Matumuuna nalunaarutigineqarput Illuliortiternermut aningaasalersuineq pillugu Inatsisartut inatsisaat nr. 39, 23. november 2017-imeersoq, allannguutit ukunani pineqartut ilanngullugit Inatsisartut inatsisaat nr. 36, 29. november 2019-imeersoq aamma Inatsisartut inatsisaat nr. 19, 30. november 2020-meersoq aamma Inatsisartut inatsisaat nr. 28, 13. Juni 2023-meersoq aamma Inatsisartut inatsisaat nr. 54, 25. november 2024-meersoq.

 

Kapitali 1

Atuuffia

 

§ 1.  Inatsisartut inatsisaat una illunik sanaartornermut, iluarsaassinermut, allilerinermut pitsanngorsaanermullu taarsigassarsinermut tapiiffigitinnermullu atorneqarpoq.
Imm. 2.  Inissianut piginnittumiit imaluunniit attartortumiit taassumalu inoqutigiivinit najugassap aammalu aalajangersimasumik najugaqarfissap saniatigut siunertanut allanut tamakkiisumik ilaannakortumilluunniit atorneqartussanut eqqarsaataasunulluunniit taarsigassarsititsisoqarsinnaananilu tapiissuteqartoqarsinnaanngilaq. Taamaattoq inuussutissarsiutit annikinnerusut namminersorfiusut piginnittumit imaluunniit attartortumit taassumalu inoqutigiivinit ingerlanneqartut mininneqarput.

  Imm. 3. Inissianik sanaartornermut, iluarsaassinermut, allilerinermut pitsanngorsaanermullu pisortanit tapiiffigineqartut, tapiissutit imaluunniit aningaasalersuineq pillugu inatsisinut allanut ilaasunut inissianut taarsigassarsisitsisoqarsinnaanngilaq.

 

  § 2.  Inissianik sanaartornermut, pitsanngorsaanermut, iluarsaassinermut imaluunniit allilerinermut piffissami sanaartornermi pilersaarusiornermilu inatsimmik atuuttumik naammassinnittumik sanaartornernut taamaallaat taarsigassarsisitsisoqarsinnaavoq tapiiffigineqarsinnaassallutilluunniit.

 

§ 3.  Taarsigassarsisitsinissamut tapiiffigitinnermullu neriorsuummik tunniussisoqannginnerani sanaartornissamut pituttuisumik isumaqatigiissusiorfiusimanngitsunut imaluunniit sanaartornermi sulinernut aallartinneqarsimanngitsunut taamaallaat sanaartornernut taarsigassarsisitsisoqarsinnaavoq tapiiffigineqarsinnaassallutilluunniit.

 

Kapitali 2

Nutaanik illuliortiternernut taarsigassarsineq

 

§ 4.  Inissiat nutaat sanaartornerinut aningaasartuutit tamarmiusut ilaannut aningaasalersorneqarnissaannut kommunalbestyrelsi taarsigassarsisitsisinnaavoq, tak. §§ 5-8.

  Imm. 2. Inissiami inissiap annertussusia 110 m² tikillugu annerpaamik taarsigassarsisitsisoqarsinnaavoq, inissiap anginerunera apeqqutaatinnagu.

  Imm. 3. Sanaartornermut aningaasartuutit tamarmiusut m²-imut ataatsimut annerpaamik 20.000 kr.-inut taarsigassarsisitsisoqarsinnaavoq, aningaasartuutit annertuneruneri apeqqutaatinnagit.

 

§ 5.  Nuummi aningaasartuutit tamarmiusut 27 %-ii tikillugit kommunalbestyrelsi nutaamik inissialiornissamut taarsigassarsisitsisinnaavoq, taamaattorli § 4, imm. 2 naapertorlugu annerpaamik naatsorsorneqartumik tassa 594.000 kr.-inik annerpaamik taarsigassarsisitsisoqarluni, taamaattoq tak. imm. 2 aamma 3.

  Imm. 2. Imm. 1 malillugu taarsigassarsisitsineq imatut annikilliartortinneqassaaq:

1) 2019-imi taarsigassarsisitsinissamut neriorsuutinut 24 %-it, tassa annerpaamik 528.000 kr.-inik taarsigassarsisitsineq

2) 2020-mi  taarsigassarsisitsinissamut neriorsuutinut 21 %-it, tassa annerpaamik 462.000 kr.-inik taarsigassarsisitsineq

3) 2021-mi  taarsigassarsisitsinissamut neriorsuutinut 18 %-it, tassa annerpaamik 396.000 kr.-inik taarsigassarsisitsineq

4) 2022-mi taarsigassarsisitsinissamut neriorsuutinut 15 %-it, tassa annerpaamik 330.000 kr.-inik taarsigassarsisitsineq

5) 2023-mi taarsigassarsisitsinissamut neriorsuutinut 12 %-it, tassa annerpaamik 264.000 kr.-inik taarsigassarsisitsineq

6) 2024-mi taarsigassarsisitsinissamut neriorsuutinut 9 %-it,  tassa annerpaamik 198.000 kr.-inik taarsigassarsisitsineq

7) 2025-mi taarsigassarsisitsinissamut neriorsuutinut 6 %-it, tassa annerpaamik 132.000 kr.-inik taarsigassarsisitsineq

8) 2026-mi taarsigassarsisitsinissamut neriorsuutinut 3 %-it, tassa annerpaamik 66.000 kr.-inik taarsigassarsisitsineq

  Imm. 3. 2027-mi januaarip aallaqqaataanit sunniuteqalersumik Nuummi taarsigassarsisitsinissamut neriorsuinermik nalunaaruteqartoqarsinnaanngilaq.

 

§ 6. Qaqortumi, Sisimiuni aamma Ilulissani kommunalbestyrelsi aningaasartuutit tamarmiusut 30 %-ii tikillugit nutaamik inissialiornissamut taarsigassarsisitsisinnaavoq, taamaattorli § 4, imm. 2 naapertorlugu annerpaamik naatsorsorneqartut, tassa 660.000 kr.-inik annerpaamik taarsigassarsisitsisoqarluni.

 

§ 7.  Maniitsumi, Aasianni aamma Tasiilami kommunalbestyrelsi aningaasartuutit tamarmiusut 35 %-ii tikillugit taarsigassarsisitsisinnaavoq, taamaattorli § 4, imm. 2 naapertorlugu annerpaamik naatsorsorneqartut, tassa 770.000 kr.-inik annerpaamik taarsigassarsisitsisoqarluni.

 

§ 8. Illoqarfinni nunaqarfinnilu §§ 6 aamma 7-imi taaneqanngitsuni kommunalbestyrelsi aningaasartuutit tamarmiusut 40 %-ii tikillugit taarsigassarsisitsisinnaavoq, taamaattorli § 4, imm. 2 naapertorlugu annerpaamik naatsorsorneqartut, tassa 880.000 kr.-inik annerpaamik taarsigassarsisitsisoqarluni.

 

§ 9. §§ 5-8 malillugit taarsigassarsiarititat inunnut ataasiakkaanut aammalu sanaartornermut aningaasartuutit tamarmiusut sinnerinut aningaasalersuinissap uppernarsarneqarnerani, taamaallaat taarsigassarsiaritinneqarsinnaapput.

 

§ 9 a.  Inuit ataasiakkaat kisimik inissiamut ataatsimut taarsigassarsitinneqarsinnaapput.

  Imm. 2 Inunnut ataasiakkaanut inissialiortiternernut aningaasalersuineq pillugu Inatsisartut inatsisaat imaluunniit inissialiortiternernut aningaasalersuineq pillugu siusinnerusukkut inatsisit naapertorlugit nutaanik inissialiornissamut taarsigassarsitinneqareersimasunut, taarsigassarsititsisoqarsinnaanngilaq.

 

§ 9 b.  Sanatitsisoq namminersortoq inunnut ataasiakkaanut tuniniaanissaq siunertaralugu nutaanik inissialiorsinnaavoq. Kommunalbestyrelsi § 9 malillugu nutaanik inissialiornissamut taarsigassarsititsinissamut neriorsuuteqarsinnaavoq. Nutaanik inissialiornissamut taarsigassarsititsisarneq pillugu aalajangersakkat taamaaqataanik atuutissapput.

  Imm. 2. Sanatitsisup namminersortup atuilernissamut akuersissummik tunniussereernerup kingorna qaammatinit 12-init kingusinnerusumi nutaanik inissialianik tunisinerani, inissianut tunineqarsimanngitsunut taarsigassarsititsinissamut neriorsuut ilimasaarinertaqanngitsumik atorunnaassaaq.

 

§ 10. §§ 5-8 naapertorlugit taarsigassarsisitsinerit inissiami qularnaveeqqusiussinikkut qulakkeerneqassapput. Sanaartornermi aningaasartuutit tamarmiusut sinnerisa sillimmasiinermullu akiliussinerit aningaasalersornissaannut inissiami qularnaveeqqusiilluni taarsigassarsineq taarsigassarsisitsinerit ataqqissavaat.

  Imm. 2. Taarsigassarsiat atulernissaanut akuersissummut ulluliussamiit ukiuni 20-ni ernialersorneqarnatillu akilersugassaanngillat, tamatumalu kingorna Nationalbankip erniaritittagai procentinik pingasunik ilallugit erniaqartinneqarlutik amerlaqatigiinnik annertussusilerlugit ukiuni 15-ini akilersugassanngussallutik. Taarsigassarsinermi allagartap qanoq iluseqarnissaa suullu piumasaqaataassanersut kommunalbestyrelsimit aalajangersarneqassapput.

  Imm. 3. Taarsigassarsiat akilersornissaannut akiligassallu akilersornissaannut maleruagassanik Naalakkersuisut aalajangersaasinnaapput.

 

§ 11. § 10, imm. 1-imi illunut pineqartunut atatillugu piginnittut nikinneri tamaasa pillugit kommunalbestyrelsi ilisimatinneqartassaaq. Inissialiortiternernut aningaasalersuineq pillugu Inatsisartut inatsisaat imaluunniit inissialiortiternernut aningaasalersuineq pillugu siusinnerusukkut inatsisit naapertorlugit nutaanik inissialiornissamut taarsigassarsiaqariinngitsunut piginnittut nikinnerat eqqaassanngikkaanni, §§ 5-8 malillugit taarsigassarsiat piginnittut nikinneranni akiligassanngortinneqassapput. Ingerlatseqatigiiffinni, peqatigiiffinni assigisaannilu pigisanik aalaakkaasunik piginnittuunissamik, attartortitsinissamik imaluunniit allatut ingerlatsinissamik pingaarnertut siunertaqartuni pigisanik, piginneqataassutinik, aktiaatinik assigisaannillu tunniussineq aammattaaq piginnittut nikinnerattut isigineqarpoq.

  Imm. 2. Piginnittut nikinnerini tamani kommunalbestyrelsip taarsigassarsisitsinerani taarsigassarsiat atsiorneqarnerisa angissusiata 15 %-iatut annertutigisumik piginnittut nikinnerannut akiliutissaq akilerneqartassaaq. Kommunalbestyrelsip taarsigassarsisitsineranik tigusinermut piumasarineqarpoq piginnittut nikinneranni akiliutip akilerneqarnissaa.

  Imm. 3. Atulernissaanut akuersissutip tunniunneqarnerata kingorna qaammatinik arfinilinnik kingusinnerusumik pisunut inissianik nutaatut sanaartorneqartunik tunisinermi taarsigassarsitinneqarnissamut neriorsuummik tunniussineq piginnittut nikinnerattut isigineqarpoq piginnittut nikinneranni akiliummik akiliisussaaffiusoq.

  Imm. 4. Piginnittut nikinnerini, pisisumit tiguneqartut taarsigassarsiat katinneri aamma niuernermi aningaasartuutit missiliussat tapiliunneri ilanngaatigalugit pisinermi akip 90 %-iinik annerpaamik aningaasartaqartut taarsigassarsiat kommunalbestyrelsip taarsigassarsiarititaasa ataqqissavai.

 

  § 11 a.  Inissiaq qularnaveeqqusiullugu taarsigassarsiat allanngortinneqarneranni aammalu piginnittut nikisinneqaratik tamanna pisimappat kommunalbestyrelsi taarsigassarsiaareersunut inissiap niuerfinni nalingata pisortani taarsigassarsiarineqartut inissiami qularnaveeqqusiinikkut qularnaarneqartut 90 %-iannik annerpaamik ilanngaaffiginerinut ataqqinninnermut tulleriiaarinermullu uppernarsaasinnaavoq.  Taamaattoq inissianut ukiut 20-t sinnerlugit pisoqaassusilinnut tunngatillugu taarsigassarsiaareersut inissiap niuerfinni nalingata 80 %-iannut annertussusilerneqarsinnaapput, matumani inissiami qularnaveeqqusiinikkut pisortani taarsigassarsiarineqartut inerneranni ilanngaateqarnikkut.

  Imm. 2.  Kommunalbestyrelsip ataqqinninnissamut tulleriiaarinermullu uppernarsaanissaani inissiami akiligassanngortunut allanut kingusinnerusukkullu akiligassanngortunut assinganik nukingisaarinissamut uppernarsaasoqarnissaanik piumasaqarfiupput.

  Imm. 3.  Inissiap pisoqaassusaa illuummut atuinissamut akuersissutaagallartumut ulluliunneqartoq atorlugu naatsorsorneqassaaq. 

  Imm. 4.  Inissiap massakkut niuerfinni nalinga illuutinut nalilersuinerit marluk agguaqatigiissitsinermut tunngasut illuutinut sullissisartunit ilisimasalinnit suliarineqartut atorlugit naatsorsuiffigineqassaaq, taakkualu illuutit aalaakkaasut najugaqarfissatut pisiarisarnerannut tuniniartarnerannullu suliaqassapput. Illuutinut nalilersuinerit piumasaqaatit pisarneq malillugu atorneqartut malillugit aamma nangaassuteqarnani, piumasaqaateqarnani imaluunniit inniminniinani aammalu piffissap qaammatit 3-6 iluani tunineqarsinnaanissaat naatsorsuutigalugu aningaasat atorlugit tunisinertut suliarineqassapput. Illuutinut nalilersuinerit ataqqinninnissamut tulleriiaarinissamut uppernarsaanissamut qinnuteqaatit sioqqullugit kingusinnerpaamik ullut qaammatisiuteqarfiusut 30-t qaangiutsinnagit suliarineqareersimassapput.

 

§ 12.  Kommunalbestyrelsip §§ 5-8 naapertorlugit taarsigassarsiarititai akiligassaatinneqassapput:

1) Erniat taarsigassarsialluunniit akilersuutit akilerneqanngippata, aamma illumi qularnaveeqqusiussaqarluni taarsigassarsinermi allagartaq naapertorlugu erniat akilersuutillu akilernissaat pillugu maleruagassat malillugit piffissaliussap naanissaa sioqqullugu akiligassanik akilinngisanik taarsigassarsisoq akiliisimanngippat, tak. qularnaveeqqut pillugu Kalaallit Nunaannut inatsit.

2) Taarsigassarsisoq inissiamik illersorneqarsinnaasumik aserfallatsaaliisimanngippat, paasineqarpallu kommunalbestyrelsip qularnaveeqqusiissutikkut qulakkeeriffigisaa taamaalilluni ajornerulersoq.

3) Taarsigassarsisup inissiaq ikuallattoornissamut illullu ajoqusersinnaaneranut sillimmasersimanngippagu.

4) Inissianik attartorneq pillugu inatsisartut peqqussutaanni attartortitsineq pillugu aalajangersakkanut akerliusunik inissiamik taarsigassarsisoq attartortitsippat.

5)  Inissiaq taarsigassarsisumut imaluunniit attartortumut taassumalu inoqutigiivinut najugaqarfissatut aammalu aalajangersimasumik najugassatut atornagu siunertanut allanut tamakkiisumik ilaannakortumilluunniit atorneqassaaq. Taamaattoq inuussutissarsiutit mikinerusut namminersortut taarsigassarsisumit imaluunniit attartortumit taassumalu inoqutigiivinit ingerlanneqartut mininneqarput.

6) Taarsigassarsisoq piginnittut nikinneri pillugu taarsigassarsisitsisumut nalunaaruteqanngitsoorpat aamma pisunik utoqqatsissutaasinnaasunik peqanngippat.
7) Piginnittut nikinnerini piginnittut nikinnerini akiliummik taarsigassarsisoq akiliinngitsoorpat.

  Imm. 2. Imm. 1, nr. 4 taamaaqataanik atorneqassaaq inissiaq inatsisitigut pisinnaatitaasumut pisussaatitaasumullu attartortinneqarpat.

 

Kapitali 3

Illunik pioreersunik iluarsaassinerit, pitsanngorsaanerit allilerinerillu

 

§ 13.  Kommunalbestyrelsiinissiat pioreersut iluarsaannerinut, pitsanngorsarnerinut allilerneqarnerinullu tassani aningaasartuutit tamarmiusut 40 %-ii tikillugit taarsigassarsisitsisinnaavoq taamaattorli annerpaamik 300.000 kr.-inik.

  Imm. 2. Inissiamut ataatsimut iluarsaassinernut, pitsanngorsaanernut imaluunniit allilerinernut ataasiaannarluni taarsigassarsisitsisoqarsinnaavoq.

  Imm. 3. Allilerinerup kingorna 110 m²-imik annertunerusumik angissuseqartunut inissianut allilerinermut taarsigassarsisitsisoqarsinnaanngilaq.

 

§ 14.  § 13 naapertorlugu taarsigassarsisitsinermut piumasarineqarpoq:

1) Inissiaq inissiamik piginnittumut, taassuma aappaanut imaluunniit meeqqanut inersimanngitsunut inissiatut atorneqassasoq.

2) Inissiaq piffissami qinnuteqarfiusumi ukiunik 20-inik pisoqaanerussasoq.

3) Inissiaq ikuallattoornissamut illullu ajoqusersinnaaneranut sillimmaserneqarsimassaaq aamma sillimmasiinermi akiliutissatigut kinguaattoortoqarsimanani.

  Imm. 2. Iluarsaassinermut, pitsanngorsaanermut allilerinermullu aningaasartuutit tamarmiusut sinnerinut taarsigassarsisoq nammineq aningaasalersuissappat taamaallaat taarsigassarsisitsisoqarsinnaavoq.

  Imm. 3.  Aappaasumut sanilliunneqarpoq nalunaarsorsimalluni aapparisaq, imaluunniit ukiuni 2-ini kingullerni inooqatigiissimappata, katissimanermut assingusumik inooqatigiinneq.

 

  § 15.  Inuulluarniutitut taaneqarsinnaasunut iluarsaassinernut imaluunniit pitsanngorsaanernut taarsigassarsisitsisoqarsinnaanngilaq.

 

  § 16. Inissiami qularnaveeqqusiussinikkut qulakkeerneqartumik taarsigassarsiatut ernialersorneqanngitsutut akilersugassaanngitsutullu taarsigassarsisitsisoqassaaq. Inissiami qularnaveeqqusiussinikkut taarsigassarsiaasinnaasut allat taarsigassarsinerup ataqqissavai.

 

§ 17.  Kommunalbestyrelsip taarsigassarsisitsinera, tak. § 13 piginnittut nikinnerini akiligassanngortinneqassaaq, aappariit akornanni piginnittut nikinneri eqqaassanngikkaanni aamma averusernermut imaluunniit avinnermut atatillugu piginnittut nikinneri imaluunniit kommunalbestyrelse allamik aalajangiisimanngippat.

 

§ 18.  Kommunalbestyrelsip taarsigassarsisitsinera tak. § 13 aamma akiligassanngortinneqassaaq:

1) Taarsigassarsisoq inissiamik illersorneqarsinnaasumik aserfallatsaaliisimanngippat, kommunalbestyrelsillu paasippagu kommunalbestyrelsip qularnaveeqqusiissutikkut qulakkeeriffigisaa taamaalilluni ajornerulersoq.

2) Taarsigassarsisup inissiaq ikuallattoornissamut illullu ajoqusersinnaaneranut sillimmasersimanngippagu.

3) Inissianik attartorneq pillugu inatsisartut peqqussutaanni attartortitsineq pillugu aalajangersakkanut akerliusunik inissiamik taarsigassarsisoq attartortitsippat.

4)  Inissiaq taarsigassarsisumit imaluunniit attartortumit taassumalu inoqutigiivinit najugaqarfiginagu aalajangersimasumillu najugaqarfiginagu siunertanut allanut tamakkiisumik ilaannakortumilluunniit atorneqarsimappat. Inuussutissarsiutit mikinerusut namminersortut taarsigassarsisumit imaluunniit attartortumit taassumalu inoqutigiivinit ingerlanneqartut taamaattoq mininneqarput.”Inissiami ininik inuussutissarsiornermut aaqqissuussisoqarsimappat imaluunniit inissiamiit inuussutissarsiummik ingerlatsisoqarpat. Inuussutissarsiutilli annikitsut namminersorfiusullu ilaanngillat.

5) Inissiaq taarsigassarsisitsisumut initut atorneqanngippat.

  Imm. 2. Imm. 1, nr. 3 taamaaqataanik atorneqassaaq inissiaq inatsisitigut pisinnaatitaasumut pisussaatitaasumullu attartortinneqarpat.

 

Kapitali 4

Illunik pioreersunik soraanermusialinnut pigineqartunik iluarsaassinerit

 

  § 19. Soraarnerussutisialimmit inissiatut atorneqartumut aamma soraarnerussutisiaqartoq taassumalu aapparisaa marluullutik inissiamik kisimiillutik pigineqartumut inissiamik pioreersumik iluarsartuussinermut kommunalbestyrelsi 300.000 koruunit tikillugit taarsigassarsisitsisinnaavoq.

  Imm. 2. Soraarnerussutisialimmit inissiatut atorneqartumi aamma soraarnerussutisiaqartup taassumalu aapparisaata marluullutik inissiami kisimiillutik pigisaanni inissiap iluata silaannaata radoneqassusianik annikillisaaniarnermut Kommunimi siulittaasut kr. 100.000 tikillugit taarsigassarsisitsisinnaapput.

  Imm. 3. Soraarnerussutisiaqartutut isigineqarput inuit utoqqalinersiuteqarsinnaatitaasut, siusinaartumik soraarnerussutisiaqarsinnaatitaasut imaluunniit tjenestemanditut soraarnerussutisiaqartut.

  Imm. 4. Aappaasumut sanilliunneqarpoq nalunaarsorsimalluni aapparisaq, imaluunniit ukiuni marlunni kingullerni inooqatigiissimappata, katissimanermut assingusumik inooqatigiinneq.

Imm. 5.  Ataatsikkut kapitali 3-mi aalajangersakkat naapertorlugit taarsigassarsititsisoqarlunilu imaluunniit kapitali 4 a-mi aalajangersakkat naapertorlugit tapiissuteqartoqarlunilu, kapitali manna naapertorlugu taarsigassarsititsisoqarsinnaanngilaq.

 

  § 20.  Inissiap atorneqarnerata imaluunniit atugaanerata allanngortinnissaanik siunertaqartunut imaluunniit kinguneqartunut imaluunniit inuulluarniutitut taaneqarsinnaasunut iluarsaassinernut pitsanngorsaanernullu taarsigassarsisitsisoqarsinnaanngilaq.

 

§ 21. § 19-imi, imm. 1 aamma 2 naapertorlugit taarsigassarsisitsinissami makkua piumasarineqarput:

1) Iluarsartuussinerup imaluunniit inissiap iluata silaannaata radoneqassusianik annikillisaaniarnerup aningaasalersornissaanut aningaaserivimmi imaluunniit illuummik qularnaveeqqusiilluni taarsigassarsisitsisarfimmi nalinginnaasumik piumasaqaatit malillugit taarsigassarsinissamut itigartitaasimaneq.

2) Inissiaq ikuallattoornissamut aamma illup ajoqusersinnaaneranut sillimmaserneqarsimanissaa aamma sillimmasiinermi akiliutissani kinguaattoortoqarsimannginnissaa.

3) Katissimallugu aappaasup inissiamik piginneqataasutut iluarsartuussinermut imaluunniit inissiap iluata silaannaata radoneqassusianik annikillisaaniarnermut kiisalu taarsigassarsinissamut akuersisimanissaa.

  Imm. 2 Inissiap iluata silaannaata radoneqassusissaanik Kalaallit Nunaanni Illuliornermut malittarisassani qaqugukkulluunniit atuuttuulluni killiliunneqartumik qaangiisimanissaa, § 19-imi imm. 2 naapertorlugu taarsigassarsisitsinissami aamma piumasaqaataavoq.

Imm. 3. Iluarsartuussinerup imaluunniit inissiap silaannaata radoneqassusianik annikillisaanissami tamakkiisumik aningaasartuutissat sinneri taarsigassarsitinneqartup nammineerluni aningaasalersussappagit taamaallaat taarsigassarsisitsisoqarsinnaavoq.

 

  § 22. Kapitali manna malillugu inissiami tamarmiusumi qularnaveeqqusiussinikkut qulakkeerneqartumik taarsigassarsiatut ernialersorneqanngitsutut akilersugassaanngitsutullu taarsigassarsisitsisoqassaaq. Inissiami qularnaveeqqusiussinikkut taarsigassarsiaasinnaasut allat taarsigassarsinerup ataqqissavai.

 

  § 23.  Kommunalbestyrelsip taarsigassarsisitsinera piginnittut nikinnerini akiligassanngortinneqassaaq, taarsigassarsisup taassumalu aappaata akornanni piginnittut nikinneri eqqaassanngikkaanni imaluunniit kommunalbestyrelse allamik aalajangiisimanngippat.

 

§ 24. Kommunalbestyrelsip taarsigassarsisitsinera tak. § 19 aamma akiligassanngortinneqassaaq:

1) Taarsigassarsisup inissiaq ikuallattoornissamut illullu ajoqusersinnaaneranut sillimmasersimanngippagu.

2) Inissiaq attartortinneqarpat.

3) Inissiaq soraarnermusiaqartumut initut atorneqanngippat.

4) Inissiaq taarsigassarsisup imaluunniit attartortup taassumalu inoqutigiivinut najugassatut aalajangersimasumillu najugaqarfissatut atornagu siunertanut allanut tamakkiisumik ilaannakortumilluunnit atorneqassaaq. Inuussutissarsiutit mikinerusut namminersortut inissiamik piginnittumit imaluunniit attartortumit taassumalu inoqutigiivinit ingerlanneqartut taamaattoq mininneqarput.

 

Kapitali 4 a

Iluarsaassinernut, pitsanngorsaanernut alliliinernulluunniit tapiissutit

 

§ 24 a. Inissianut, inunnit ukiuni akileraarfiusuni kingullerni marlunni inunnit ukiumut 300.000 koruunit inorlugit isertitaqarsimasunit pigineqartunut, imaluunniit inunnit, ulloq manna tikillugu isertitarisimasaat apeqqutaatinnagit siunissami qanittumi inoqutigiinni ukiumut 300.000 koruunit inorlugit isertitaqartussatut naatsorsuutigineqartunit pigineqartunut annerpaamik 150.000 koruuninik inissiamik iluarsaassinermut, pitsanngorsaanermut imaluunniit alliliinermut kommunalbestyrelsi tapiissuteqarsinnaavoq.

Imm. 2. Taamaallaat inissiamut Namminersorlutik Oqartussanit taarsigassarsisoqarsimappat, imaluunniit maanna piginnittuusut taarsigassarsisuullutik Namminersorlutik Oqartussanit taarsigassarsisoqarsimappat kommunalbestyrelsi tapiissuteqarsinnaavoq.

Imm. 3. Meeqqanut suli angerlarsimaffimmi najugaqartunut, 18-it inorlugit ukioqartunut, najukkami inuit nalunaarsorsimaffianni nalunaarsorsimasunut, taamaattorli amerlanerpaamik meeqqanut arfinilinnut, isertitassanut killigititat meeqqamut ataatsimut 4.000 koruuninik qaffanneqartassapput.

 

§ 24 b.  Piffissaq qinnuteqarfiusoq sioqqullugu qaammatit 60-it kingulliit ingerlanerini pisortat inissiamik iluarsaassinissamut, pitsanngorsaanissamut alliliinissamulluunniit tapiissuteqarsimappata, kommunalbestyrelsi tapiissuteqarsinnaanngilaq.

  Imm. 2. Inissianut sumiiffinni, nalinginnaasumik inissiaq qularnaveeqqusiullugu aningaaserivimmit imaluunniit realkreditimit taarsigassarsiviusinnaasuni inissisimasunut kommunalbestyrelsi tapiissuteqarsinnaanngilaq.

Imm. 3. Kommunalbestyrelsip § 24 a naapertorlugu qinnuteqaammik naliliinermini uku eqqarsaatigissavai:

1) iluarsaassinissap kissaatigisap annertussusissaa,

2) alliliinerup pitsanngorsaanerulluunniit qinnuteqartup pigisaanut nalilinnut aammalu nammineerluni suliaqarnissamut piginnaaneqarneranut sanilliunneqarnissaa, kiisalu

3) inissiap pisoqaassusia niuerutigineqarnermilu nalinga.
  Imm. 4. Naalakkersuisut inissiamik iluarsaassinermut, pitsanngorsaanermut alliliinermulluunniit maleruagassiorsinnaapput, taakkununngalu aqutsineq, aningasat tunniunneqarnerat suliassallu tapiiffigineqarsinnaatitaasut ilaatinneqarput.

 

  § 24 c. Inunnit ukiuni kingullerni marlunni akileraarusigassanik ukiumut kr. 300.000 inorlugit inoqutigiittut isertitaqarsimasunit imaluunniit inoqutigiit ulloq manna tikillugu isertitarisimasaat apeqqutaatinnagit siunissami qanittumi akileraarusigassanik ukiumut kr. 300.000 inorlugit isertitaqartussatut naatsorsuutigineqartunit inissiani pigineqartuni atorneqartunilu, inissiat iluisa silaannaasa radoneqassutsinik annikillisaaniarnernut kommunimi siulittaasut kr. 100.000 tikillugit tapiissuteqarsinnaapput. § 24 a-mi, imm. 3 assinganik atuuppoq.

  Imm. 2. Tapiissuteqarnissami piumasarineqarpoq:

1) inissiap iluata silaannaata radoneqassusissaanik Kalaallit Nunaanni Illuliornermut malittarisassani qaqugukkulluunniit killiliunneqartumik, inissiap iluata silaannaata radoneqassusisssaanik qaangiisimanissaa,

2) inissiap iluata silaannaata radoneqassusaanik annikillisaanissap aningaasalersornissaanut aningaaserivimmi imaluunniit illuummik qularnaveeqqusiilluni taarsigassarsisitsisarfimmi nalinginnaasumik piumasaqaatit malillugit taarsigassarsinissamut itigartitaasimaneq aamma

3) inissiaq ikuallattoornissamut illullu ajoqusersinnaaneranut sillimmaserneqarsimassaaq aamma sillimmasiinermi akiliutissanik akilinngitsuugaqarani.

  Imm. 3.  Inissiap silaannaata radoneqassusianik annikillisaanissami tamakkiisumik aningaasartuutissat sinnerinik qinnuteqartoq nammineq aningaasalersuissappat taamaallaat tapiissuteqartoqarsinnaavoq.

  Imm. 4. Inissiap silaannaata radoneqassusianik annikillisaanissami tapiissuteqarnissamut Naalakkersuisut maleruagassiorsinnaapput, taakkununngalu aqutsineq, aningaasat tunniunneqarnerat suliassallu tapiiffigineqarsinnaatitaasut ilaatinneqarput.

 

Kapitali 5

Ataatsimut aalajangersakkat

 

Taarsigassarsinissamut qinnuteqaatinik aqutsineq il.il.

 

§ 25.  Inatsisartut inatsisaat manna naapertorlugu suliamik suliarinninnermi aningaasartuutinut matussutissatut kommunalbestyrelsip taarsigassarsiarititat 0,5 procentiinik annertussuseqartumik akileeqqusisoqassaaq.

  Imm. 2. Piffissami taarsigassarsisup taarsigassarsiat tunniuteqqullugit kommunalbestyrelsimut qinnuteqarfigisaani taarsigassarsisup akitsuut kommunalbestyrelsimut akilissavaa. Taamaattoq taarsigassarsianik tunniussinermi akiliutissaq ilanngaatigineqassasoq, kommunalbestyrelsi aalajangersinnaavoq.

 

§ 26.  Kommunalbestyrelsiqularnaveeqqusiinermut allagartap atsiorneqarneranut atatillugu suliamik suliarinninnermut akitsuummik 1.250 kr.-inik akileeqqusisinnaavoq.

  Imm. 2. Kommunalbestyrelsi aningaaserivimmut ataatsimut amerlanerusulluunniit qularnaveeqqusiinermi allagartap atsiorneqarnissaanut kiisalu akitsuummik akileeqqusinissamut piginnaatitsissummik tunniussisinnaavoq.

 

§ 27.  Inissianik nutaanik sanaartornissamut qinnuteqaatit allakkatigut kommunalbestyrelsimut nassiunneqassapput.

  Imm. 2. Qinnuteqaammut ilanngunneqassapput:

1) Pilersaarummut nassuiaat inissiat amerlassusaannut inissiamullu ataatsimut inissiap annertussusaa pillugu paasissutissanik imaqartoq.

2) Sanaartornermi aningaasartuutinut tamakkiisunut missingersuutit.

3) Kommunalbestyrelsimiit nunaminertamik immikkoortitsineq imaluunniit nunaminertamik tunineqarneq.

4) Nammineerluni aningaasalersuutissat pissarsiarisimanerinut uppernarsaat, tak. § 9.

5) Qinnuteqartoq Inatsisartut inatsisaanni matumani imaluunniit inatsisini allani taarsigassarsiaqariinngitsoq uppernarsaat, takuuk § 1, imm. 3.

6) Qinnuteqartup inuup normua, CVR-normua, najugaqarnermut uppernarsaataa imaluunniit uppernarsaat alla kinaassutsimik erseqqissumik takutitsisoq.”

7) Qinnuteqartup pisortanut akiitsoqarnera pillugu Akiliisitsiniarnermut oqartussaniit nalunaarut.

  Imm. 3. Qinnuteqaatit nassiunneqartut tunngavigalugit qinnutigineqartut aningaasaliissutigineqarsinnaanersut kommunalbestyrelsi isummissaaq.

 

  § 28. Kapitali 3 aamma 4 naapertorlugit taarsigassarsitinneqarnissamik qinnuteqaat kiisalu kapitali 4 a naapertorlugu tapiiffigineqarnissamik qinnuteqaat allaganngorlugu kommunimi siulittaasunut nassiunneqassaaq.

  Imm. 2. Qinnuteqaammut ilanngunneqassapput:

1) Iluarsartuussinissamut, pitsanngorsaanissamut alliliinissamulluunniit kissaatigineqartumut nassuiaat.

2) Inissiaq pillugu nassuiaat, tassunga ilanngullugit pisoqaassusaa, angissusaa qanorlu pitsaassuseqarnera.

3) Suliassami aningaasartuutinut tamarmiusunut missingersuusiaq.

4) Sulineq pineqartoq nunaminertamik atugassinneqarnissamik pisariaqartitsippat kommunimi siulittaasunit nunaminertamik immikkoortitsineq imaluunniit nunaminertamik atugassinneqarneq.

5) Nammineq aningaasalersuisinnaanermut uppernarsaat.

6) Qinnuteqartup inuup-normua aamma najugaqarnermut allagartaq.

7) Inissiamut piginnittuuneq pillugu uppernarsaat.

8) Qinnuteqartup pisortanut akiitsoqarnera pillugu Akiliisitsiniarnermut oqartussaniit nalunaarut.

Imm. 3. § 19-imi imm. 2 naapertorlugu taarsigassarsitinneqarnissamik imaluunniit § 24 c naapertorlugu tapiiffigineqarnissamik qinnuteqaammut aamma ilanngunneqassapput:

1) Uuttuutit matoqqasut qassiunerinik, sumullu inissinneqarsimanerinik kiisalu piffissaq uuttortaaffiusoq pillugit paasissutissaq.

2) Misissueqqissaartarfimmit nalunaarusiaq.

3) Inissiap iluata silaannaata radoneqassusiata annikillisinneqarnissaanut sanaartukkanik immikkut ilisimasallip siunnersuuteqarluni allakkiaa.

  Imm. 4. Qinnuteqaatit nassiunneqartut tunngavigalugit taarsigassarsisitsisoqarsinnaanersoq imaluunniit tapiissuteqartoqarsinnaanersoq kommunimi siulittaasut isummissapput.”

 

  § 29. 25.000 kr.-it sinnerlugit pisortanut akiitsunik akilerneqartussanik akiliisimanngitsumut qinnuteqartumut taarsigassarsisitsinissamut kommunalbestyrelsi neriorsuuteqarsinnaanngilaq.

 

  § 30.  Taarsigassarsitinneqarnissamik imaluunniit tapiiffigineqarnissamik qinnuteqaat kommunimi siulittaasunit akuerineqarpat neriorsuut tunniunneqassaaq, tassanilu taarsigassarsiaritinneqartut imaluunniit tapiissutigineqartut annertussuserigallagassaat aammalu piumasaqaatit allassimassallutik.

  Imm. 2. Kommunimi siulittaasut taarsigassarsisitsineranni imaluunniit tapiissuteqarneranni aningaasaliissutaasunut tunngavigineqartuni aningaasartuutinut missingersuutini allanngortoqarpat, allannguinerlu taarsigassarsiat imaluunniit tapiissutit inaarutaasumik annertussusiinut sunniuteqarpat, qinnuteqartoq pisariaqanngitsumik kinguarsaanani tamanna kommunimi siulittaasunut nalunaarutigissavaa. Taamaattoqanngippat inaarutaasumik taarsigassarsiat imaluunniit tapiissutit neriorsuutigineqartunit annertunerulersinneqarsinnaanngillat.

 

  § 31. Taarsigassarsiat imaluunniit tapiissutit inaarutaasumik annertussusaat sanaartornermi inaarutaasumik naatsorsuutit tunngavigalugit naatsorsorneqassapput. Sanaartornermi inaarutaasumik naatsorsuutit suliamut attuumassuteqanngitsumit uppernarsarneqassapput.

  Imm. 2. Qinnuteqartup nammineq sulinerata nalinga aningaasartuutinut tamarmiusunut ilaassanngilaq, tak. imm. 1. Tamannali sanaartornerup iluani qinnuteqartoq ileqquusumik suliffeqarneranut atasumik qinnuteqartoq suliaqarpat atuutissanngilaq.

 

§ 32.  Inissiap sanaartorneqarnera, iluarsaanneqarnera, pitsanngorsarneqarnera allilerneqarneralu neriorsuutitut allakkiap tunniunneqarneraniit ukiut marluk iluanni aallartinneqareersimassaaq kiisalu ukiut pingasut iluanni naammassineqarsimallunilu atorneqalereersimassalluni. Taamaattoqanngippat neriorsuut siumoortumik nalunaarutigineqarani atorunnaarsinneqassaaq.

  Imm. 2. Taarsigassarsisoq neriorsuutitut allakkiap tunniunneqarneraniit ukiut marluk iluanni suliniut aallartinneqarsimanersoq imaluunniit aallartinneqarsimannginnersoq pillugu kommunalbestyrelsimut paasissutissanik nassiussissaaq.

  Imm. 3. Taarsigassarsisoq neriorsuutitut allakkiap tunniunneqarneraniit ukiut pingasut iluanni atuilernermut akuersissutip assilineranik kommunalbestyrelsimut nassiussissaaq.

  Imm. 4. Kommunalbestyrelsi immikkut pisuni piffissami killissarititaasut imm. 1-imi allassimasuniit immikkut akuersissuteqarsinnaavoq.

 

Taarsigassarsianik tapiissutinillu tunniussineq

 

§ 33.  Sanaartorneq, iluarsaassineq, pitsanngorsaaneq imaluunniit allilerineq naammassineqarpat aamma sanaartornermi naatsorsuutit uppernarsarneqarsimasut aamma qularnaveeqqusiussaqarluni taarsigassarsinermi allagartap uparuagassartaqanngitsup naqeqqaarneranik nalunaarsorneqarsimasup naqissuserneqarsimasullu kiisalu ikuallattoornissamut illullu ajoqusernissaanut sillimmasiisimanermut uppernarsaatip takutinneqarnerisigut taarsigassarsiat tunniunneqassapput. Taamaattorli aningaasaliissutit kommunalbestyrelsip missingersuusiatut akuerisaanni ukiumi ilanngunneqarfianni ukiumi siusinnerpaamik taarsigassarsiat tunniunneqarsinnaallutik.

  Imm. 2.  Sanaartukkanut naatsorsuutini aningaasartuutit tamarmiusut sananermut, iluarsaanermut, pitsanngorsaanermut alliliinermulluunniit atassutillit ilaatinneqassapput.  Sanaartukkanut naatsorsuutit kukkunersiuisartumit nalunaarsorneqartumit, kukkunersiuisumit naalagaaffimmit akuerisaasumit imaluunniit Kalaallit Nunaanni aningaaserivimmit uppernarsarneqarsimassapput.

 

  § 33 a.  Kommunalbestyrelsi § 33 apeqqutaatinnagu taarsigassarsiat kapitali 3-4-mi ilaasut tamakkiisumik ilaannakortumilluunniit ingerlaavartumik tunniuttarnissaanut aalajangiisinnaavoq aamma sulisimanermut atortussanullu tunniunneqartartut sanaartortitsisartumit akiligassiissutit naleqqussarnissaannut tunngatillugu.  § 34 allanngornani atuutiinnassaaq.

  Imm. 2.  Akiligassiissutip akilerneqarnissaa pillugu piumasaqarneq taarsigassarsisumit aamma sanaartugassanik suliassinneqartartumiit uppernarsaammik atsiukkamik ilallugu kommunalbestyrelsimut nassiunneqassaaq, tassanilu sulinerit atortussallu akiligassiissutitallit suliarineqarsimanerannut sanaartorfimmullu tunniunneqarsimanerannut sanaartortitsisartumit uppernarsaaneq ilanngunneqassaaq.

  Imm. 3.  Taarsigassarsisoqarnissaanut neriorsuutip suliarinera ilanngullugu suliarineqareerpat taarsigassarsisoq piaartumik aamma piffissaliussaq kommunalbestyrelsimit aalajangersagaq nallertinnagu uppernarsaatissanik § 33-mut ilaasunik pisariaqartinneqartunik nassiussissaaq.

  Imm. 4.  Imm. 3 naapertorlugu piffissaliussaq qaangerneqarsimappat taarsigassarsiat ingerlaannartumik akiligassanngortinneqassapput.

  Imm. 5.  Kommunalbestyrelsip immikkut pisoqarsimatillugu imm. 3 malillugu piffissaliussaq aalajangersarneqartoq sivitsuiffigisinnaavaa.

 

  § 34. Inatsisartut inatsisaat una naapertorlugu taarsigassarsiniartumut pisortanut akilerneqarsimanngitsunik akiitsoqartumut taarsigassarsiat tunniunneqarsinnaanngillat. Akiitsut akilerneqarsimanngitsut aaqqinnissaannut taarsigassarsiat Akiliisitsiniartarfimmut kommunalbestyrelsip tunniutissavai. Nuussineq imaluunniit eqqartuussivikkut malersuineq naapertorlugu taarsigassarsianit iluanaarutissat sinneri taarsigassarsisumut imaluunniit pisussaatinneqartumut tunniunneqassapput.

Imm. 2. Taarsigassarsiat tunniunneqarnissaat sioqqullugu kommunalbestyrelsi taarsigassarsisup pisortanut akiitsoqarnersoq pillugu Namminersorlutik Oqartussani Akiliisitsiniartarfimmit nalunaarummik pissarsiniassaaq.

 

  § 34 a. Inissiamik iluarsartuussineq, pitsanngorsaaneq, alliliineq imaluunniit inissiap iluata silaannaata radoneqassusianik annikillisaaneq naammassineqarpat aamma sanaartornermi naatsorsuutit uppernarsarneqarsimasut takutinneqarnerisigut kiisalu ikuallattoornissamut illullu ajoqusernissaanut sillimmasiisimanermut uppernarsaatip takutinneqarnerisigut, § 24 a aamma § 24 c naapertorlugit tapiissutit tunniunneqassapput. Taamaattorli aningaasaliissutit kommunimi siulittaasut missingersuusiatut akuerisaanni ukiumi ilanngunneqarfianni siusinnerpaamik tapiissutit tunniunneqarsinnaapput. Tapiissutit entreprenørimut suliaqartumut toqqaannartumik tunniunneqarnissaannik kommunimi siulittaasut aalajangiisinnaapput.

  Imm. 2. Alliliinermi tapiissutit tunniunneqarnissaanni atuilernissamut akuersissuteqarnissaq aamma piumasaqaataavoq.

 

Illup angissusia aamma kvadratmeterimut akit

 

§ 35.  Inissiap annertussusaa inissiami init tamarmik annertussusaattut naatsorsorneqassaaq, tak. imm. 2. Pequusiviit, quit, biilinut oqqussiviit, aneerasaartarfiit imaluunniit biilit unittarfii, illup silammut iigaasa avataaniittut imaluunniit inissiamit immikkoortillugit inissitat naatsorsuinermi ilanngunneqassanngillat, taakku oqorsarlugit inigisassatut atorneqassanngippata.

  Imm. 2. Inissiap annertussusaa imatut naatsorsorneqassaaq:

1) Naqqup ataani inissiap annertussusaa naqqup ataata silammut iigaaniit illup takissusaanut silissusaanullu amerlisitsilluni naatsorsuinikkut uuttorneqassaaq. Naqqup ataa tamakkerluni atorneqanngippat, inissiap annertussusaa illup iluani iikkat ininik immikkoortitsissutaasut qeqqaniit uuttuisoqassaaq. Init nateqanngitsut naqqi tamakkerlutik cementimik beton-imiluunniit qallerneqarsimasut uuttortaanermi ilanngunneqassanngillat.

2) Inissiap quleriinnerni init quleriinni nalinginnaasumiittut inissiami ataatsimi silami iikkamiit imaluunniit qaliata silataani iikkamiit, tak. nr. 3, aamma inissiap avinnerata qeqqaniit annertussuseq uuttorneqassaaq. Ilaqutariinnut arlalinnut inissiani uuttortaanermi illup isua iikkatut inissianut immikkoortitsissutaasutut affartut nalilerneqartarpoq. Qisuit qalliutaasut marluuppata ataatsip uuttorneqarnera qisuup alliup silataaniit uuttuisoqassaaq.

3) Qaliani inissiap annertussusaata naatsorsornerani, illup takissusaanut silissusaanullu amerlisitsilluni naatsorsuinikkut uuttuisoqassaaq. Takissuseq inissiap quleriivini nalinginnaasuni uuttuisarnertut uuttorneqassaaq, silissuserlu silami qaliat qalliutaasa qalipaa naqqaniit 1,5 meterinik portussuseqartut akornanni uuttorneqassalluni. Ilassutit, soorlu aniinganerit, iikkat inimut killiliissutaasut silataannit uuttorneqassapput.

  Imm. 3. Naqqup ataani qalianilu init imm. 2, nr. 1-imi aamma 3-mi taaneqartut aatsaat najugassatut ilusilersorneqarsimappata, init annertussusaat uuttortaanermut ilanngunneqassapput.

  Imm. 4. Init aalajangersimasumik nateqanngitsut uuttortaanermut ilanngunneqassanngillat, taamaattorli tak. imm. 5.

  Imm. 5.  Imm. 2-4 malillugit inissiap annertussusaata naatsorsuiffiginerani inissiami majuartarfinnut ilanngaateqartitsisoqassanngilaq. Torsuusat, majuartarfiit majuartarfiillu sangoriaat ataatsimoorussat, illup silammut iigaasa iluini inini kiassakkani inissisimasut angissusaannut naapertuuttumik uuttortaanermut ilanngunneqassapput, taamaattorli annerpaamik 11 kvadratmeterinik annertussusilerneqassallutik.

  Imm. 6.  Naalakkersuisut sanaartornermi iluserineqartut tulluartippassuk imaluunniit pisariaqartippassuk inissiap annertussusaanut imm. 2-5-imut saneqqutsisut naatsorsuiffiginissaannut akuersissuteqarsinnaapput.

 

§ 36.  Inissiap kvadratmeterimut akia inissiap sanaartornerani aningaasartuutit tamarmiusut inissiap initaanit tamarmiusunit agguarneqarnera tunngavigalugu naatsorsorneqassaaq.

 

Kapitali 6

Taarsigassarsiat inaarlugit akilerneqarneri

 

  § 37.  Taarsigassarsianut inissiat nutaat sanaartornissaannut tunniunneqartunut taarsigassarsisup piffissaq sioqqullugu akiliinerani akiitsunut sinneruttut qinnuteqarfiusumut kingullermik atuisunut akit naleqqersuutaanni qaammatini 12-ini allanngortumi 1 procentpointimik ilallugu kingullermik Naatsorsueqqissaartarfimmi naatsorsuiffiginera atorlugu qinnuteqarnerup aallartiffianut naapertuuttumik kingumut akiligassanngortinneqassapput. Akiitsut sinneri taarsigassarsisup allakkatigut inaarilluni akiliinissaq pillugu noqqaaneraniit aamma taarsigassarsiani piffissamut ernialersuiffiunanilu akilersuiffiusussaanngitsumut sinneruttumut kingumut naatsorsorneqassapput, taamaattorli taarsigassarsiat tunniunneqarneranniit siusinnerpaamik ukiunut tallimanut.

 

  § 37 a. Namminersorlutik Oqartussanut nunatsinnilu kommuuninut qularnaveeqqusiussaqarluni taarsigassarsititsinermut uppernarsaat aamma akiitsunut uppernarsaat illuliortiterneq pillugu Inatsisartut inatsisaat manna imaluunniit siusinnerusukkut inatsisaasut naapertorlugit tunniunneqartut kaaviiaartitsinermut, qularnaveequtitut imaluunniit akiliisitsisussamit malersorneqarnissamut atorneqarsinnaanngillat.

Kapitali 7

Atulernissaanut, atorunnaarsitsinermut ikaarsaarnermullu aalajangersakkat

 

§ 38. Inatsisartut inatsisaatulloq 1. januar 2018-imi atuutilissaaq.

  Imm. 2. Peqatigisaanik illuliortiternermi aningaasalersuineq pillugu Inatsisartut peqqussutaat nr. 1, 7. maj 2007-imeersoq atorunnaarsinneqarpoq.

 

  § 39.  Taarsigassarsiat aamma taarsigassarsinissamut neriorsuinerit, ulloq 1. januar 2018 sioqqullugu tunniunneqarsimasut imaluunniit nalunaarutigineqarsimasut piumasaqaatit allanngortinnagit ingerlatiinnarneqassapput.

  Imm. 2. Inatsisartut inatsisaanni matumani § 37-mi pineqarput inissianik nutaanik sanaartornermut taarsigassarsiat aamma taarsigassarsinissamut neriorsuineq 1. januar 2018-ip kingorna tunniunneqartut imaluunniit nalunaarutigineqartut.

 

  § 40. Qinnuteqartut, ulloq 1. januar 2018 sioqqullugu taarsigassarsinissaq pillugu neriorsorneqarsimasut taarsigassarsiallu tunniunneqarsimanatik, qinnuteqartoqarneratigut inatsisartut inatsisaanni matumani maleruagassat naapertorlugit taarsigassarsinissamut neriorsuummik nutaamik nalunaarfigineqarsinnaapput.

 

 

Inatsisartut inatsisaat nr. 36, 29. november 2019-imeersoq (Inissialiortiternermut tapiissutitalimmik illulianik iluarsaassinermut, pitsanngorsaanermut alliliinermullu taarsigassarsititsisarneq tapiissuteqartarnerlu)^[1] imatut atortuulersitsinermut aalajangersagaqarpoq:

 

§ 2

 

Inatsisartut inatsisaat 1. januar 2020-mi atuutilerpoq.

 

 

Inatsisartut inatsisaat nr. 19,  30. november 2020-meersoq (Nutaanik inissialiornissamut taarsigassarsiarititat taamaallaat inunnut taarsigassarsiaritinneqartassapput aammalu inuit inissiamut ataatsimut taamaallaat taarsigassarsisinnaallutik)^[2] imatut atortuulersitsinermut aalajangersagaqarpoq:

 

§ 2

 

Inatsisartut inatsisaat ulloq 1. januar 2021 atuutilerpoq.

  Imm. 2. Inissialiortiternernut aningaasalersuineq pillugu Inatsisartut inatsisaat imaluunniit inissialiortiternernut aningaasalersuineq pillugu siusinnerusukkut inatsisit naapertorlugu nutaanik inissialiornissamut taarsigassarsiat pioreersut, piginnittut nikinnissaasa tungaanut allannguuteqartinnagit ingerlatiinnarneqarput.

  Imm. 3. Ulloq 1. januar 2021 sioqqullugu inissialiortiternernut aningaasalersuineq pillugu Inatsisartut inatsisaat imaluunniit inissialiortiternernut aningaasalersuineq pillugu siusinnerusukkut inatsisit naapertorlugu nutaanik inissialiornissamut taarsigassarsititsinissamik neriorsuutit, pisussaaffiliisumik sanaartornissamut akigititassanut isumaqatigiissuteqartoqarsimanngippat, Inatsisartut inatsisaanni pineqartunut ilaatinneqarput.

  Imm. 4.  Ulloq 1. januar 2021 sioqqullugu nutaanik inissialiornissamut taarsigassarsititsinissamik neriorsuutit aammalu pisussaaffiliisumik sanaartornissamut akigititassanut isumaqatigiissuteqartoqareersimatillugu, atugassarititaasut allanngortinnagit ingerlatiinnarneqarput. Taarsigassarsisup isumaqatigiissuteqarfigisaanit taassuma isumaqatigiissuteqarfigisaanut piginnittut nikinneranni § 1, nr. 2 aamma 3 atuutissapput.

 

 

Inatsisartut inatsisaat nr. 28, 13. juni 2023-meersoq (Radoneqassutsimik annikillisaanissamut taarsigassarsisitsineq tapiissuteqarnerlu)^[3] imatut atortuulersitsinermut aalajangersagaqarpoq:

 

§ 2

 

Inatsisartut inatsisaat tamanna 2023-mi juulip aallaqqaataani atuutilissaaq.

 

 

Inatsisartut inatsisaat nr. 54, 25. november 2024-meersoq (Tulleriiaarinissamut uppernarsaaneq, sanaartortitsinernut naatsorsuutit, kaaviiaartitsinissamut inerteqqut, piffissaq sioqqullugu taarsigassarsianik akiliineq il.il.)^[4]

 

§ 2

 

Inatsisartut inatsisaat ulloq 1. januar 2025 atuutilissaaq.

  Imm. 2.  Inatsisartut inatsisaanni Illuliortiternermut aningaasalersuisarneq pillugu Inatsisartut inatsisaat imaluunniit illuliortiternermut aningaasalersuisarnerit pillugit siusinnerusukkut inatsisaasimasut naapertorlugit taarsigassarsiat pioreersut Naalakkersuisunit kommunalbestyrelsimiillu tunniunneqartut ilaapput, taamaattoq imm. 4 takuuk.

  Imm. 3.  Inatsisartut inatsisaanni Illuliortiternernut aningaasaliisarneq pillugu Inatsisartut inatsisaat imaluunniit illuliortiternernut aningaasalersuisarneq pillugu siusinnerusukkut inatsisaasimasut naapertorlugit ulloq 1.januar 2025 sioqqullugu taarsigassarsinissamut neriorsuinerit Naalakkersuisunit kommunalbestyrelsimiillu nalunaarutigineqartut pioreersut ilaapput.

  Imm. 4. Taarsigassarsiat allannguutissatut siunnersuutip atuutilernissaa sioqqullugu siusissukkut akilersinniarnissaat pillugu qinnuteqaat § 37 atuussimasoq tunngavigalugu suliarineqassaaq aalajangiiffigineqarlunilu, taamaattoq ukiut tallimat aatsaat qaangiutereernerisigut.

 

 

 

 

Ineqarnermut, Attaveqaasersuutinut Isorliunerusunullu Naalakkersuisoqarfik, ulloq april-ip 16.-at, 2025

 

 

Ruth Lindhardt (atsior.)

Naalakkersuisoqarfimmi pisortaaneq

 

 

/ Embla Kristjánsdóttir (atsior.)

 

 

[1] Inatsimmi allannguutit ukuupput § 1, § 2, § 3, § 24 a aamma § 24 b.

[2] Inatsimmi allannguutit ukuupput § 9, § 9 a aamma § 9 b, § 11, imm. 1., § 27, imm. 2-mi nr. 5-7.

[3] Inatsimmi allannguutit ukuupput § 19, § 21, § 24 c, § 28, § 30, § 31, § 33 sioqqullugu qulequtaq, § 34 a.

[4] Inatsimmi allannguutit ukuupput § 1, imm. 2, § 11a, § 12, imm. 1, nr. 5, § 18, imm. 1, nr. 4, § 24, imm. 1, nr. 4, § 27, imm. 1, nr. 6, § 33 a, § 33 a imm. 2, § 33 a imm. 3, § 33 a imm. 4, § 33 a imm. 5, § 35, imm. 5, § 35, imm. 6, § 37, § 37 a.