§ 1 

Piniarneq aallaaniarnerlu pillugit Inatsisartut inatsisaanni nr. 34, 13. juni 2023-meersumi tulliuttut allanngortinneqarput:

1. § 16-ip kingorna ikkunneqarpoq:

”  § 16 a. Inuit Kalaallit Nunaanni akiliisitsilluni aallaaniarnermik aaqqissuussisartut nammineersinnaassuseqassapput aamma:

1)  Kalaallit Nunaanni inuiaqatigiinnut aalajangersimasumik attuumassuteqassapput,

2) ukiuni kingullerni tallimani Kalaallit Nunaanni aalajangersimasumik najugaqarsimassallutik,

3)  ukiuni kingullerni tallimani Kalaallit Nunaanni tamakkiisumik akileraartartussaatitaasimassapput aamma

4)  akiliisitsilluni aallaaniarnermik ingerlataqartut nunap immikkoortuani aqutsiveqarfiusumi piniarnermut aallaaniarnermullu atortunik pisariaqartunik pigisaqassapput, tassani ilaallutik angallat, qamut motoorilik aammalu unnuiffiusinnaasut,”

2. § 10 imatut oqaasertalerneqassaaq:

  § 10.  Naalakkersuisut immikkut akuersissuteqarsinnaapput:

”1) §§-it 7-9-mit aamma § 16 a, nr. 1-3-mit, inuk pineqartoq piffissani taaneqartuni ilinniarnermik assigisaannilluunniit peqquteqartumik Kalaallit Nunaata avataaniikkallarsimappat imaluunniit qinnuteqartup Kalaallit Nunaannut attuumassuteqarnera naammaginartutut nalilerneqarpat,

2)  § 7, imm. 1, nr. 5-miit aamma § 8-miit, inunnut manna tikillugu inuussutissarsiutigalugu aalisarnermik, piniarnermik aallaaniarnermillu pingaarnertut inuussutissarsiutitut ingerlatsisimanngitsunut,

3)  § 7, imm. 1, nr. 5-mit aamma § 8-mit, isertitat amerlassusissaat pillugu piumasaqaatit eqquutsinneqannginnerinut pissutsit immikkut ittut sunniisuusut atuussimanerat uppernarsarneqarsinnaappat,

4)  § 7, imm. 1, nr. 5-mit aamma § 8-mit, inunnut siusinnerusukkut inuussutissarsiutigalugu aalisarnermik, piniarnermik aamma aallaaniarnermik pingaarnertut inuussutissarsiutigalugu ingerlataqarsimasunut, tamanna piniarneq pillugu qarasaasiatigut toqqortaatinit uppernarsarneqarsinnaappat, aamma

5)  § 7, imm. 1, nr. 4-mit, inunnut 18-it inorlugit ukiulinnut piniarnermut aallaaniarnermullu atortulersuutinik pisariaqartunik pigisaqartunut sunngiffimmilu piniarsinnaanermut atuuttumik allagartalinnut.”

3. § 13, imm. 7, imatut oqaasertalerneqassaaq:

”  Imm. 7.  Inuk pineqartoq akuersissummik tunniussisoqarnissaa sioqqullugu aqutsiveqarfimmi aalajangersimasumi qinnuteqarfiusumi najukkami anginerusumi mikinerusumiluunniit sivikinnerpaamik qaammatini pingasuni ataavartumik najugaqarsimassasoq piniakkanut pisassiiffiusartunut akuersissummi aamma inuussutissarsiutigalugu piniarnermut akuersissummi piumasaqaateqarfiusinnaavoq.”

§ 2

Inatsisartut inatsisaat 1. januar 2025-mi atuutilissaaq.

  Imm. 2.  Inatsisartut inatsisaata atuuttunngornissaa sioqqullugu inatsit naapertorlugu pissarsiarineqarsimasut, akiliisitsilluni aallaaniartitsisinnaanermut akuersissutinut Inatsisartut inatsisaat atuutinngilaq.

Namminersorlutik Oqartussat, ulloq 25. novembari 2024

Múte Bourup Egede (atsior.)

Naalakkersuisut Siulittaasuat