Kapitali 1

Atuuffii

1.1. Malittarisassat makkua kommunini maleruaqqusanut, Inatsisartut inatsisaat, Inatsisartut peqqussutaat imaluunniit Namminersorlutik Oqartussat nalunaarutaat naapertorlugu aalajangersarneqartunut, taakkua innuttaasunut maannakkut atuussimappata, atuupput.

1.2. Kommunini maleruaqqusat, imm. 1.1.-imi piumasaqaatinik naammassinnittut, atuutsinneqarsinnaanissaminnut tamanut nalunaarutigineqassapput. Kommunini maleruaqqusat allat tamanut nalunaarutigineqassanngillat, aammalu malittarisassani matumani pineqartunut aamma ilaatinneqaratik.

1.3. Kommunini maleruaqqusat malittarisassani matumani pineqartunut ilaatinneqartut, inatsisitigut Namminersorlutik Oqartussat nalunaarutaattut isigineqarput, kommunalbestyrelsimit akuerineqartussaanerannut aalajangersarneqartussaanerannullu, aammalu Naalakkersuisut akuersisussaannginnerannut, naleqqussarneqarlutik.

1.4. Kommunini maleruaqqusat malittarisassani matumani pineqartunut ilaatinneqartut, imarisamikkut Namminersorlutik Oqartussat nalunaarutaannut piumasaqaatit assingi naammassisimassavaat. Kommunini maleruaqqusat taakkua aaqqissuunnerinut il.il. Namminersorlutik Oqartussanut nalunaarutaannut teknikkikkut piumasaqaatit taamatuttaaq naammassisimassavaat.

Kapitali 2

Kommunini maleruaqqusanik suliaqarneq

2.1. Kommunit suliassaqarfimmik iluanni kommunini maleruaqqusanik suliaqarnissamut akisussaasuupput.

2.2. Kommunip atorfilittaasa Naalakkersuisuni Naalakkersuisoqarfik suliassaqarfimmut akisussaasuusoq kommunini maleruaqqusanik suliaqarnermi ilitsersorneqarnissamik siunnersorneqarnissamillu qinnuigisinnaavaa.

2.3. Kommunip atorfilittai kommunini maleruaqqusat kiisalu taakkununnga piumasaqaatit pillugit nalinginnaasunik apeqquteqarlutik administration Inatsiseqarnermut immikkoortortamut saaffiginnissinnaapput.

Kapitali 3

Naalakkersuisoqarfimmi suliassaqarfimmut akisussaasuusumi aamma Inatsiseqarnermut immikkoortortami misissuineq

3.1. Kommunini maleruaqqusat kommunalbestyrelsimit akuerineqannginneranni, kommunip maleruaqqusat Naalakkersuisoqarfimmi suliassaqarfimmut akisussaasuusumi misissorneqartussanngorlugit nassiutissavai.

3.2. Kommunini maleruaqqusat inatsimmi tunngavissaminik qaangiisimannginnersoq kiisalu aaqqissuunneranut teknikkikkut piumasaqaatit naammassineqarsimanersut, Naalakkersuisoqarfiup suliassaqarfimmut akisussaasuusup misissussavaa.

3.3. Naalakkersuisoqarfik suliassaqarfimmut akisussaasuusup tamatuma kingorna kommunini maleruaqqusat Inatsiseqarnermut immikkoortortamut nassiutissavai, tassani kommunini maleruaqqusanut imarisaannut teknikkitaannullu piumasaqaatit kommunini maleruaqqusani naammassineqarsimanersut, kiisalu tamanut nalunaarutigineqarnissamut piareersimanersut, misissorneqassalluni.

3.4. Inatsiseqarnermut immikkoortortap kommunini maleruaqqusat Naalakkersuisoqarfik suliassaqarfimmut akisussaasuusumut nassiutissavai, taassuma kommunimut ingerlateqqissallugit.

Kapitali 4

Kommunini maleruaqqusat tamanut nalunaarutigineqarnerat

4.1. Kommunini maleruaqqusat kommunalbestyrelsimit akuerineqareerneranni borgmesterip kommunalbestyrelsi sinnerlugu maleruaqqusat atsiussavai.

4.2. Kommunini maleruaqqusat atsiorneqareersut Naalakkersuisoqarfik suliassaqarfimmut akisussaasuusumut pdf-nngorlugit elektroniskimik nassiunneqassapput aammalu word-fil-it aamma ilanngunneqassallutik. Kommunip pappiaranngorlugu atsiugaq allaqqaarnera tigummiinnassavaa.

4.3. Malittarisassat Naalakkersuisunit imaluunniit Naalakkersuisumit aalajangersarneqassasut imaluunniit akuerineqassasut inatsimmi tunngavigineqartumi piumasaqaataappat, Naalakkersuisoqarfik suliassaqarfimmut akisussaasuusup piumasaqaatip taassuma naammassineqarnissaa isumagissavaa.

4.4. Naalakkersuisoqarfik suliassaqarfimmut akisussaasuusup tamatuma kingorna maleruaqqusat inaarutaasumik atsiorneqareersut Tamanut nalunaarutiginninnermut allakkanik nakkartitsisarfimmut (saqqummiussineq@nanoq.gl) pdf-nngorlugu elektroniskimik nassiunneqassaaq aammalu word-fil-it aamma ilanngunneqassallutik.

Kapitali 5

Atuutilersitsinermut ikaarsaarnissamullu aalajangersakkat

5.1. Malittarisassat makkua ulloq 1. maj 2023 atuutilerput.

5.2. Peqatigisaanik inatsimmi imaluunniit nalunaarummik tunngavilimmik kommunini maleruaqqusat nalinginnaasumik pilertarnerannut suliat ingerlanissaannut pilersaarut 9. februar 2017-imeersoq aammalu kommunini maleruaqqusat aalajangersarneqartarnerat tamanullu nalunaarutigineqartarnerat pillugu ilitsersuut 9. februar 2017-imeersoq atorunnaarsinneqarput.

5.3. Malittarisassani makkunani aammalu Inatsisilioriaatsinut malittarisassani 1. november 2011-meersuni aalajangersakkat imminnut naapertuutinnginneranni, malittarisassani makkunani aalajangersakkat malinneqassapput.

Inatsisilerinermut immikkoortortaqarfik, ulloq  28. april 2023

Jógvan Svabo Samuelsen

Inatsisileriffimmi pisortaq