§ 1

Namminersorlutik Oqartussat inatsit pillugu nalunaarutaat nr. 6, 1. juni 2022-meersoq naapertorlugu Meeqqat tapersersorneqarnissaannut Inatsisartut inatsisaanni tullinnguuttut allanngortinneqarput:

1. § 8-mi imm.3-p kingorna immikkoortutut nutaatut ikkunneqassaaq:

”  Imm. 4.  Kommunalbestyrelse kommunimi meeqqanut ilaqutariinnullu sullissivinni ilaqutariillu illuini ingerlatsinermut sammititamik nakkutilliisassaaq. Kommunalbestyrelse aammattaaq najugaqarfinnik, meeqqat illuinik kiisalu qimarnguinnik, meeqqanut ilaqutariinnullu sullissivimmut atassuserneqarlutik pilersinneqartunut, ingerlatsinermut sammititamik nakkutilliisassaaq, takuuk § 55 a, imm. 5, nr. 4-6.”

Imm. 4-6 tamatuma kingorna tassaalerput imm. 5-7.

2. § 8, imm. 4-5, imm. 5-6-inngortut, imatut oqaasertalerneqassapput:

”  Imm. 5.  Nakkutilliineq imm. 2 aamma 4 tunngavigalugit nalunaaqqaarluni nalunaaqqaarnaniluunniit nakkutilliinertut ingerlanneqarsinnaavoq.

  Imm. 6.  Imm. 1-5 malillugit kommunalbestyrelsip nakkutilliinermik ingerlatsinera pillugu Naalakkersuisut noqqaaneratigut paasissutissat kissaatigineqartut tamaasa nassiunnissaannut kommunalbestyrelse pisussaaffeqarpoq.”

3. § 14 imatut oqaasertalerneqassaaq:

”  § 14.  Kommunalbestyrelsip noqqaaneratigut Isumaginninnermut Aqutsisoqarfik kommunip sulianik suliarinninnerani ilitsersuinermik, siunnersuinermik suliallu tungaatigut siunnersuinermik suliat ukununnga tunngassuteqarpata ikiuussinnaavoq:

1)  isumaginninnermi sulianik misissuineq, takuuk § 45,

2)  ikiorsiinissamik suliniuteqarnerit, takuuk kapitali 7,

3)  ikiorsiinissamik suliniuteqarnerit immikkut ittut, takuuk kapitali 8,

4)  ikiorsiinissamik suliniuteqarnerit sukannernerit, takuuk kapitali 9, aamma

5)  ikiorsiinissamik suliniuteqarnernik suliniuteqarnerullu kingorna malitseqartitsinermik unitsitsineq, takuuk kapitali 11.”

4. § 18 atorunnaarpoq.

5. § 21-mi, imm. 4, nr. 1 nutaatut ikkunneqassaaq:

”1) meeqqanut ilaqutariinnullu sullissivimmut innersuussineq,”

Nr. 1-4 tamatuma kingorna tassaalerput nr. 2-5.

6. § 21, imm.4, nr. 1, nr. 2-nngortussaq, imatut oqaasertalerneqassaaq:

”2) ilaqutariinnik pikkorissartitsisoqassasoq, ilaqutariinnik isumasioqatigiissitsisoqassasoq imaluunniit attaveqaatit peqatigalugit ataatsimiittoqassasoq,”

7. § 21, imm. 5, imatut oqaasertalerneqassaaq:

”  Imm. 5.  Imm. 4, nr. 4-mut atatillugu meeqqap aalajangersimasup sullinneqarnerata ataaniiffigisai efterskolit sullinniakkanik tigusinissaminnut naleqquttuussapput.”

8. § 21, imm. 7, imatut oqaasertalerneqassaaq:

”  Imm. 7.  Imm. 4, nr. 4 malillugu tapersersuineq sorleq tunniunneqassanersoq pillugu Naalakkersuisut sukumiinerusumik malittarisassanik aalajangersaasinnaapput, kiisalu imm. 6 malillugu ikiorsiinissamik suliniutit allaanerit allat pillugit sukumiinerusumik malittarisassiorsinnaapput.”

9. § 22, imm. 1, imatut oqaasertalerneqassaaq:

” Kommunalbestyrelsip meeqqamut taassumalu ilaqutaanut isumassuisuinulluunniit tapersersortiliineq attaveqarfigisartaliinerlu ikiorsiinertut aalajangiiffigisinnaavaat, takuuk § 21, imm. 4, nr. 3.”

10. § 32, imm. 2, imatut oqaasertalerneqassaaq:

”  Imm. 2.  Meeqqamut ajunnginnerussappat, tikeraarluni angalanermut taarsiullugu angajoqqaatut oqartussaassusillip aappaanut qanigisaasumulluunniit allamut tunniunneqarsinnaavoq, taamaalilluni taanna meeqqap imaluunniit inuusuttup suliniuteqareernermi malitseqartitsilluni suliniuteqarfigineqartup inissinneqarfigisaanut tikeraarsinnaanngorlugu. Illusimatitsinermut aningaasartuutit kommunalbestyrelsimit akilerneqassapput.”

11. § 32, imm. 4, imatut oqaasertalerneqassaaq:

”  Imm. 4.  Meeqqamut, eqqartuussut eqqartuussiviulluunniit tamanna pillugu aalajangernerata kingorna ulloq unnuarlu paaqqinnittarfimi inissinneqarsimasumut, tikeraarluni angalaneq taamaallaat angajoqqaatut oqartussaasuinut tunniunneqarsinnaavoq.”

12. § 33-mi, imm. 1-ip kingorna immikkoortutut nutaatut ikkunneqassaaq:

”  Imm. 2.  Meeqqamut qitiusumik inissitsiterinermut aaqqiissutikkut ulloq unnuarlu paaqqinnittarfimmi inissamik utaqqisumut, kommunalbestyrelsip inissiiffiugallartumik aqqutissiuinissani pisussaaffigaa.”

Imm. 2-5 tamatuma kingorna tassaalerput imm. 3-6.

13. § 34, imm. 1, imatut oqaasertalerneqassaaq:

” Ulloq unnuarlu paaqqinnittarfiit takuuk § 33, imm. 3, matumani ulloq unnuarlu paaqqinnittarfinni immikkoortortat isumannaallisakkat ilanngullugit, takuuk § 33, imm. 4, Naalakkersuisunit akuerineqarsimassapput.”

14. § 36, imm. 1, imatut oqaasertalerneqassaaq:

“  Meeraq §§ 27 imaluunniit 28 malillugu inissinneqarsimasoq, ulloq unnuarlu paaqqinnittarfimmi immikkoortortamut isumannaallisakkamut inissinneqassanersoq pillugu kommunalbestyrelse aalajangiisinnaavoq. Immikkoortortani isumannaallisakkani matut silarliit igalaallu parnaarsimatittuaannarneqarsinnaapput. Ulloq unnuarlu paaqqinnittarfiup immikkoortortaanut isumannaallisakkamut inissiinissaq taamaallaat aalajangiiffigineqarsinnaavoq, ukua tunngavigalugit:

1)  meeraq 12-it 15-illu akornanni ukioqarpat,

2)  meeraq sakkortuumik inatsimmik unioqqutitsisimappat, aamma

3)  meeqqap allalluunniit isumannaatsuutinnissaat eqqarsaatigalugit ulloq unnuarlu paaqqinnittarfiup immikkoortortaanut isumannaallisakkamut inissiisariaqarneq pisariaqartinneqarluinnalersimappat.”

15. § 39, imm. 6, imatut oqaasertalerneqassaaq:

“  Imm. 6.  Naalakkersuisut ukununnga ersarinnerusunik malittarisassiorsinnaapput:

1) kommunalbestyrelsip paarisaqarsinnaanermut akuersissutinik tunniussinissaanut utertitsinissaanullu piumasaqaatit, tassunga ilanngullugit ilaqutariinni paarsisartuni inoqutigiiusut tamarmik 15-it sinnerlugit ukioqalereersimasut meeqqanik pinerliisimannginnerannut aamma pineqaatissinneqarsimannginnerannut uppernarsaataannik pissarsiniartarnerit,

2) paarisaqarsinnaanermut akuersissummik tunniussisoqannginnerani paasissutissat suut kommunalbestyrelsimit pissarsiarineqarsimassanersut, aamma

3) paarisaqarsinnaanermut akuersissummi paasissutissat suut allassimassanersut.”

16. § 41, imm. 2, imatut oqaasertalerneqassaaq:

”  Imm. 2.  Kommunalbestyrelsip inissiinerup unitsinnissaanut tunngatillugu aalajangiinnginnermini inissiiffimmiit allaganngorlugu oqaaseqaammik pissarsiniartoqarsimanissaa akisussaaffigaa, takuuk imm. 1, nr. 3. Inissiiffiup oqaaseqaammini meeqqap inissiiffigisaminiiginnarnissaa inassutigippagu, kommunalbestyrelsip Meeqqat Pillugit Paasisimasalittut Qitiusumik Ataatsimiitsitaliap allattoqarfia ilisimatissavaa. Meeqqat Pillugit Paasisimasalittut Qitiusumik Ataatsimiitsitaliap allattoqarfiata aalajangersinnaavaa suliassaq Meeqqat Pillugit Paasisimasalittut Qitiusumik Ataatsimiitsitaliamut oqaaseqarfigisassanngorlugu saqqummiunneqassanersoq, takuuk § 54.”

17. § 44-mi, imm. 2-p kingorna immikkoortutut nutaatut ikkunneqassaaq:

“  Imm. 3.  Meeqqat angerlarsimaffiup avataanut inissinneqartut meeqqat illersuisuannik neqeroorfigineqarsimassapput, takuuk § 27.”

Imm. 3-5 tamatuma kingorna tassaalerput imm. 4-6.

18. § 45-mi imm. 2-p kingorna immikkoortutut nutaatut ikkunneqassaaq:

”  Imm. 3.  Kommunalbestyrelse isumaginninnermi sulianik misissuinissamut atugassanik meeqqap angajoqqaalluunniit sumiiffigisaata ungasinngisaani meeqqanut ilaqutariinnullu sullissivimmut imaluunniit ilaqutariit illuanut ikioqqusinnaavoq.”

Imm. 3-7 tamatuma kingorna tassaalerput imm. 4-8.

19. Kapitali 14-ip kingorna ikkunneqassaaq:

”Kapitali 14 a

Meeqqanut ilaqutariinnullu sullissiviit kiisalu ilaqutariit illui

  § 55 a.  Kommunini tamani meeqqanut ilaqutariinnullu sullissivinnik ikinnerpaamik ataatsimik pilersitsisoqarlunilu ingerlatsisoqassaaq. Meeqqanut ilaqutariinnullu sullissivik kommunalbestyrelsimit pilersinneqarlunilu ingerlanneqassaaq.

  Imm. 2.  Kommunalbestyrelse najugaqarfinni 1000-t sinnerlugit inulinni meeqqanut ilaqutariinnullu sullissivimmik suli pilersitsiffiunngitsumi, ilaqutariit illuinik pilersitsillunilu ingerlatsissaaq.

  Imm. 3.  Kommunalbestyrelse najugaqarfinni 1000-t ataallugit inulinni ilaqutariit illuinik pilersitsillunilu ingerlatsisinnaavoq.

  Imm. 4.  Meeqqanut ilaqutariinnullu sullissiviit aamma ilaqutariit illui meeqqanut ilaqutaanullu kiisalu angajoqqaanngortussanut pitsaaliuinermik katsorsaanermillu neqerooruteqartarnissaat siunertaavoq, tassunga ilanngullugit § 20 malillugu siunnersuineq, § 21, imm. 4, nr. 1 malillugu ikiorsiinissamik suliniuteqarneq imaluunniit § 23 malillugu angajoqqaat akisussaaffii pillugit oqaloqatigiinnernik malinnaatitsineq imaluunniit § 24 malillugu meeqqanik oqaloqateqarneq.

  Imm. 5.  Naalakkersuisut meeqqanut ilaqutariinnullu sullissiviit aamma ilaqutariit illui pillugit sukumiinerusumik malittarisassaliorsinnaapput, tassunga ilanngullugit:

1)  Innersuussineq aamma saaffigisat.

2)  Neqeroorutini piumasaqaatit minnerpaaffissaminiittut.

3)  Pisortanik oqartussaasunik, paaqqinnittarfinnik, katsorsaanissamik neqerooruteqartartunik aamma suleqataasunut namminersortunik suleqateqarnerit.

4)  Najugaqatigiiffinnik meeqqanut ilaqutariinnullu sullissivinnut atassutilinnik pilersitsinerit ingerlatsinerillu.

5)  Meeqqat illuinik meeqqanut ilaqutariinnullu sullissivinnut atassutilinnik pilersitsinerit ingerlatsinerillu.

6)  Qimarnguinnik meeqqanut ilaqutariinnullu sullissivinnut atassutilinnik pilersitsinerit ingerlatsinerillu.

Kapitali 14 b

Allaffissorneq

  § 55 b.  Inatsisartut inatsisaata matuma allaffissornikkut ingerlanneqarnissaanut kommunit aamma Naalakkersuisut pisortani IT-kkut ataatsimoorussamik aaqqissuussamik atuissapput.”

20. Kapitali 16-ip kingorna ikkunneqassaaq:

”Kapitali 16 a

Kisitsisitigut naatsorsueqqissaarneq

  § 60 a.  Kommunalbestyrelse kisitsisitigut paasissutissanik assigisaannillu, Naalakkersuisut noqqaassutigisaannik, nassiussinissamik pisussaaffeqarpoq.

  Imm. 2.  Kisitsisitigut paasissutissat assigisaallu nassiunneqartussat annertussusissaannut malittarisassanik aamma taakku qanoq nutarterneqartassanersut nassiunneqartassanersullu pillugit imm. 1 malillugu Naalakkersuisut aalajangersaasinnaapput.”

§ 2

Inatsisartut inatsisaat 1. januar 2024-mi atortuulersinneqassaaq.

Namminersorlutik Oqartussat, ulloq 20. novembari 2023

Múte Bourup Egede (atsior.)

Naalakkersuisut Siulittaasuat