Eqqumiitsuliornermik ingerlatsineq pillugu Inatsisartut inatsisaanni nr. 11, 6. juni 2016-imeersumi, kingullermik Inatsisartut inatsisaatigut nr. 25, 28. november 2019-imeersutigut aamma Inatsisartut inatsisaatigut nr. 33, 13 juni 2023-meersutigut allanngortinneqartumi, § 16 a, imm. 2 aamma 3 naapertorlugit aalajangersarneqarpoq:

 

Kapitali 1

Siunertaq, atorneqarfissaa aamma suliassat

 

  § 1.  Kalaallit Nunaanni Eqqumiitsuliornermut Aningaasaateqarfiup siunertaraa siuarsassallugit Kalaallit Nunaanni eqqumiitsuliornikkut ingerlatsineq, aamma kalaallit nunani allani eqqumiitsuliornikkut ingerlatsinerat, sapinngisamillu qularnaarniassallugu innuttaasut siamasissumik aamma tamatigoortumik kalaallit eqqumiitsuliaannik eqqumiitsuliornikkullu ingerlatsinerannik periarfissaqarnissaat, aamma eqqumiitsuliornikkut  nunani allaneersunik periarfissaqartinneqarnissaat.

 

  § 2.  Kalaallit Nunaanni Eqqumiitsuliornermut Aningaasaateqarfiup ingerlatsinerani ilaapput eqqumiitsuliornermik ingerlatsinerit tamakkiisut, Inatsisartut eqqumiitsuliornernut inatsisaanni ilaasut..

 

  § 3.  Kalaallit Nunaanni Eqqumiitsuliornermut Aningaasaateqarfiup suliassaraa ataqqinaammik tunniuttakkanik tunniussinissaq ukununngalu tapiissuteqarnissaq:

1)  eqqumiitsuliornermik ingerlatsinerup ingerlanneranut, tamatumunnga ilanngullugit angalanernut aningaasartuutit matussusernissaannut aamma ineqarnermut aningaasartuutinut,

2)  eqqumiitsuliorluni suliat inerisarnerinut suliarinerinullu, tamatumunnga ilanngullugit eqqumiitsuliornermik ingerlatsinermut atortussat aamma

3)  eqqumiitsuliornermik ingerlatat saqqummersinnissaannut siammaannissaannullu.

  Imm. 2.  Suliassat allat suliassat isumaginerinut attuumassuteqartut, matumani ilanngullugit eqqumiitsuliornermik ingerlatsineq pillugu apeqqutini siunnersuineq aningaasaateqarfiup suliarisinnaavai.

  Imm. 3.  Takussutissatut katersugaateqalernissaq inillu tamanit tikinneqartartut pinnersarnissaat siunertaralugit kalaallit eqqumiitsuliaannik pisiortornissamut inniminniinissamulluunniit tunngatillugu aningaasaateqarfiup naalakkersuisoqarfimmik siunnersuinissaa pillugu Kultureqarnermut Naalakkersuisoqarfik aningaasaateqarfimmut qinnuiginnissinnaavoq.

 

Kapitali 2

Aningaasaateqarfiup siulersuisui

 

  § 4.  Kalaallit Nunaanni Eqqumiitsuliornermut Aningaasaateqarfik siulersuisunit tallimanik ilaasortalimmit aqunneqarpoq.

  Imm. 2.  Siulersuisut ataatsimoorlutik eqqumiitsuliorneq, tapiissutinik aqutsineq pillugit ilisimasaqassapput kiisalu aningaasaqarnikkut, aqutsinikkut inuussutissarsiornikkullu piginnaaneqassallutik.

  Imm. 3.  Siulersuisut ataatsimut sinniisuuffigisassaanni ilaasortat ataasiakkaat tamarmik suliassaqarfimmi arlariinniluunniit piginnaaneqartuussapput.

  Imm. 4.  Siulersuisuni ilaasortat aalajangersimasumik Kalaallit Nunaanni najugaqassapput.

 

  § 5.  Kultureqarnermut Naalakkersuisoq siulersuisuni ilaasortanik ukiunut sisamanut atasussanik toqqaassaaq. Kattuffinnit aamma ingerlatsivinnit assigiinngitsunit inassuteqaateqartoqareerneratigut toqqaasoqassaaq, taakku tamarmik siulersuisuni ilaasortassamik ataatsimik inassuteqaateqassapput, kisiannili Eqqumiitsuliortut kattuffiat EPI siulersuisuni ilaasortassanik pingasunik inassuteqaateqassalluni:

1)  Sulisitsisut.

2)  Eqqumiitsuliortut kattuffiat EPI.

3)  Katuaq.

  Imm. 2.  Siulersuisuni ilaasortat ataasiarlutik toqqaqqinneqarsinnaapput.

  Imm. 3.  Siulersuisut inissitsiternerminni siulittaasoq siulittaasullu tullia toqqassavaat.

 

  § 6.  Siulersuisuni ilaasortap ataatsip toqqagaaffiup iluani tunuarneratigut, piffissap sinnerani siulersuisuni ilaasortaasussamik nutaamik Kultureqarnermut Naalakkersuisoq toqqaassaaq. Tamanna pissaaq kattuffiup imaluunniit ingerlatsiviup inassuteqarsinnaatitaasup ilaasortaajunnaartumik toqqaasimasup inassuteqareerneratigut.

  Imm. 2.  Toqqagaaffiup iluani siulersuisuni ilaasortaq siulersuisutut akisussaaffimminik annertuumik sumiginnaasoq, allatulluunniit siulersuisutut sulinissaminut naapertuutinngitsumik iliuuseqartoq Kultureqarnermut Naalakkersuisup soraarsissinnaavaa.

 

  § 7.  Siulersuisut aningaasaateqarfiup sulineranut pingaarnertigut najoqqutassanik aalajangersaassapput. Aningaasaateqarfiup atuunnermini ammasuunissaa paasiuminartuunissaalu siulersuisut qulakkiissavaat.

  Imm. 2.  Aningaasaateqarfiup sulinera pillugu Kultureqarnermut Naalakkersuisoqarfimmut ukiumoortumik siulersuisut nalunaarusiortassapput. Nalunaarut tamanut saqqummiunneqartassaaq.

  Imm. 3.  Ukiumoortumik nalunaarummi siulersuisut ukiumut tapiissutit nassuiartassavaat, uku malillugit:

1)  eqqumiitsuliortut kinaassusii oqaatigineqartut sorliit ataqqinaammik tunniuttakkamik tunineqarnersut,

2)  eqqumiitsuliornermut sammisaq aalajangersimasoq, eqqumiitsuliortumut nersorinnissutaasoq,

3)  eqqumiitsuliortup nersornaammik tunineqarneranut tunngaviusoq, aamma

4)  aningaasat ataqqinaammik tunniussinermi tunniunneqartut amerlassusaat tamakkiisoq.

  Imm. 4.  Ukiumoortumik nalunaarummi siulersuisut ukiumut tapiissutit nassuiassavaat, imatut agguaanneqassalluni:

1)  eqqumiitsulioriaatsit ataasiakkaat,

2)  tapeeriaatsit ataasiakkaat,

3)  pissarsisup najugaa, kommunikkaartumik naatsorsorlugu,

4)  pissarsisup suiaassusaa,

5)  pissarsisup ukiui, ukiut akuttussusaat naleqquttut naatsorsorlugit,

6)  nutaat siusinnerusukkullu aningaasaateqarfimmit tapiissutinik pissarsisut, aamma

7)  nutaat siusinnerusukkullu aningaasaateqarfimmit tapiissutinik itigartinneqarsimasut.

  Imm. 5.  Tamatuma saniatigut aningaasaateqarfimmi aningaasaqarnermut sulisoqarnermullu pissutsit nalunaarummi nassuiarneqassapput.

 

  § 8.  Siulersuisut namminneq suleriaasissartik Kultureqarnermut Naalakkersuisoqarfimmit akuerineqartussaq aalajangersassavaat.

  Imm. 2.  Suleriaatsimi malittarisassat ilaat makku ilaassapput: 

1)  Ataatsimiittarnerit,

2)  taasinernut malittarisassat,

3)  attuumassuteqarpallaannginnissamut tunngasut,

4)  nipangiussisussaatitaaneq,

5)  ullut ataatsimiiffiusut amerlassusaat, kiisalu 

6)  imaqarniliortarneq.

 

  § 9.  Kalaallit Nunaanni Eqqumiitsuliornermut Aningaasaateqarfiup siulersuisui sulinerminnut ukiumoortumik akissarsisarput. Siulittaasup akissarsiai 50.000 kr.-upput. Ilaasortat sinnerisa akissarsiaat 25.000 kr.-upput. Akissarsiat qaammatikkaartumik kingumoortumik tunniunneqartassapput, ukiumut aqqaneq-marloriarluni tunniunneqartassallutik.

  Imm. 2.  Siulersuisuni ilaasortaq qaammatip ingerlanerani ilaasortanngussappat siulersuisuni ilaasortap ullut atuuffii aallaavigalugit ullormut akissarsiaqassaaq, akissarsiat § 1-imi aningaasat amerlassusiisa taaneqartut 1/365-erutaannik. Taamatut assinganik atuuppoq siulersuisuni ilaasortaq qaammatip ingerlanerani ilaasortaajunnaarpat.

  Imm. 3.  Akissarsianut aningaasartuutit aningaasaateqarfiup akilissavai.

 

Aningaasartuutinik taartisiaqarneq

 

  § 10.  Aningaasartuutit, taakkununnga ilanngullugit angalanernut, nerisaqarnermut najugaqarnermullu aningaasartuutit, Kalaallit Nunaanni Eqqumiitsuliornermut Aningaasaateqarfiup sulinerani akilerneqartut Kalaallit Nunaanni Namminersorlutik Oqartussani tjenestemandinut malittarisassat qaqugukkulluunniit atuuttut naapertorlugit siulersuisuni ilaasortat aningaasartuutaanut taarsiissutaasassapput. Taakku aningaasaateqarfimmit akilerneqassapput.

 

Allattoqarfik

 

  § 11.  Aningasaateqarfiup sulineranut allattoqarfeqarnikkut ikiuuttoqarnissaa sulisunik imaluunniit allatut iliorluni tassunga atorfinitsitsinikkut siulersuisut qulakkiissavaat.

  Imm. 2.  Atorfinitsitaanerni atugassarititaasut pissutsillu allat,

atorfinitsinneqarnermi soraarsitsinernilu pissutsit eqqarsaatigalugit Kalaallit Nunaanni Eqqumiitsuliornermut Aningaasaateqarfiata pisussaaffigaa aalajangersakkat Namminersorlutik Oqartussani atorfeqartunut qaqugukkulluunniit atuuttut malissallugit.

 

Kapitali 3

Suliamik paasisimasallit

 

  § 12.  Siulersuisut eqqumiitsulioriaatsinut tamanut suliamut paasisimasalimmik sinniisussamillu ataatsimik ukiuni marlunni atuuffeqartussanik toqqaassapput, ukunani: 

1)  Illussanik titartaaneq,

2)  assilissanik eqqumiitsuliorneq,

3)  filmiliorneq,

4)  assassukkanik eqqumiitsuliat ilusilersuinerlu,

5)  atuakkiorneq,

6)  nipilersorneq, aamma

7)  isiginnaartitsineq.

  Imm. 2.  Tamatumunnga suliamik paasisimasalik sinniisussaalu kalaallit eqqumiitsuliaannut aammalu suliamik paasisimasallip eqqumiitsulioriaatsimut aalajangersimasumut sammisaanut ilisimasaqangaatsiassapput.

  Imm. 3.  Suliamik paasisimasallit ataasiarlutik toqqaqqinneqarsinnaapput.

 

  § 13.  Siulersuisut suliamik paasisimasallit ataatsimoorlutik inassuteqaataat tunngavigalugu aamma Ataqqinaammik tunissutisisitsisarneq tunniuttakkallu isertitat naapertorlugit annertussusilerneqartarnissaat pillugit Namminersorlutik Oqartussat nalunaarutaat naapertorlugu ataqqinaammik tunniuttakkamik tunniussissapput.

  Imm. 2.  Suliamik paasisimasallit arfineq-marluusut ataatsimoorlutik nalilersussavaat, piukkunnaatillit kikkut ataqqinaammik tunniuttakkamik tunineqarsinnaanersut. Suliamik paasisimasallit arfineq-marluusut ataatsimoorlutik siulersuisunut inassuteqaasiussapput. Inassuteqaat piukkunnaatillit akornanni salliutitat tulleriaarneqarnerannik kiisalu piukkunneqartut tamarmik sooq inassutigineqarnersut pillugu tunngavilersuummik imaqassaaq. Suliamik paasisimasallit arfineq-marluusut akornanni isumaqatigiinngitsoqarpat, piukkussatut inassutigineqartut tamarmik taasissutigineqarnerisa agguataarneqarsimanerat allanneqassaaq.

  Imm. 3.  Suliamik paasisimasallit inassuteqaataannut siulersuisut pisussaaffeqanngillat.

 

  § 14.  Siulersuisut suliamik paasisimasallit inassuteqaataat tunngavigalugu aamma Eqqumiitsuliornermik ingerlatsineq tamatuminngalu ingerlatitseqqittarneq pillugit Namminersorlutik Oqartussat nalunaarutaat naapertorlugu tapiissuteqassapput.

  Imm. 2.  Suliamik paasisimasallit eqqumiitsulioriaatsimi ilisimasaminni tapiiffigineqarnissamik qinnuteqaatinik tiguneqartunik nalilersuissapput, tamannalu tunngavigalugu tapiissutinik tunniussinissaq, tassunga ilanngullugu tapiissutit suunissaat, angissusissaat piffissarlu killilik pillugit siulersuisunut inassuteqaasiussallutik.

  Imm. 3.  Suliamik paasisimasallit inassuteqaataannut siulersuisut pisussaaffeqanngillat.

 

  § 15.  Suliamik paasisimasallit akornanni ataqatigiissaarinissaq siulersuisut qulakkiissavaat.

 

  § 16.  Piffissami atuuffiusumi suliamik paasisimasalik tunuarpat, eqqumiitsulioriaatsimut pineqartumut sinniisussaq suliamik paasisimasalittut ilaasortanngussaaq. Matuma kingorna siulersuisut sinniisussamik nutaamik toqqaassapput.

  Imm. 2.  Piffissami atuuffiusumi sinniisoq tunuarpat siulersuisut sinniisussamik nutaamik toqqaassapput.

  Imm. 3.  Suliamik paasisimasalik pineqartoq ilatsiinnarpallaarpat imaluunniit suliap ingerlannissaanut allatut qanoq iliuuseqarnermigut imminut naleqqukkunnaarsimappat tamatuminnga Siulersuisut soraarsitsisinnaapput.

 

  § 17.  Suliamik paasisimasalik attuumassuteqarnermi imaluunniit sivisuumik napparsimanermi kinguneranik qinnuteqaammik suliarinnissinnaanngippat, eqqumiitsulioriaatsimi pineqartumi qinnuteqaat sinniisup suliarissavaa.

 

  § 18.  Suliamik paasisimasallit sinniisuilu Kalaallit Nunaanni Eqqumiitsuliornermut Aningaasaateqarfimmit tapiiffigineqarnissamik qinnuteqaammik ataatsimik suliaqarnerit tamaasa akissarsisassapput.

  Imm. 2.  Tamatuma saniatigut suliamik paasisimasallit sinniisullu Kalaallit Nunaanni Eqqumiitsuliornermut Aningaasaateqarfimmit qinnuiginnittoqarneratigut, ataqqinaammik tunniuttakkanik tunniussinissamik inassuteqaasiornerit tamaasa akissarsiat imm.1-imi taanneqartumi akissarsisassapput. Akissarsiassat annertussusissaat Eqqumiitsuliornermut Aningaasaateqarfimmi siulersuisunit aalajangerneqassapput.

  Imm. 3.  Suliamit paasisimasalinnut sinniisuinullu akissarsiaannut aningaasartuutit Eqqumiitsuliornermut Aningaasaateqarfimmit akilerneqassapput.

 

Kapitali 4

Aningaasaliineq, missingersuut, naatsorsuutit kukkunersiuinerlu

 

  § 19.  Eqqumiitsuliornermut Aningaasaateqarfiup sulinera Nunatta Karsiata ukiut tamaasa tapiissuteqarneratigut aningaasalersorneqassaaq.

  Imm. 2.  Eqqumiitsuliornermut Aningaasaateqarfik kingornussanit tunissutisianilluunniit isertitanik pissarsiaqarsinnaavoq.

  Imm. 3.  Eqqumiitsuliornermut Aningaasaateqarfik avataaniit tapiissutinik qinnuteqarsinnaavoq.

 

  § 20.  Kalaallit Nunaanni Eqqumiitsuliornermut Aningaasaateqarfimmi siulittaasut ukiumut aningaasanut inatsiseqarfiusumut tullermut Kultureqarnermut Naalakkersuisoqarfimmit piffissalerneqartumik missingersuutinut siunnersuummik ukiut tamaasa Kultureqarnermut Naalakkersuisumut tunniussaqartassapput.

  Imm. 2.  Siunnersuummut imm. 1 malillugu ilaassapput isertitassatut aningaasartuutissatullu ilimagisaasut missingersuusiorneri. Ilutigisaanik siulersuisut Nunatta karsiata ukiumi aningaasaliiffiusumi tullermi tapiissutaasa annertussusissaattut siunnersuut saqqummiutissavaat.

 

  § 21.  Kalaallit Nunaanni Eqqumiitsuliornermut Aningaasaateqarfiup ukioq naatsorsuusiorfia tassaavoq ukioq aningaasanut inatsisiliorfik. 

  Imm. 2.  Kommunit Namminersorlutillu Oqartussat missingersuutaat naatsorsuutaallu pillugit Inatsisartut Inatsisaat naapertorlugu Kalaallit Nunaanni Namminersorlutik Oqartussat missingersuutit, naatsorsuuserineq naatsorsuutinillu saqqummiineq pillugit malittarisassai qaqugukkulluunniit atuuttut Eqqumiitsuliornermut Aningaasaateqarfiup malissavai.

 

  § 22.  Ukiumoortumik naatsorsuutit Kalaallit Nunaanni Namminersorlutik Oqartussat kukkunersiuisoqarfiannit kukkunersiorneqassapput.

  Imm. 2.  Piffissaliussaq Kultureqarnermut Naalakkersuisoqarfimmit aalajangerneqartoq tikitsinnagu, ukiumoortumik naatsorsuutit kukkunersiorneqarsimasut siulersuisunit akuerineqarsimasut kukkunersiuisut oqaaseqaataannik ilaqartillugit, siulersuisunit Kultureqarnermut Naalakkersuisoqarfimmut akuersissutigisassatut saqqummiunneqartassapput. Kultureqarnermut Naalakkersuisup ukiumoortumik naatsorsuutit tamatuma kingorna Inatsisartunut ilisimatitsissutitut ingerlateqqissavai.

  Imm. 3.  Kultureqarnermut Naalakkersuisumit naatsorsuutit akuerineqarsimasut siulersuisunit tamanut saqqummiunneqassapput.

 

Kapitali 5

Atuutilersitsinermut atorunnaarsitsinermullu aalajangersakkat

 

  § 23.  Nalunaarut una atuutilerpoq ulloq 1. november 2024.

  Imm. 2.  Peqatigitillugu Kalaallit Nunaanni Eqqumiitsuliornermut Aningaasaateqarfik pillugu Namminersorlutik Oqartussat nalunaarutaat nr. 43, 13. august 2021-meersoq atorunnaarpoq.

 

 

Namminersorlutik Oqartussat, ulloq 29. oktober 2024

 

 

Aqqaluaq B. Egede (atsior.)

Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq

 

 

/ Nuka Kleemann (atsior.)