Inatsisartut Naalakkersuisullu pillugit Inatsisartut inatsisaat nr. 26, 18. november 2010-meersumi § 23, imm. 1 naapertorlugu, uku aalajangersarneqarput:

 

Atuuffia

 

  § 1.  Kaajallaasitaq Naalakkersuisut naalakkersuisoqarfiinut taakkulu ataani immikkoortortanut atuutsinneqarpoq, tak. suliassaqarfiit pillugit agguataarnerat pillugu kaajallaasitaq (Suliassaqarfiit agguataarnerat).

 

 

  § 2.  Kaajallaasitaq una inunnut paasissutissanik suliarinnittarneq pillugu inatsit Kalaallit Nunaannut atuuttutut peqqussummi § 42, imm. 2 naapertorlugu inatsisitigut pituttuivoq (inunnut paasissutissanik suliarinnittarneq pillugu peqqussut).

 

Paasissutissanik suliarinnittumik toqqaaneq

 

  § 3.  Ataatsimoorussamik qarasaasiaqarnikkut atortunik qitiusumik allaffeqarfimmit atorneqartussani Digitalimik Sullissinermut Aqutsisoqarfik paasissutissanik suliarinnittuuvoq.
  Imm. 2.  Digitalimik Sullissinermut Aqutsisoqarfik qarasaasiakkut atortorineqartunik nalunaarsuissapput, nalunaarsugarlu qitiusumik allaffeqarfiup intranetianut ilineqassaaq.

 

 

Paasissutissanut akisussaasoq aamma paasissutissanik suliarinnittoq

 

  § 4.  Oqartussaqarfiit ataasiakkaat inunnut paasissutissat suliarineqartarneri oqartussaqarfiit qarasaasiamik atortuminni, tassunga ilanngullugu ataatsimut qarasaasiani atorneqartartut, tamani paasissutissat suliarineqarneri eqqarsaatigalugit immikkut akisussaaffigivaat.
  Imm. 2.  Paasissutissanik akisussaasoq paasissutissanik piaarinaatsoornikkut imaluunniit unioqqutitsisumik nungutitsineq, annaasaqarneq imaluunniit ajorseriaatitsineq kiisalu susassaqanngitsunut ilisimalerneqarnissai, atornerlunneqarnissai imaluunniit inatsisitigut unioqqutitsisumik suliarineqarnissai eqqarsaatigalugit aaqqissuussatigut aamma teknikkikkut isumannaallisaanermik iliuuseqartussaavoq, matumani inunnut paasissutissanik suliarinnittarneq pillugu peqqussummi § 41, imm. 2 aamma isumannaallisaanermut nalunaarut innersuussutigineqarpoq.

 

  § 5.  Paasissutissanik suliarinnittoq aamma paasissutissanut akisussaasut inunnut paasissutissanik suliarinnittarneq pillugu peqqussummi aamma isumannaallisaanermut nalunaarummi nalinginnaasumik malittarisassaasa malitsigisaanik akisussaasuutitaapput, matumani inunnut paasissutissanik suliarinnittarneq pillugu peqqussummi §§ 41-42 eqqaassagaanni kaajallaasitap matuma malitsigisaanik erseqqissaateqarluni.

 

  § 6.  Paasissutissanik suliarinnittup suliarinnittarnerani inunnut paasissutissat pineqartut ilaatigut makkuupput: 
1)  Inunnut paasissutissat nalinginnaasut. 
2)  Inunnut paasissutissat immikkut isigineqartut (inunnut paasissutissat mianerisassat). 
3)  Inuit normui.
4)  Paasissutissat pinerluuteqarnermut tunngasut. 
  Imm. 2.  Paasissutissanik suliarinnittup suliarinnittarnerani inuit nalunaarsorsimasut assigiinngitsut pineqarput, ilaatigut innuttaasut aamma sulisut pineqarlutik. Paasissutissat inunnut nalunaarsorsimasunut tunngasut paasissutissani tassanilu paasissutissanut allanut tunngasuni paasissutissanik akisussaasutut oqartussat qarasaasiaqarnikkut ataatsimut atortuni suliarinnittartutut atortuini takuneqarsinnaapput.

 

Paasissutissanik suliarinnittoq peqquneqarneq malillugu iliuuseqassaaq

 

  § 7.  Inunnut paasissutissanik suliarinnittarneq pillugu pisariaqartumik isumannaallisaanissamut tunngasunik atuinissami teknikkikkut aaqqissuussaanikkullu iliuutsit pillugit paasissutissanik suliarinnittoq aalajangiinissaminut piginnaatitaallunilu pisussaatitaavoq.
  Imm. 2.  Paasissutissanik suliarinnittoq najoqqutassanik qarasaasiaq atorlugu atortut ataavartumik matoqqasuutinnissaannik, innarligassaajunnaarnissaannik, atoruminarsarnissaannik patajaatsuunissaannillu qulakkeerisussanik aalajangersaassaaq. 
  Imm. 3.  Qarasaasiaq atorlugu atortut matoqqasuunissaasa, innarligassaajunnaarnerisa, atoruminartuunerisa patajaatsuunerisalu qulakkeernissaannut atatillugu inunnut paasissutissanik suliarinnittarnermut atatillugu paasissutissanik suliarinnittoq suliarinnittuussaaq. 
  Imm. 4.  Peqqusineq paasissutissanik suliarinnittup naliliinera naapertorlugu inunnut paasissutissanik suliarinnittarneq pillugu peqqut, isumannaallisaanermut nalunaarut imaluunniit inatsit alla, matumani qarasaasiaqarnikkut paasissutissiisarnikkullu isumannaallisaanermi politikkikkut aamma pitsaasumik paasissutissanik pissuserissaarnikkut aalajangersagaasut unioqqutinneqarpata paasissutissanik suliarinnittoq paasissutissanut akisussaasumut nalunaaruteqartassaaq. 
  Imm.5.  Paasissutissanik suliarinnittup qitiusumik allaffeqarfimmi oqartussat sinnerlugit inunnut paasissutissanik suliarinnittarnera piffissaliussatigut killiligaanngilaq, kaajallaasitalli atorunnaarsinneqarnissaata tungaanut atuutissaaq. 
  Imm. 6.  Qarasaasiaq atorlugu ataatsimut atortuniit paasissutissat assersuutigalugu kisitsisinut imaluunniit ilisimatusarnermi misissuinermut tunngatillugu atugassat paasissutissanik suliarinnittumiit noqqaasumut ingerlateqqinneqarsinnaapput, noqqaasup inatsisit malillugit malitassatigut akuersissummillu peqarnikkut inunnut paasissutissanik ingerlatitseqqiisinnaaguni, matumani inunnut paasissutissanik suliarinnittarneq pillugu peqqussummi § 10 naapertorlugu. 
  Imm. 7.  Matumani imm. 6 malillugu ingerlatitseqqiinermut atatillugu inunnut paasissutissanik ingerlatitseqqiinermut paasissutissanik suliarinnittoq immikkut paasissutissanik akisussaasunngussaaq, aamma ingerlatitseqqiinermut malittarisassanik atuuttunik peqarnissaa paasissutissanik suliarinnittup qulakiissavaa.

 

Isertuussineq aamma nipangiussisussaatitaaneq

 

 § 8.  Paasissutissanik suliarinnittup paasissutissanik suliarinnittutut qarasaasiaq atorlugu ataatsimut atortuni inunnut paasissutissanik suliarinninnissamut inuit akuerisaasut paasissutissanik isertuussisinnaanermut pisussaatitaanersut imaluunniit inatsisitigut nipangiussisussaatitaanersut qulakkiissavaa. 
  Imm. 2.  Paasissutissanik suliarinnittuttaaq qulakkiigassarivaa isertuussinissamut piumasaqaat pisiortorfigisarlu paasissutissanik suliarinninnissamut allakkatigut isumaqatigiissummi inatsisitigut aalajangersakkamik nipangiussisussaatitaanermik peqassasoq qulakkiissavaa.

 

Isumannaatsumik suliarinninneq

 

  § 9.  Paasissutissanik suliarinnittoq paasissutissanik piaarinaatsoornikkut imaluunniit unioqqutitsisumik nungutitsineq, annaasaqarneq imaluunniit ajorseriaatitsineq kiisalu susassaqanngitsunut ilisimalerneqarnissai, atornerlunneqarnissai imaluunniit inatsimmik unioqqutitsisumik suliarinissai teknikkikkut isumannaallisaanermik iliuuseqartussaavoq.
  Imm. 2.  Paasissutissanik suliarinnittoq teknikkikkut isumannaallisaanermut malittarisassaliornissamut aalajangersaanissamut suliaqaqquneqassaaq. Matumani ilanngullugit:
1)  Qarasaasiaq atorlugu atortunut isumannaatsumik isernissamut Login aamma kinaassutsimut uppernarsaammik peqarnissaq
2)  Sillimmatitut toqqortaqarneq (Backup)
3)  Qarasaasiaq atorlugu atortunut iserneq
4)  Qarasaasiani software-nik ikkussinissamut najoqqutassaq
  Imm. 3.  Qitiusumik allaffeqarfiup qarasaasiat sulitilluni atugassatut tunniussat pillugit teknikkikkut isumannaallisagaanissaannut maleruagassanik Paasissutissanik suliarinnittoq aalajangersaassaaq. Matumani makku ilanngullugit:
1)  Qitiusumik allaffeqarfiup qarasaasiat sulitilluni atugassatut tunniussaasa isumannaallisaanikkut nutarterneqarnissaat
2)  Atuisut softwarenik aalajangersaanissamut ikkussuinissamullu isersinnaanissaat
  Imm.4.  Isumannaallisaanissaq qulakkeerniarlugu paasissutissanik suliaqartoq taamaalilluni teknikkikkut aaqqissuussatigullu naleqquttunik suliaqarnissamut qulakkeerissaaq makku eqqarsaatigalugit:
1)  Teknikkikkut qaffasissuseq maannakkut atuuttoq
2)  Atulersitsinermi aningaasartuutit
3)  Suliarinninnermi suussuseq, annertussuseq, ataqatigiinnera aamma siunertaa pineqartoq
4)  Inuit timikkut pisinnaatitaaffiisa kiffaanngissusermillu pisinnaatitaaffiisa ilimanaatilimmik imaannaanngitsumillu nikerartumik nalorninartumiinneri. 
  Imm. 5.  Paasissutissanik suliarinnittup nalorninartut kingunerisinnaasallu misissuiffigeqqissaarnerisa inerneri tunngavigalugit, nalorninartutut paasineqartut iluarsiniarlugit paasissutissanik suliarinnittoq naleqquttunik suliniuteqassaaq. Naleqquttut suunersut apeqqutaallutik suliniutiginiarneqartut tassaasinnaapput: 
1)  Inunnut paasissutissanik paasiuminaallisaaneq. 
2)  Suliarinninnermi atortunik kiffartuussissutinillu ataavartumik isertuussisinnaaneq, innarligassaajunnaarsitsineq, atoruminarsaaneq aamma patajaallisaaneq isumagisinnaallugit. 
3)  Sumiiffimmi imaluunniit teknikkikkut pisoqartillugu inunnut paasissutissanut isersinnaanerup piffissaq eqqorlugu pilerseqqissinnaallugu. 
4)  Suliarinninnermi isumannaatsuunissaq qulakkeerniarlugu teknikkikkut aaqqissuussatigullu suliniutit pitsaassusaasa akulikitsumik misiligartarnissaannut, naliliiffigisarnissaannut nalilersortarnissaannullu najoqqutassiaqarneq. 
  Imm. 6.  Aaqqissuussatigut sumiiffimmilu qulakkeerinninnissaq siunertaralugu paasissutissanik suliarinnittarnermi isumannaallisaanissamut suliniutit pillugit paasissutissanik suliarinnittoq paasissutissiisarnermut isumannaallisaanermi namminerisamik atortorissaarutigisani suliffiup iluani atuuttussanik aalajangersagaliussaaq, matumani isumannaallisaanermi aaqqissuussaaneq, isertitaatit aqunnissaannut aaqqiissutit aamma akuersisartuunermi aaqqiissutit kiisalu akuersisarnerit misissuataarnissaat ilanngullugit. Paasissutissatuttaaq atortut avammut suliffiullu iluani atorneqartut nungutinnissaannut kiisalu qarasaasianik atortorissaarutit atorneqarnerisa suliarinerinut akisussaaffimmik nassuiaasiukkamillu aalajangersaanissaq siunertaralugu peqqussutinik aalajangersaasoqassaaq. Tamatuma saniatigut isumannaallisaanissamut suliniutit paasissutissanik suliarinnittarnikkut aalajangersagaasut malinneqarnersut pillugit nakkutilliinissamut maleruagassaliortoqassaaq. 
1)  Suliffiup iluani aalajangersakkat paasissutissanik suliarinnittumut tunngatillugu naammaginarnersut naapertuunnersullu qulakkeerniarlugit ukiumut ikinnerpaamik ataasiarlugit misissuataarneqartassapput. 
2)  Paasissutissanik suliarinnittoq sulisuminut inunnut paasissutissanik suliarinnittartunut pisarialimmik ilitsersuisassaaq. Sulisut tamatumunnga ilanngullugu imm. 4-p malitsigisaanik malittarisassatut aalajangersakkat ilisimaarilissavaat. 
3)  Sumiiffinni inunnut paasissutissanik suliarinniffiusuni susassaqanngitsut paasissutissanik pissarsisinnaajunnaarsinneqarnissaat siunertaralugu malittarisassanik aalajangersaasoqassaaq. 
  Imm. 7.  Qarasaasiaq atorlugu ataatsimut atortut ineriartortinneqarnerat, ingerlanneqarnerat, aserfallatsaalineqarnerat ingerlatsinerlu eqqarsaatigalugit nalinginnaasumik aaqqiissutitigut ilusilersuineq paasissutissanillu illersuineq aqqutigalugit paasissutissanik illersuinissaq pillugu malittarisassanik malinnaanissaq paasissutissanik suliarinnittoq akisussaasuuvoq.

 

Akuersissuteqarneq aamma isersinnaanerup aqunneqarnera

 

  § 10.  Inuit akuersissuteqartut kisimik inunnut paasissutissanik suliarinninnissamut isersinnaatitaapput. 
  Imm. 2.  Inuit inunnut paasissutissanik suliaqarnissamik siunertaqartut kisimik akuersissummik tunineqartassapput. Inuit ataasiakkaat atuinissamik pisariaqartitsinngitsut akuersissummik tunineqartassanngillat. 
  Imm. 3.  Aammattaaq kukkunersiuinermik imaluunniit ingerlatsinermik atortutigullu teknikkimik suliaqarniartut paasissutissanut pisariaqartitaannut isersinnaanissamut akuersissuteqartoqassaaq. 
  Imm. 4.  Inuit akuersissuteqartut kisimik isersinnaanissaat qulakkeerniarlugu suliniuteqartoqassaaq, aamma inunnut paasissutissanut akuersissutaannarmilu siunertaanut isersinnaanissaq taamaallaat atorneqassasut. 
  Imm. 5.  Akuersissutini, imm. 1 innersuussutigalugu, allaqqassapput atuisup inunnut paasissutissanik apeqquteqaatigineqarsinnaaneranut, avammut nassiussinnaaneranut, eqqussinnaaneranut imaluunniit nungutissinnaaneranut tunngasut. 
  Imm. 6.  Inuit akuersissuteqartut immi. 1-4-mi piumasaqaatinik naammassinninnersut qulakkeertuarneqartassaaq. 
  Imm. 7.  Imm. 6-ip malitsigisaanik misissuisarneq ikinnerpaamik ukiup affaani ataasiarluni pisassaaq. 
  Imm. 8.  Inuit qarasaasianut akuersissummik pinissaannut pilersitsineq, allannguineq aamma atorunnaarsitsineq pillugit malittarisassaliornissamut paasissutissanik suliarinnittartut peqquneqassapput.

 

Paasissutissanik suliaqartut allat akuerineqarnerat

 

  § 11.  Paasissutissanik suliarinnittup qarasaasiaq atorlugu ataatsimut atortunut paasissutissanik suliaqartut allat atornissaannut nalinginnaasumik akuereqqaartarpai, tassunga ilanngullugu pisariaqartinneqartillugu paasissutissanik pissarsisinnaanermut isumaqatigiissut. Paasissutissanik suliaqartut allat pilersaarutaasumik ilanngunnerat imaluunniit taarserneqarnerat qitiusumik allaffeqarfiup intranetiatigut saqqummiunneqartassapput. 
  Imm. 2.  Paasissutissanik suliaqartunik allanik atuinermi inunnut paasissutissanik suliarinnittarneq pillugu peqqussutip immikkoortuata IV-mi piumasaqaatit malissallugit paasissutissanik suliarinnittoq akisussaaffeqarpoq. Paasissutissanik suliarinnittuttaaq makkununnga pisussaaffeqarpoq:
1)  Inunnut paasissutissanik suliarinnittarneq pillugu peqqussummi suliaqarnissamut piumasaqaatinik naammassinninneq aamma nalunaarsorsimasup pisinnaatitaaffiinik illersuineq qulakkeerneqartoq anguneqarsinnaasoq teknikkikkut aaqqissuussaanikkullu isumannaallisaaneq naleqquttoq naammassisinnaagaanni paasissutissanik suliarinnittartut allat taamaallaat atorneqarsinnaapput. 
2)  Paasissutissanik suliarinnittup aamma paasissutissanik suliarinnittartunik allanik peqassappat taakku akornanni paasissutissanik suliarinnittarnissamut isumaqatigiissummik qulakkeerinnittoqassasoq.

 

Paasissutissanik suliarinnittartunik atuineq

 

  § 12.  Paasissutissanik suliarinnittup qarasaasiaq atorlugu ataatsimut atortunut paasissutissanik suliaqartartui allat qitiusumik allaffeqarfiup intranetiatigut takuneqarsinnaapput. Paasissutissanik suliaqartut allat pillugit paasissutissat Paasissutissanik suliarinnittumut allakkatigut noqqaassutigereernerini qitiusumik allaffeqarfimmut nassiunneqarsinnaapput. 
  Imm. 2.  Paasissutissanik suliaqartut allat inunnut paasissutissanik suliaqartarneq pillugu peqqussummi piumasaqaatit suliaqarnermi naammassineqartarnissaat anguniarlugu paasissutissanik suliaqartut allat teknikkikkut aaqqissuussaanikkullu naammattunik suliaqarsinnaanerat pisarialimmik qulakkeersinnaagaanni isumaqatigiissuteqarneq imaluunniit inatsisitigut pituttuisumik uppernarsaateqarneq aqqutigalugu kaajallaasitatigut matumuuna aalajangersakkap assinganik paasissutissanik illersuinissamut pisussaaffilersorneqarnissaat paasissutissanik suliarinnittup isumagissavaa. 
  Imm. 3.  Paasissutissanik suliarinnittoq taamaalilluni paasissutissanik illersuinissamut malittarisassat kaajallaasitarlu una qitiusumillu allaffeqarfiup paasissutissiinikkut isumannaallisaanermut politikkia malillugit pisussaaffeqartitaasoq paasissutissanik suliaqartut isumaqatigiissuteqarfigineritigut paasissutissanik suliaqartut minnerpaamik pisussaaffilersornissaannut akisussaasuuvoq. 
  Imm. 4.  Paasissutissanik suliaqartut allat isumaqatigiissuteqarfiginerata malinneqarnera paasissutissanik suliaqartut paasissutissanik suliarinnittup nakkutigisussaavaa. Paasissutissanik suliarinnittoq allakkatigut akuersissuteqartinnagu paasissutissanik akisussaasut paasissutissanik suliaqartullu allat toqqaannartumik nakkutilliivigisinnaanngilai.
  Imm. 5.  Paasissutissanik suliarinnittup paasissutissanik suliaqartut allat nakkutiginerini ilaatigut makku suliarineqassapput: 
1)  Paasissutissanik suliaqartut allat isumaqatigiissusiaat atuuttoq naapertorlugu paasissutissanut isumannaallisaanerup inunnullu paasissutissat namminneq suliarineri pillugit ukiumut ataasiarlutik kukkunersiuisut arlaannaanulluunniit attuumassuteqanngitsut atorlugit oqaaseqaataannik pissarsiniartassapput. Paasissutissanik suliarinnittup kukkunersuisut oqaaseqaataat paasissutissanik suliaqartunit pissarsiarissavaat tamatumalu kingorna paasissutissanut akisussaasutut oqartussanut atortussanngortillugu.
2)  Paasissutissanik suliarinnittoq, imaluunniit kukkunersiuisoq arlaannaanulluunniit attuumassuteqanngitsoq paasissutissanik suliarinnittumit pisinnaatinneqartoq, paasissutissanik suliaqartut allat sumiiffinni inunnut paasissutissanik suliffigisaasa alakkarternissaannut pisinnaatitaapput kiisalu isumaqatigiissutaasup kiisalu paasissutissat illersorsinnaatitaanerisa malitsigisaanik paasissutissanik suliaqartut allat isumannaallisaasimanersut misissuiffigissallugit pisinnaatitaallutik. 
3)  Kukkunersiuisut oqaaseqaataannit, sumiiffinni atortorissaarutinit allakkarterinermit imaluunniit paasissutissat tiguneqartunit inernerit tunngavigalugit paasissutissanik suliarinnittoq paasissutissanik pissarsiniartuarnissamut pisussaaffeqarpoq. Paasissutissanik illersuinissamut pisinnaatitaaffiup atuuttup malinneqarnera qulakkeerniarlugu pisariaqartitsineq naapertorlugu allatigut suliniuteqartoqarnissaa Digitalimik Sullissinermut Aqutsisoqarfik piginnaatitaavoq. 
4)  Paasissutissanik suliaqartut allat sumiiffiini atortorissaarutinut uppernarsaatinik takutitsisinnaanikkut oqartussaasut, imaluunniit aallartitaasutut toqqagaat, paasissutissanik suliarinnittup aamma paasissutissanik suliaqartut allat atortorissaarutaannut paasissutissanik illersuinissamut malittarisassat malillugit pisinnaatitaasut paasissutissanik suliaqartunit allanit isersinnaatitaanermik tunniussissapput. 
  Imm. 6.  Paasissutissanik suliaqartut allat paasissutissanik illersuinissaminnut pisussaaffitsik naammassinngippassuk, taakku paasissutissanik akisussaaffillit pisussaaffiisa naammassinissaannut paasissutissanik suliarinnittoq akisussaasunngussaaq.

 

Nunanut allanut inunnut paasissutissanink nuussineq

 

 § 13.  Paasissutissanik suliaqartoq inunnut paasissutissanik sunilluunniit nunanut allanut tunniusseqqusaanngillat, tassunga ilanngullugu nunani allani paasissutissanik suliaqartartut allat, aatsaallu paasissutissanik tunniussisoqarsinnaavoq paasissutissanik akisussaasut akuersiteqqaarlugit. Paasissutissanut akisussaasoq akuersissagaluarpat Inunnut paasissutissanik suliarinnittarneq pillugu peqqussummi immikkoortoq 7-mi allassimasut atorneqassapput malinneqassallutillu.

 

Paasissutissanut akisussaasumut ikiuunneq

 

  § 14.  Nalunaarsorsimasut pisinnaatitaaffii inunnut paasissutissanik suliarinnittarneq pillugu peqqussummi kapitali 9-mi aamma 10-mi aalajangersarneqartut suliarinissaannut noqqaassutit akissuteqarfigineqarnissaannut paasissutissanut akisussaasup pisussaaffiisa naammassineqarneri ilaatillugit teknikkikkut aaqqissuussatigullu naleqquttunik suliniuteqarnikkut suliarisassap qanoq ittuunera eqqarsaatigalugu sapinngisamik paasissutissanut akisussaasoq paasissutissanik suliarinnittumi ikiorneqartassaaq. 
  Imm. 2.  Matumani siunertarineqarpoq paasissutissanik suliarinnittup paasissutissanut akisussaasoq paasissutissanut akisussaasutut inissisimanerani sapinngisamik ikiortassallugu ilaatigut inunnut paasissutissanik suliarinnittarneq pillugu peqqussummi malittarisassat ataani allaqqasut malinneqarnissaat makkuusut eqqarsaatigalugit: 
1)  Nalunaarsorsimasumi inunnut paasissutissanik katersinermi paasissutissiinissamut pisussaaffik, tak. § 28. 
2)  Paasissutissiinissamut pisussaaneq, matumani inunnut paasissutissat nalunaarsorsimasumi katersorneqarsimanngippata, tak. § 29. 
3)  Nalunaarsorsimasup takunnissinnaatitaanera, tak. § 31. 
4)  Suliarinninnissap killilersornissaanut pisinnaatitaaffik, tak. § 35. 
5)  Akerliliissuteqarnissamut pisinnaatitaaffik, tak. § 36. 
6)  Naqqiuteqarnissamut, nungutitsinissamut mattussinissamullu pisinnaatitaaffik, tak. § 37, imm. 1. 
7)  Inunnut paasissutissanik naqqiuteqarnissamut imaluunniit nungutitsinissamut imaluunniit suliarinninnerup killilersorneqarnissaanut nalunaartussaatitaaneq, tak. § 37, imm. 2. 
  Imm. 3.  Inunnut paasissutissanik suliarinnittarneq pillugu peqqussummi immikkoortup IV-p aamma isumannaallisaanermut nalunaarutip malitsigisaanik paasissutissanut akisussaasup pisussaaffiisa malinneqarneri qulakkeerniarlugit suliarisassap suussusaa aamma paasissutissanik suliarinnittup paasissutissanik suliarinnittutut paasissutissat pissarsiarisinnaasai eqqarsaatigalugit, paasissutissanut akisussaasoq paasissutissanik suliarinnittumit ikiorneqartassaaq. Matumani siunertarineqarpoq paasissutissanik suliarinnittup suliarinteqartussap suussusaa qitiutillugu paasissutissanut akisussaasut ataasiakkaat ataani allaqqasunik malinninnissaannut atatillugu ikiortassammagit: 
1)  Isumannaallisaanissaq suliarinninnermut atatillugu nalorninartunut naapertuuttoq qulakkeerniarlugu teknikkikkut aaqqissuussatigullu naleqquttunik suliniuteqarnissamut pisussaaffik. 
2)  Inunnut paasissutissanik isumannaallisaanikkut unioqqutitsineq paasissutissanut akisussaasut ataasiakkaat unioqqutitsinermik paasisaqareersullu pisariaqanngitsumik kinguarsaasoqanngitsumik periarfissaappallu kingusinnerpaamik 72 tiimit qaangiuppata nalunaarutiginissaanut pisussaatitaaneq, pissanngilarli inunnut paasissutissanik isumannaallisaanerup unioqqutinneqarnera inuit pisinnaatitaaffiinut imaluunniit kiffaanngissutsikkut pisinnaatitaaffiinut nalorninartoqartoq ilimanaateqanngippat.
3)  Inunnut paasissutissanik isumannaallisaanerup unioqqutinneqarnera inuit pisinnaatitaaffiinut aamma kiffaanngissutsimik pisinnaatitaaffiinut annertuumik nalorninartorsiortitsippat nalunaarsorsimasumut/nalunaarsorsimasunut pisariaqanngitsumik kinguarsaasoqartinnagu nalunaaruteqarnissamik pisussaaffeqarneq. 
4)  Paasissutissanik illersuinissaq pillugu nalorninartunik kingunerisassanillu misissuinissamut pisussaaffeqarneq, matumani suliarinninneq inuit pisinnaatitaaffiinik aamma kiffaanngissusaasa pisinnaatitaaffiinik annertuumik nalorninartoqartillugu, aamma paasissutissanik illersuinissaq pillugu kingunerisassanik misissuinermi suliarinninneq paasissutissanut akisussaasut ataasiakkaat nalorninartumik killilersimaartitsiniarlutik suliniutitut aalajangiinerat annertuumik amigaateqartutut pippat suliarinninnissaq sioqqullugu Datatilsynet-ip qanoq oqariartuuteqarnissaata tusaanissaanut pisussaaffeqarneq.

 

Inunnut paasissutissat isumannaallisaanerata unioqqutinneqarnera pillugu Datatilsynet-imut nalunaaruteqarneq

 

  § 15.  Paasissutissanik suliarinnittup pisariaqanngitsumik kinguarsaasoqarnani inunnut paasissutissanik isumannaallisaanikkut unioqqutitsisoqartillugu paasisaqartoqarpat paasissutissanut akisussaasoq nalunaarfigissavaa. 
  Imm. 2.  Paasissutissanik suliarinnittup paasissutissanut akisussaasumut nalunaaruteqarnera pisariaqanngitsumik kinguarsarneqassanngilaq periarfissaappallu unioqqutitsineq paasineqarpat kingusinnerpaamik 48 tiimit qaangiuppata, taamaalilluni paasissutissanut akisussaasup inunnut paasissutissanik isumannaallisaanermi unioqqutitsineq Datatilsynet-imut nalunaartussaatitaanini malinniassavaa. Paasissutissanut akisussaasut inunnut paasissutissanik isumannaallisaaneq unioqqutinneqartoq pillugu nalunaarsorsimasunut nalunaarutigissavai. 
  Imm. 3.  Paasissutissanik suliarinnittoq paasissutissanut akisussaasut kaajallaasitami matumani ilaatinneqartut tamaasa sinnerlugit suliap qanoq ittuunera, unioqqutitsinerup annertussusaa aamma unioqqutitsineq qarasaasiaq atorlugu ataatsimut atortunut attuumassuteqarnersoq eqqarsaatigalugit ataatsimut Datatilsynet-imut nalunaarusiorsinnaavoq. 
  Imm. 4.  Matumani imm. 1 naapertorlugu paasissutissanut akisussaasut unioqqutitsineq pillugu Datatilsynet-imut nalunaaruteqarnissaannut paasissutissanik suliarinnittoq ikiuutissaaq. Tamanna ima isumaqarpoq, paasissutissanut akisussaasut unioqqutitsinerup Datatilsynet-imut nalunaaruteqarnerani paasissutissat ataani allaqqasut takutinnissaannut paasissutissanik suliaqartoq aqqutissiueqataassasoq: 
1)  Inunnut paasissutissanik isumannaallisaanerup unioqqutinneqarnerata suussusaa, matumani periarfissaappat suussutsit aamma nalunaarsorsimasutut kalluarneqartut missiliorlugit kiisalu inunnut paasissutissatut nalunaarsorsimasutut kalluarneqartut missiliorlugit ilanngullugit. 
2)  Inunnut paasissutissanik isumannaallisaanerup unioqqutinneqarneranit kingunerisinnaasai. 
3)  Inunnut paasissutissanik isumannaallisaanerup unioqqutinneqarnerata pakkersimaarnissaanut paasissutissanut akisussaasut suliniutigerusutatut aalajangiussai, matumani pisariaqarpat ajoqutaasinnaasutut kingunerisinnaasai pillugit naleqquttunik suliniutigiumasai ilanngullugit.

 

Inunnut paasissutissanik nungutitsineq

 

  § 16.  Qarasaasiaq atorlugu ataatsimut atortunut tunngatillugu nungutitsisarnissamut malittarisassat paasissutissanik suliarinnittumit aalajangersarneqassapput.
  Imm. 2.  Qarasaasiaq atorlugu ataatsimut atortut allagaateqarnermut inatsimmi aalajangersakkat malillugit atoreernerini tunniuttussaatitaaneranut ilaatinneqartut Nunatta Allagaateqarfianut tunniunneqareernerisa kingorna siusinnerpaamik nungutinneqareersimassapput.

 

Nakkutilliineq aamma kukkunersiuineq

 

  § 17.  Naalakkersuisoqarfiit suliassaqarfimminni paasissutissanik suliarinnitsitsinikut, suliassaqarfiit agguataarnerat pillugu kaajallaasitami (Suliassaqarfiit agguataarnerat) allassimasut malillugit, paasissutissanik akisussaasut sinnerlugit paasissutissanik suliarinnittut nakkutilliissapput. Naalakkersuisoqarfik nakkutilliinertik tunngavigalugu paasissutissanut akisussaasunit atugassamik nakkutilliinermi nalunaarummik suliaqassaaq. 
  Imm. 2.  Paasissutissanut akisussaasut paasissutissanik suliarinnittup sumiiffimmi sulisoqarnikkut isumannaallisaanikkullu peqquteqartumik atortorissaarutaannik alakkarterisinnaanissaminnut periarfissaqanngillat. Akerlianik paasissutissanut tunngatillugu iliuuseqarneq pillugu paasissutissanik suliarinnittoq nalunaarusiussaaq. 
  Imm. 3.  Paasissutissanik suliarinnittoq paasissutissanik kaajallaasitami piumasaqaatinik malinninnissamut takussutissaqarniartilluni attuumassuteqartunik pisariaqartunillu paasissutissanut akisussaasunut pissaqartitsissaaq, matumani paasissutissanik suliaqartunut allanut paasissutissa ilanngullugit.

 

Illuatungerisamut ilisimatitsissuteqarneq

 

  § 18.  Paasissutissanik suliarinnittut aamma paasissutissanut akisussaasut pissutsinik suliarinninnermut kaajallaasitaq naapertorlugu ilaatinneqartutut pingaarutilinnik imminnut ilisimatitseqatigiittassapput.

 

Atuutilerfia

 

  § 19.  Kaajallaasitaq atuutilerpoq ulloq 13.decemberi 2022.

 

 

Siulittaasup Naalakkersuisoqarfia, 13. decemberi 2022.

 

 

Múte Bourup Egede
Naalakkersuisut Siulittaasuat

 

 

/ Hans-Peder Barlach Christensen