniit”

2)  akiliisinnaajunnaartussatut suliarineqarpat, imminut akisussaajunnaarsitaappat imaluunniit suliffeqarfimmik ingerlatsisinnaanerminik arsaarneqarpat.

 

Maalaaruteqarneq

 

  § 13. Inatsisartut inatsisaat malillugu aalajangiinerit allaffissornikkut oqartussanut allanut maalaarutigineqarsinnaanngillat. Tamannattaaq § 10, imm. 1 malillugu atuuppoq kommunalbestyrelsi imaluunniit allaffissornikkut suliffeqarfik aalajangiisuusimappat.

 

Kapitali 6

Pineqaatissiinerit aamma atuutsilerfissaa assigisaallu

 

  § 14. Kinaluunniit piaaraluni imaluunniit annertuumik mianersuaalliornikkut ima iliortoq Kalaallit Nunaanni Pinerluttulerinermi inatsit malillugu pineqaatissinneqarsinnaavoq:

1)  Pisussaatitaanani tapiiffigineqarnissamik neriorsorneqarnissaq imaluunniit tapiissutinik akiliiffigineqarnissaq anguniarlugu paasissutissanik eqqunngitsunik imaluunniit pututsitsiniutinik tuniussisoq imaluunniit paasissutissanik nipangiussisimasoq.

2)  Tapiissutinik tunniunneqarsimasunik tamatumunnga piumasaqaatit unioqqutillugit atuisoq.

  Imm. 2. Inatsisartut inatsisaanni maleruagassiat malillugit Kalaallit Nunaanni Pinerluttulerinermi Inatsimmi malittarisassat malillugit akiliisitsinermik pineqaatissiinissaq aalajangersarneqarsinnaavoq.

  Imm. 3.  Inatsisartut inatsisaanni imaluunniit inatsisit malillugit aalajangersagaq malillugu akiliisitsinissamik pineqaatissiisarnissamut pisinnaatitsineqarpat, Kalaallit Nunaanni pinerluttulerinermi inatsimmi § 17 malillugit akiliisitsineq inummut inatsisinut attuumassuteqartumut tutsinneqarsinnaavoq.

  Imm. 4. Inatsisartut inatsisaat manna malillugu imaluunniit inatsisartut inatsisaat malillugit maleruagassat aalajangerneqarsimasut malillugit akiliisitsinermik pineqaatitsiissutit landskarsimut nakkartinneqassapput.

 

  § 15. Inatsisartut inatsisaata atuutilerfigissavaa 1. januar 2013.

  Imm. 2. Tamanna ilutigalugu takornariartitsinermik inuussutissarsiuteqarnerup nunamilu inuussutissarsiornerup iluanni inuussutissarsiornermik siuarsaanissaq pillugu inatsisartut inatsisaat nr. 14, 12. november 2001-imeersoq, inatsisartut inatsisaatigut nr. 10, 14. november 2004-meersukkut allanngortinneqarsimasoq atorunnaassaaq.

  Imm. 3.  Takornariartitsinermik inuussutissarsiornerup nunamilu inuussutissarsiornerup iluanni inuussutissarsiornermik siuarsaanissaq pillugu inatsisartut inatsisaanni pisinnaatitsissutitut maleruagassat atorunnaarsinneqarnissaasa tungaannut atuutiinnassapput.

  Imm. 4. Taarsigassarsinissamut neriorsuutit, qularnaveeqqusiinerit imaluunniit tapiiffigineqarnissamik neriorsuutit takornariartitsinermik inuussutissarsiornermut aningaasaliissutissatut tapiissutit pillugit inatsisartut inatsisaanni nr. 15, 31. oktober 1996-imeersumi pisinnaatitsineqarluni tunniunneqarsimasut, nunami inuussutissarsiutinut aningaasaliissutissatut tapiissutit pillugit inatsisartut inatsisaat nr. 20, 30. oktober 1998-meersoq aamma takornariartsitsinermik inuussutissarsiuteqarnerup nunamilu inuussutissarsiuteqarnerup iluanni inuussutissarsiutinik siuarsaanissaq pillugu inatsisartut inatsisaat nr. 14, 12. november 2001-imeersoq suli atuupput, inatsisartullu inatsisaat manna malillugu naleqqussarneqarlutik.

 

________________________________________________________________________

 

Inatsisartut inatsisaat nr. 20, 23. november 2017-imeersoq (elektroniskimik saqqummiunneqartoq)* tulliuttutut atortuulersitsinermik aalajangersagaqarpoq:

§15 imm. 1

 

Inatsisartut inatsisaat manna 1. januar 2013-imi atortuulersinneqarpoq.

__________________________________________________________________________

 

Aallarnisaasunik ineriartortitsinermik ingerlataqarnermut tapersiisarneq pillugu Inatsisartut inatsisaat nr. 4, 3. juni 2016-imeersoq (elektroniskimik saqqummiunneqartoq)^[1] tulliuttutut atortuulersitsinermik aalajangersagaqarpoq:

 

§ 2

Inatsisartut inatsisaat atortuulissaaq ulloq 1. juuni 2016.

 

_________________________________________________________________________

Nunami inuussutissarsiutinut tunngatillugu inuussutissarsiornermik siuarsaaneq pillugu Inatsisartut inatsisaata allanngortinneqarnera (Annikitsunik taarsigassarsititsisarnermik aaqqissuussineq) pillugu Inatsisartut inatsisaat nr. 27, 17. november 2017-imeersoq (elektroniskimik saqqummiunneqartoq)^[2] tulliuttutut atortuulersitsinermik aalajangersagaqarpoq:

 

§ 2

 

Inatsisartut inatsisaat 1. januar 2018 atuutilissaaq.

___________________________________________________________________________

 

Nunami inuussutissarsiutinut tunngatillugu inuussutissarsiornermik siuarsaaneq pillugu Inatsisartut inatsisaata allanngortinneqarnera pillugu (Erseqqissaaneq nipilersornermik inuussutissarsiutinut aamma filmiliornermi inuussutissarsiutinut tunngatillugu) Inatsisartut inatsisaat nr. 21, 1. december 2021-meersoq (elektroniskimik saqqummiunneqartoq)^[3] tulliuttutut atortuulersitsinermik aalajangersagaqarpoq:

 

§ 2

 

Inatsisartut inatsisaat atortuulissaaq ulloq 1. januar 2022.

___________________________________________________________________________

 

Nunami inuussutissarsiutinut tunngatillugu inuussutissarsiornermik siuarsaaneq pillugu Inatsisartut inatsisaata allanngortinneqarnera (Annikitsumik taarsigassarsititsisarnermik aaqqissuussinermut atorunnaarfissaannut ulluliussap atorunnaarsinneqarnera, qinnuteqartunut piumasaqaatinik qasukkartitsineq, inunnut pisortanut annertuunik akiitsulinnut tapersiinissamut killiliinerup atorunnaarsinneqarnera aammalu aaqqissuussinermi allanngortitsinerit annikinnerusut allat) pillugu Inatsisartut inatsisaat nr. 61, 25. november 2024-meersoq (elektroniskimik saqqummiunneqartoq)^[4] tulliuttutut atortuulersitsinermik aalajangersagaqarpoq:

 

§ 2

 

Inatsisartut inatsisaat ulloq 1. januar 2025 atuutilerpoq.

 

 

Namminersorlutik Oqartussat, ulloq 3. december 2012

 

 

 

 

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut, Naligiissitaanermullu Naalakkersuisoqarfik, ulloq 20. oktobari 2025

 

 

 

Jørgen T. Hammeken-Holm (Atsior.)

Naalakkersuisoqarfimmi Pisortaq

 

 

 

Marte Lorna (Atsior.)