Kalaallit Nunaata erfalasua pillugu Inatsisartut inatsisaanni nr. 6, 11. juni 1985-imeersumi § 2 naapertorlugu aalajangersarneqarput:

  § 1.  Pisortatigoortumik ullut erfalasulerfissat, matumani kalaallit erfalasuata Erfalasutta pisortat illorsuini tamani amuneqarfissai ilanngussaq 1 naapertorlugu aalajangersarneqarput.

  Imm. 2.  Ilanngussaq 2 naapertorlugu ulluni erfalasulerfissani aalajangerneqartuni Erfalasorput allamik taarserneqarsinnaavoq taarserneqassallunilu.

  § 2.  Erfalasoq siusinnerpaamik nal. 6:00 kingusinnerpaamillu nalunaaqutaq 9:00 amuneqassaaq aamma siusinnerpaamik nalunaaqutaq 17:00 kingusinnerpaamillu nalunaaqutaq 20:00 peerneqassaaq.

  § 3. Ulluni erfalasulerfinni erfalasoq qummut apissillugu amuneqassaaq, taamaattorli imm. 2 aamma 3 takukkit.

  Imm. 2.  Tallimanngortumi tannaartumi erfalasoq qiteqqusimassaaq, ullormi ulloq erfalasulerfissaq alla nalliunnersoq apeqqutaatinnagu.

  Imm. 3.  Ullormi Danmarkip tiguagaaffiani, ulloq 9. april, erfalasoq nalunaaquttap 12.00 tungaanut qiteqqullugu amuneqassaaq, kingorna qummut apissillugu amuneqassaaq, taamaattorli imm. 2 takuuk.

  § 4. Nalunaarummi matumani ullut allat erfalasulerfiusartut, assersuutigalugu ilagiinni nalliuttut imaluunniit pisut nalinginnaasumik erfalasulisaarfiusartut mattunneqanngillat.

  § 5. Nalunaarut manna 1. aggusti 2025 aallarnerfigalugu atuutilissaaq.

  Imm. 2. Peqatigisaanik Ullut erfalasulerfissat pillugit Namminersornerullutik Oqartussat nalunaarutaat nr. 26, 11. november 2008 atorunnaarsinneqarpoq.

Namminersorlutik Oqartussat, ulloq 11. juuli 2025

Jens-Frederik Nielsen (atsio.)

Naalakkersuisut Siulittaasuat

/ Simigaq Broberg (atsio.)