Nioqqutissanik eqqussuineq annissuinerlu pillugit Inatsisartut inatsisaat nr. 18, 30. oktober 1992-imeersumi § 11, imm. 2, § 17, imm. 1 aamma imm. 2, § 18, imm. 2, § 35, imm. 1, aamma § 46, imm. 6, naapertorlugit aalajangersarneqarput:

Tikinneq

  § 1.  Tikinnertut nunanit allanit tikinnermut atatillugu akitsuuteqarfimmut inuttut tikinnertut paasineqassaaq, tassani Danmark Savalimmiullu ilanngullugit.
  Imm. 2.  Tikinnermi angalasup nioqqutissat tulliuttutut amerlassusillit nassarlugilluunniit pisiarisinnaavai:
1)  Arlaat:
a)  Sikaritsit 200-t, imaluunniit
b)  sikaat 50-it, imaluunniit
c)  cigarillot 100-t, imaluunniit
d)  tupat 250 g, imaluunniit
e)  sukuluut snusilluunniit 250 g.
2)  imusivissat immeriaannaalluunniit 200-t.
3)  imigassat kimittuut 22 procentimik qaffasinnerusumik aalakoornartortalik imaluunniit hedviinni 2,25 liiteri 15 aamma 22 procentit akornanni aalakoornartortalik.
4)  viinni nerriseq 2,25 liiteri 15 procent inorlugu aalakoornartortalik.
5)  immiaaqqat 2 liiteri.
6)  imeruersaatit kulsyrillit 2 liiterit imaluunniit imeruersaatit koffeinitallit liiterimut 150 mg-mit annertunerusumik koffeinitallit.
7)  imeq imigassaq 1 liiteri.
8)  sukkulaatinit mamakujuttunillu nioqqutissiat katillugit 4 kg.
9)  savaaqqap savalluunniit neqaat katillugit 5 kg.
  Imm. 3.  Inuit 18-inik ukioqalereersimasut kisimik tupanit nioqqutissianik, imigassanik kimittuunik, viinninik immiaaqqanillu akitsuuteqanngitsunik eqqussisinnaapput.

  § 2.  Nioqqutissanik § 1, imm. 2-mi taaneqartuni akitsuuteqanngitsunik tuniniaaneq mittarfinni niuertarfinnit, taamatut tuniniaasinnaanermut Akileraartarnermut ingerlatsivimmit akuersissuteqartuni taamaallaat pisinnaavoq.

  Imm. 2. § 1, imm. 2-mi taaneqartutut nioqqutissanik akitsuuteqanngitsunik tuniniaaneq, akileraartarnermut ingerlatsiviup akuersineratigut onlinikkut inniminniisarneq aqqutigalugu pisinnaavoq, kingornalu avataanit tikittumit nioqqutissat mittarfimmi boksimiittut, taamaallaat angalasup kode ammarsinnaasaa atorlugu aasinnaavai.

  Imm. 3.  Akileraartarnermut ingerlatsivik imm. 1 aamma imm. 2 malillugu akuersissutinik tunniussinermini § 1, imm. 2, § 3, imm. 1 aamma § 4, imm. 1-imi nioqqutissat taaneqartut eqqunneqarnerannut nakkutilliinermut sunniuteqartumut atugassarititaasut erseqqinnerusut aalajangersarsinnaavai.

Assartuutini sulisut

  § 3.  Umiarsuarni timmisartunilu sulisut (assartuutini sulisut), umiarsuarni timmisartunilu nunat tamat akornanni ingerlaartuni sulisut, assartuutillu ingerlanneqarnerani tassaniluunniit sullissinermik suliaqartut, Kalaallit Nunaata avataani ullut unnuallu 15-init sivikinnerusumik uninngareernermi, uku nassarsinnaavaat:
1)  Arlaat:
a)  Sikaritsit 60-it, imaluunniit
b)  sikaat 40-t, imaluunniit
c)  cigarillosit 50-it, imaluunniit
d)  tupat 250 g, imalluunniit
e)  snusit 250 g sukuluulluunniit,
2)  hedviinni 2,25 liiteri imaluunniit viinni nerriseq 2,25 liiteri.

  Imm. 2.  Ullut unnuallu 15-ini ataqatigiissuni sivisunerusumik Kalaallit Nunaata avataaneereerluni tikinnermi, assartuinermi sulisut § 1-imi malittarisassat malillugit nioqqutissanik nassarsinnaapput.

Imartani atortuni/sanaartukkani sulisut

  § 4.  Imartani atortuni/sanaartukkani, tassani qilleriviit misissueqqaarnernut, ujarlernernut aatsitassanillu kulbrintinilluunniit qalluinermi suliaqartut, akitsuuteqarfimmi nunamut niunerminnut atatillugu uku arlaat nassarsinnaavaat.:
1)  Sikaritsit 60-it, imaluunniit
2)  sikaat 40-t, imaluunniit
3)  cigarillosit 50-it, imaluunniit
4)  tupat 250 g, imalluunniit
5)  snusit 250 g sukuluulluunniit,
  Imm. 2.  Akitsuuteqanngitsunik niuersinnaanermi sioqqutsisumik minnerpaamik ullut unnuallu 15-it ataqatigiissuni akitsuuteqarfiup avataaniissimanissaq piumasaqaataavoq.
  Imm. 3.  Imm. 1 malillugu akitsuuteqanngitsitsineq taamaallaat nioqqutissanut akitsuuteqarfiup avataani pisianut atuuppoq.

Nunani allamiut aalisariutaat

  § 5.  Nunat allamiut, tassani Savalimmiormiut qallunaallu ilanngullugit, aalisariutaanni Kalaallit Nunaata imartaani aalisartuni aammalu umiarsuarni Kalaallit Nunaata imartaaniinnerminni nioqqutissanik akitsuuteqanngitsunik nassataqarnissaminnut akuerineqarsimasuni, umiarsuup inuttaanut ataatsimut ullormut unnuamullu ataatsimut amerlanerpaamik ulluni 28-ni ataqatigiissuni naatsorsuullugu nassarneqarsinnaapput viinni 1 literi, imaluunniit hedviinni 0,5 literi, imaluunniit imigassaq kimittooq 0,25 literi, imaluunniit immiaaqqat 2 literit aamma tupanit nioqqutissiat 40 g.
  Imm. 2.  Umiarsuarni inuttaasut, imm. 1 naapertorlugu nioqqutissanik akitsuuteqanngitsunik pissarsisimasut, akitsuuteqarfiusumit aallarnissartik pissutigalugu umiarsuarmit niusimasut nioqqutissanik akitsuuteqanngitsunik § 3-mi annertussusissamut aalajangersakkat annertoqataannik, nassataqarsinnaatitaapput.
  Imm. 3.  Imm. 1 malillugu umiarsuarmut nioqqutissanik nassarneqartunik akitsuuteqanngitsitsineq taamaallaat nioqqutissanut akitsuuteqarfiup avataani pisianut atuuppoq.

Takornariat nunani allamiut umiarsuaannut ilaasartaatiniittut

  § 6.  Takornariat nunat allamiut, tassani Savalimmiormiut qallunaallu ilanngullugit,  umiarsuaannut ilaasartaatinut ilaasut umiarsuup Kalaallit Nunaata imartaaniinnerani akitsuuteqanngitsunik atugaqarsinnaatitaapput.
  Imm. 2.  Takornariat, imm. 1 naapertorlugu akitsuusigaanngitsumik atugaqartut, nioqqutissanik akitsuusigassanik allanik nunaliaasseqqusaanngillat, taamaallaat tupanit, sukkulaatinit aamma mamakujuttunit nioqqutissiat, nammineq atugassat. Kalaallit Nunaat aqqusaarlugu angerlamut aallarnermi takornariat § 1 naapertorlugu nioqqutissat akitsuuteqanngitsut nassarsinnaavaat.
  Imm. 3.  Imm. 1 naapertorlugu akitsuuteqannginnissaq taamaallaat nioqqutissanut, umiarsuup akitsuuteqarfiusup avataani pisiarisimasaanut, atuuppoq.

Akitsuuteqartitsinnginnermut tunngaviit

  § 7.  §1 aamma §§-it 3 - 6 malillugit akitsuusiinnginnissamut piumasaqaataavoq pisiat inuup nammineq nassassagai angalanermiluunniit nassataminnut ilanngullugit nassassagai, taamaalilluni pisiat Akileraartarnermut ingerlatsivimmut takutinneqarsinnaaqqullugit.

Nakkutilliineq

  § 8.  Suliffeqarfiit § 2, imm. 1, naapertorlugu tikittunut akitsuuteqanngitsunik nioqqutissanik tuniniaasinnaanermut akuersissuteqartut, imigassanik aalakoornartortalinnik, kiisalu tupanik nioqqutissianik tunisinerminnut atatillugu, angalasoq nunanit allanit tikinneranut uppernarsaatitut boardingkortimik takutitsinissaa piumasarissavaat.

  § 9.  § 2, imm. 2 naapertorlugu, suliffeqarfiit tikittunik internetikkut inniminniikkanik akitsuuteqanngitsunik tuniniaanissamut akuersissuteqartut, imigassanik aalakoornartortalinnik kiisalu tupanik nioqqutissianik tunisinermi, angalasoq nioqqutissanik inniminniinermini pisinerminilu atiminik angalanermullu paasissutissanik tunniussinissaa piumasarissavaat, tassani timmisartup normua ullorlu ilanngullugu.

  § 10.  Angalasut tamarmik, tassani nunatsinni angalasut ilanngullugit, mittarfimmiinnerminni qinnuigineqarnerminni boardingkortimik atorsinnaasumik takutitsissapput.

Pineqaatissiissutit

  § 11.  Kalaallit Nu­naanni pinerluttulerinermik inatsimmi maleruagassat naapertorlugit akiliisitsinermik pineqaa­tissinneqarsinnaavoq:

1)  § 1, imm. 2, § 3, imm. 1, § 4, imm. 1, § 5, imm. 1 aamma imm. 2, imaluunniit § 6, imm. 2, oqaaseqatigiit aappaanni taaneqartunit nioqqutissanik akitsuusigassaatitaasunik akuerisanik amerlanernik eqqussisoq.

2)  § 1, imm. 3, § 2, imm. 1 aamma 2, § 5, imm. 1, § 6, imm. 2, oqaaseqatigiit siulliit, § 8 imaluunniit § 9-mik unioqqutitsisoq.

3)  § 2, imm. 3 naapertorlugu aalajangersakkanik unioqqutitsisoq.
  Imm. 2.  Imm. 1-imi taaneqartutut unioqqutitsisoqarneratigut imaluunniit unioqqutitseriartoqaraluarneratigut akiliisitsinermik pillarneqaatissiilluniluunniit akiliisitsisoqanngikkaluartoq nioqqutissaq, taannaluunniit peqanngippat taassuma aningaasanngorlugu nalingata amerlaqatai, Kalaallit Nunaanni pinerluttaalisitsinermik inatsimmi malittarisassat malillugit arsaarinnissutigineqarsinnaapput.
  Imm. 3.  Imm. 1 malillugu akiliisitsinerit Nunatta Karsianut nakkartinneqartassapput.
  Imm. 4.  Imm. 2 malillugu arsaarinnissutit Nunatta Karsianut nakkartinneqartassapput.

Atuutilerfik

  § 12.  Nalunaarut una ulloq 27. november 2024 atuutilissaaq.
  Imm. 2.  Tamatumunnga peqatigitillugu tikinnermi nioqqutissanik akitsuuteqanngitsunik eqqussisinnaaneq pillugu nalunaarut nr. 6, 13. marts 2023-meersoq atorunnaarsinneqarpoq.

Kalaallit Nunaanni Namminersorlutik Oqartussat, ulloq 19. november 2024

Erik Jensen (atsior.)
Aningaasaqarnermut Akileraartarnermullu Naalakkersuisoq

 / Nikolai S. Christensen (atsior.)