Kapitali 1

Atuuffia aamma nassuiaatit

 

  § 1.  Takornariartitsinermik ingerlataqarnermut Inatsisartut inatsisaat atuuppoq.

  Imm. 2.  Inuussutissarsiutigalugu sulinermut Inatsisartut inatsisaat aammattaaq atuutissaaq.

  Imm. 3. Ingerlatanut sumiiffinninunami aalajangersimasuni takornariartitsinermut akuersissuteqartarnissaq pillugu Inatsisartut inatsisaat naapertorlugu akuersissutini ilaatinneqartunut Inatsisartut inatsisaat atuutinngilaq.

Imm. 4.  Inunnut imaluunniit inatsisitigut pisinnaatitaasunut pisussaatitaasunullu, Kalaallit Nunaannut imaluunniit Kalaallit Nunaannit imaluunnit Kalaallit Nunaanni inunnik angallassinermik suliaqartunut, tassunga atatillugu takornariartitsinermik ingerlataqarneq suliarineqarani, Inatsisartut inatsisaat atuutinngilaq, taamaattoq § 15 takuuk.

  Imm. 5.  Inuussutissarsiutit inatsisartut inatsisaannit matuminnga ilaatinneqartussaanngitsut pillugit Naalakkersuisut aalajangersakkanik erseqqinnerusunik aalajangersaasinnaapput.

 

  § 2. Inatsisartut inatsisaanni matumani takornariartitsinermik ingerlataqarneq ima paasineqassaaq, pingaarnertut takornarianut aningaasaqarnikkut ingerlatsinerit ingerlatsinerillu allat, Kalaallit Nunaanni misigisaqartitsinissamik iluseqartumik sullissinermik neqerooruteqarnissamik siunertaqartut, aamma ima tuniniarneqartut:

1)  ulloq naallugu angallassinerit unnuinertaqanngitsut, aamma

2)  angallassinerit ullunik arlalinnik sivisussuseqartut.

  Imm. 2.  Inatsisartut inatsisaanni matumani takornarialerisutut paasineqassaaq inuk imaluunniit inatsisitigut pisinnaatitaasoq pisussaatitaasorlu, § 3, imm. 1 malillugu takornarialerinermik ingerlataqarnissamut akuersissummik atuuttumik pilik.

  Imm. 3.  Inatsisartut inatsisaanni matumani takornariatut paasineqassaaq inuk, inuup nalinginnaasumik najugaqarfigisami imaluunniit najukkami avataanut sumiiffimmut angalasoq, aamma angalaneq tamarmi imaluunniit angalanerup ilaa nuannisaarnissaq, peqqissarnissaq imaluunniit sulinngiffeqarnissaq eqqarsaatigalugu pisoq, aamma tassunga atatillugu sullissinernik imm. 1-imi ilaatinneqartunik pissarsisoq. 

 

Kapitali 2

Takornarialerinermik ingerlataqarnissamut akuersissut

 

  § 3.  Imm. 2 malillugu takornariartitsinermik ingerlataqarneq taamaallaat akuersissummik atuuttumik pigisalimmit suliarineqassaaq.

  Imm. 2.  Inunnut imaluunniit inatsisitigut pisinnaatitaasumut pisussaatitaasumullu, §§ 7-miit 10 ilanngullugu malillugit piumasaqaatinik naammassinnittunut, Naalakkersuisut akuersissutinik atulersitsissapput. Takornariartitsinermik ingerlataqarnissamut t akuersissut, tamanna immikkut ittumik pissutsit pissutissaqartippassuk, piffissamut aalajangersimasumut killilerlugu atulersinneqarsinnaavoq.

  Imm. 3.  Akuersissutip atuuffiani tamarmi, §§ 7-imiit 10 ilanngullugu piumasaqaatit takornariartitsisup naammassissavai. Takornariartitsisup piumasaqaatit naammassinngippagit, inatsisartut inatsisaanni § 14, imm. 1 malillugu takornariartitsisoq naalakkiummik atulersitsivigineqarsinnaavoq. Isumannaallisaaneq pillugu eqqarsaatigisassat suliarineqarnissaannut aamma uumasut pinngortitamilu sumiiffiit aalajangersimasut qajassuunneqarnissaannut, takornariartitsinermik ingerlataqarnissamut akuersissutip piffissami atuuffiani ilutsit aalajangersimasut suliarinissaannut, malittarisassani piumasaqaatinik amerlanerusunik, takornarialerisup naammassisassaanik, Naalakkersuisut aalajangersaasinnaapput.

  Imm. 4.  Takornariartitsinermik ingerlataqarnissamut akuersissut, Naalakkersuisunit allakkatigut akuersissuteqarnikkut allanut tunniunneqarsinnaavoq.

  Imm. 5.  Takornariartitsinermik ingerlataqarnissamut akuersissutit Naalakkersuisut tamanut saqqummiussinnaavaat.

  Imm. 6.  Takornarialerisumi takornariartitsinermik ingerlataqarnermit 1-mit arlalinnilluunniit aningaasatigut kaaviiaartitsineq katillugu ukiumut 50.000 kr.-it qaanginngippagit, imm. 1 apeqqutaatinnagu akuersissuteqarnissamik piumasaqaat atuuppoq.

 

  § 4.  Suliniutit inatsisartut inatsisaanni aamma takornariartitsinermik ingerlataqarnissamut akuersissutit kiisalu taakkuninnga nakkutilliinermut ilaatinneqartut pillugit paasissutissat, oqartussaasut suliarinninnerannut pisariaqartinneqartut tamaasa, takornariartitsinermik  ingerlataqarnissamut akuersissummik qinnuteqartut takornarialerisullu nalunaarutigissavaat.

  Imm. 2.  Naatsorsueqqissaarnermut siunertat anguniarlugit, imm. 1 malillugu paasissutissat kinaassutsimik ilisarsisinnaajunnaarsillugit, pisortat oqartussaasuinut aamma ingerlatseqatigiiffiinut namminersorlutik oqartussanit pigineqartunut Naalakkersuisut avitseqatigiissutigisinnaavaat.

  Imm. 3.  Imm. 1 malillugu akuersissutit pillugit takornariartitsinermik ingerlataqarnissamut aaqqissuussinerup suliassiissutigineqarnissaa siunertaralugu, pisortani oqartussaasunut imaluunniit ingerlatseqatigiiffiinut namminersorlutik oqartussanit pigineqartunut, § 6, imm. 1 malillugu Naalakkersuisut pisussaaffiinik pisinnaatitaanerinillu tigusisimasunut, paasissutissat Naalakkersuisut avitseqatigiissutigisinnaavaat. 

 

  § 5.  Kalaallit Nunaanni takornariartitsinermik ingerlataqarnissamut akuersissutit atulersinneqarnerannut piumasaqaatit ingerlatseriaatsillu pillugit malitarisassat erseqqinnerusut Naalakkersuisut aalajangersarsinnaavaat, matumani takornarialerisut nalunaarusiornissamik pisussaaffii aamma paasissutissat allat nalunaarutiginneqarnissaannut piumasaqaatit pillugit.

 

  § 6.  § 3 malillugu takornariartitsinermikingerlataqarnissamut , § 13 malillugu nakkutilliinissamut, § 14, imm. 1 malillugu naalakkiummik nalunaaruteqarnissamut, kiisalu § 14, imm. 2 malillugu takornariartitsinermik ingerlataqartunut akuersissutip utertinneqarneranut atatillugu aamma piginnaatitaanerit pillugit pisussaaffitsik, ingerlatseqatigiiffimmut namminersorlutik oqartussanit pigineqartumut imaluunniit kommunalbestyrelsimut ataatsimut Naalakkersuisut tunniussinnaavaat.

  Imm. 2.  Ingerlatseqatigiiffik namminersorlutik oqartussanit pigineqartoq imaluunniit kommunalbestyrelse ataaseq, imm. 1 malillugu pisussaaffinnik pisinnaatitaanernillu tunineqartoq, pisussaaffinnut pisinnaatitaanernullu taakkununnga atasumik inatsisini ingerlatsinermut tunngasuni malittarisassanut tunngavinnullu, Kalaallit Nunaanni Namminersorlutik Oqartussat ataanni pisortat ingerlatsineranni atuuttunut ilaatinneqassapput, matumani pisortat ingerlatsineranni suliassat suliarineqartarnerat pillugu Inatsisartut inatsisaat aamma inunnik paasissutissanik suliarinnittarneq pillugu inatsit ilanngullugit. 

  Imm. 3.  Pisuni pisussaaffiit pisinnaatitaanerillu ingerlatseqatigiiffimmut namminersorlutik oqartussanit pigineqartumut imaluunniit kommunalbestyrelsimut ataatsimut tunniunneqarneranni, nakkutilliineq pillugu kiisalu naammagittaalliorsinnaaneq pillugu Naalakkersuisut malittarisassanik erseqqinnerusunik aalajangersaasinnaapput.

 

Kapitali 3

Pisinnaatitaaffinnik piginnittut

 

  § 7.  Takornariartitsinermik ingerlatsisinnaanermut akuersissut taamaallaat tunniunneqarsinnaavoq inummut:

1)  Kalaallit Nunaanni inuit allattorsimaffianni nalunaarsugaasimasumut.

2)  Kalaallit Nunaannut tamakkiisumik akileraartussaatitaasumut, aamma

3)  nammineq pisuussutiminik tamakkiisumik atuisinnaasumut aamma akiliisinnaajunnaarneq-, akiliisinnaannginneq- imaluunniit atorunnaarsitsineq pillugit suliaqarfigineqanngitsumut.

 

  § 8.  Inatsisitigut pisinnaatitaasumut pisussaatitaasumullu takornariartitsinermik ingerlataqarnissamut akuersissut taamaallaat nalunaarutigineqarsinnaavoq ukununnga:

1)  aningaaasaatileqatigiiffimmut imaluunniit inuup ingerlatseqatigiiffianut Kalaallit Nunaanni angerlarsimaffeqartumut,

2)  akiliisinnaajunnaarnermik, akiliisinnaannginnermik imaluunniit atorunnaarsitsinissaq pillugit suliaqarfigineqanngitsumut,

3)  aningaasaatileqatigiiffiup aningaasaataasa minnerpaamik 2/3-ii inunnit § 7, nr. 1- 3-mi piumasaqaatinik naammassinnittunit toqqaannartumik toqqaannanngitsumilluunniit pigineqarpata,

4)  aningaasaatileqatigiiffimmi taasisinnaatitaanermut piginnaatitaaffiit minnerpaamik 2/3-ii toqqaannartumik toqqaannanngitsumilluunniit inunnit, § 7, nr. 1-3-mi piumasaqaatinik naammassinnittunit, pigineqarpata, aamma

5)  inuup ingerlatseqatigiiffiani peqataasut minnerpaamik 2/3-ii § 7, nr. 1-3-mi piumasaqaatinik naammassinnippata.

 

Kapitali 4

Iisumannaallisaanermut pilersaarutit

 

  § 9.  Sullissinernut inatsisartut inatsisaanni matumani ilaatinneqartunut, aamma qinnuteqartup tuniniassallugit eqqarsaatigisaanut, takornariartitsinermik ingerlataqarnissamut akuersissummik qinnuteqartut, allaganngorlugu isumannaallisaanermut pilersaarummik suliaqassapput.

  Imm. 2.  Isumannaallisaanermut pilersaarut qaqugukkulluunniit kalaallisut tuluttullu takornarianit tikinneqarsinnaassaaq.

  Imm. 3. Isumannaallisaanermut pilersaarut ajutoorutaasinnaasunik nalilersuinermik aamma upalungaarsimanissamut pilersaarummik katitigaassaaq aamma nutarterneqarsimassaaq.

  Imm. 4. Pissutsit navianarsinnaasut pingaaruteqarnerpaat, suliniummut inatsisartut inatsisaanni matumani ilaatinneqartumut atassuteqartut pillugit, ajutooratarsinnaanermik nalilersuineq erseqqissumik annertuumillu paasissutissanik takornarianut ilisimasaqalersitsinissamut naleqquttuussaaq. Suliniutip piareersarneqarnerani ajutoorutaasinnaasunik nalilersuineq sulisut toqqarneqarneranni tunngaviussaaq, matumani angalanermi siulersuisut, angalanermi piffissaliussaq, pissutsit avataanersut nalilersorneqarneranni, atortussat toqqarneqarneranni il.il.

  Imm. 5. Upalungaarsimanissamut pilersaarut ajutoorutaasinnaasunik nalilersuinermik tunngaveqassaaq aamma tulliuttunik imaqassalluni:

1)  annakannajaartoqartillugu imaluunniit ajunaarnermik pisoqartillugu iliuusissat aalajangerneqartussat allaaserineqarnerat,

2)  sulisuni ingerlataqarnermi peqataasuni ilisimasassat, misilittagaqarnissaq aamma pisinnaasaqarnerit pillugit paasissutissat, aamma

3)  qinnuteqartup sulisuisa navianartumik pisoqartillugu qanoq qisuariaateqarnissaat pillugit, matumani attaveqaqatigiinnerup eqqarsaatigineqarnera ilanngullugu, paasissutissat.

  Imm. 6.  Pisuni inatsisiliornerit allat imaluunniit aalajangersimasumik sulisaatsit, suliniutip pineqartup suliarineqarneranut atasumik isumannaallisaanermut piumasaqaatinik malittarisassiuussisut, aamma qinnuteqartup eqqortissallugit pisussaaffigisai, atuutsillugit, imm. 1-miit 5 ilanngullugu aalajangersakkaniittut atuutinngillat.

 

Kapitali 5

Sillimmasiinermit matussusiineq aamma allatut qularnaveeqqusiineq

 

  § 10.  Takornariartitsinermik ingerlataqarneq inatsisartut inatsisaanni matumani ilaatinneqartoq inuussutissarsiornermi akisussaanermut sillimmaserneqarsimassaaq imaluunniit allatut qularnaveeqquserneqarsimassaaq.

  Imm. 2. Pisuni, takornarialerinermik ingerlataqarnerup suussusaani tassani matussusiisussamik inuussutissarsiornermi akisussaanermut sillimmasiisinnaaneq periarfissaatinnagu, aammattaaq qularnaveeqqusiinissaq alla periarfissaatinnagu, imm. 1 atuutinngilaq.

  Imm. 3.  Imm. 1 malillugu sillimmasiinermit matussuserneqarnissamut aamma qularnaveeqqusiinissamut piumasaqaatit pillugit Naalakkersuisut malittarisassanik erseqqinnerusunik aalajangersaasinnaapput.

 

Kapitel 6

Immikkut ittumik akuersissutit

 

  § 11.  Pisuni immikkut ittuni §§ 7-imiit 10 ilanngullugu aalajangersakkanit aamma inatsisartut inatsisaanni matumani § 3, imm. 4-p, § 5-ip, § 6, imm. 3-p, § 10, imm. 3-p aamma § 15-ip malitsigisaannik aalajangersakkanit aalajangersarneqartunit, piumasaqaatinit Naalakkersuisut immikkut ittumik akuersissuteqarsinnaapput.

 

Kapitali 7

Akiliutit

 

  § 12. § 3, imm. 2 malillugu takornarialerinermik ingerlataqarnissamut akuersissummik qinnuteqartunit kiisalu oqartussaasut suliarinnerannut atasumik aningaasartuutinut takornarialerisunit Naalakkersuisut akiliummik akileeqqusisinnaapput.

  Imm. 2.  Imm. 1 malillugu akiliutit akilerneqarnissaat pillugit malittarisassanik erseqqinnerusunik Naalakkersuisut aalajangersaasinnaapput.

 

Kapitali 8

Nakkutilliineq, peqqussuteqarneq aamma takornarialerinermik ingerlataqarnissamut akuersissutip utertinneqarnera

 

  § 13.  Inatsisartut inatsisaannik malittarisassanilu inatsisartut inatsisaata massuma malitsigisaannik takornarialerisut il.il. eqqortitsinerat Naalakkersuisut nakkutigissavaat.

 

  § 14.  Inatsisartut inatsisaata aamma inatsisartut inatsisaat manna malillugu malittarisassat aalajangersarneqartut malinneqarnissaanikpeqqussuteqarneq , Naalakkersuisut takornarialerisunut il.il. nalunaaruteqarsinnaapput. 

  Imm. 2. Takornarialerisoq inatsisartut inatsisaat malillugu peqqussummik naammassinninngippat, takornarialerinermik ingerlataqarnissamut akuersissut inatsisartut inatsisaat manna malillugu atulersinneqartoq Naalakkersuisut utertissinnaavaat.

 

Kapitali 9

Inuussutissarsiutigalugu sulinermut zonenut immikkoortiterineq il.il aamma sumiiffiit ilaanni atuisinnaatitaanermut killiliineq

 

  § 15.  Sumiiffiit ilaanni atuisinnaanermut killiliineq, aamma inuussutissarsiutigalugu ingerlataqarneq taamaallaat sumiiffinni erseqqinnerusumik aalajangerneqartuni, piffissani erseqqinnersumik aalajangerneqartuni imaluunniit piumasaqaatit immikkut ittut eqqortinneqarnerisigut pisinnaaneri pillugit, malittarisassanik erseqqinnerusunik Naalakkersuisut aalajangersaasinnaapput.

 

Kapitali 10

Pineqaatissiinerit

 

  § 16.  Inummut tulliuttunik iliuuseqartumut Kalaallit Nunaanni Pinerluttulerinermi inatsimmi malittarisassat malillugit akiliisitsissummik akiliisitaasussanngortitsisoqarsinnaavoq:

1)  § 3, imm. 1 malillugu takornariartitsinermik ingerlataqarnissamut akuersissummik atuuttumik peqarani takornariartitsinermik ingerlataqartumut ,

2)  § 4, imm. 1 malillugu oqartussaasut il.il. pisassaannik paasissutissanik eqqunngitsunik imaluunniit salloqittaataasunik nalunaaruteqartumut imaluunniit paasissutissanik nipangiussisumut.

3)  § 14, imm. 1 malillugu naalakkiummik naammassinninngitsumut.

  Imm. 2.  Inatsisartut inatsisaat imaluunniit inatsisartut inatsisaat manna malillugu malitassat atulersinneqartut akiliisitsissummik aalajangiisoqarnissaa periarfissaliissutigineqartillugu, akiliisitsissut Kalaallit Nunaanni pinerluttulerinermi inatsimmi malittarisassat malillugit inatsisitigut pisinnaatitaasumut pisussaatitaasumullu naalakkiutigineqarsinnaavoq.

  Imm. 3.  § 5, § 10, imm. 3, aamma § 15 malillugit malitassani atulersinneqartuni, Kalaallit Nunaanni pinerluttulerinermi inatsimmi malittarisassat malillugit pineqaatissiinerit akiliisitsissutitut ilusillit aalajangersarneqarsinnaapput.

  Imm. 4.  Inatsisartut inatsisaata imaluunniit inatsit malillugu malittarisassat aalajangersarneqartut unioqqutinneqarnerani, Kalaallit Nunaanni pinerluttulerinermi inatsimmi malittarisassat malillugit arsaarinnittoqarsinnaavoq. Arsaarinninneq nunatta karsianut iluanaarutitut pissaaq.

  Imm. 5.  Akiliisitsissutit, inatsisartut inatsisaat manna imaluunniit inatsisartut inatsisaat manna malillugu malittarisassat aalajangersarneqartut malillugit akiliisitaasussanngortitaasut, nunatta karsiata pissavai.

 

Kapitali 11

Eqqartuussivilersuussisinnaaneq

 

  § 17.  Pissutsit inatsisartut inatsisaanni ilaatinneqartut pillugit aalajangiineq, aalajangiinerup akuusumut nalunaarutigineqarnerata kingorna qaammatit 6 piffissaliunneqartut iluanni eqqartuussivinnut saqqummiunneqarsinnaavoq.

  Imm. 2. Suliat inatsisartut inatsisaanni ilaatinneqartut, Nunatsinni Eqqartuussivimmut suliarinneqqaarfittut saqqummiunneqassapput.

  Imm. 3. Naalakkersuisut allatut aalajangiisimatinnagit, aalajangiinerup eqqartuussivinnut saqqummiunneqarnera aalajangiinerup naammassineqarnissaata kinguartinneqarnissaanik kinguneqanngilaq.

 

Kapitali 12

Atuutilersitsinermut- ikaarsaariartitsinermullu aalajangersakkat

 

  § 18. Inatsisartut inatsisaat ulloq 1. januar 2025 atuutilissaaq.

  Imm. 2. Takornariartitsinermik ingerlataqartunut , piffissami inatsisartut inatsisaata atuutilernissaa sioqqutitsiarlugu inatsisit malillugit suliarineqartunut, inatsisartut inatsisaat 1. januar 2027 ilanngullugu atuutinngilaq.

 

 

Namminersorlutik Oqartussat, ulloq 25. novembari 2024

 

 

Múte Bourup Egede (atsior.)

Naalakkersuisut Siulittaasuat