Eqqumiitsuliornermik ingerlatsineq pillugu Inatsisartut inatsisaanni nr. 11, 6. juni 2016-imeersumi § 8 a, imm. 4 aamma § 8 b, imm. 4 naapertorlugit, kingullermik Inatsisartut inatsisaatigut nr. 33, 13 juni 2023-meersutigut allanngortinneqartumi aalajangersarneqarpoq:

Ataqqinaammik tunniussinissamut piumasaqaatit

  § 1.  Ataqqinaammik tunniuttakkat eqqumiitsuliortup eqqumiitsuliornermini pilersitaasa pitsaassusiisa naliliiviginerisigut tunniunneqartassapput. Naliliinermi piumasaqaatit uku tunngavigineqassapput:

1) Inuttut pigiliussineq; Eqqumiitsuliornermi pilersitat inuttut pigiliunneqarsimanissaat aamma takunnittoq misigissutsinik, eqqarsaatinik isumassarsianillu annertuunik imminnut akerleriittunik misissuinissamut periarfissillugu immikkut ittuunissaat.

2) Paasinninneq; Eqqumiitsuliornermi pilersitat inuit akornanni, inuiaqatigiinni nunarsuarmilu paasinnitsitsisinnaanissaat, atassuteqartitsisinnaanissaat ataatsimoortitsisinnaanissaallu.

3) Alapernaanneq; Eqqumiitsuliornerup silarsuarmut alapernaassuseqarnermik tunngaveqarnera aamma 

isumassarsianut, oqaluttuarisaanermut, piffissamut inuuffigisamut timitigullu atugassarititaasunut atatillugit eqqarsaasersorsinnaanera.

4) Nutaanik isumaliorneq; Eqqumiitsuliortup isumassarsiat, eqqarsaasersuutit isiginnittariaatsillu eqqarsaatigalugit nutaanik isumaliorsinnaassuseqarnera, taamalu nutaanik paasisaqartitsillunilu nutaanik misilittagaqartitsisinnaanera.

5) Eqqumiitsuliortarnermik ineriartortitsineq; Eqqumiitsuliap ilusaata, imaata oqaasertaliussaatalu akornanni erseqqissumik ataqatigiittoqarnera, tassani eqqumiitsuliortutut saqqummiussami eqqumiitsuliamut atatillugu immikkut "oqariartuuteqarneq" sunniiniarnerlu aamma sammisamik nutarterineq pillugit sapiissuseqarnera ilisimaarinninneralu.

  Imm. 2.  Kalaallit Nunaanni eqqumiitsuliornermut aningaasaateqarfimmi siulersuisut ataqqinaammik tunniussisinnaanerup nalilersorneqarnissaanut immikkut malittarisassaliorsinnaapput, tassunga ilanngullugu eqqumiitsulioriaatsit ataasiakkaat iluini eqqumiitsuliat pitsaassusaannik naliliinissamut aalajangersimasunik malittarisassaliorsinnaallutik.

Eqqumiitsulioriaatsit assigiinngitsut ataqqinaaserneqarsinnaasut

  § 2.  Ataqqinaammik tunniussassat sisamat eqqumiitsulioriaatsit iluanni agguataarneqarsimasut, Inatsisartut inatsisaanni nr. 11 6. Juni 2016 Eqqumiitsuliornermik ingerlatsineq pillugu inatsimmi allassimasut naapertorlugit. 

  Imm. 2. Eqqumiitsuliornermut Aningaasaateqarfiup qulakkiissavaa, ataqqinaammik tunniuttakkat siammarsimanissaa eqqumiitsulioriaatsit arfineq marluusut iluanni imm. 1 naapertorlugu. Ataqqinaammik tunniussisoqartassaaq ataatsimik eqqumiitsulioriaatsip ataatsip iluani.

Isertitat naapertorlugit annertussusiliineq

  § 3.  Ataqqinaammik tunniussassat Eqqumiitsuliornermik ingerlatsineq pillugu Inatsisartut inatsisaanni tunniunneqartartunut aningaasat tunngaviusut naapertorlugit annertussusilerneqassapput.

  Imm. 2.  Eqqumiitsuliortut ataqqinaammik tunniussat saniatigut ukiumut 450.000 kr.-nik taakkuluunniit inorlugit isertitaqarsimasut ataqqinaammik tunniussat aningaasartaat tamarmiusut tigussavaat.

  Imm. 3.  Eqqumiitsuliortut ataqqinaammik tunniussat saniatigut ukiumut 450.000 kr.-nik taakkuluunniit sinnerlugit isertitaqarsimasut tunniussassat ukiumut minnerpaartaannik 125.000 kr.-usunik tunineqassapput.

  Imm. 4.  Imm. 2 aamma 3-mi aningaasatigut killiliussat aamma imm. 3-mi minnerpaamik tunniunneqartussat Procenti aaqqiissutissaq aamma maannakkorpiaq aningaasarsiat pillugit Inatsisartut inatsisaanni malittarisassat malillugit ukiunut aningaasanut inatsiseqarfiusunut tamanut iluarsineqartassapput.

  Imm. 5.  Eqqumiitsuliortup imm. 2-mit 3-mut isertitai taaneqartut Isertitat pillugit Inatsisartut inatsisaat naapertorlugit eqqumiitsuliortup akileraartussaatitaalluni isertitarai akileraartussaatitaasup isertitai ilanngullugit naatsorsuutigalugit aalajangersakkat qaqugukkulluunniit atuuttut naapertorlugit. Ataqqinaammik tunniussassat akileraartarnermut oqartussat inaarutaasumik ukiumoortumik naatsorsuutaat tunngavigalugit ukiut tamaasa ulloq 1. oktober naatsorsorneqartassapput. Akileraarutit pillugit paasissutissat eqqumiitsuliortup nammineerluni Nunatsinni Eqqumiitsuliornermi Aningaasaateqarfiup allattoqarfianut nassiutissavai.

Atuutilersitsineq

  § 4.  Nalunaarut atuutilissaaq ulloq 1. november 2024.

Namminersorlutik Oqartussat, ulloq 29. oktober 2024

Aqqaluaq B. Egede (atsior.)

Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq

/ Nuka Kleemann (atsior.)