Nunami inuussutissarsiutinut tunngatillugu inuussutissarsiornermik siuarsaaneq pillugu Inatsisartut inatsisaata allanngortinneqarnera pillugu Inatsisartut inatsisaat
(Annikitsumik taarsigassarsititsisarnermik aaqqissuussinermut atorunnaarfissaannut ulluliussap atorunnaarsinneqarnera, qinnuteqartunut piumasaqaatinik qasukkartitsineq, inunnut pisortanut annertuunik akiitsulinnut tapersiinissamut killiliinerup atorunnaarsinneqarnera aammalu aaqqissuussinermi allanngortitsinerit annikinnerusut allat)
§ 1
Nunami inuussutissarsiutinut tunngatillugu inuussutissarsiornermik siuarsaaneq pillugu Inatsisartut inatsisaanni nr. 20, 3. december 2012-imeersumi, Inatsisartut inatsisaanni nr. 4, 3. juni 2016-imeersumi, Inatsisartut inatsisaanni nr. 27, 17. november 2017-imeersumi aamma Inatsisartut inatsisaanni nr. 21, 1. december 2021-meersumi allanngortinneqartumi, makkua allanngortinneqarput:
1. Inatsisartut inatsisaata qulequtaa imatut oqaasertalerneqarpoq:
”Nalinginnaasumik inuussutissarsiutinik siuarsaaneq pillugu Inatsisartut inatsisaat.”
2. § 1 b, imm. 1, imatut oqaasertalerneqarpoq:
”Suliffeqarfiit minnerusut aningaasalersuutissarsiniartarnerisa ajornannginnerulersinnissaa siunertaralugu, annikitsunik taarsigassarsititsisarnermik aaqqissuussinermut aningaasalersuutissanik, aningaasaliissutinik ataatsimoortunik pilersitsisoqassaaq.”
3. § 1 b, imm. 3, atorunnaarsinneqarpoq.
4. § 2, imm. 1, imatut oqaasertalerneqarpoq:
”Inatsisartut inatsisaanni nalinginnaasumik inuussutissarsiutinut tapersiisarneq pineqartunut ilaatinneqarpoq.”
5. § 7, imm. 4, oqaaseqatigiit aappaat, imatut oqaasertalerneqarpoq:
”Ingerlatsinermi aningaasaqarnikkut nalilersuinermi qinnuteqartup sulianut aqutsinermullu piukkunnassuseqarnerinik, qinnuteqartup aningaasaqarneranik aammalu ingerlatsinissamut pilersaarutip aalajangersimasup attanneqarsinnaaneranik nalilersuineq ilaatigut ilaatinneqassaaq, taamaattoq takuuk imm. 5.”
6. § 7-imi, imm. 5-itut ilanngunneqarpoq:
” Imm. 5. Tapersiinissaq annikitsunik taarsigassarsititsinertut ittoq pillugu neriorsuuteqarneq, qinnuteqaatip ingerlatsinermut aningaasaqarnikkut inuiaqatigiillu aningaasaqarnerannut nalilersorneqarnera tunngavigalugu tunniunneqassaaq. Ingerlatsinermi aningaasaqarnermut nalilersuinermi, ingerlatsinissamut pilersaarutip aalajangersimasup attanneqarsinnaassusaanik nalilersuineq, taamaallaat ilaatinneqassaaq.”
7. § 8, imm. 2, imatut oqaasertalerneqarpoq:
” Imm. 2. Tapiiffigineqarnissamik neriorsuummik tunniussisoqarsinnaanngilaq, pissarsisussaq imaluunniit pisortaaneqarfimmi siulersuisuniluunniit inuit aqutsisuusut akileraartarnermi inatsimmik annertuumik unioqqutitsisimasutut imaluunniit Kalaallit Nunaanni pinerluttulerinermi inatsimmi aningaasarsiornermi pinerluuteqarnermut aalajangersakkanik unioqqutitsisimasutut pineqaatissinneqarsimappata imaluunniit pisortanut akiitsoqarpata annertuunik akiligassanngorsimasunik, taamaattoq takuuk imm. 3.”
8. § 8-mi imm. 3-tut nutaatut ilanngunneqarpoq:
” Imm. 3. Annikitsunik taarsigassarsititsinissaq pillugu neriorsuuteqarnermi, qinnuteqartoq pisortanut annertuunik akiitsoqarnersoq, isiginiarneqassanngilaq.”
Imm. 3 tamatuma kingorna imm. 4-nngorpoq.
§ 2
Inatsisartut inatsisaat ulloq 1. januar 2025 atuutilerpoq.
Namminersorlutik Oqartussat, ulloq 25. novembari 2024
Múte Bourup Egede (atsior.)
Naalakkersuisut Siulittaasuat