Inatsisartut Naalakkersuisullu pillugit Inatsisartut inatsisaat nr. 26, 18. november 2010-meersumi § 23, imm. 1 naapertorlugu makkua aalajangersarneqarput:

Atuuffia

  § 1.  Kaajallaasitaq Naalakkersuisut naalakkersuisoqarfiinut taakkunanilu immikkoortortanut atuutsinneqassaaq, tak. suliassaqarfiit agguarneri pillugit kaajallaasitaq (Suliassaqarfiit agguataarnerat).
  Imm. 2.  Matumani suliffeqarfiit namminersortitat immikkoortortallu nammineertut ilaatinneqanngillat.

Qarasaasiaqarnikkut paasissutissiisarnikkullu isumannaallisaanermi oqartussaaffeqarfik

  § 2.  Digitalimik Sullissinermut Aqutsisoqarfik Qarasaasiaqarnikkut Paasissutissiisarnikkullu isumannaallisaanermi oqartussaaffeqarfiuvoq. 
  Imm. 2.  Qarasaasiaqarnikkut Paasissutissiisarnikkullu isumannaallisaanermi oqartussaaffeqarfiup qarasaasiaqarnikkut ataatsimut atortorissaarutinut piginnittup atortuutai isumagissavai. 
  Imm. 3.  Data-nik akisussaasut oqartussaaffeqarfiit kvartalikkaartumik nalunaarusiaat tunngavigalugit Qarasaasiaqarnikkut Paasissutissiisarnikkullu isumannaallisaanermi politikki malinneqarnersoq Qarasaasiaqarnikkut Paasissutissiinikkullu isumannaallisaanermi oqartussaaffeqarfik kvartalikkaartumik naalakkersuisoqarfiit pisortaqatigiivinut nalunaarusiortassapput, tak. § 9, imm. 4.

  § 3.  Qarasaasiaqarnikkut Paasissutissiisarnikkullu isumannaallisaanermi oqartussaaffeqarfiup qarasaasianik piginnittut paasissutissanillu isumannaallisaanermut akisussaasut sulineranni ikorfartuisassapput.

Qarasaasiaqarnikkut atortorissaarutinik akuersereertarneq

  § 4.  Qarasaasiaqarnikkut atortorissaarutit qarasaasiaqarnikkut ataatsimut attaveqaqatigiinnermi malittarisassat qarasaasiaqarnikkut paasissutissiisarnikkullu isumannaallisaanermut qaffasissumik isumannaallisagaasutut aalajangersakkat malittarineqassapput.

 § 5.  Immikkoortortaq pisiniartarnermut akisussaasoq neqeroortitsissutinik tamanut saqqummiussinnginnermi imaluunniit qarasaasiaqarnikkut pisiortorfimmik isumaqatigiinniaqatigiinnginnermi neqeroortitsissutinut piumasaqaatit Qarasaasiaqarnikkut Paasissutissiisarnikkullu Isumannaallisaanermut Oqartussaqarfimmut akuersititsereersimassaaq imaluunniit isumaqatigiinniarnermut saqqummiisimassaaq.
  Imm. 2.  Qarasaasiaqarnikkut Paasissutissiisarnikkullu Isumannaallisaanermut Oqartussaqarfiup akuersereernerani § 4, imm. 1 naapertorlugu malittarisassat tamaasa eqquutsinnissaat pisariaqarpoq.

  § 6. Immikkoortortaq pisiniartarnermut akisussaasoq isumaqatigiissummik atsiunnginnermi imaluunniit qarasaasiaqarnikkut atortorissaarutinik pisiniarnissamut isumaqatigiissutissatut tunngavissap inissinnginnarani Qarasaasiaqarnikkut Paasissutissiisarnikkullu Isumannaallisaanermut Oqartussaqarfimmit akuerineqaqqaassaaq, matumani isumaqatigiissutip tunngaviani periarfissat allat, suliassat nutaat imaluunniit inniminniinerit piulertussat ilanngullugit.
  Imm. 2.  Isumaqatigiissutip tunngaviani erseqqissaassutitut nalunaarusioqqusisoqarpat atuilernermullu nalunaarusioqqusisoqarluni, nalunaarutit inaarutaasumik akuersissutiginnginnaranni taakku Qarasaasiaqarnikkut Paasissutissiisarnikkullu Isumannaallisaanermut Oqartussaqarfimmut oqaaseqarfigisussanngorlugit saqqummiunneqartassapput.
  Imm. 3.  Qarasaasiaqarnikkut Paasissutissiisarnikkullu Isumannaallisaanermut Oqartussaqarfiup uppernarsaatinik allanik Qarasaasiaqarnikkut pisiortorfiup isumannaallisaanermut piumasaqaatinik malinninneranik piumasaqaateqartunik takutitsisoqarnissaanik piumasaqaateqarsinnaavoq, tak. § 4, imm. 1. Matumani ISAE 3000 kukkunersiuinermut uppernarsaat imaluunniit allagaatit assingusut kiisalu isumannaallisaanermut qaffasissumik ingerlanneqassasoq qulakkeerniarlugu pisiortorfimmut ilanngullugu.

Naalakkersuisoqarfinni pisortaqatigiit

  § 7.  Naalakkersuisoqarfinni pisortaqatigiit ukiut sisamakkaarlugit Qarasaasiaqarnikkut Paasissutissiisarnikkullu isumannaallisaanermi politikki pingaarneq ukiunut tulliuttunut atuuttussaq Qarasaasiaqarnikkut Paasissutissiisarnikkullu isumannaallisaanermi oqartussaaffeqarfimmiit inassuteqareerneratigut akuersissuteqartuusassapput. 
  Imm. 2.  Naalakkersuisoqarfinni pisortaqatigiit Qarasaasiaqarnikkut Paasissutissiisarnikkullu isumannaallisaanermut tunngasut ataatsimoorunneqartut pillugit malittarisassat aamma politikkit Qarasaasiaqarnikkut Paasissutissiisarnikkullu isumannaallisaanermi oqartussaaffeqarfimmit inassuteqartoqareerneratigut akuersissutigisassavaat. Matumani assersuutigalugu pineqarput:
1)  Qarasaasiaqarnikkut atortuni nalorninartoqartillugu tunngavissanik aalajangersaaneq,
2)  sulisut aamma pisiortorfiusup Qarasaasianik atortunut isersinnaanerannut pisinnaatitsissutit isersinnaanermullu misissuisarnermi malitassat,
3)  angalanermi Qarasaasianik atortunut isersinnaaneq,
4)  atortut angallassinnaasat atortarnissaannut piumasaqaatit,
5)  Qarasaasianik atortut ataatsimoorussat atornissaannut malittarisassat,
6)  angerlarsimaffimmi suliffittut sulinissamut piumasaqaat.

Qarasaasiaqarnikkut paasissutissiisarnikkullu isumannaallisaanermi ataatsimiititaliaq

  § 8.  Qarasaasiaqarnikkut paasissutissiisarnikkullu isumannaallisaanermi ataatsimiititaliaq inuttaqassaaq naalakkersuisoqarfimmi pisortanik makkunanngaanneersunik:
1) Naalakkersuisut Siulittaasuata Naalakkersuisoqarfia
2) Nunanut Allanut Pissutsinut Naalakkersuisoqarfik aamma
3) Attaveqaqatigiinnermut Naalakkersuisoqarfik.
  Imm. 2. Qarasaasiaqarnikkut paasissutissiisarnikkullu isumannaallisaanermi ataatsimiititaliaq qaammatit pingasukkaat iluini ikinnerpaamik ataasiarluni ataatsimiittassaaq. Ataatsimiinnermi qarasaasiaqarnikkut paasissutissiisarnikkullu isumannaallisaanerup qaffasissusaa nalinginnaasup annertusinissaanut suliniutit suliarineqarnissaat pillugit ataatsimiititaliaq aalajangiisassaaq. Aalajangiisarnerit pisumi siooranartut qaffasissusaat qaammatillu pingasukkaarlugit nalunaarusiarineqartut tunngavigalugit pisassapput, tak. § 2, imm. 3.
  Imm. 3. Isumannaallisaanermi annertuumik pisoqartillugu Qarasaasiaqarnikkut paasissutissiisarnikkullu isumannaallisaanermi oqartussaqarfiup Qarasaasiaqarnikkut paasissutissiisarnikkullu isumannaallisaanermi ataatsimiititaliaq sapinngisamik piaarnerpaamik ataatsimiigiaqqusassavaa.
  Imm. 4.  Qarasaasiaqarnikkut paasissutissiisarnikkullu isumannaallisaanermi ataatsimiititaliaq pisuni immikkut ittuni aalajangiisinnaallunilu pinartunik iliuuseqarnissamut aalajangiisassaaq.
Imm. 5.  Qarasaasiaqarnikkut paasissutissiisarnikkullu isumannaallisaanermi ataatsimiititaliaq aalajangiisassaaq qarasaasiaqarnikkut atortorissaarutini qarasaasiaqarnikkut ataatsimut attaveqaqatigiinnermi piumasaqaatit malinneqanngippata, tak. § 4, ataatsimut attaveqaqatigiinnermit peerneqarsinnaasut. Immikkut attaveqaammut nuunnermi tamatumalu kingunerisaanik ingerlatsinermut, attassiinnarnissamut, allaffissornermut, qarasaasiaqarnikkut paasissutissiisarnikkullu isumannaallisaanikkut illersuinermut aningaasartuutit oqartussaqarfiup qarasaasiaqarnikkut atortorissaarutinik piginnittup aningaasartuutigissavai.
  Imm. 6.  Pisuni pisariaqavissortuni siulittaasoq kisimiitilluni aalajangiisinnaavoq imaluunniit ilaasortat marluullutik ataatsimut aalajangiisinnaapput.

Oqartussaaffeqarfiit ataasiakkaat akisussaaffii

  § 9.  Oqartussaaffeqarfimmi pisortatut qullersaasoq Qarasaasiaqarnikkut paasissutissiisarnikkullu isumannaallisaanermi politikkip atulersinneqarnerani, malitseqartinneqarnerani malinneqarneranilu akisussaasuussaaq.
  Imm. 2.  Qarasaasiatigut atortunik piginnittumik paasissutissiisarnikkullu isumannaallisaanermut akisussaasumik ikinnerpaamik ataatsimik toqqarneqassaaq. Inuk ataasiusinnaavoq.
  Imm. 3.  Oqartussaaffeqarfiit qarasaasiatigut atortunik ataatsimoorussillutik Digitalimik Sullissinermut Aqutsisoqarfimmut tunngatillugu atuisuusut Qarasaasiatigut atortunik piginnittumik toqqaasariaqanngillat. Assinganik oqartussaqarfinnut aningaasaqarnikkut sulisoqarnikkullu allaffissornermi qarasaasiatigut atortorissaarutinik Inussuk IT-mit atugassanngortinneqartunik atuisunuttaaq atuuppoq.
  Imm. 4. Oqartussaaffeqarfiit ingerlatsinermut atortuminnut suliassaminnut Digitalimik Sullissinermut Aqutsisoqarfimmut isumaqatigiissuteqarnikkut suliassanik Digitalimik Sullissinermut Aqutsisoqarfimmut tunniussisinnaapput. Taamaalilluni Qarasaasiaqarnikkut atortunik Digitalimik Sullissinermut Aqutsisoqarfik piginnittuulissalluni.
  Imm. 5.  Data-nik unioqqutitsisoqartillugu isumannaallisaanermullu tunngatillugu allatigut pisoqartillugu kvartalikkaartumik nalunaarusiortoqartassaaq, matumani isumannaallisaanermut tunngatillugu pisuni nalorninartutut qulakkeerneqartut taavalu nalorninartut iluarsinissaannut iliuuserineqartut ilanngullugit. Kvartalikkaartumik nalunaarusiaq Qarasaasiaqarnikkut paasissutissiisarnikkullu isumannaallisaanermi oqartussaaffeqarfimmut tunniunneqartassaaq.
  Imm. 6.  Nalorninartutut kingunerisassatullu misissoqqissaakkat Qarasaasiaqarnikkut paasissutissiisarnikkullu isumannaallisaanermi oqartussaaffeqarfimmut tunniunneqartassapput.

  § 10.  Qarasaasiatigut atortunik piginnittutut ikinnerpaamik makku suliassaapput:
1)  Qarasaasiatigut atortut oqartussaaffeqarfinnit atugaareersut nalorninartumiinnersut kingunerisassatullu naliliiffigineri nutartissasut isumagissallugit imaluunniit qulakkiissallugit, aamma nutaanik atuilinnginnermi,
2)  Oqartussaaffeqarfiit qarasaasiaqarnikkut atortuinik atuinerat pillugu nassuiaasiorneq ilaatigut data-t sumiinnersut, pisiortorfiit paasissutissanik suliarinninnerat, data-nik suliarinninnissamut isumaqatigiissutit data-nillu nuussinissamut tunngaviit pineqarlutik,
3)  Data-nik suliarinninnermi isumaqatigiissutini isumannaallisaanermut piumasaqaatit data-nik suliarinnittunit malinneqarnersut misissuilluni, matumani kukkunersiuinissamut allagaatit ilanngullugit,
4)  Pisiortorfiit isersinnaasarnerat misissorlugu.
5)  Qarasaasiaqarnikkut atortunik piginnittunut oqalliffimmi peqataaneq.

  § 11.  Paasissutissiinikkut isumannaallisaanermut akisussaasutut ikinnerpaamik makku suliassaapput:
1)  Aaqqissuussatigut ajornartoornerit kingunerisassaanillu misissueqqissaarnerit suliarissallugit,
2)  Paasissutissiisarnikkut isumannaassutsimik ilinniartitsineq, 
3)  Isumannaallisaanermi data-nillu ajortoqartillugu suliarinninneq, matumani Datatilsynet-imut nalunaaruteqarneq nalunaarsukkallu,
4)  Suliffiup iluani malitassanik ilitsersuutinillu suliaqarneq nutarterisarnerlu,
5)  Atortussanik tigussaasunik suliarinninneq, toqqorterineq imaluunniit aserorterineq,
6)  Isersinnaanermik killeqartitsinissamut piumasaqaateqarneq,
7)  Qarasaasiaqarnikkut atortunut piginnaatitaanerit sulisullu isersinnaanerannik misissuisarneq.
8)  Paasissutissiisarnikkut isumannaallisaanermi akisussaasunut oqallittarfimmi peqataasarnissaq.

Qarasaasiaqarnikkut atortunik piginnittunut oqalliffik

  § 12.  Qarasaasiaqarnikkut paasissutissiisarnikkullu isumannaallisaanermi oqartussaaffeqarfik Qarasaasiaqarnikkut atortunik piginnittunut oqallittarfimmi qarasaasiaqarnikkut piginnittunik tamanik ukiumut ikinnerpaamik marloriarluni aggersaasassaaq.
  Imm. 2.  Qarasaasiaqarnikkut atortunik piginnittut ataatsimiinnissanut aaqqissuussanullu allanut pisariaqartitsisoqartillugu aggersarneqarsinnaapput. Aggersaanermilu tassaasinnaavoq isumannaallisaanermut tunngatillugu pisoqarsimatillugu isumannaallisaanermi nalorninartup minnerpaaffianiitinniarlugu sukkasuumik immikkullu ittumik iliuuseqartoqartariaqarneratigut.
  Imm. 3.  Ataatsimiinnermi oqaluuserisassat aaqqissuussallu imaa tassaasinnaavoq:
1)  Isumannaallisaanikkut navianartorsiortitsisoqartoq, 
2)  Nalorninartunik kingunerisassanillu misissueqqissaarneq,
3)  Pisiortorfinnut tunngatillugu aqutsineq, matumani pisiortorfiit isersinnaanerat ilanngullugu,
4)  Data-nik suliarinnittunut paasissutissiisarnermi isumannaallisaanikkut piumasaqaateqarneq taamaalillunilu misissueqqusisarnissaq,
5)  Data-nik suliarinnittunut kukkunersiuinissamik piumasaqaateqarneq taamalillunilu misissueqqissaarneq,
6)  Qarasaasiaqarnikkut politikkit imaluunniit ilitsersuutit teknikkiusut,
7)  Data-nik nuussinissamut tunngaviit,
8)  Qarasaasiaqarnikkut atortut nutaat nalunaarutigisarneri 
9)  Atortunut tunngatillugu allagaateqarneq aamma atuisunik ilitsersuineq.

Paasissutissiisarnikkut isumannaallisaanermi akisussaasunut oqalliffik

  § 13.  Qarasaasiaqarnikkut paasissutissiisarnikkullu isumannaallisaanermi oqartussaaffeqarfik paasissutissiisarnikkut isumannaallisaanermi akisussaasunut oqallittarfimmi paasissutissiisarnikkut isumannaallisaanermi akisussaasunik tamanik ukiumut ikinnerpaamik marloriarluni aggersaasassaaq. 
  Imm. 2.  Paasissutissiisarnikkut isumannaallisaanermi akisussaasut ataatsimiinnissanut aaqqissuussanullu allanut pisariaqartitsisoqartillugu aggersarneqarsinnaapput. Aggersaanermilu tassaasinnaavoq isumannaallisaanermut tunngatillugu pisoqarsimatillugu isumannaallisaanermi nalorninartup minnerpaaffianiitinniarlugu sukkasuumik immikkullu ittumik iliuuseqartoqartariaqarneratigut.
  Imm. 3.  Ataatsimiinnermi oqaluuserisassat aaqqissuussallu imaa tassaasinnaavoq:
1)  Isumannaallisaanikkut navianartorsiortitsisoqartoq, 
2)  Nalorninartunik kingunerisassanillu misissueqqissaarneq,
3)  Awareness pillugu qaammarsaaneq,
4)  Qarasaasiaqarnikkut politikkit imaluunniit ilitsersuinerit,
5)  Data-nik unioqqutitsisoqartillugu suliarinninneq,
6)  Isersinnaanermut killiliinissamik piumasaqaateqarneq,
7)  Piginnaatitaanernik sulisullu qarasaasiaqarnikkut atortunut isersinnaanerannik misissuineq,
8)  Isumannaallisaaneq,
9)  Sulisunik ilitsersuineq aamma
10)  Atortussanik tigussaasunik suliarinninneq.

Atuutilerfia

  § 13.  Kaajallaasitaq atuutilerpoq ulloq 13. decemberi 2022.

Siulittaasup Naalakkersuisoqarfia, 13. decemberi 2022.

Múte Bourup Egede
Naalakkersuisut Siulittaasuat

/ Hans-Peder Barlach Christensen