§ 1

 

Pilersaarusiorneq aamma nunaminertat atorneqartarnerat pillugit Inatsisartut inatsisaanni nr. 17, 17. november 2010-meersumi, Inatsisartut inatsisaatigut nr. 34, 9. december 2015-imeersumi allanngortinneqartumi, makku allanngortinneqarput:

 

1. § 1, nr. 3, ima oqaasertalerneqassaaq:

”3) nunatsinni nunaminertat pilersaarusiornerit inuussutissarsiornikkut, isumaginninnikkut avatangiisitigullu piujuartitsilluni ineriartortitsiffiusut naapertorlugit atorneqassasut, ”

 

2. § 2-mi imm. 2-tut ilanngunneqassaaq: 

”  Imm. 2.  Inatsisartut inatsisaat aatsitassarsiornermi suliffissuarnut pilersaarusiornernut nunaminertanillu atugassiisarnernut atorneqassanngilaq. ”

 

3. § 5-imi imm. 1-ip kingorna imm. 2-tut nutaatut ilanngunneqassaaq:

”  Imm. 2.  Naalakkersuisut nuna tamakkerlugu immikkoortunut pilersaarusiornerup ataatsimut suliarinissaanik ataqatigiissaarneqarnissaanillu qulakkeerinnissapput.”

 

Imm. 2 aamma 3 tamatuma kingorna imm. 3-tut aamma 4-tut allanngortinneqassapput.

 

4. § 5, imm. 2, imm. 3-nngortoq ima oqaasertalerneqassaaq:

”  Imm. 3.  Naalakkersuisut nuna tamakkerlugu qarasaasiaq atorlugu, nunami sumiiffinnut tamanut paasissutissanik katersuiffimmik, pilersaarusianut isaaffittalimmik atugassaqartitsissapput. Qarasaasiaq atorlugu pilersaarusianut isaaffik nunaminertat nunami sumiiffiini killiliinerit kiisalu nunaminertap pineqartup inatsisitigut aalajangersakkanut pineqartunut ilaaffiinut innersuussinerit pillugit paasissutissanik imaqassaaq. Naalakkersuisut immikkoortunut oqartussaasui kommunillu nunaminertanik atuinissanut immikkoortunut pilersaarutit, nunaminertanik atugassiisarnernit killilersuutillu tigussaasumik atortussanngortinnissaannut paasissutissanik qarasaasiaq atorlugu pilersaarusianut isaaffimmut nalunaaruteqartassapput. ”

 

5. § 5, imm. 3, imm. 4-nngortoq oqaaseqatigiit aappaattut nutaatut ilanngunneqassaaq:

”Takussutissiaq qarasaasiakkut tamanut saqqummiunneqarsinnaavoq. ”

 

6. § 5-imi imm. 5-itut ilanngunneqassaaq:

”  Imm. 5.  Naalakkersuisut immikkoortunut pilersaarutit illuliornermut tunngasut tamakkulu nalunaarutigisarnissaasa suliarisarnissaat pillugit aalajangersakkanik sukumiinerusunik aalajangersaasinnaapput. Naalakkersuisut tassunga atatillugu immikkoortut sorliit immikkoortunut pilersaarusiorfiginissaat pillugit aalajangersakkanik aalajangersaasinnaapput.”

 

7. § 8 ima oqaasertaqalerneqassaaq:

”  § 8.  Kommuninut tusarniaanerit kingorna Inatsisartunut nutaamik qinersisoqareernerata kingorna kingusinnerpaamik ukioq ataaseq qaangiutsinnagu nuna tamakkerlugu pilersaarusiorneq pillugu nalunaarummik Naalakkersuisut Inatsisartunut kommunalbestyrelsinullu tunniussissapput.”

 

8. § 14, imm. 1-imi oqaaseqatigiit pingajuattut ilanngunneqassaaq: 

”Kommuninut pilersaarummi piffissaliussaq sivikinnerpaamik ukiunik 12-inik sivisussusilik ilanngunneqassaaq.”

 

9. § 14 imm. 2, nr. 2 aamma nr. 3 imatut oqaasertalerneqassaaq:

”2)  Immikkoortoq pingaarneq kommunip ataatsimut ilusiligaaneranut, sumiiffinnut immikkut pingaarnertut ilusilikkamut kiisalu kommunimi illoqarfinnut, nunaqarfinnut aammalu nunaannaap tunniuttarnissaanut pingaarnertut ilusiligaq, takuuk §§ 16 aamma 17.

3)  Immikkoortoq aalajangersakkanik imaqartoq, tassani aalajangersarneqassallutik sumiiffiup ilaanni aalajangersimasuni ataasiakkaani nunaminertanik atuinissamut aamma illuliortiternissamut aalajangersakkat pingaarnerit, takuuk § 20, aamma takuuk § 14a. ”

 

10. § 14, imm. 3 ima oqaasertalerneqassaaq:

”  Imm. 3.  Kommunalbestyrelsi aamma nunap ilaannut ataasiakkaanut nunaminertanik atuinissanut illuliortiternissanullu nunap immikkoortuinut pilersaarutinut aalajangersakkanik nassuiaasersukkanik aalajangersaasinnaavoq, taamaattorli takuuk § 27, imm. 2 aamma 3."

 

11. § 14, imm. 4, imatut oqaasertalerneqassaaq:

”  Imm. 4.  Kommunimut pilersaarut Naalagaaffiup aamma Namminersorlutik Oqartussat suliassaqarfinnut inatsisaannut il.il., § 9 malillugu nuna tamakkerlugu pilersaarusiornermut malitassanut imaluunniit inuiaqatigiit soqutigisaannut pingaaruteqartunut, takuuk § 5, imm. 4, akerliussanngilaq.”

 

12. § 14-ip kingorna ilanngunneqassaaq:

”  § 14 a. Kommunalbestyrelsip nunap ilaannut sammiviliinissamut pilersaarutinik suliaqartoqassasoq aalajangersinnaavaa.

  Imm. 2. Sammiviliinissamik pilersaarut atorlugu siunissami kissaatigisamik atuinissanut piffissap ukiut sisamat siulliit ingerlaneranni piviusunngortinneqarsinnaanngitsutut nalilerneqartumi nunap ilaannik kommunalbestyrelsi immikkoortitaqarsinnaavoq.

  Imm. 3.  Nunap ilaanut sammiviliinissamut pilersaarutinik suliaqarfiusimasunut tunngatillugu tunngaviliinissamut aalajangersakkanik pingaarnernik suliaqartoqassanngilaq. 

  Imm. 4.  Nunap ilaanut sammiviliinissamut pilersaarutinik suliaqarfiunngitsunut nunaminertanik atugassiisoqarsinnaanngilaq.

  Imm. 5.  Nunap ilaanut sammiviliinissamut pilersaarut aatsaat tunngaviliinissamut aalajangersakkanik pingaarnernik suliaqartoqarneratigut atorunnaarsinnaavoq, takuuk § 20.

  Imm. 6.  Nunap ilai sammiviliinissamut pilersaarusiorfigineqarsimasut § 45 a naapertorlugu pilersaarusiornissamut qinnuteqarnissamut periarfissiisinnaapput. ”

 

13. § 16 ima oqaasertalerneqassaaq:

”  § 16.  Kommuninut pingaarnertut ilusilersuinermi § 14, imm. 2, nr. 2-mi taaneqartumi kiisalu nunap immikkoortuinut immikkut pingaarnertut ilusilersuinermi kommunimi najugaqariaatsinut nunaannarmilu pingaarnertut ineriartornernut pilersaarutit ataatsimut nalilersuiffiginerisigut aalajangersarneqassapput.

  Imm. 2.  Imm. 1-imi kommuninut pingaarnertut ilusilersuinerit ataatsimoortinneqalernissaat kiisalu nunap immikkoortuinut immikkut pingaarnertut ilusilersuinerit taaneqartut pingaarnertut kommuninullu attaveqaasersuutit ataatsimoortinneqalersinnaanerannut siunissami ineriartortitsinissamut periarfissat killiffiannut nassuiaanermik nalilersuinermillu imaqassapput.”

 

14. § 17-imi imm. 2-p kingornagut ilanngunneqassaaq:

”  Imm. 3. Kommunalbestyrelsi agguataarinissanik imm. 2-mi sumiiffinnut killilersuinernut taaneqartunut annertunerusumik nassuiaasersukkanik aalajangersaasinnaavoq.

  Imm. 4. Kommunalbestyrelsi innutaasunut tipitigut, silaannakkut nipiliornikkullu akornutit minnerpaaffiutinnissaat siunertaralugu sumiiffiit inuussutissarsiornermut umiarsualiveqarnermullu atorneqartussat aamma sumiiffiit inissianut pisiniarfinnullu tunniunneqarsimasut akornanni minnerpaamik ataatsimut ungasissuseqarnissaannut aalajangersaasinnaavoq.”

 

15. § 19-imi imm. 3-tut ilanngunneqassaaq: 

"3) Piujuartitsilluni ineriartortitsinermut nunarsuaq tamakkerlugu, nunami namminermi najukkanilu suliniutissat."

 

16. § 19-ip kingorna qulequtaq imatut oqaasertalerneqassaaq:

”Kommunini pilersaarutit sumiiffinnut tunngasortai, pingaarnertut tunngavissanut aalajangersakkat”

 

17. § 20 ima oqaasertalerneqassaaq:

”  § 20.  Nunaminertanik atuinermut sanaartukkanullu tunngavissanut aalajangersakkat pingaarnerit § 14, imm. 2, nr. 3-mi taaneqartut makku eqqarsaatigalugit sumiiffiit ilaannut ataasiakkaanut aalajangersarneqassapput:

1)  Sumiiffiup atorneqarnissaanut siunertaq.

2)  Nunaminertanik sanaartukkanillu atuineq, taakkununnga ilanngullugit sullissiviit pisortallu kiffartuussiviisa allat inissisimaffii.

3)  Sanaartukkap suussusia angissusaalu, taakkununnga ilaatigut ilanngullugit sanaartukkat akulikissusiat, portussusiat ungasissutsimullu tunngasut malittarisassiornerat.

4)  Sumiiffiup ilaani inissiat inuussutissarsiornerlu eqqarsaatigalugit initussuseq sinneruttoq.

5)  Eqqissisimatitat eriagisassallu, taakkununnga ilanngullugit illuutit, atortut sumiiffiilluunniit eqqissisimatitat eriagisallu, pinngortitami nalillit eriagisassat kiisalu sumiiffiit kulturikkut oqaluttuarisaanermut pingaarutillit.

6)  Qaartartuusiviit, tankeqarfiit, mittarfeqarfiit, imermik katersuiveqarfiit, nalunaarasuartaaserisoqarfiit aamma nunaminertat ikuallattoqartillugu annaassiniarnermut atorneqartartut il.il. eqqaanni isumannaallisaanermut killeqarfiit.

7)  Sumiiffiit ilaasa angallannikkut sullinneqarnerat aamma pilersuinermut atortut inissisimaffii, taakkununnga ilanngullugit aqqusineqarfiit aqqusersuutinullu ikkuffiit.

8)  Sumiiffiup ilaani illoqarfimmik nutarterineq isaterinerlu.

9)  Sumiiffiup ilaata immikkoortukkaarlugu inerisarneqarnera.

10)  Sumiiffiup ilaani pineqartumi aalajangersakkat immikkut ittut, nuna tamakkerlugu soqutigisat qulakkeerneqarnissaat siunertaralugu Naalakkersuisunit aalajangersarneqarsimasut. 

11) Sumiiffiup ilaani nunaminertat atorneqanngitsut suliniutissanut qinnuteqarfioqqusaanngitsut.

  Imm. 2.  Imm. 1 naapertorlugu tunngavissatut aalajangersakkani pingaarnerni kommunip suliassanik naammassinninnissaanut kommunalbestyrelsip saniatigut oqartussaasunit allanit suliniutit immikkut ittut, akuersissutit, akuersinerit imaluunniit saneqqutsisinnaanermut akuersissutit apeqqutaassanersut nassuiarneqassaaq. ”

 

18. § 20-p kingorna qulequtaq imatut oqaasertalerneqassaaq:

”Kommunalbestyrelsip nunaminertanik atugassiisarneranut aalajangersakkat”

 

19. § 21 ima oqaasertalerneqassaaq:

”  § 21.  Nunaminertanik atugassiisarnermut aalajangersakkat § 14, imm. 2, nr. 4-mi taaneqartut kommunimut tamarmiusumut ataatsimut atuuttussanngorlugit aalajangersarneqassapput. Aalajangersakkat nunaannarmut, inoqarfinnut ataasiakkaanut, imaluunniit sumiiffiit ilaannut ataasiakkaanut aalajangersakkanik immikkut ittunik ilaneqarsinnaapput.

  Imm. 2.  Aalajangersakkat makku eqqarsaatigalugit aalajangersarneqassapput:

1)  Nunaminertanik atugassinneqarnissamut qinnuteqaatit assigiimmik suliarineqartarnissaasa qulakkeerneqarnissaa.

2)  Kommunini pilersaarusiornerni anguniakkat piviusunngortinneqarnissaat.

3)  Sanaartorfissagissaanermut aningaasartuutaasinnaasut, kiisalu aningaasaqarnikkut pissutsit allat, illoqarfiup ineriartortinneqarneranut sunniuteqartussat agguarneqarnissaat. 

  Imm 3.  Kommunalbestyrelsi § 45a naapertorlugu suliniutissanut qinnuteqartoqarnerani aamma sanaartugassanut sanaartortitsinissanullu pilersaarutini 100 kvadratmeterinik anginerusuni pilersaarutinut takussutissanik 3D-usunik qarasaasiakkut suliaasunik sanaartortitsisoq tunniusseqqullugu piumasaqarsinnaavoq.”

 

20. § 21-p kingorna qulequtaq atorunnaassaaq, taarsiullugulu ilanngunneqassaaq:

”Kapitali 5 a

Nunap immikkoortuinut pilersaarutit”

 

21. § 21-p kingorna kapitali 5 a-imi ilanngunneqassaaq:

”  § 21 a.  Kommunalbestyrelsi kapitali 6-imi malittarisassat malillugit nunap immikkoortuinut pilersaarutinik tunniussisinnaavoq. 

  Imm. 2.  Nunap immikkoortuinut pilersaarut kommunimi pilersaarummut, nuna tamakkerlugu immikkoortunut pilersaarummut, Naalagaaffiup pilersaarusiorneranut imaluunniit pingaarnertigut pilersaarusianut allanut akerliussanngilaq. 

  Imm. 3.  Inoqarfinni 500-nik sinnerlugilluunniit innuttalinni nunaminertanik atugassiinissat tunniunneqarnissaat pisinnaassappat nunap immikkoortuanut pilersaarummik suliaqartoqassaaq.

  Imm. 4.  Inoqarfinni 500-t ataallugit innuttalinni nunap immikkoortuinut pilersaarutit suliarinngikkaluarlugit nunaminertanik atugassiissut tunniunneqarsinnaavoq.”

 

22. § 21a-p kingorna qulequtaq manna ilanngunneqassaaq:

”Nunap immikkoortuinut pilersaarummi aalajangersakkat nassuiaasersukkat”

 

23. § 22 imatut oqaasertalerneqassaaq:

”  § 22.  § 14, imm. 3 malillugu nunap immikkoortuinut pilersaarummi aalajangersakkat nassuiaasersukkat pissutsinut makkununnga aalajangersarneqarsinnaapput:

1)  Sanaartukkap inissisimaffia, tassunga ilanngullugu sanaartorfissat aalajangersarneqarnerat.

2)  Sanaartukkap silataata isikkua, tassunga ilaatigut ilanngullugit ilusiliinissamut, qaliap ilusissaanut, toqqaviup portussusissaanut, atortunut aamma qalipaammik toqqaanermut aalajangersakkat.

3)  Aqquserngit pisuinnaallu aqqutaat aammalu pissutsit allat angallannermut pingaarutillit, taakkununnga ilanngullugit nunaminertanut angallaffiusunut aqqutit aamma angallannerit assigiinngitsut avissaartinneqarnissaat.

4)  Sumiiffiup ilaani nunaminertat sanaartorfiusussaanngitsut aamma pisariaqarpat sunngiffimmut tunngatillugu sanaartornerit.

5)  Aqqusersuutit inissisimaffiat, taakkununnga ilanngullugit innaallagissamik imermillu pilersuinerit.

6) Ilusiliinissaq, nunaminertanik sanaartorfiunngitsunik atuineq aserfallatsaaliinerlu, nunaminertat sanaartorfigineqarsimanngitsut ilanngullugit, tassunga ilanngullugit aamma nunagissaaneq, ungaloqarfiit, naasoqarfinnik eriaginninneq kiisalu aqqusinernik angallaffiusunillu allanik qullilersuineq.

7)  Sanaartukkanik pioreersunik avatangiisiinillu qaninnerusunik allanngutsaaliuineq, taamaalilluni illu aatsaat kommunalbestyrelsip akuersineratigut isaterneqarsinnaalluni, allanngortiterneqarsinnaalluni allatulluunniit allannguiffigineqarsinnaalluni.

8)  Pinngortitamik illersuinissamut soqutigisat isumagineqarnissaat kiisalu sumiiffiit nunataasa nalillit allanngutsaaliorneqarnissaat.

9)  Nunalerinermi soqutigisat isumagineqarnissaat, tassunga ilanngullugit nunaateqarfiit immikkut naleqartitat qularnaarnissaat.

10)  Sanaartukkanik nutaanik atuilernissamut sumiiffinni pilersaarutip iluaniittuni imaluunniit avataaniittuni atortunut ataatsimoorussanut, angallavinnut imaluunniit pilersuinermi teknikikkut atortoqarfinnut attaveqaatinik sanaartorneq attaviliinerluunniit.

11)  Sanaartukkanik ataatsimoorussanik sanaartornermut atatillugu aningaasaqarnikkut pissutsinik iluarsiineq, tassunga ilanngullugit atuisinnaatitaaffinnik pigisaqartut peqatigiiffissaannik pilersitsineq, taakku ilaasortaanissamut pisussaaffeqarnerat aamma peqatigiiffiup nunaminertanik ataatsimoorussanik atortunillu ataatsimoorussanik sanaartornermik, ingerlatsinermik aserfallatsaaliuinermillu isumagisaqarnissamut pisinnaatitaaffeqarnera pisussaaffeqarneralu.

12)  Avatangiisini nipimik, pujoralammik, tipimik allamillu avatangiisinut ajoqutaasinnaasunik killilersuineq, taakkununnga ilanngullugit nunaminertat illullu sumiiffiit saniliusut eqqarsaatigalugit atorneqarnissaannut killeqarfiliussaasinnaasut.

13)  Sanaartukkani nutaani sanaartukkanut nukimmik annikitsumik atuisunut kommunalbestyrelsip anguniagassatut aalajangersagaat aalajangersimasut malinneqarnissaat pillugu piumasaqaat. Sanaartornissamut malittarisassani minnerpaaffiliinissamut piumasaqaat eqqortinneqassaaq.

14) Sumiiffiit ilaanni inissiat tamarmiusut procentiisa aalajangersimasut ilaat nalinginnaasumik inissiaanissaannut imaluunniit sanaartorfissanut attuumassuteqarlutik piumasarineqartut aalajangersaaffiginissaannut piumasaqaat.

15) Pakkersimaarinninnissamut iliuusissat pilersinnissaat siunertaralugu sumiiffiit qarsutsisoqarnissaanut imaluunniit aseroriartortoqarnissaanut ulorianartorsiortut toqqartarnissaat.

16) Suliniutissanut piujuartitsilluni ineriartortoqarnissaanut qulakkeerinnittunut iluaqutaasussanullu piumasaqarneq.

  Imm. 2.  § 14, imm. 3 malillugu sumiiffiit ilaannut pissutsinut imm. 1-imi taaneqartunut aalajangersakkanik aalajangersaasoqarnissaa pillugu Naalakkersuisut aalajangersinnaapput.”

 

24. § 25, imm. 2, ima oqaasertalerneqassaaq:

”  Imm. 2.  Kommunalbestyrelsip kommunimut pilersaarutip qarasaasiakkut suliarineqarluni tamanut nalunaarutigineqartup assinga ataaseq Naalakkersuisunut aamma oqartussanut § 23, imm. 6 malillugu pilersaarutissatut siunnersuutip tamanut nalunaarutigineqarnera pillugu allakkatigut nalunaarfigineqarsimasunut nassiutissavaa.”

 

25. § 25, imm. 3, imatut oqaasertalerneqassaaq:

”  Imm. 3.  Kommunip kommunimut pilersaarut saqqummiunneqartoq § 5, imm. 3 malillugu qarasaasiakkut nunami sumiiffinnut paasissutissaasivimmut ikkutissavaa, taamaalilluni taanna tamanit pissarsiarineqarsinnaassalluni.”

 

26. § 27, imm. 2 aamma 3 ima oqaasertalerneqassapput:

”  Imm. 2.  Nuna tamakkerlugu pilersaarusiornerup aamma kommunimut pilersaarutip naammassineqarnissaata qularnaarneqarnissaa pisariaqarpat, kommunalbestyrelsi § 14, imm. 3 malillugu sumiiffiup ilaanut nunap immikkoortuanut pilersaarummut aalajangersakkanik nassuiaasersukkanik saqqummiussaqassaaq.

  Imm. 3.  Illuliortiternissanut sanaartornissanulluunniit annertuunut imaluunniit pingaarutilinnut nunaminertamik atuinissamik akuersissummik tunniussinnginnermi aammalu ineqarfinnik annertuunik pingaarutilinnilluunniit isaterilinnginnermi, sumiiffiup ilaani aalajangersimasumi nunaminertanik atuinermut illuliortiternermullu pilersaarummut aalajangersakkanik nassuiaasersukkanik aalajangersagaqarnissaa, takuuk § 14, imm. 3, kommunalbestyrelsip isumannaassavaa.”

 

27. § 34, imm. 2-p kingorna immikkoortutut nutaatut ilanngunneqassaaq:

”  Imm. 3.  Periusissatut siunnersuut imm. 1-imi taaneqartoq piujuartitsilluni ineriartornerup qanoq isilluni kommunip pilersaarutaani piviusunngortinneqarsinnaaneranut paasissutissanik imaqassaaq.”

 

28. Kapitali 8-mi kapitalip qulequtaata "Nunaminertanik atugassiisarneq"-p kingorna immikkoortup qulequtaatut nutaatut ilanngunneqassaaq:

”Nassuiaatit”

 

29. § 36-ip kingorna kapitali 8-mi ilanngunneqassaaq:

”  § 36 a.  Nunaminertanik atugassiisarneq illuutit aalajangigaasut imaluunniit sanaartukkat sananissaannut, allanngortinnissaannut imaluunniit isaternissaannut imaluunniit tamakku atornissaannut nunaminertamik atuisinnaanermut pisinnaatitaaffiuvoq.

  Imm. 2.  Nunaminertanut akuersissutit nunaminertanut sanaartukkanut aalajangigaanngitsunut, illuutinut atortunullu nunaminertanut atuinissanut pisinnaatitaaffiupput. Nunaminertanut akuersissutit assersuutigalugu containerip toqqortarinissaanut, angallammik ukiuunerani inissiinermut il.il. tunniunneqartarput.

  Imm. 3. Sanaartorfissaq kommunimi imaluunniit nunap immikkoortuanut pilersaarummi nunaminertamik atugassiinissaq pillugu qinnuteqarfiusinnaasumi nunaminertaavoq killeqartitaq. Sanaartorfiusussat illuutip siunissami sumut atorneqarnissaanut takutitsiffiussapput.

 

  § 36 b.  Nunaminertanik atugassiisarnerit atugassiinermi tamakku illuutinut sanaartukkanullu utaqqiisaasutut isikkulinnut nalunaarutigineqarsimanngitsutut isikkoqarsimappata ataavartuussapput, tassalu nunaminertanut oqartussaq piffissami killeqartumi nunaminertanik atugassiinissamut nalunaaruteqarsimatillugu.

  Imm. 2.  Nunaminertanik atugassiisarnerit ukiut 5-it tikillugit killeqartinneqarput, ukiullu 5-it angullugit sivitsuiffigineqarsinnaallutik. Nunaminertanik inuussutissarsiornermi atugassamik ilaqartumik atugassiinermi ukiut tallimakkaarlugit sivitsuisarnissaq piumasaqaataanngilaq.

  Imm. 3.  Nunaminertanik atugassiisarneq pilersaarummi tunngavigineqartumi imaluunniit nunaminertamut pineqartumut nunaminertamik atugassiinissami allanngornerit kingunerisaannik sivikinnerpaamik qaammatinik 3-nik piffissaliinikkut utertinneqarsinnaavoq.

 

  § 36 c.  Nunaminertanik atugassiinerit nunaminertanik atugassiinertut pingaarnertut nunaminertanik atugassiinerit nunaminertanullu akuersissutit allat atasut ilaatillugit nalunaarutigineqassapput.”

 

30. § 38, imm. 4, ima oqaasertalerneqassapput: 

”  Imm. 4.  Nuna tamakkerlugu pilersaarutinut najoqqutassaq allallu naapertorlugit akuersissut Naalakkersuisunit tunniunneqarsinnaavoq.”

 

31. § 38-mi imm. 5-itut ilanngunneqassaaq:

”  Imm. 5. Naalakkersuisut kommunalbestyrelsip nunaminertanik aqutsinera pillugu malittarisassanik sukumiinerusunik aalajangersaasinnaapput.”

 

32. § 40 ima oqaasertalerneqassaaq:

“  § 40.  Nunaminertanik atugassiisarneq pillugu qarasaasiakkut nunami sumiiffinnut paasissutissiivimmi, takuuk § 5, imm. 3 nunaminertamik qinnuteqarnernut ilitsersuut aqqutigalugu qarasaasiakkut pisinnaapput.

  Imm. 2.  Qinnuteqaatip ilusissaa imarisassaalu pillugit malittarisassanik sukumiinerusunik Naalakkersuisut aalajangersaasinnaapput.”

 

33. § 42, imm. 2, ima oqaasertalerneqassaaq:

”  Imm. 2.  Qinnuteqaatigineqartoq sumiiffiup ilaanut nunap immikkoortuanut aalajangersakkanut pingaarnernut atuuttunut naapertuussimappat imm. 1 naapertorlugu tamanut saqqummiussinissamik piumasaqaat saneqqunneqarsinnaavoq.”

 

34. § 45-mi imm. 5-itut ilanngunneqassaaq:

”  Imm. 5.  § 41 naapertorlugu sanaartorfissanik nalunaaruteqarnermi nunaminertaq qinnuteqartumut qaammatini arfinilinni kommunalbestyrelsimit immikkoortinneqarsinnaavoq. Sanaartorfissanik nunaminertanut immikkoortitsinerit sivitsuiffigineqarsinnaanngillat.”

 

35. § 45a-mi imm. 8-9-tut ilanngunneqassapput: 

”  Imm. 8.  Kommunalbestyrelsip sumiiffiup ilaanut atuisinnaanermut pisinnaatitaaffik qinnuteqartumut immikkoortissinnaanngilaa, matumani tamanna sioqqullugu kommunip qinnuteqartullu akornanni attartornissamut pisinissamulluunniit isumaqatigiissummik sumiiffiup ilaanut tunngasumut atsiortoqarsimanngippat. 

  Imm.  9.  Suliniutissamut pilersaarut taamaallaat piffinnut atuuttunik nunaminertanut pisinnaatitaaffigineqanngitsunut atuisinnaanermullu pisinnaatitaaffigineqanngitsunullu tunngasinnaavoq.”

 

36. § 48 ima oqaasertalerneqassaaq:

”  § 48.  Nunaminertanik atugassiinerit, nunaminertanut akuersissut atuinissamullu pisinnaatitaaffiit nutaat qarasaasiakkut nunami sumiiffinnut paasissutissiivimmi,takuuk § 5, imm. 3, nalunaarsussallugit nunaminertanut oqartussaq pisussaaffeqarpoq.

  Imm. 2.  Inoqarfinni pisinnaatitaaffiit pioreersut misissuiffigissallugit nalunaarsussallugillu nunaminertanut oqartussaq pisussaaffeqarpoq, taamaasilluni nunaminertanik atugassiinerit eqqortumik nalunaarsorneqassammata aammalu kommunimi nunaminertanut pisinnaatitaaffinnut atuuttunut ataatsimut takussutissaqarnissaq isumagineqarsinnaassammat.

  Imm. 3.  Naalakkersuisut nunaminertat atuinissamullu pisinnaatitaaffiit nalunaarsortarnissaat pillugit malittarisassanik sukumiinerusunik aalajangersaasinnaapput.”

 

37. § 50, imm. 1-3-mi ima oqaasertaliisoqassaaq: 

”  Immikkut akuersissuteqarneq sumiiffiup ilaanut aalajangersimasumut kommunimut pilersaarummi aalajangersakkat tunngaviinut akerliunngippat, sumiiffiup ilaanut aalajangersimasumut aalajangersakkat sukumiisut, takuuk § 14, imm. 3, saneqqunneqarnissaannut immikkut akuersissuteqarnerit kommunalbestyrelsimit nalunaarutigineqarsinnaapput.

  Imm. 2.  Sumiiffiup ilaanut tunngaviusumik aalajangersagaq pingaarneq, tassani imaritinneqartut Namminersorlutik Oqartussani naalagaaffimmiluunniit oqartussaasumik isumaqatigiissuteqarnikkut aalajangersarneqarsimatillugit, aatsaat oqartussaasup pineqartup akuersineratigut saneqqunneqarsinnaavoq.

  Imm. 3.  Sumiiffiup ilaanut aalajangersakkanut atuuttunut nikinganerit ingerlaqqittut sumiiffiup ilaanut pineqartumut tunngaviusumik aalajangersakkat pingaarnerit nutaat aalajangersaaffiginerisigut kommunimut pilersaarummut ilassutip nutaap pigilerneratigut aatsaat suliarineqarsinnaapput.”

 

38. § 54, imm. 1 ima oqaasertalerneqassaaq:

”  Kommunalbestyrelsi nunaminertanik atugassiisarneq, nunaminertamik akuersineq pillugu qinnuteqaatinut aamma suliniutissanut qinnuteqaatinut atatillugu sulianik suliarinninnermut akiliutissanut kommunit ileqqoreqqusaat aqqutigalugu aalajangersaasinnaavoq akiliisitsiniarsinnaallunilu.”

 

39. § 56, imm. 5, ima oqaasertalerneqassaaq:

”  Imm. 5.  Naalakkersuisut aalajangiineri aalajangiinerit tamanut saqqummiunneqarnerisa kingorna qaammatit 6-it qaangertinnagit Kalaallit Nunaanni Eqqartuussivimmut oqartussatut siulliusumut suliassanngortinneqarsinnaapput.”

 

§ 2

 

Inatsisartut Inatsisaat ullormi 1. januar 2024 atuutilissaaq.

 

 

Kalaallit Nunaanni Namminersorlutik Oqartussat, ulloq 20. novembari 2023

 

 

Múte Bourup Egede (atsior.)

Naalakkersuisut Siulittaasuat