§ 1

Inuussutissarsiutinik ilinniartitsinerit aamma inuussutissarsiutinik ilinniartitsinerup iluani pikkorissaanerit pillugit Inatsisartut inatsisaanni nr. 10-mi, 19. maj 2010-meersumi, Inatsisartut inatsisaatigut nr. 3-kkut, 4. juni 2012-imeersukkut, Inatsisartut inatsisaatigut nr. 6, 6. juni 2016-imeersukkut aammalu Inatsisartut inatsisaatigut nr. 15-ikkut, 12. juni 2019-imeersukkut allanngortinneqartumi, tulliuttut allanngortinneqarput:

1. § 2, imm. 1, imatut oqaasertalerneqarpoq:

"Tunngaviusumik inuutissarsiutinik ilinniartitsineq tassaavoq paarlakaattumik ilinniarneq, sungiusarluni sulinerup ilinniarfimmiinnerullu paarlakaaffigisaat. Tunngaviusumik inuutissarsiutinik ilinniartitsinermut ilaapput tunngaviusumik ilinniartitsissutit, ilinniartitsissutit suliamut tunngasut, ilinniartitsissutit immikkut ittut aamma ilinniartitsissutit nammineq toqqarneqarsinnaasut."

2. Kapitali 3-mi qulequtaq imatut oqaasertalerneqassaaq:

”Ilinnialernissamut piumasaqaatit akuerisaanissarlu”

3. § 7, imm. 1-mi “imm. 2-4” imatut allanngortinneqassaaq: "imm. 2-5".

4. § 7 imm. 3-p kingorna immikkoortutut nutaatut ilanngunneqassaaq:

”  Imm. 4.  Tunngaviusumik inuutissarsiummik ilinniakkamik aallartitsinissamut piumasaqaataavoq, qinnuteqartoq lærlingitut imaluunniit ilinniartinneqarnissamik isumaqatigiissuteqarsimanissaa, taamaattorli § 7 a tak.”

Imm. 4 aamma 5 taava imm. 5 aamma 6-nngussapput.

5. § 7-ip kingorna una ikkunneqarpoq:

”  § 7 a.  § 7, imm. 4 naapertorlugu lærlingetut imaluunniit ilinniartinneqarnissamik isumaqatigiissuteqarnissamut piumasaqaat naammassineqanngikkaluartoq qitiusumik inuussutissarsiutinillu ilinniarfiit tunngaviusumik inuutissarsiummik ilinnialernissamut qinnuteqartunut akuersisassapput

1)  § 10, imm. 4 naapertorlugu sungiusarluni sulineq ilinniarfimmi ingerlanneqassappat, imaluunniit

2)  Naalakkersuisut akuerereerpagu ilinniartitaanermi pineqartumi § 5, imm. 3, naapertorlugu ilinniartitsinermut pilersaarummi aalajangersarneqassasoq ilinnialertussamik akuersisoqarsinnaasoq naak qinnuteqartup ilinnialernissamut akuerineqarnerani lærlingitut imaluunniit ilinniartinneqarnissamik isumaqatigiissuteqarsimanngitsoq.

  Imm. 2.  Lærlingetut imaluunniit ilinniartinneqarnissamik isumaqatigiissuteqarnissamut piumasaqaatitaqanngitsumik ilinniartitsinermut pilersaarummik akuersissuteqarnissamut Naalakkersuisut piumasaqaatit erseqqinnerusut aalajangersarsinnaavaat, tassunga piumasaqaataalluni ilinniarfik kingusinnerusukkut ilinniarnerup ingerlanerani ilinniartut suliffimmik sungiusarfissaannik imaluunniit tassunga assingusumik, assersuutigalugu ilinniarfimmi sulinermik misiliinermik, aaqqissuussissasoq.”

§ 2

Inatsisartut inatsisaat ulloq 1. august 2023 atuutilissaaq.

Namminersorlutik Oqartussat, ulloq 13. juuni 2023

Múte Bourup Egede (atsior.)

Naalakkersuisut Siulittaasuat