§ 1 

Piginneqatigiilluni inissiat pillugit Inatsisartut inatsisaanni nr. 33, 23. november 2017-imeersumi, Inatsisartut inatsisaatigut nr. 19, 27. november 2018-imeersutigut allanngortinneqartumi makku allanngortinneqassapput: 

1. § 8, imm. 5 imatut oqaasertalerneqassaaq:
”  Imm. 5.  Imm. 2-4 malillugit inissiap annertussusaata naatsorsuiffiginerani inissiami majuartarfinnut ilanngaateqartitsisoqassanngilaq. Torsuusat, majuartarfiit majuartarfiillu sangoriaat ataatsimoorussat, illup silammut iigaasa iluini inini kiassakkani inissisimasut angissusaannut naapertuuttumik uuttortaanermut ilanngunneqassapput, taamaattorli annerpaamik 11 kvadratmeterinik annertussusilerneqassallutik.”

2. § 8-mi imm. 6-tut ilanngunneqassaaq:
”  Imm. 6.  Naalakkersuisut inissiap annertussusaanut sanaartornermi iluserineqartut tulluartippassuk imaluunniit pisariaqartippassuk imm. 2-5-imut saneqqutsisut naatsorsuiffiginissaannut akuersissuteqarsinnaapput.”

3. Immikkoortumut qulequtaq ”Taarsigassarsititsinissamik neriorsuuteqarneq” sioqqullugu 10-p kingorna ilanngunneqassaaq:
”  § 10 a. Namminersorlutik Oqartussanut nunatsinnilu kommuninut qularnaveeqqusiussaqarluni taarsigassarsititsinermut allagaq aamma akiitsunut uppernarsaat illuliortiterneq pillugu Inatsisartut inatsisaat manna imaluunniit siusinnerusukkut inatsisaasut naapertorlugit tunniunneqartut kaaviiaartitanut, qularnaveeqqusiisarnernut imaluunniit akiliisitsisussamit malersorneqarnissamut atorneqarsinnaanngillat. ”

4. § 13, imm. 2 imatut oqaasertalerneqassaaq:
”  Imm. 2.  Taarsigassarsiat annertussusissaat sanaartukkanut naatsorsuutit inaarutaasut tunngavigalugit naatsorsorneqassapput. Sanaartornermut naatsorsuutini piginneqatigiilluni inissiat sanaartornerannut atasumik aningaasartuutinngortut tamarmik ilanngunneqassapput.  Sanaartukkanut naatsorsuutit kukkunersiuisartumit nalunaarsorneqartumit, kukkunersiuisumit naalagaaffimmit akuerisaasumit imaluunniit Kalaallit Nunaanni aningaaserivimmit uppernarsarneqarsimassapput.”

5. § 22, imm. 2 imatut oqaasertalerneqassaaq:

”  Imm. 2.  Neriorsuutitut allakkiap suliarineqarnerani ulluliunneqartumit ukiut marluk qaangiutsinnagit sanaartugassaq aallartinneqarsimanersoq, aallartinneqarsimannginnersorluunniit pillugu sanatitsisoq kommunalbestyrelsimut paasissutissanik nassitsissaaq. Sanaartugassaq aallartinneqarsimassappat, tamanna pillugu sanatitsisup uppernarsagaanik, sumiiffimmilu kommunimi teknikkimut ingerlatsiviup uppernarsagaanik uppernarsaat ilanngullugu nassiunneqassaaq.”

6. § 22, imm. 4, imatut oqaasertalerneqassaaq:

”  Imm. 4.  Neriorsuutitut allakkiap suliarineqarnerani ulluliunneqartumit ukiut pingasut qaangiutsinnagit kommunalbestyrelsimit atuilernissamut akuersissutip assilinera sanatitsisup nassiutissavaa.”

7. Kapitali 4-p kingorna ilanngunneqassaaq:

”Kapitali 4 a

Namminersorlutik Oqartussat kommunillu inissiaataat attartortittakkat piginneqatigiilluni inissiatut allanngortinneqassapput

§ 45 a.  Naalakkersuisut imaluunniit kommunalbestyrelsip illuutip attartortittakkap pioreersup piginneqatigiilluni inissiatut najugassanngorlugu allanngortinnissaanut aalajangiisinnaapput. Allanngortitsinissaq illuutit attartortittakkat pioreersut Naalakkersuisut imaluunniit kommunalbestyrelsip piginneqatigiilluni inissiaatillit peqatigiiffiannut pilersinneqartumut ataatsimut tunisinikkut pissaaq.

  Imm. 2.  Naalakkersuisut imaluunniit kommunalbestyrelse piginneqatigiilluni inissiaatillit peqatigiiffianni inissianut tamanut atuinissamut pisinnaatitaaffik atorlugit piginneqataasutut ilaalissapput.

  § 45 b.  Naalakkersuisut imaluunniit kommunalbestyrelsi allanngortitsisoqarnissaanut aamma piginneqatigiilluni inissiaatillit peqatigiiffiata pilersinneranut atasumik pisortat innaallagissamik, imermik, kiassarnermik aqqusersuutinillu pilersuinerannut illuutinik attartortitsisoq piginneqatigiillunilu inissiaatillit peqatigiiffiat aalajangiinissamut pisussaaffeqalernissaannik, tassungalu piumasaqaatinik aalajangersaasarnissamik, peqqusinnaavai.

  § 45 c.  Naalakkersuisut imaluunniit kommunalbestyrelsi illuliortiternernut ilisimasalimmik atorfinitsitsissapput, taannalu illuutinut attartortittakkanut qanoq issusermut nalunaarusiamik suliaqassaaq. Naalakkersuisut imaluunniit kommunalbestyrelsi sulianut ilisimasalimmik kimulluunniit attuumassuteqanngitsumik atorfinitsitsissapput, taannalu illuutit attartortittakkap niuerfinni naleritinneqartumik naatsorsuissaaq.

  Imm. 2. Qanoq issutsinut nalunaarusiat, niuerfinnilu naleritinneqartumik naatsorsuinissaq pillugit Naalakkersuisut malittarisassanik aalajangersaasinnaapput.

  § 45 d.  Illuutit attartortittakkat pioreersut piginneqatigilluni inissiaatillit peqatigiiffiannut tunineranni pisinermi akia tamarmi piumasaqaatillu allat Naalakkersuisunit imaluunniit kommunalbestyrelsimit aalajangersarneqassapput. 

  Imm. 2.  Illuut attartortittagaq niuerfinni akigitinneqartoq atorlugu tunineqassaaq, taamaattoq inissiaq tamakkerlugu minnerpaamik 7.000 kr./m²-imut akeqassaaq. Naalakkersuisut Inatsisartut Aningaasaqarnermut Akileraartarnermullu Ataatsimiititaliaata akuersissuteqarneratigut illuut attartortittagaq akigitinneqartumit minnerpaaffiusumit akikinnerutillugu tunisinnaavaat. Kommunalbestyrelsi Naalakkersuisut akuersissuteqarnerisigut illuut attartortittagaq akigitinneqartumit minnerpaaffiusumit akikinnerutillugu tunisaqarsinnaavoq.

  § 45 e.  Naalakkersuisut kommunalbestyrelsillu piginneqatigiilluni inissiaatillit peqatigiiffiata illuummik attartortittakkanik inissiartaqartumik tigusineranut atatillugu, atugassarititaasut sukumiinerusumik isumaqatigiissutaareersut tunngavigalugit piginneqatigiilluni inissiaatillit peqatigiiffiannit ininik attartornissamut pisinnaatitaaffeqarnissani piumasarisinnaavaat. Taamatuttaaq tigusinermi attartortut allalluunniit illuummut tunngatillugu atuisinnaatitaasut, tassunga ilaallutik inuussutissarsiutinik ingerlatsinissamik pisinnaatitaaffeqartut, tigusinermi pisinnaatitaaffeqarnerisa atuutiinnarnissaat piumasarineqarsinnaavoq.

  § 45 f.  Naalakkersuisut imaluunniit kommunalbestyrelsi illuummik attartortittakkamik Naalakkersuisunit imaluunniit kommunalbestyrelsimit piginneqatigiilluni inissiaatillit peqatigiiffiata pisineranut taarsigassarsititsissapput. §§ 3-10 assinganik atorneqarput, taamaattoq takuuk imm. 2.

  Imm. 2.  Pisortat taarsigassarsiarititaanni imm. 1 naapertorlugu taarsigassarsiaritinneqartuni, taarsigassarsianut tigusinerup nalaani aserfallatsaaliuisoqarsimannginnerata uppernarsarneqartup iluarseqqinnissaanut aningaasalersornissaanullu piginneqatigiilluni inissiaatillit peqatigiiffiannit taarsigassarsiarineqartunut tunngatillugu, akilersorneqartussat tulleriinnilersorneranni nikisitsinissaq uppernarsaaserneqassasoq, Naalakkersuisut imaluunniit kommunalbestyrelsip akuerisinnaavaat, takuuk § 45c.

  Imm. 3.  Naalakkersuisut imaluunniit kommunalbestyrelsi piginneqatigilluni inissiaatillit peqatigiiffiani inissianut piginneqataaffiusunut immikkut nammineerluni aningaasaliissutissanik akiliuteqassapput.

  § 45 g.  Piginneqatigiilluni inissiaatillit peqatigiiffiannut inissiamut akitsuummut inissianut piginneqatigiiffimmut atuinissamut pisinnaatitaaffimmut ilaasumut aalajangersaaffigineqartumut piginneqatigiilluni inissiaatillit peqatigiiffiat Naalakkersuisunut imaluunniit kommunalbestyrelsimut akiliisitsiniassapput.

  § 45 h.  Piginneqatigiilluni inissiat kapitalimut uunga ilaasut allanngortitsisoqareernerata kingorna piginneqatigiilluni inissiaatillit attartortuinut pioreersunut tuniniarnissaat neqeroorutigineqassaaq. Piginneqatigiilluni inissiat inoqanngitsut imaluunniit inoqarunnaartut tuniniarnissaat neqeroorutigineqassaaq. 

  Imm. 2.  Naalakkersuisut imaluunniit kommunalbestyrelsip piginneqatigiilluni inissiamik tunisinerini akeq anguneqarsinnaasoq pitsaanerpaaq atorlugu, taamaattoq tak. imm. 3, aammalu massakkut inatsisartut inatsisaat atuuttoq peqatigiiffiullu ileqqoreqqusai naapertorlugit piginneqatigiilluni inissiaatillit peqatigiiffiat aqqutigalugu pissaaq. Taamaattoq piginneqatigiilluni inissiaatillit peqatigiiffiat piginneqatigiilluni inissiap attartortumut pioreersumut tunineqarnissaanut akerliusinnaanngilaq. 

  Imm. 3.  Piginneqatigiilernermi pisinermi akia tamarmiusoq minnerpaamik Naalakkersuisut imaluunniit kommunalbestyrelsip nammineerluni akiliutigisimasaasa naleqqatigissavaa. Inissiaatillit peqatigiiffiata piginneqatigiilluni inissianik tigusineranit qaammatinit aqqaneq-marlunnit kingusinnerusumit piginneqataassutsimik tunisinermi Naalakkersuisut imaluunniit kommunalbestyrelsip nammineerluni akiliutimi 20%-ia tikillugu akikilliliissuteqarluni piginneqataassutsinik tunisisinnaavoq.

  Imm. 4.  Piginneqatigiilluni inissiaatillit peqatigiiffiat pissutissaqarnani uninngaqqaarnani piginneqataassutinik tuniniaasinnaavoq. Piginneqatigiilluni inissiaatillit peqatigiiffiat piginneqataassutinut inummik pisisussamik takutitsisinnaanngippat, piginneqatigiilluni inissiaatillit peqatigiiffiata piginneqataassut tamanut tunisassanngorlugu pilerisaarutigissavaa.

  § 45 i.  Naalakkersuisut imaluunniitkommunalbestyrelsi piginneqatigiilluni inissiap inoqanngitsup tuniniarnissaanik pinngitsoortitsisinnaapput inissiarlu piginneqataaffigineqartoq allamut attartortilerlugu. Attartortitseqqinneq piginneqatigiilluni inissiap tuninissaa piginneqatigiilluni inissianut, inissianut pigisanut aamma inissianut  nammineq pigisanut sumiiffimmi pineqartumi niuerfinni akigitinneqartunut malunnaatilimmik ajortumik sunniuteqarsinnaanera ilimanarsimappat pisinnaavoq. 

  Imm. 2. Allamut attartortitsineq taamaallaat atugassarititaasut piffissamut killiligaasut tunngavigalugit aammalu qaammatit 12-ikkaarlugit pissaaq, qaammatit 6-ikkaarlugit sivitsuisarnissaq periarfissaqarluni. §§ 63-65 taamaaqataanik atuutissapput.

  Imm. 3. Attartortitseqqinnermik isumaqatigiissummik sivitsuisoqartinnagu piginneqataassutsip tunineqarnissaanut periarfissat Naalakkersuisut imaluunniit kommunalbestyrelsip nutaamik naliliiffigissavaat.

  § 45 j.  Attartortoq, inigisaminik attartortittakkamik piginneqatigiilluni inissiatut tigusinissamik kissaateqanngitsoq, inissiamini attartortittakkami najugaqaannarsinnaavoq.

  Imm. 2.  Naalakkersuisut imaluunniit kommunalbestyrelsi piginneqataasutut, attartortup piffissami attartorfiusumi iliuuseqarnerinut, iliuuseqannginnerinut aamma aalajangiinerinut allanut, piginneqatigiilluni inissiaatillit peqatigiiffiannut tunngatillugu, akisussaasuuvoq. Attartortoq § 65 malillugu nammineerluni pisinnaatitaaffimminik killilersuiffigineqarnissaa pillugu allakkatigut ilisimatinneqassaaq. 

  Imm. 3.  Attartortumut inissiami najugaqaannartumut ineqarnermut akiliut Namminersorlutik Oqartussat kommunillu inissiaataannut attartortikkanut ineqarnermut akiliutit naatsorsortarnissaannut malittarisassat nalinginnaasut qaqugumulluunniit atuuttut malillugit aammalu inissiat attartortittakkat pillugit inatsisit qaqugumulluunniit atuuttut malillugit aalajangersarneqassapput.

  Imm. 4. Piginneqatigiilluni inissiaatillit peqatigiiffiata ileqqoreqqusaani aalajangersakkat attartortumut illuummi najugaqaannartumut atuutiinnassapput.”

8. § 49, imm. 4 ima oqaasertalerneqassaaq:

”  Imm. 4.  Imm. 1 aamma 3 atuutissanngillat Naalakkersuisut, kommuni imaluunniit sanatitsisoq namminersortoq piginneqatigiilluni inissiaatillit peqatigiiffianni piginneqataasutut inississimappata. ”

9. § 55 imatut oqaasertalerneqassaaq:

”  § 55.  Piginneqatigiilluni inissiaq najugaqarfissatut najornerata saniatigut siunertanut allanut atorneqaqqusaanngilaq, taamaattoq takuuk imm. 2, § 45 aamma § 45e.

  Imm. 2. Piginneqatigiilluni inissiap inuussutissarsiortunut namminersortunut mikinerusunut atorneqarsinnaanera ataatsimeersuartut akuersissutigisinnaavaat, inuussutissarsiullu piginneqatigiilluni inissiap piginnittuanit taassumalu inoqutigiivinit ingerlanneqarsinnaavoq. Inuussutissarsiortut namminersortut mikinerusut pisisartut pulaartarnerannik kinguneqartitsissanngillat.”

10. § 61-imi imm. 2-tut ilanngunneqassaaq: 

” Imm. 2.  Najugaqartussaatitaanermi Naalakkersuisut, kommuni imaluunniit sanatitsisoq namminersortoq piginneqatigiilluni inissiaatillit peqatigiiffiannut piginneqataasutut ilaalersoq ilaatinneqanngillat. ”

§ 2

Inatsisartut Inatsisaat ulloq 1. januar 2025 atuutilissaaq.

  Imm. 2.  § 1, nr. 6, Namminersorlutik Oqartussat kommunillu illuutaanni attartortittakkani kingusinnerpaamik ullormi 31. december 2024 atuilernissamut akuersissut tunniunneqartoq atorlugu atorneqartassapput.

Namminersorlutik Oqartussat, ulloq 6. decembari 2024

Múte Bourup Egede (atsior.)

Naalakkersuisut Siulittaasuat