§ 1

Nioqqutissanik eqqussuinermi akitsuutit pillugit Inatsisartut inatsisaanni nr. 19, 30. oktober 1992-imeersumi, Inatsisartut inatsisaatigut nr. 12, 21. november 2022-mi kingullermik allanngortinneqartumi makku allannguutigitinneqarput:

1. § 1, stk. 1, nr. 6 aamma nr. 6 a, oqaasertalerneqarpoq:

”Nr. 6.  Puut imeruersaatinik imallit tamarmik, tassunga ilanngullugit pikkunarsakkat paarnallu saftii, puut immuk tunngavigalugu imeruersaatinik tunisassianik imallit pinnagit, takujulli nr. 6 a.

a)  pooq ataaseq ilanngaaseereerluni 0,25 literi tikillugu imalik: 1 kr. 40 øre
b)  pooq ataaseq ilanngaaseereerluni 0,25 literi sinnerlugu imalik: 2 kr. 90 øre.

Nr. 6 a.  Akileraartussaanngitsut tassaapput: Puut immiaaqqanik aamma imeruersaatinik sunilluunniit kulsyrimik akullit tuneqqinneqarnissaat siunertaralugu inuussutissarsiortunit sumiiffinnut Qaanaamut, Ittoqqortoormiinut imaluunnit Tasiilamut eqqussorneqartut.”

2. § 1, imm. 1, nr. 13, ima oqaasertaqarpoq:

”Nr. 13.  Savaaqqat savallu neqaat taakkunanngalu nioqqutissiat.

a)  Nutaat, nillataartitat, qerititat, tarajortikkat, taratsuni aatsitaniittut, panertut imaluunniit pujuukkat, nioqqutissat allattorsimaffianni 0204.10.00.0-imit 0204.43.00.0 ilanngullugu allassimasut kiisalu nioqqutissat allattorsimaffianni ukunani inissisimasut 0206.80.99.0-imi, 0206.90.99.0-imi aamma 0210.90.11.0-imi, 0210.90.19.0-imi aamma 0210.90.60.0-imi kg.-imut: 25 kr. 00 øre.

b)  Nioqqutissat allat, piariikkat imaluunniit aqerlortikkat, savaaqqat savallu neqaannit nioqqutissiat, nioqqutissat allattorsimaffianni 1602.10.00.0-imi, 1602.90.71.0.10-mi aamma 1602.90.79.0.10-mi allassimasut kg.-imut: 25 kr. 00 øre.”

3. § 1, imm. 1-imi nr. 14, 15 aamma 17 atorunnaarsinneqarput.

4. § 3 a, imm. 3, ima oqaasertaqarpoq:

”  Imm. 3.  Imm. 1 aamma 2 naapertorlugit neqinik agguinissamut atortorissaarutit inuussutissalerinermut inatsisit atuuttut naapertorlugit inuussutissanik nakkutilliinermik oqartussaasumit akuerineqartussaapput.”

5. § 8 ima oqaasertaqarpoq:

”  § 8.  Unioqqutitsineq akitsuutip akilinngitsoorneqartup marloriaataanit annerusumik akiliisitsinermik kinguneqassangatinneqanngippat aamma arsaarinnissuteqartoqassangatinneqanngippat, akileraaruseriffiup pineqartoq nalunaarfigisinnaavaa suliassaq eqqartuussinertaqanngitsumik naammassineqarsinnaasoq, unioqqutitsisoq unioqqutitsisimalluni nassuerpat akiliisitsissutissarlu nalunaarutigineqartoq, tak. § 4, piffissaliussaq erseqqinnerusumik taaneqartoq, qinnuteqarnikkut sivitsorneqarsinnaasoq qaangiutsinnagu akilerumallugu piareersimappat, aammalu nioqqutissat arsaarinnissutigineqarnissaat piareersimaffigippagu.
  Imm. 2.  Umiarsuarni timmisartuniluunniit nunanut allanut angalasartuni inuttaasunut, inunnullu nunami maani najugaqavissuunngitsunut tunngatillugu akileraaruseriffiup pillaatitut akiliisitsissutissaq akitsuutillu akilerneqarnissaat kiisalu aamma arsaarinnissuteqarnissaq pillugit aalajangiigallarsinnaavoq. Aalajangiiffigineqartup aalajangiineq pillugu nalunaarfigineqarnermi kingorna ullut 14-it qaangiutsinnagit piumasarisinnaavaa, aalajangiineq eqqartuussisunut suliassanngortinneqassasoq. Aalajangiineq eqqartuussisunut suliassanngortitsisinnaaneq, taamaaliornissamullu piffissarititaasoq pillugit paasissutissamik imaqassaaq. Suliassap eqqartuussisunut suliassanngortinneqarnera akileraaruseriffimmit isumagineqassaaq. Pineqartup suliassamik eqqartuussisunut suliassanngortitsinissamik piumasaqarnermigut, eqqartuussisunit aalajangiisoqarserlugu, akileraaruseriffiup aalajangiineranik malinnittussaanini avaqqussinnaanngilaa.
  Imm. 3.   Kalaallit Nunaanni pineqaatissiissuteqarnissamut unnerluussuteqartarnermut aalajangersakkat eqqartuussisarnermi inatsimmi kap. 38-miittut, nalunaarummut imm. 1-imi taaneqartumut tunngatillugu atorneqarsinnaapput.
  Imm. 4.  Qanoq iliuuseqartoqaqqissanngilaq:
1)  akiliisitsissut piffissaagallartillugu akilerneqarpat, aalajangerneqarnermiluunniit kingorna akiliisitsiniarnikkut akilersinneqarpat, aamma
2)  nioqqutissat arsaarinnissutigineqarpata.

  Imm. 5.  Akiliisitsissutit Nunatta Karsiata pisassarai.

  Imm. 6. Arsaarinnissutit Nunatta Karsianut iluaqutissanngortinneqassapput.”

6. § 9 atorunnaarsinneqarpoq.

§ 2

Inatsisartut inatsisaat ulloq 1. januar 2024 atuutilissaaq.

Namminersorlutik Oqartussat, ulloq 20. novembari 2023

Múte Bourup Egede (atsior.)

Naalakkersuisut Siulittaasuat