Inatsisartut Naalakkersuisullu pillugit Inatsisartut inatsisaat nr. 26, 18. november 2010 -meersumi § 23-mi imm. 1-imi allassimasut malillugit ima aalajangersaasoqarpoq:

 

Atuuffia

 

  § 1.  Kaajallaasitaq una Naalakkersuisut naalakkersuisoqarfiinut immikkoortortaqarfinnullu taakkununnga attuumassusilinnut atorneqassaaq takuuk suliassaqarfiit agguataarnerat pillugu kaajallaasitaq (Suliassaqarfiit agguataarnerat).

  Imm. 2.  Pisortaqarfiit suliffeqarfii imminnut ingerlattut oqartussaqarfiilluunniit attuumassuseqanngitsut ilaatinneqanngillat

 

  § 2. Digitalimik Sullissinermut Aqutsisoqarfik isumaqatigiissuteqarfigineratigut kommunit tamakkiisumik ilaannakortumilluunniit sullissivik.gl-imut peqataasinnaapput.

Imm. 2. Digitalimik Sullissinermut Aqutsisoqarfik isumaqatigiissuteqarfigineratigut naalagaaffiup oqartussaqarfiit tamakkiisumik ilaannakortumilluunniit sullissivik.gl-imut peqataasinnaapput.

  Imm. 3. Digitalimik Sullissinermut Aqutsisoqarfik isumaqatigiissuteqarfigineratigut pisortaqarfiit suliffeqarfii imminnut ingerlattut tamakkiisumik ilaannakortumilluunniit sullissivik.gl-imut peqataasinnaapput.

  Imm. 4.  Kommunit, naalagaaffiup oqartussaqarfii imaluunniit pisortaqarfiit suliffeqarfii imminnut ingerlattut sullissivik.gl-imut peqataaniarunik kaajallaasitamut matumunnga peqataanissartik akuerissavaat.

 

www.sullissivik.gl

 

  § 3.  Digitalimik Sullissinermut Aqutsisoqarfiup oqartussat ataatsimoorussamik nittartagaat www.sullissivik.gl oqartussaqarfinnut imaritikkumaneqartunut, imminut digitalikkut sullissinnaanermut atugassanngorlugu suliarissavaa, taannalu aqqutigalugu aamma digitalimik aaqqiissutit innuttaasunut suliffeqarfinnullu attuumassusillit aamma suliarineqarsinnaassapput.

 

sullissivik.gl-iup minnerpaamik imarisassaa

 

  § 4.  Sullissivik.gl -ip imarisai minnerpaamik ukunannga imaqassapput:

1)  inatsimmut atuuttumut innuttaasut suliffeqarfiillu pisinnaatitaaffiinik pisussaatitaaffiinillu nassuiaat.

2)  Inatsisinut atuuttunut naapertuuttunullu innersuussinerit.

3)  Oqartussaqarfik akisussaasuusup taaguutaa, sumiiffia, oqarasuaataata normua, emailadressia saaffiginninnissamullu paasissutissat allat.

  Imm. 2.  Sullissivik.gl-imittaaq ersersinneqassaaq Sullissivik.gl suunersoq, kikkut nittartakkamut akisussaasuunersut kiisalu systemimut akisussaasumut attaveqarfissat.

 

  § 5.  Sullissivik.gl -ip atuisunit atoruminartuunissaa iserfigiuminarnissaanullu pitsaassusissat ilisimaneqartut naammassissavai.

  Imm. 2.  Naatsorsoruminassuseq, atorneqarsinnaassuseq, paasinassuseq pitsaassusaalu aqqutigalugit atoruminassusaa iserfigiuminassusaalu qulakkeerneqassaaq.

  Imm. 3. Paasissutissat atuisullu paasisinnaasaannik periuseqarneq naatsorsoruminassutsimik taaneqarpoq.

  Imm. 4.  Atuisut paasisinnaasaannik periuseqarneq atoruminassusaalu atorneqarsinnaassutsimik taaneqarpoq.

  Imm. 5.  Paasissutissat atuisullu paasisinnaasaaneq periuseqarneq paasinassutsimik taaneqarpoq.

  Imm. 6.  Browserit assigiinngitsut teknologiillu assigiinngitsut atorlugit atorneqarsinnaassusaa pitsaassutsitut taaneqarpoq.

 

  § 6.  § 5-imi taaguutit atorneqartut www.sullissivik.gl aqqutigalugu Digitalimik Sullissinermut Aqutsisoqarfimmit nassuiarneqassapput.

 

sullissivik.gl-imi digitalimik imminut sullinneq

 

  § 7.  Digitalimik sullississutit inuk pillugu paasissutissanik imallit atorneqassatillugit NemLog-in uppernarsaasersuinerlu atorlugit iserfigineqarsinnaassapput. NemLog-in danskit Digitalimik Sullissinermut Aqutsisoqarfianit atorneqarsinnaasunngortinneqarput takuuk MitID aamma NemLog-in pillugu peqqussutit.

 

  § 8. Oqartussaqarfinnut tamanut digitalimik immersugassaqarnissaq Digitalimik Sullissinermut Aqutsisoqarfimmit suliarineqassaaq. Digitalimik immersugassaq immersugassat tigussaasut assigalugit suliarineqassaaq. Digitalimik immersugassat sullissivik.gl-imiittut innuttaasunut suliffeqarfinnullu oqartussaqarfinnut immersukkanik isumannaatsumik sullissivik.gl aqqutigalugu digitalimik nassiusserusuttunut neqeroorutaapput.

  Imm. 2.  Oqartussaqarfiit aalajangersimasumik e-mailadressemik toqqaassapput, tassungalu digitalimik immersukkat nassiunneqartassapput. E-mailadresse allanngussappat, tamanna sullissivik@sullissivik.gl -imut minnerpaamik ullut tallimat sioqqullugit nalunaarutigineqassaaq.

  Imm. 3.  Digitalimik immersugassami MitID-mi paasissutissat allassimasut atorlugit suliarineqassaaq, taamaaliortoqassaarlu nassiussisup kinaassusaa uppernarsarniarlugu, taassumami digitalimik nassiussisinnaanissani pisinnaatitaaffigaa.

 

§ 9. Digitalimik Sullissinermut Aqutsisoqarfiup oqartussaqarfiit sullissivik.gl aqqutigalugu digitalimik aaqqissuussamik imminut sullissivinnik atuutsitsilerniartut sullisissavai. Imminut sullissivittut aaqqiissut tamakkiisumik ilaannakortumilluunniit imminut sulliviuvoq, sullissivik.gl atorlugu paasissutissat allanneqartut toqqaannaq nammineerlutik sulianik sullississummut allatulluunniit suliaqarnermi atorneqartartumut nuunneqassapput.

Imm. 2. Oqartussaqarfik nammineerluni aningaasaqarnermut inatsimmi aningaasaliissutaasut atorlugit digitalimik imminut sullissiviup atortunut atassuteqalersinnissaanut ineriartortitsineq, ingerlatsineq allaffissornerlu ingerlatissavaa.

 

Imarisaanut akisussaasoq

 

  § 10.  Suliaq pillugu suliassaqarfiillu akisussaasuusoq imarisaasumi allassimasunut nassuiaatinullu paasinartuunissaat pillugu § 4-imi imm. 1-imi allassimasut malillugit allassimasoqarnissaanut akisussaasuussaaq.

Imm. 2. Nutaamik inatsimmik atuuttuulersitsisoqarsimappat inatsimmiluunniit allannguisoqarsimappat ulloq taanna atuutilerfiani sullissivik.gl-imi allassimasut nutarterneqartassapput eqqortumillu allassimassallutik. Allaffissornikkut allannguutit uani aamma ilaapput.

 

  § 11.  Inatsisartut nalinginnaasumik ataatsimeersuarnertik ingerlatereeraangassuk, Digitalimik Sullissinermut Aqutsutsisoqarfiup oqartussaqarfiit akisussaaffimmi iluanni sullissivik.gl -imi allassimasuutaannik imminullu sullissinnaanermut periarfissanik nalunaarsukkanik nassinneqartassapput.

Imm. 2. Imarisat imminullu sullissinnaanermut periarfissat oqartussaqarfinnit misissorneqartassapput, takuniarlugu Inatsisartut ataatsimiinneranni allaffissornikkulluunniit allatigut allannguinermi imarisaanik allannguisoqassanersoq takuniarlugu.

 

  § 12. Digitalimik Sullissinermut Aqutsisoqarfimmit sullissivik.gl-imut nanuaraq.gl-imullu malittarisassanik ilitsersuutinillu saqqummersitsisoqassaaq, tassanilu oqartussaqarfiit imarisaanik qanoq suliaqarnissartik, digitalimilluunniit imminut sullissinermut periarfissanik qanoq suliaqartoqartassanersoq takusinnaassavaat.

  Imm. 2. Digitalimik Sullissinermut Aqutsisoqarfimmit sullissivik.gl-imut immersuisussanut pikkorissaasoqartassaaq. Sulisut sullissivik.gl-imut immersuisussat pikkorissarnermik pineqartumik ingerlatsisimassapput.

 

Ukiumut ataatsimiinneq

  § 13. Digitalimik Sullissinermut Aqutsisoqarfik ukiumoortumik oqartussaqarfinnut ataatsimiigiaqqusisassapput, tassanilu oqartussaqarfiit sullissivik.gl -imi allassimasuutillit digitalimillu imminut sullinnissamut periarfissaatillit peqataasassapput.

  Imm. 2. Ataatsimiigiaqqusissut oqartussaqarfimmi pisortaanermut nassiunneqartassaaq. Oqartussaqarfimmi pisortaanerup ataatsimiigiaqqusissut sulisunut sullissivik.gl-imut ikkussuisunut ataatsimiinnermilu peqataasussanut ingerlateqqittassavaa, tassani aamma akisussaaffeqarfiup iluani suliamut attuumassusilimmut immikkoortortaqarfimmi aqutsisoq peqataasassaaq. Immikkoortortaqarfimmi aqutsisoq sulianillu ingerlatsisoq ataatsimiinnermi peqataasassaaq.

  Imm. 3. Ukiumut ataatsimiigiaqqussut ullut 14-it sioqqullugit nassiunneqartassaaq.

  Imm. 4. Ataatsimiinnermi minnerpaamik oqaluuserisassat:

1) Ukiumi qaangiuttumi suleqatigiinnerup killiffissiornera,

2) Imarisaanik digitalimillu imminut sullissiffinnik misissuineq,

3) Kukkunernik amigaatinillu suliaqarnissamut piffissalersuinissaq.

 

Suliassaqarfinnik allannguineq

 

  § 14.  Suliassaqarfinnik allannguisoqarnerani oqartussaqarfik pineqartoq Digitalimik Sullissinermut Aqutsisoqarfimmut paasissutissiissaaq paasissutissat oqartussaqarfimmut sorlermut tunniunneqarnissaanik.

  Imm. 2.  Oqartussaqarfik suliassaqarfimmik tigusinermi kinguninngua Digitalimik Sullissinermut Aqutsisoqarfimmut nalunaaruteqassaaq suliassaqarfimmik nuussinermi allassimasuni qanoq allannguisoqarnissaanik.

  Imm. 3.  Oqartussaqarfik suliassaqarfimmik tigusisussaq sullissivik.gl-imi allassimasuuteqareersimassappat §11 imm. 3-mi allassimasut aallaavigalugit attaveqaataasoq Digitalimik Sullissinermut Aqutsisoqarfimmit ataatsimiigiaqquneqassaaq. Ataatsimiinnermi sullissivik.gl-imi allassimasunik nutarterinissamut ulluliineq pissaaq.

  Imm. 4.  Oqartussaqarfik sullissivik.gl-imi allassimasuuteqanngippat § 13-imi allassimasut aallaavigalugit Digitalimik Sullissinermut Aqutsisoqarfik ataatsimiigiaqqusissaaq.

 

Imarisat eqqunngitsut

 

  § 15.  sullissivik.gl-imi eqqunngitsunik allassimasoqartoq Digitalimik Sullissinermut Aqutsisoqarfimmit paasineqarpat tamanna oqartussaqarfimmi pisortamut piaartumik nalunaarutigineqassaaq.

  Imm. 2.  Paasissutissat eqqortuunnginnerinut tunngatillugu oqartussaqarfimmi pisortamit, immikkoortortaqarfimmi aqutsisumit oqartussaqarfimmiilluunniit sulisunit

ullut suliffiusut tallimat qaangiuppata nalunaaruteqartoqanngippat, taava allassimasut iserfigineqarsinnaajunnaarsinneqassapput. Allassimasut iserfigineqarsinnaajunnaarnerinik oqartussaqarfimmi pisortamut nalunaaruteqartoqassaaq (tak. §2).

 

Paasissutissanut akisussaasoq

 

  § 16.  Oqartussaqarfik sullissivik.gl-imi imminut sullissinnaanermut aaqqiissummik Digitalimik Sullissinermut Aqutsisoqarfimmut saaffiginnittuusoq, sullissivik.gl-imi imminut sullinnermi paasissutissanik suliaqartussatut paasissutissanut akisussaasuussaaq.

 

Tekniskimik aaqqiissutit isumannaallisaanerlu

 

§ 17. Digitalimik Sullissinermut Aqutsisoqarfimmit contentmanagement system (CMS-system), ilutsit aammalu oqartussaqarfiit digitalimik imminnut sullinnissaannut allatigulluunniit atuinissaannut ataatsimut nittartagaqarnissaq periarfissaatinneqassaaq.

 

  § 18.  Digitalimik Sullissinermut Aqutsisoqarfik sullissivik.gl-ip systemianut akisussaasuuvoq.

  Imm. 2.  Systemimut akisussaasuuneq atorlugu paasissutissanik annaasaqarsinnaaneq imaluunniit unioqqutitsilluni piiaasoqarnissaanut, sequtserisoqarnissaanut aammalu inunnut tunngasunik paasissutissat pillugit inatsisit malillugit allassimasut pillugit ilisimasaqartussaanngitsut ilisimasaqalersinnaanerat atornerluisinnaanerat allatigulluunniit peqquserlussinnaanerat pinaveersaartinniarlugu Digitalimik Sullissinermut Aqutsisoqarfiup teknikkimut tunngatillugu aaqqissuussaanermilu sillimaniarnermut attuumatillugu aalajangiisinnaassuseq akisussaaffigissavaa.

Imm. 3. Inunnut tunngasunik paasissutissanik suliaqarneq pillugu akisussaaffiit, suliassat, nakkutilliinerillu pillugit kaajallaasitami (paasissutissanik suliarinnissinnaanermut isumaqatigiissut) Digitalimik Sullissinermut Aqutsisoqarfiup pisinnaatitaaffii pisussaaffii aammalu paasissutissanik suliaqarnera sukumiinerusumik aalajangersarneqarsimapput.

  § 19.  Digitalimik Sullissinermut Aqutsisoqarfiup akisussaaffigivaa sullissivik.gl-ip ingerlannissaanut CMS-systemip tassungalu attuumassusillip inerisarnissaa, ingerlanneqarnissaa, isumannaallisaanikkut nutarterneqarsimanissaa allaffissornikkullu suliarineqarnissaa.

  Imm. 2.  Digitalimik Sullissinermut Aqutsisoqarfiup CMS-systemimut isissutit suliarissavai.

Imm 3. Sullissivimmi allannguinissat qaammatit arfinillit sioqqullugit nalunaarutigineqartassapput. Tassunga ilaanngillat CMS-imi sillimaniarnikkut nutarterinerit, taakkua erngertumik suliarineqartassapput.

  Imm. 4. Inatsisit nutaat assigisaallu peqqutaallutik allannguinerit, inatsimmik atuutsitsilernermut sunniutitut ilaatillugit suliarineqartassapput.

 

  § 20. Digitalimik imminut sullissinnaanermut oqartussaaffik tunineqarnissamut isumaqatigiissusiornerani minnerpaamik ukua ilanngunneqassapput:

1) Service Level Agreement, tassani aaqqissuussinerit ajortoqarnerilu piffissat kiffartuussiffiusinnaasut aalajangersarneqassapput.

2)  Suleqatigiinnissamut isumaqatigiissut, tassanilu allassimassaaq Digitalimik Sullissinermut Aqutsisoqarfik suleqatigineqartoq.

3)  Paasissutissanut sillimaniarnermut piumasaqaatit.

4)  Aaqqiissummut sillimaniarnermut nutarterinissamut piumasaqaatit.

5)  sullissivik.gl-imi NemLog-in-imilu tekniskimik aaqqissuussaanerup nassuiarneqarnera.

 

Atuutilerfia

 

§ 21.  Kaajallaasitaq atuuttuulersinneqarpoq ulloq 1. maj 2023.

 

 

Naalakkersuisut Siulittaasuata Naalakkersuisoqarfia, 24. april 2023

 

 

Múte Bourup Egede (atsior)

Naalakkersuisut Siulittaasuat

 

 

/ Hans-Peder Barlach Christensen (atsior.)