Kapitali 1

Inatsisip atuuffia nassuiaatillu

 

  § 1.  Inatsisartut inatsisaat inatsisinik mianernartunillu allanik unioqqutitsinerit pillugit nalunaaruteqarnernut atuuppoq, takukkilli imm. 2 aamma 3.

  Imm. 2.  Inatsisartut inatsisaat illersornermi sillimaniarnermilu pissutsit pillugit neqeroortitsinernut malittarisassanik unioqqutitsinernik nalunaaruteqarnernut atuutinngilaq.

  Imm. 3.  Inatsisartut inatsisaat ukunani aamma atuutinngilaq:

1)  Paasissutissanut eqqartuussisoqarneq pillugu Kalaallit Nunaanni eqqartuussisarnermik inatsimmi § 81 naapertorlugu eqqartuussissuserisut nipangiusimasussaatitaanerannut.

2)  Paasissutissanut napparsimasut inatsisitigut inissisimanerat pillugu Inatsisartut peqqussutaanni § 23 naapertorlugu peqqinnissaqarfimmi sulisut nipangiusimasussaatitaanerannut.

3)  Eqqartuussivimi isumasioqatigiinnermi taasinermilu paasissutissanut nipangiusimasussaatitaanermut ilaasunut.

4)  Pinerluttulerineq pillugu inatsimmi sulianut.

 

  § 2.  Unioqqutitsinernik immikkoortuni aalajangersimasuni malittarisassat naapertorlugit nalunaarutit pillugit immikkut malittarisassat suli atuupput.

  Imm. 2.  Inatsimmi matumani malittarisassat pissuseq unioqqunneqarsinnaanngitsumik killilersorneqanngippat, malittarisassani taaneqartuni oqaaseqatigiinnut siullernut tapertaapput.

  Imm. 3.  Nalunaarummi pissutsit sulisitsisut sulisartullu akornanni aaqqissuussakkut aamma manna inatsisikkut suliarineqarsinnaappata, isumaqatigiissummi ilaasut, § 28 naapertorlugu akiliummut taartinut aamma soraarsitsinernut tunngatillugu suliaq, sulisitsisut sulisartullu akornanni aaqqissuussakkut suliarineqarsinnaasoq isumaqatigiissuteqarsinnaapput.

 

  § 3.  Inatsisartut inatsisaanni matumani uku imatut paasineqassapput:

1)  Unioqqutitsinerit: Iliuutsit iliuuseqannginnerilluunniit:

a)  annertuumik unioqqutitsinerullutik pissutsilluunniit mianernartuullutik, tak. § 1, imm. 1, imaluunniit

b)  Inatsisartut inatsisaata attuuffiani malittarisassani siunertanik unioqqutsisinnaanngortitsisut, tak. 1, imm. 1.

2)  Unioqqutitsinerit pillugit paasissutissat: Paasissutissat suulluunniit, tassunga ilanngullugit unioqqutitsisoqavinneranik unioqqutitsinerusinnaasunilluunniit pissutissaqartumik pasitsaassinerit, suliffimmi pasinapiluttumik kalerriisartup suliffigisaani suliffigisimasaanilluunniit, suliffimmiluunniit allami sulinini aqqutigalugu pasinapiluttumik kalerriisartup attavigisaani pisut, unioqqutitsinernilu taamaattunik isertuussiniarnerit.

3)  Nalunaaruteqarneq: Unioqqutitsinerit pillugit paasissutissanik oqaasiinnartigut allaganngorluguluunniit nalunaarutiginninneq.

4)  Suliffigisami nalunaaruteqarneq: Suliffimmi namminersortumi pasinapiluttoqarneranik kalerriisoqarsinnaatitsinermi unioqqutitsinerit pillugit paasissutissanik oqaasiinnartigut allaganngorluguluunniit nalunaarutiginninneq.

5)  Suliffigisap avataanut nalunaaruteqarneq: Unioqqutitsinernik pasinapiluttoqarneranik suliffigisap avataani kalerriisoqarsinnaatitsinermi Inatsisartut inatsisaannut matumunnga ilaasumut paasissutissanik oqaasiinnartigut allanngorluguluunniit nalunaaruteqarneq.

6)  Tamanut saqqummiussineq: Unioqqutitsinerit pillugit paasissutissanik tamanut saqqummiussineq.

7)  Pasinapiluttumik kalerriisoq: Inuk unioqqutitsinerit, pissutsilluunniit ilungersunartut allat pillugit paasissutissanik suliamik ingerlatsinerminut atatillugu pissarsiarisimasaminik nalunaarutiginnittoq.

8)  Akunnermiliuttoq: Inuk pasinapiluttumik kalerriisup sulinermut atatillugu nalunaaruteqarnerani ikiuisoq ikiuineralu isertuunneqartariaqartoq.

9)  Sulinermut atatillugu: Pisortani namminersorlutillu inuussutissarsiortuni maannakkut siusinnerusukkullu suliaqarneq, suliap suunera apeqqutaatinnagu, inuit tassani unioqqutitsineq pillugu paasissutissanik pissarsillutik, inuillu taakku paasissutissat taamaattut nalunaarutigigunikkit pillaatitut akiniarneqariaannaallutik.

10)  Inuk attuumassuteqartoq: Inuk imaluunniit inatsisit tunngavigalugit inuttut isigineqartoq nalunaaruteqarnermi avammulluunniit saqqummiussinermi inuttut unioqqutitsisutut oqaatigineqartoq, inuulluunniit taaneqartup attaveqarfigisaa.

11)  Pillaatitut akiniutit: Sulinermut atatillugu toqqaannartumik toqqaanngitsumilluunniit iliuuseqarneq iliuuseqannginnerluunniit, suliffimmi namminermi avammulluunniit nalunaaruteqarnerup avammulluunniit saqqummiussinerup kingunerisaa pasinapiluttumik kalerriisumulluunniit pissutissaqanngitsumik ajoqutaalerneranik kinguneqarsinnaasoq.

12)  Ingerlatitseqqinneq: Nalunaarummik tigusaqartup oqartussalluunniit oqaatigineqartup eqqortuuneranik nalilersuisussaatitaasup iliuusissaq aalajangigaa, unioqqutitsinerullu iliuuseqarfiginissaata pinngitsoortinnissaa naleqqulluni, tassunga ilanngullugu iliuuseqarnikkut, soorlu suliffimmi namminermi misissuineq, pinerluttoqarsimanersoq paasiniaaneq, eqqartuussisutigoortumik sulissutigititsineq, aningaasat utertinneqarnissaannik eqqartuussivinnut suliassanngortitsineq sulialluunniit naammassineqarnera.

13)  Akissuteqarneq: Ingerlatitseqqinneq pillugu taamatullu ingerlatitseqqinnermut tunngavilersuut pillugu pasinapiluttumik kalerriisumut nalunaaruteqarneq.

14)  Pisortat ingerlatsinerat: Inatsisilerinermi immikkoortut pisortat ingerlatsineranni suliassat suliarineqartarnerat pillugu inatsimmi § 1, imm. 1-imi ilaasut tamarmik. Pisortat ingerlatsineranni suliassat suliarineqartarnerat pillugu Inatsisartut inatsisaanni § 1, imm. 1-imi allaqqavoq, inatsit pisortat ingerlatsineranni immikkoortunut tamanut atuuttoq. Inatsisilerinermi immikkoortut tamarmik taamaalillutik pisortat ingerlatsinermi § 1, imm. 1-imut ilaasut, pisortat ingerlatsinerini aamma inatsit manna naapertorlugu ilaapput. Pisortat ingerlatsineranni Inatsisartut sulisoqarfiillu tassunga atasut aamma ilaapput. Naalagaaffiup Kalaallit Nunaanni oqartussaasui, eqqartuussiviit ilanngullugit, inatsimmi matumani ilaanngillat.

15)  Namminersortut ingerlatsinerat: Inatsisilerinermi immikkoortut pisortat ingerlatsineranni suliassat suliarineqartarnerat pillugu inatsimmi § 1, imm. 1-imi ilaanngitsut aamma Inatsisartut ataanni sulisoqarfiinilu tassunga atasuni imaluunniit Danmarkip naalagaaffiata sulisoqarfiini, tassunga ilanngullugit eqqartuussivinnut, ilaanngitsut tamarmik.

 

Isumaqatigiissummut tunngasut

 

  § 4.  Inatsisartut inatsisaat pasinapiluttumik kalerriisumut inunnulluunniit attuumassuteqartunut ajoqutaasumik isumaqatigiissuteqarnikkut unioqqunneqarsinnaanngilaq.

 

Kapitali 2

Pasinapiluttumik kalerriisunik illersuinermut illersuinerullu imarisaanut piumasaqaatit

 

  § 5.  Inatsisartut inatsisaat pasinapiluttumik kalerriisumut imatut iliuuseqartumut atuuppoq:

1) Kapitali 3 naapertorlugu suliffimmi pasinapiluttoqarneranik kalerriisoqarsinnaatitsinermut nalunaaruteqarneq.

2)  Kapitali 4 naapertorlugu avataani pasinapiluttoqarneranik kalerriisoqarsinnaatitsinermut nalunaaruteqarneq.

  Imm. 2.  Inatsisartut inatsisaat pasinapiluttumik kalerriisup tamanut saqqummiussinera imatut pisoqarnerani atuuppoq:

1)  Pasinapiluttumik kalerriisoq tamanut saqqummiussisoq pasinapiluttumik kalerriisarnermut immikkoortortaqarfik piffissarititap § 12, imm. 2, nr. 3, aamma § 18, imm. 2, nr. 3-mi aalajangerneqartup iluani naleqquttumik nalunaaruteqarneq pillugu iliuuseqarsimatinnagu kapitalit 3 aamma 4 naapertorlugit siullermik suliffimmi tamanut saqqummiussisimappat toqqaannartumilluunniit tamanut saqqummiussisimappat.

2)  Pasinapiluttumik kalerriisoq tamanut saqqummiussisoq unioqqutitsineq pisortat soqutigisaannik ajoqusiinissaa aarlerinaateqartoq ajoqutaavissasorluunniit tunngavissaqartumik isumaqarpat.

3)  Pasinapiluttumik kalerriisoq tamanut saqqummiussisoq avataani pasinapiluttoqarneranik kalerriisoqarsinnaatitsinermut nalunaaruteqarnermi pillaammik akiniaasoqariaannaasoq imaluunniit suliami unioqqutitsinerup sunniuteqartumik iliuuseqarfiginissaa ilimanarpianngitsoq tunngavissaqartumik isumaqarpat.

 

  § 6.  Inatsisartut inatsisaatigut illersuineq taamaallaat paasissutissat nalunaarutigineqartut tamanulluunniit saqqummiunneqartut piffissami nalunaaruteqarfiusumi eqqortuunerannik pasinapiluttumik kalerriisoq tunngavissaqartumik ilimasussimappat paasissutissallu § 1, imm. 1 naapertorlugu Inatsisartut inatsisaata atuuffiata ataaniippata atuuppoq.

 

  § 7.  Pasinapiluttumik kalerriisoq §§ 5 aamma 6-imi illersuinermik piumasaqaatinik eqqortitsippat, paasissutissanik pineqartunik nalunaaruteqarnermi tamanulluunniit saqqummiussinermi pissutsinik Inatsisartut inatsisaanni § 1, imm. 1-imi ilaasunik ersersitsinissap pisariaqarneranik pasinapiluttumik kalerriisoq tunngavissaqartumik ilimagisaqarsimanera piumasaralugu nipangiussimasussaatitaanermik inatsisikkut aalajangerneqartumik sumiginnaasimasutut isigineqassanngilaq tamatumunngalu akisussaatinneqassanani.

  Imm. 2. Pasinapiluttumik kalerriisoq §§ 5 aamma 6-imi illersuinissamik piumasaqaatinik eqqortitsisoq taamatut iliorneq immikkut pineqaatissiissutaasinnaasumik iliornerunngitsoq piumasaralugu paasissutissanik nalunaarutigineqartunik tamanulluunniit saqqummiunneqartunik pissarsisimaneranik akisussaatinneqanngilaq.

 

  § 8.  Pasinapiluttumik kalerriisoq Inatsisartut inatsisaanni tamanna pillugu malittarisassat suliffimmi avataanullu nalunaaruteqarnerata avammulluunniit saqqummiinerata kinguneranik pillaammik akiniarneqassanngilaq, tassunga ilanngullugit siorasaarneqassanngilaq pillaammilluunniit akiniarniarneqassanani. Pasinapiluttumik kalerriisoq aamma nalunaaruteqarnissamut akornuserneqassanngilaq akornuserniarneqassananilu.

  Imm. 2.  Imm. 1 naapertorlugu pillaammik akiniarneqarnissamut illersuinermi matumani inuit aamma ilaapput:

1)  Akunnermiliuttut.

2)  Inuit pingajui pasinapiluttumik kalerriisumut attuumassuteqartut sulinermullu atatillugu pillaammik akiniarneqarsinnaasut.

3)  Suliffeqarfiit oqartussalluunniit pasinapiluttumik kalerriisup pigisai imaluunniit sulinermut atatillugu allatut sullitarisai.

  Imm. 3. Pasinapiluttumik kalerriisoq, pasinapiluttumik kalerriisup unioqqutitsinerup § 1, imm. 1-imi ilaasup ersersinnissaa pisariaqartutut pissutissaqartuuneranik ilimagisaqarnera piumasaralugu eqqartuussivinnut suliassanngortinneqarnissamut akerliliiniarluni nalunaaruteqarnerup avammulluunniit saqqummiinerup patsisissaqartuuneranik nalunaaruteqarsinnaatitaavoq.

 

Kapitali 3

Suliffimmi pasinapiluttoqarneranik kalerriisoqarsinnaatitsinerit

 

Pasinapiluttoqarneranik kalerriisoqarsinnaatitsinermik pilersitsinissamik periarfissaq

 

  § 9.  Sulisitsisut namminersortut sulisut paasissutissanik § 1, imm. 1-imut ilaasunik nalunaaruteqarfigisinnaasaannik pasinapiluttoqarneranik kalerriisoqarsinnaatitsinermik pilersitsisinnaapput.

  Imm. 2.  Sulisitsisut imm. 1-imi ilaasut suliffeqarfissuarmi namminermi pasinapiluttoqarneranik kalerriisoqarsinnaatitsinermik pilersitsisinnaapput.

  Imm. 3.  Namminersorlutik inuussutissarsiuteqartuni sulisitsisut suliffigisami pasinapiluttoqarneranik kalerriisoqarsinnaatitsinermik pilersitsineq ingerlatsinerlu eqqarsaatigalugit isumalluutit avitseqatigiissutigisinnaavaat.

 

Suliffimmi nalunaarutinik ingerlatitseqqinnernilu suleriaatsit

 

  § 10.  Suliffimmi pasinapiluttoqarneranik kalerriisoqarsinnaatitsineq allaganngorlugu oqaasiinnartigulluunniit taakkuluunniit marluk atorlugit nalunaaruteqarsinnaatitsisoqassaaq.

  Imm. 2.  Imm. 1 naapertorlugu oqaasiinnartigut nalunaaruteqarnissamut periarfissaqarpat, nalunaaruteqarneq pasinapiluttumik kalerriisup qinnuiviginninneratigut naleqquttumik piffissaliussaqarluni naapilluni ataatsimiinnermi pisinnaassaaq.

 

 

Pasinapiluttumik kalerriisoqarnermut immikkoortortaqarfimmik toqqaaneq

 

  § 11.  Sulisitsisoq § 9 naapertorlugu suliffigisami pasinapiluttoqarneranik kalerriisoqarsinnaatitsinermik pilersitsinissamik toqqaasoq inummik immikkoortortaqarfimmilluunniit kinaassusersiunngitsumik ukuninnga suliassaqartussamik toqqaassaaq:

1)  Nalunaarutinik tigusisartoq pasinapiluttumik kalerriisumullu attaveqartoq

2)  Nalunaarutinik malittarinninneq, tak. § 12, imm. 2, nr. 2.

3)  Pasinapiluttumik kalerriisumut akissuteqartartoq, tak. § 12, imm. 2, nr. 3.

  Imm. 2.  Suliassat imm. 1-imi taaneqartut suliffeqarfissuarmi Inatsisartut inatsisaat manna malillugu suliarinninnissamik piumasaqaammik eqqortitsisussamit suliarineqarsinnaapput.

 

  § 12.  Suliffimmi pasinapiluttoqarneranik kalerriisoqarsinnaatitsineq imatut ilusilersorneqassaaq pasinapiluttumik kalerriisup, inuup attuumassuteqartup inuillu pingajuata nalunaaruteqarnermi taaneqartup kinaanerata isertuunneqarnissaa akuerineqanngitsumillu tamassuminnga pissarsisoqannginnissaa qulakkeerneqarlutik.

  Imm. 2.  Sulisitsisoq § 9-mut ilaatinneqartoq pasinapiluttoqarneranik kalerriisoqarsinnaatitsinermi suleriaatsinik naleqquttunik ukuninnga qulakkeerinniffiusunik atuutilersitsissaaq:

1) Pasinapiluttumik kalerriisoq nalunaarutip tiguneqarneranik taassuma tiguneqarnerata kingorna ullut arfineq marluk qaangiutsinnagit uppernarsaammik tigusaqassaaq.

2) Nalunaarut peqqissaartumik ingerlateqqinneqassaaq.

3) Pasinapiluttumik kalerriisoq piaarnerpaamik nalunaarutillu tiguneqarneranit qaammatinik pingasunik kingusinnerunngitsumik akissummik tigusaqassaaq, tak. nr. 1.

  Imm. 3.  Kinaaneq isertuullugu nalunaarutit suliffigisami pasinapiluttunik nalunaaruteqartarnermut immikkoortortaqarfimmi suliarinissaannik pisussaatitaasoqanngilaq.

 

Paasissutissiisussaatitaaneq

 

  § 13.  Sulisitsisup § 9 napertorlugu suliffigisami pasinapiluttoqarneranik kalerriisoqarsinnaatitsineq pilersitsinissamik toqqaasup paasissutissat uku ersarissumik paasiuminartumillu sulisuminit pissarsiarineqarsinnaatissavai:

1) Suliffimmi pasinapiluttoqarneranik kalerriisoqarsinnaatitsinermut nalunaaruteqarnermi suleriaaseq, tassunga ilanngullugu unioqqutitsineq suliffimmi namminermi sunniuteqartumik nalunaaruteqarnissamik kaammattuinermi, pasinapiluttumillu kalerriisoq pillaammik akiniuteqartoqariaannaasoqannginneranik naliliippat.

 

Uppernarsaasiortussaatitaaneq

 

  § 14.  Sulisitsisup § 9 naapertorlugu pasinapiluttoqarneranik kalerriisoqarsinnaatitsinermik pilersitsinissamik toqqaasup imaluunniit § 15 naapertorlugu avataani pasinapiluttoqarneranik kalerriisoqarsinnaatitsinermik pilersitsisussaatitaasup pasinapiluttoqarneranik kalerriisoqarsinnaatitsinermik pilersitsineq suleriaatsillu pillugit allaganngorlugu uppernarsaatit toqqortarissavai, tak. §§ 10-mit 20-mut.

 

Kapitali 4

Avataani pasinapiluttoqarneranik kalerriisoqarsinnaatitsineq

 

Avataani pasinapiluttoqarneranik kalerriisoqarsinnaatitsinermut pilersitsisussaatitaaneq

 

§ 15.  Sulisitsisut uku sulisut paasissutissanik § 1, imm. 1-imi ilaatinneqartunik nalunaaruteqarfigisinnaasaannik avataani pasinapiluttoqarneranik kalerriisoqarsinnaatitsinermik pilersitsissapput:

1)  Pisortani sulisitsisut.

2)  Sulisitsisut namminersortut 30-nik amerlanerusunilluunniit sulisoqartut.

  Imm. 2.  Pasinapiluttoqarneranik kalerriisoqarsinnaatitsinerit immikkoortunut aalajangersimasunut inatsisit naapertorlugit pilersinneqartut, tak. § 2.

  Imm. 3.  Naalakkersuisut sulisitsisut namminersortut 30-nit ikinnerusunik sulisoqartut imm. 1-imi taaneqartumik pasinapiluttoqarneranik kalerriisoqarsinnaatitsinerit pilersitsinissaannut malittarisassiorsinnaapput.

  Imm. 4.  Sulisitsisut namminersortut avataani pasinapiluttoqarneranik kalerriisoqarsinnaatitsinermik pilersitsineq ingerlatsinerlu eqqarsaatigalugit isumalluutinik avitseqatigiissinnaapput.

 

Avataani pasinapiluttoqarneranik kalerriisoqarsinnaatitsinermut piumasaqaatit

 

  § 16.  Avataani pasinapiluttoqarneranik kalerriisoqarsinnaatitsinermut allaganngorlugu oqaasiinnartigullu nalunaaruteqartoqarsinnaassaaq pasinapiluttumik kalerriisullu qinnuivigineratigut naleqquttumik piffissaliussaqarluni naapilluni ataatsimiinnermi nalunaaruteqartoqarsinnaassalluni.

  Imm. 2.  Naalakkersuisut avataani pasinapiluttoqarneranik kalerriisoqarsinnaatitsinermut § 15-imi taaneqartumut piumasaqaatit pillugit sukumiinerusunik malittarisassiorsinnaapput.

 

  § 17.  Sulisitsisut § 15-imi taaneqartut suleqatigisat pingajuannik ukuninnga akisussaasussamik toqqaassapput:

1)  Nalunaarutinik tigusineq pasinapiluttumillu kalerriisumut attaveqarneq.

2)  Nalunaarutinik tiguneqartunik ingerlatitseqqinneq, tak. § 18, imm. 2, nr. 2.

3)  Pasinapiluttumik kalerriisumut akissuteqarneq, tak. § 18, imm. 2, nr. 3.

  Imm. 2.  Suliffeqarfiit ingerlatseqatigiiffissuarnut ilaasut imm. 1-imi suliassat taaneqartunut, avataani suliamut peqataasunik toqqaasinnaapput.

  Imm. 3.  Naalakkersuisut imm. 2-mi atuutinnginnissaanut malittarisassiorsinnaapput.

 

Avataanut nalunaaruteqarnermi ingerlatitseqqinnermilu suleriaatsit

 

  § 18.  Avataani pasinapiluttoqarneranik kalerriisoqarsinnaatitsineq imatut ilusilersorneqassaaq paasissutissat tamakkiisuunissaat, innarligassaannginneq isertuussinerlu inuillu akuerisaanngitsut taakkuninnga pissarsisinnaannginnissaat qulakkeerneqarlutik.

  Imm. 2.  Avataani pasinapiluttoqarneranik kalerriisoqarsinnaatitsinermi ukuninnga qulakkeerinnittussanik suleriaatsinik naleqquttunik atuutilersitsisoqassaaq:

1)  Pasinapiluttumik kalerriisoq, taanna allatut ersarissumik qinnuiviginnissimanngippat imaluunniit nalunaarummik uppernarsaanermi pasinapiluttumik kalerriisup kinaanerata illersugaanera navianartorsiortinneqassappat nalunaarummik tigusaqarnerup kingorna qaammatisiutit malillugit ullut arfineq marluk qaangiutsinnagit nalunaarut pillugu uppernarsaammik tigusaqassaaq.

2)  Nalunaarummik peqqissaartumik ingerlatitseqqiisoqassaaq.

3)  Pasinapiluttumik kalerriisoq tigusaqarnermik uppernarsaaneq qaammatit 3-t qaangiutsinnagit imaluunniit pisuni tunngavilersorluakkani qaammatit 6-ini, akissummik tigusaqassaaq.

4)  Pasinapiluttumik kalerriisoq nr. 3 malillugu akissuteqarnermut atatillugu taamatut nalunaarfigineqarsimanngippat, nalunaaruteqarnerup kinguneranik misissuinerup inaarutaasumik inernera pillugu nalunaarummik tigusaqassaaq.

5)  Pasinapiluttumik kalerriisoq paasissutissat ingerlateqqinneqarnissaat sioqqullugu nalunaarummik tunngavilersukkamik tigusaqassaaq, tak. § 25 imm. 4.

  Imm. 3. Avataani pasinapiluttoqarneranik kalerriisoqarsinnaatitsineq nalunaarutinik Inatsisartut inatsisaata atuuffianut, tak. § 1, imm. 1, ilaanngitsunik itigartitsisoqarsinnaavoq, taakkulu oqartussanut allanut ingerlateqqinneqarnissaannik pisussaaffeqartoqanngilaq.

 

Paasissutissiisussaatitaaneq

  § 19.  Sulisitsisoq § 15-imi ilaatinneqartoq avataani pasinapiluttoqarneranik kalerriisoqarsinnaatitsinermut nalunaaruteqarnermi suleriaaseq pillugu sulisuminut erseqqarissumik paasinartumillu paasissutissiissaaq.

 

Suliap naammassineqarnera

 

  § 20.  Avataani pasinapiluttoqarneranik kalerriisoqarsinnaatitsinermi nalunaarutinik suliarineqarnermi imatut pisoqarnerani naammassineqarneranik aalajangiisoqarsinnaavoq:

1)  unioqqutitsinerit pillugit paasissutissat ersarissumik mianernannginnerusunik imaqarpata ingerlatitseqqinnissarlu pisariaqanngippat, imaluunniit

2)  inatsisit tunngavigalugit pissutsit pissusiviilluunniit allatut ingerlatitseqqinnissamik tunngavissaqartitsinngippata, siusinnerusukkut nalunaarutip suliarineqarnera naammassereerneqarsimasumut tunngatillugu unioqqutitsineq pillugu paasissutissanik pingaaruteqartunik nutaanik imaqanngippat.

  Imm. 2.  Imm. 1 malillugu aalajangiinerit allaffissornermi oqartussamut suliareqqitassanngortinneqarsinnaanngillat.

 

Kapitali 5

Suliffimmi avataanilu pasinapiluttoqarneranik kalerriisoqarsinnaatitsinermi sulianik suliarinninnermi malittarisassat

 

  § 21.  Nalunaarutit pasinapiluttoqarneranik kalerriisoqarsinnaatitsineq Inatsisartut inatsisaat manna naapertorlugu pilersinneqartumi, nalunaarutit suliarinissaannut pisariaqaraangat inuit pillugit paasissutissat suliarineqarsinnaapput.

 

Suliffimmi avataanilu pasinapiluttoqarneranik kalerriisoqarsinnaatitsinermi nalunaarsuinermut il.il. ataatsimut malittarisassat

 

  § 22.  Nalunaarutit tiguneqartut nalunaarsorneqassapput. Nalunaarsuineq nipangiussimasussaatitaaneq § 24-mi aalajangersarneqartoq naapertorlugu pissaaq.

  Imm. 2. Inatsit manna naapertorlugu nalunaarutit taamaallaat pisariaqartillugu inatsillu malillugu piumasaqaatit eqqortinnissaannut pisariaqaraangat pissutsinullu naleqqiullugu sivisussusilimmik toqqortarineqarsinnaapput.

 

  § 23.  Oqaasiinnartigut nalunaarutit pasinapiluttumik kalerriisup akuersinerata kingorna oqaloqatigiinnerit ataatsimiinneriluunniit immiunnerisigut imaluunniit ataatsimiinnermit oqaloqatigiinnermillu pasinapiluttumik kalerriisup misissussallugit, naqqissallugit periarfissaqarfigisaanik eqqortumik takutitsisumik imaqarniliornikkut imaqarniliarlu atsiorlugu akuersineratigut, uppernarsarneqassapput.

  Imm. 2. Digitalinngorlugu attaveqaatini oqaasiinnartigut nalunaarutit aamma oqaloqatigiinnermit eqqortumik takutitsisumik pasinapiluttumik kalerriisup misissussallugu, naqqissallugu periarfissaqarnissaanik allakkiornikkut allakkiarlu atsiorlugu akuersineratigut uppernarsarneqassapput.

 

Nipangiussimasussaatitaaneq

 

  § 24.  Nalunaarutinik tigusisussatut nangitseqqiisussatullu toqqarneqartoq, tak. § 11 imaluunniit § 17, paasissutissat tassani allaqqasut eqqarsaatigalugit nipangiussimasussaatitaavoq.

  Imm. 2.  Imm. 1-imi nipangiussimasussaatitaaneq taamatuttaaq inunnut § 25 malillugu ingerlatitseqqiinikkut imm. 1-imi paasissutissanik ilisimasaqalersunut atuuppoq.

  Imm. 3. Imm. 1-imi nipangiussimasussaatitaaneq taamatuttaaq suliffeqarfinni pisortaniluunniit sulisunut akuerineqanngitsunut avataani pasinapiluttoqarneranik kalerriisoqarsinnaatitsinermik ingerlatsisunut, tak. § 15, paasissutissanik imm. 1-imi taaneqartunik siunertarineqanngitsumik ilisimasaqalersunut atuuppoq.

 

Ingerlatitseqqiineq

 

  § 25. Pasinapiluttumik kalerriisup kinaanera pillugu paasissutissat taakkunani pasinapiluttumik kalerriisup kinaanera toqqaannartumik toqqaannanngitsumillu paasineqarsinnaalluni, sulisut nalunaarutinik tigusisinnaatitaasutut ingerlateqqiisinnaasutullu akuerineqartut, tak. § 11, imm. 1 aamma § 17, saniatigut pasinapiluttumik kalerriisoq ersarissumik akuersisimatinnagu allanut ingerlateqqinneqassanngillat.

  Imm. 2.  Paasissutissat imm. 1-imi ilaasut, tak. § 1, imm. 1, aatsaat unioqqutitsineq iliuuseqarfiginiarlugu imaluunniit inuit akuusut imminnut illersorsinnaatitaanerisa qulakkeernissaa siunertaralugu pippat, pasinapiluttumik kalerriisoq akuersippat pisortani oqartussanut allanut ingerlateqqinneqassapput.

  Imm. 3. Paasissutissat allat imm. 1-imi nalunaaruteqarnermi taaneqanngitsut allanut, § 11, imm. 1, aamma § 17 naapertorlugit, nalunaarutinik tigusinissamut aamma malitseqartitsinissamut toqqagaanngitsunut, § 1, imm. 1 naapertorlugu nalunaarummik malitseqartitsinertut imaluunniit unioqqutitsinermik pinaveersaartitsinertut, ingerlatseqqinneqarsinnaapput.

  Imm. 4.  Nalunaaruteqarnermi misissuinerit eqqartuussivimmiluunniit suliat suliamut attuumassuteqartut navianartorsiortinneqanngippata imm. 2 malillugu ingerlatitseqqiinnginnermi pasinapiluttumik kalerriisoq nalunaarfigineqassaaq.

  Imm. 5.  Pisortat ingerlatsineranni suliassat suliarineqartarnerat pillugu inatsimmi peqataasup suliassamut tunngasunik ilisimasaqarnera, peqataasup isumaanik tusarniaaneq tunngavilersuinerlu pillugit kapitalit 4-mit 6-imut paasissutissanut imm. 1-imi taaneqartunut atuutinngillat.

 

  § 26.  Naalakkersuisut paasissutissat suliamut attuumassuteqartut tamaasa nalunaarutinik tigusisussatut ingerlatitseqqinnissamilu toqqarneqartunit, tak. § 11 aamma § 17,  naatsorsueqqissaarnerit suliarinerannut atugassatut pissarsiarisinnaavai.

  Imm. 2.  Naalakkersuisut malitassamik nalunaarusiornermut atorneqarsinnaasumik aalajangersaassapput.

 

Suliffimmi avataanilu pasinapiluttoqarneranik kalerriisoqarsinnaatitsinermi piffissaq suliarinniffik pillugu maalaarut

 

  § 27.  §§ 12 aamma 18-imi piffissaliussanik qaangiineq Naalakkersuisumut, Naalakkersuisut Siulittaasuata naammagittaalliornermik suliarinninnissamut akisussaaffiligaanut, maalaarutigineqarsinnaavoq.

  Imm. 2.  Naalakkersuisoq suliassaqarfimmut akisussaasoq isumaqarpat qaangiinermut taamaallaat suliap suuneranik imarisaanillu pissuteqartoq, Naalakkersuisoq suliassaqarfimmut akisussaasoq allamik avataanilu pingajuusumik suliap suliarineqarneranut akisussaasussamik toqqaasinnaavoq. Suliap suliarineranut aningaasartuutit sulisitsisup akilissavai. Sulisitsisoq akiliisarnermik unitsitsinikuuppat allanilluunniit pissuteqarluni aningaasartuutit akilersinnaanngippagit, taakku Nunatta Karsianit akilerneqassapput.

 

Kapitali 6

Taartisiat, uppernarsaatinik naliliineq pineqaatissiinerlu

 

  § 28.  Pasinapiluttumik kalerriisut imaluunniit inuk aamma inatsisitigut pisinnaatitaasoq § 8, imm. 2-mi ilaatinneqartoq, nalunaaruteqarnerup kinguneranik pillaatitut akiniarneqartoq imaluunniit § 8, imm. 1 naapertorlugu nalunaaruteqarnissamut akornuserneqartoq, akornuserniarneqartorluunniit sulisitsisumit taarsiivigineqarnissamik piumasaqaateqarsinnaavoq. Taartisiassap annertussusia Kalaallit Nunaanni suliffeqarnermi atugassaritinneqartut isigalugit aalajangerneqassaaq.

  Imm. 2.  Sulisoq § 8, imm. 1-imut akerliusumik soraarsinneqarpat, soraarsitsineq, sulisullu atorfimminiiginnassanerluni sulileqqissalluniluunniit kissaatigippagu, atorunnaarsinneqassaaq. Tamannali immikkut pisuni aamma illuatungeriit soqutigisaannik naliliinerup kingorna atorfeqaannarnissap atorfineqqinnissalluunniit piumasarinissaa naleqqutinngitsuusorinarpat atuutinngilaq.

  Imm. 3.  Pasinapiluttumik kalerriisoq unioqqutitsinerit, tak. § 7, imm. 2, pillugit uppernarsaatinik pissarsinerup imaluunniit paasissutissanut uppernarsaatissanik pissarsiniarnerup kinguneranik pillaatitut akiniarneqartoq taartisiaqarnissamik piumasaqaateqarsinnaavoq. Taartisiap annertussusia Kalaallit Nunaanni suliffeqarnermi atugassaritinneqartut isigalugit aalajangerneqassaaq.

 

  § 29.  Pasinapiluttumik kalerriisup Inatsisartut inatsisaat manna malillugu nalunaaruteqarnermi tamanulluunniit saqqummiussinermi ajoqutissarsisimalluni uppernarsarpagu illuatungerisap ajoquteqalerneq nalunaaruteqarnerup kinguneranik pillaammik akiniutaanngitsoq uppernarsassavaa.

  Imm. 2.  Imm. 1 taamatuttaaq inunnut aamma inatsisitigut pisinnaatitaasunut § 8, imm. 2-mi ilaatinneqartunut suliamut attuumassuteqartillugu atuuppoq.

 

  § 30.  Kalaallit Nunaannut pinerluttulerineq pillugu inatsit malillugu pillaammik akiliisitsinikkut pineqaatissinneqarsinnaavoq:

1)  § 24-mik piaaraluni mianersuaalliorujussuarluniluunniit unioqqutitsisoq, imaluunniit,

2)  piaaraluni paasissutissanik eqqunngitsunik nalunaarutiginnittoq tamanulluunniit saqqummiisoq.

  Imm. 2.  Sulisitsisoq, tak. §§ 9 imaluunniit 15, sulisitsisup kapitalit 3, 4 aamma 5 malillugit pisussaaffimminik eqqortitsinngitsoq Kalaallit Nunaannut pinerluttulerineq pillugu inatsit malillugu pillaammik akiliisitsinikkut pineqaatissinneqarsinnaavoq.

  Imm. 3.  Ingerlatseqatigiiffiit il.il. (inatsisitigut pisinnaatitaasut) pinerluttulerineq pillugu Kalaallit Nunaannut inatsimmi kapitali 5 malillugu pinerlussimasutut akisussaatinneqarsinnaapput.

  Imm. 4. Pillaammik akiliutit arsaarinnissutilluunniit, imm. 1, 2 imaluunniit 3 malillugit aalajangerneqartut, Nunap Karsianut akilerneqassapput.

 

Kapitali 7

Atuutilersitsinermut ikaarsaariarnermullu aalajangersakkat

 

  § 31.  Inatsisartut inatsisaat 1. januar 2025-mi atuutilissaaq.

  Imm. 2.  Inatsisartut inatsisaat inatsisip atuutilersinneqarnera sioqqullugu pisunut atuuppoq.

  Imm. 3.  Kapitali 4 sulisitsisunut namminersortunut 100-t tikillugit sulisulinnut 1. juli 2025-mit aatsaat atuutilissaaq.

 

 

Kalaallit Nunaanni Namminersorlutik Oqartussat, ulloq 3. juuni 2024

 

 

Múte Bourup Egede (atsior.)

Naalakkersuisut Siulittaasuat