Qaffasinnerusumik ilinniartitaanerit pillugit Inatsisartut inatsisaanni nr. 14, 12. juni 2019-imeersumi, Inatsisartut inatsisaatigut nr. 15, 1. december 2021-meersukkut allanngortinneqartumi § 31 a, imm. 2 aamma § 35, malitsigisaannik aalajangersarneqarput:

Piumasaqaatit

  § 1.  Isiginnaartitsisarnerni bacheloritut ilinnialernissamut qinnuteqartup ukuninnga naammassinnissinnaaneranik piumasaqaateqarpoq:

1) Ilinnialinnginnermi 18-inik ukioqalereersimanissaq,

2) meeqqat atuarfiannik naammassisimassavaa, aamma

3)  Nunatta Isiginnaartitsisarfianit akuerisaanissamut misilitsinnermi angusisimanissaq, § 2 tak.

Akuerisaanissamut misilitsinnissaq

  § 2.  Akuerisaanissamut misilitsinneq marloqiusaavoq. Akuerisaanissamut aappassaannik misilitsissagaanni akuerisaanissamut misilitsinnermi siullermi angusisimanissaq piumasaqaataavoq.

  Imm. 2.  Akuerisaanissamut misilitsinnerup immikkoortua siulleq isiginnaartitsissummik ataatsimik arlalinnilluunniit siumoortumik Nunatta Isiginnaartitsisarfianit toqqarneqarsimasunik qinnuteqartullu nammineq videokkut saqqummiussassaanik aallaaveqarpoq. Video qinnuteqartumit akuerineqarnissamut ataatsimiititaliamut nassiunneqassaaq.

  Imm. 3.  Akuerisaanissamut misilitsinnerit aappaat qinnuteqartup nammineerluni takkunneranik aallaaveqarpoq, tassani ilaatigut isiginnaartitsissummik akuerisaanissamut ataatsimiititaliamut qinnuteqartup eqqumiitsuliornermut piginnaasaanik naliliinissamut tunngaviusussamik qinnuteqartoq isiginnaartitsissummik takutitsissaaq. Akuerisaanissamut misilitsinnerup aappaani akuerisaanissamut ataatsimiititaliaq qinnuteqartorlu aamma oqaloqatigiinnerat ilaatinneqarpoq. Oqaloqatigiinneq qinnuteqartup imatut ittuuneranik naliliinissaq qitiutitsiffiussaaq:

1)  ilikkagaqarnissamut piareersimaneq nammineersinnaanerlu,

2)  inooqataanermi piginnaasat suleqatiginnissinnaassuserlu,

3)  attaveqaqatiginnissinnaanerit aamma akissuteqarsinnaanerit, aamma

4)  takorluukkat isumassarsianillu piviusunngortitsisinnaanerit.

  Imm. 4.  Nunatta Isiginnaartitsisarfiata ilinniagaq pillugu aaqqissuussami akuerisaanissamut misilitsinnermut siullermut aappaanullu suliatigut imarisai aammalu ingerlatseriaaseq aalajangersartarpaa.

Ilinniartussatut akuerisaanissamut ataatsimiititaliaq

  § 3.  Nunatta Isiginnaartitsisarfia ilinniartussatut akuerisaanissamut ataatsimiititaliamik akuerisaasarnermut aammalu misilitsinnernut naliliinissamut aalajangiisussanik pilersitsissaaq.

  Imm. 2.  Ilinniartussanik akuerisaanissamut ataatsimiititaliami ilaasortat tassaapput ilinniartunut akisussaasoq, ilinniartitsisoq ataaseq arlallilluunniit aammalu avataaniit isiginnaartitsinermik paasisimasalik isiginnaartitsisarnerni nunani tamalaamiusulli qaffasitsigisumik piginnaaneqartoq.

  Imm. 3.  Naliliisartut tamarmik nalilersuinerup nalaani saqqummiineq karakteeriliinerlu pillugit allattuissapput, taakku naammagittaalliuuteqartoqassagaluarpat naammagittaalliuutip suliarinissaanut atorneqassapput. Allattukkat minnerpaamik ukiumi ataatsimi taassumalu saniatigut naammagittaalliuuteqartoqarsimappat taassuma naammassineqarnissaata tungaanut toqqortaatigineqassapput.

Ilinniarnissamut akuerineqarneq

  § 4.  Nunatta Isiginnaartitsisarfia ukiuni tulliuttuni ilinniartussat qanoq amerlatigisussaaneri pillugit nittartakkamini tamanut saqqummiussissaaq. Ukiumi akuerisaaffiusumi pineqartumi akuerisaanissamik qinnuteqaatit tunniussuunneqarnissaannut ammaannginnermi tamanut saqqummiussisoqassaaq.

  § 5.  Ilinniartut akuerineqartussat ikinnerpaaffissaattut aalajangersagaq anguneqanngippat Ilinniartitaanermut Naalakkersuisoqarfimmi ukiumi pineqartumi ilinniakkamik neqerooruteqarsinnaaneq immikkut ittumik akuerisinnaavaa.

  Imm. 2.  Ilinniagaq neqeroorutigineqarsinnaanngippat tamanna pillugu Nunatta Isiginnaartitsisarfiata nittartakkamini tamanut saqqummiutissavaa tamannalu pillugu qinnuteqartut nalunaarfigineqassapput.

  § 6.  Akuerineqarnissamik qinnuteqarnermi Nunatta Isiginnaartitsisarfianit qinnuteqarnissamut immersuiffissaq immersorneqassaaq, taannalu CV-it ilanngullugit aamma siusinnerusukkut sulisimanerit ilinniagaqarsimanerillu pillugit uppernarsaatinik ilallugu nassiunneqassaaq. Qinnuteqaammi akuerineqarnissamik qinnuteqarnermi kajumissuseqarneq pillugu naatsumik allaaserisaq ilanngunneqassaaq.

  Imm. 2.  Nunatta Isiginnaartitsisarfiani qinnuteqarnissamut suleriaaseq aalajangersarneqassaaq qinnuteqaqqusinissallu ammarneqannginnerani taanna nittartakkamini tamanut saqqummiunneqassalluni.

  § 7.  Nunatta Isiginnaartitsisarfiani ilinniartut piginnaasaasa ataatsimut nalilerneqarnerat tunngavigalugit aamma akuerineqarnissamik misilitsinnermi naliliisoqarneratigut kiisalu akuerineqarnissamik kajumissutsit aallaavigalugit ilinniartussanik akuersisarpoq.

  Imm. 2.  Nunatta Isiginnaartitsisarfiani akuersinissanut ataatsimiititaliami atugassanik akuersinissamut naliliinermi piumasaqaatit sukumiinerusut aalajangersarneqarsinnaapput tamakkulu Ilinniartitaanermut Naalakkersuisoqarfimmi akuerineqassapput.

Atortuulersitsinermut aamma ikaarsaariarnermi aalajangersakkat

  § 8.  Nalunaarut ulloq 1. juni 2023-mi atuutilissaaq.

  Imm. 2.  Tamanna ilutigalugu isiginnaartitsisartutut ilinniagaqarneq pillugu Namminersorlutik Oqartussat nalunaarutaat nr. 11, 14. november 2011-meersoq atorunnaarpoq, taamaattorli imm. 3 tak.

  Imm. 3.  Ilinniartut nalunaarutip atuutilernerata nalaani isiginnaartitsisartutut ilinniagaqartut isiginnaartitsisartutut ilinniagaqarneq pillugu nalunaarummi nr. 11, 14. november 2011-meersumi malittarisassat naapertorlugit ilinniagartik naammassissavaat.

Namminersorlutik Oqartussat, 26. april 2023

Peter Olsen (atsior)

Ilinniartitaanermut, Kultureqarnermut, Timersornermut Ilageeqarnermullu Naalakkersuisoq

/ Karl Davidsen (atsior.)