Matumuuna nalunaarutigineqarput Naalakkersuinikkut ingerlatsisut partiit naatsorsuutaasa tamanut saqqummiunneqartarneri pillugit Inatsisartut inatsisaat nr. 15, 22. novmeber 2011-meersoq Inatsisartut inatsisaata nr. 14-ip, 4. februar 2025-meersup malitsigisaanik allannguutitalik

Naalakkersuinikkut ingerlatsisut partiit naatsorsuutaat

  § 1.  Partiit Folketingimut Inatsisartunulluunniit Kalaallit Nunaanni qinersinermi kingullermi qinigassanngortitaqarsimasut qaammatisiutit ukiui tamaasa partiip nuna tamakkerlugu kattuffiata isertitaanut aningaasartuutaanullu ukiumoortumik naatsorsuutinik kukkunersiukkanik saqqummiussaqartassapput. Isertitat assigiinngitsut makku pillugit paasissutissanik ukiumoortumik naatsorsuutit imaqassapput:

1)  Pisortaniit partiimut tapiissutit.

2)  Ilaasortat akiliutaannit isertitat.

3)  Qulaani taaneqartut saniatigut inuinnarnit tapiissutit allat.

4)  Inatsisilerinikkut inuttut isigineqarsinnaasunit, taakkununnga ilanngullugit ataatsimut kattuffinnit namminersortunit, sulianut atatillugu suliniaqatigiiffinnit, inuussutissarsiortut suliniaqatigiiffiinit, inuussutissarsiutigalugu suliffeqarfinnit, aningaasaateqarfinnit peqatigiiffinnillu, tapiissutit.

5)  Ernianit isertitat.

  Imm. 2.  Partii ukiumi naatsorsuuteqarfiusumi tapiissuteqartumit ataatsimit ataasiarluni arlaleriarluniluunniit tapiissutinik imm. 1, nr. 3-mut ilaatinneqartunik katillugit 1.000 kr.-init amerlanerusunik pissarsisimappat, tapiissuteqartup aqqa najugaalu ukiumoortumik naatsorsuutini takuneqarsinnaassapput, tapiissuteqartumit tapiissutit tamarmiusut nalunaarlugit.

  Imm. 3.  Partii ukiumi naatsorsuuteqarfiusumi tapiissuteqartumit ataatsimit ataasiarluni arlaleriarluniluunniit tapiissutinik imm. 1, nr. 4-mut ilaatinneqartunik pissarsiaqarsimappat, tapiissuteqartup aqqa najugaalu ukiumoortumik naatsorsuutini takuneqarsinnaassapput, tapiissuteqartumit tapiissutit tamarmiusut nalunaarlugit.

  Imm. 4.  Ukiumoortumik naatsorsuutit oqimaaqatigiissitsineq aamma nammineq aningaasaatit pillugit paasissutissanik imaqassapput.

  Imm. 5.  Ukiumoortumik naatsorsuutit ilassutitut nassuiaammik paasissutissaajunnartunik partiip nuna tamakkerlugu kattuffiata § 4 aamma § 4 a malillugit pissarsiarisimasaanik imaqassapput.

  § 2.  Ukiumoortumik naatsorsuutit partiip aqutsisuinit atsiorneqassapput aamma ukiumoortumik naatsorsuutini allanneqarsimasunik partii allanik isertitaqarsimanngineranik ani-ngaasartuuteqarsimanngeranilluunniik nalunaarummik imaqassallutik.

  § 3.  Ukiup naatsorsuiffiusup naaneraniit kingusinnerpaamik qaammatit arfinillit qaangiutsinnagit partii ukiumoortumik naatsorsuutinik Inatsisartunut nassiussissaaq. Ukiumoortumik naatsorsuutit Inatsisartut Siulittaasooqarfiata tamanut saqqummiutissavai.

Immikkoortortaqarfiit aamma inuusuttut immikkoortortaqarfiit paasissutissiisussaatitaanerat

  § 4.  § 1, imm. 1-mi ilaasup partiip immikkoortortaqarfia imaluunniit inuusuttunut immikkoortortaqarfia ukiumi ilivitsumi § 1, imm. 1, nr. 3-4-mi taaneqartunik akileeqataassutinik, katillugit 40.000 kr.-inik amerlanerusunik tigusaqarsimappat, immikkoortortaqarfik ukiup ilivitsup naaneraniit kingusinnerpaamik qaammatit sisamat qaangiutsinnagit partiip nuna tamakkerlugu kattuffianut makku pillugit paasissutissanik nassiussissaaq:

1)  Akileeqataassutit tamarmiullutik annertussusaat.

2)  Tapiissutit ataasiakkaat annertussusii, tapiissuteqartup aqqa najugaalu nalunaarlugit:

a)  immikkoortortaqarfik tapiissuteqartumit ataatsimit ataasiarluni arlaleriarluniluunniit tapiissutinik imm. 1, nr. 3-mut ilaatinneqartunik katillugit 1.000 kr.-init amerlanerusunik pissarsiaqarsimappat, imaluunniit

b)  immikkoortortaqarfik tapiissutinik § 1, nr. 4-mut ilaatinneqartunik pissarsiaqarsimappat.

Ilaasortat qinigassanngortissimasullu paasissutissiisussaatitaanerat

  § 4 a.  Partiimut § 1, imm.1-imut ilaatinneqartumut ilaasortaq naalakkersuinikkut sulinerminut allanit parteerinngisaminit tapiissutinik, ilaatigut qineqqusaarnermut tapiissutinik, qaammatisiutit ukiuanni pissarsiaqarsimappat, ilaasortaq qaammatisiutit ukiuata naanerata kingorna qaammatit sisamat qaangiutsinnagit uku pillugit partiip nuna tamakkerlugu kattuffianut paasissutissanik nassiussaqassaaq:

1)  tapiissutit tamarmiullutik annertussusii, aamma

2)  tapiissutit ataasiakkaat annertussusii, tapiissuteqartut aqqi najugaallu nalunaarlugit:

a)  ilaasortaq tapiissuteqartumit ataatsimit ataasiarluni arlaleriarluniluunniit tapiissutinik imm. 1, nr. 3-mut ilaatinneqartunik katillugit 1.000 kr.-init amerlanerusunik pissarsiaqarsimappat, imaluunniit

b)  ilaasortaq tapiissutinik § 1, nr. 4-mut ilaatinneqartunik pissarsiaqarsimappat.

  Imm. 2.  Inuit partiimut ilaasortaanngikkaluarlutik Folketingimut Inatsisartunulluunniit qinersinermi kingullermi partii sinnerlugu qinigassanngortissimasut ilaasortatut isigineqassapput.

Kinaassutsimik isertuussilluni tapiissutit nunanillu allanit tapiissuteqartunit tapiissutit

  § 4 b.  Partiit, najukkani inuusuttunullu immikkoortortaqarfiit ilanngullugit, nunanit allanit kinaassutsimilluunniit isertuussilluni tapiissuteqartunit tapiissutinik § 1. imm. 1, nr. 3-4-mut ilaatinneqartunik pissarsiaqarsinnaatitaanngillat. Nunanit allanit tapiissuteqartutut paasineqassapput tapiissuteqartut Kalaallit Nunaata avataani najugaqarlutilluunniit angerlarsimaffillit. Nunanit allanit tapiissuteqartunit tapiissutinik pissarsiaqarsinnaatitaannginnermut partiinit kunngeqarfimmi nalunaarsorneqarsimasunit tapiissutit ilaatinneqanngillat.

  Imm. 2.  Partiit, najukkani inuusuttunullu immikkoortortaqarfiit ilanngullugit, tapiissutinik imm. 1-imi taaneqartunik tunineqarpata, partiip tapiissutit piissarsiarineqarnerinit sapaatit akunnerisa sisamat qaangiutinnginnerini tapiissutit utertissavaat. Tapiissutit utertinneqarsinnaanngitsut nunatta karsianut nakkartinneqassapput, pissarsiarineqarineqarnermillu kingorna sapaatit akunnerisa arfineq-pingasut qaangiutinnginnerini kontumut aningaasaqarnermut naalakkersuisoqarfimmit innersuussutigineqartumut nuunneqassallutik.

  Imm. 3.  Imm. 1 aamma 2 taamaaqataanik ukununnga atuutissapput:

1)  Folketingimut Inatsisartunulluunniit ilaasortanut taakkulu sinniisussaannut, aamma

2) inunnut Folketingimut Inatsisartunulluunniit qinersinissamut aggersumut qinigassanngortissimasunut.

Tapiissutinut pissarsiarineqarsinnaasunut killiliussat

  § 4 c.  Partii qaammatisiutit ukiuanni ataatsimi tapiissutinik § 1, imm. 1, nr. 3-4-mut ilaatinneqartunik katillugit 200.000 kr.-init sinnilinnik, imaluunniit tapiissuteqartut ataasiakkaat eqqarsaatigalugit 20.000 kr.-init sinnilinnik, pissarsiaqarsinnaatitaanngillat.

  Imm. 2.  Partii tapiissutinut pissarsiarineqarsinnaasunut killiliussaq imm. 1-imi taaneqartoq sipporlugu pissarsippat, tapiissutit pissarsiarineqarnerisa kingorna sapaatit akunneri sisamat qaangiutsinnagit tapiissutit ilaat sipporuttut partiip utertissavai. Tapiissutit ilaat sipporuttut utertinneqarsinnaanngitsut nunatta karsianut nakkartinneqassapput, pissarsiarineqarnermillu kingorna sapaatit akunnerisa arfineq-pingasut qaangiutinnginnerini kontumut aningaasaqarnermut naalakkersuisoqarfimmit innersuussutigineqartumut nuunneqassallutik.

Pineqaatissiinerit, atulersinnera il.il.

  § 5.  Tulliuttunut akiliisitaanermik pineqaatissiisoqarsinnaavoq:

1) § 2-mik, § 3-mi oqaaseqatigiit siulliannik, § 4-mik, § 4 a-mik, § 4 b, imm. 2-mik aamma § 4 c, imm. 2-mik unioqqutitsinermut,

2) §§-it 1, 4 aamma 4 a malillugit paasissutissanik eqqunngitsunik amigartunilluunniit tunniussaqarnermut, aamma

3) § 2 malillugu eqqunngitsumik nalunaaruteqarnermut.

  Imm. 2.  Inatsisartut inatsisaat akiliisitsinissamut tunngavissiippat Kalaallit Nunaanni pinerluttulerinermik inatsimmi inatsisitigut pisussaatitaasup pisinnaatitaasullu akisussaaffia pillugu maleruagassat malillugit partiip kattuffia akiliisinneqarsinnaavoq.

  Imm. 3.  Akiliisitsissutit imm. 1-2 malillugit aalajangersarneqartut nunatta karsianut nakkartinneqartassapput.

  Imm. 4.  § 4 b, imm. 2-mik aamma § 4 c, imm. 2-mik unioqqutitsisoqartillugu Kalaallit Nunaanni pinerluttulerinermi inatsimmi malittarisassat malillugit arsaarinnittoqarsinnaavoq. Arsaarinnissutit nunatta karsianut iluaqutissanngortinneqassapput.

  § 6.  Inatsisartut inatsisaat ulloq 1. januar 2013-mi atulersinneqarpoq.

  Imm. 2.  § 1 malillugu naatsorsuutit 2013-mut ukiumut naatsorsuiffik pillugu siullermeertumik nassiunneqassapput.

Naalakkersuinikkut ingerlatsisut partiit naatsorsuutaasa tamanut saqqummiunneqartarneri pillugit Inatsisartut inatsisaata allanngortinneqarneranik Inatsisartut inatsisaat nr. 14, 4. februar 2025-meersoq (Naalakkersuinikkut sulinermut inunnit inatsisilerinikkullu inuttut isigineqarsinnaasunit tapiissutinik pissarsisarneq pillugu paasissutissiisussaatitaanerup sakkortusineqarnera, kinaassutsi-mik isertuussilluni nunanillu allanit tapiissutinik tunineqartarnermik inerteqquteqarneq, tapiissutit annertussusiinut killigititat) §§-inut 1, 4, 4 a, 4 b, 4 c aamma 5-imut tunngasoq, atuutilersitsinis-samut aalajangersakkamik tulliuttumik imaqarpoq:

§ 2

Inatsisartut inatsisaat Inatsisartut inatsisaata tamanut nalunaarutigineqarnerata aqaguani atuutilissaaq.

  Imm. 2.  § 1, nr. 5, 6 aamma 8 kiisalu § 4a, § 1, nr. 10-kkut ilanngunneqartoq, siullermik atuutilissapput tapiissutinut ukiumi naatsorsuuteqarfiusumi 2025-mi pissarsiarineqartunut.

Naalakkersuisut Siulittaasuata Naalakkersuisoqarfia maajip.13.2025

Hans-Peder Barlach Christensen (atsiorn.)

Naalakkersuisoqarfimmi Pisortaq

/Stefan Krehbiel (atsiorn.)