Siunertaq

Pineqartup atorfiani naatsorsuutigineqartut qaangerlugit sulisup angusaanut nersorinninnissamik immikkoortortat neqerooruteqarsinnaatinneqarnissaat kaajallaasitami siunertaavoq. Nersorinninneq tamanut saqqummiussinikkut Namminersorlutik Oqartussani sulisunik isumassarsisitseqataaffiussaaq, kajumilersitseqataaffiulluni ineriartortitseqataaffiullunilu. Tassa imaappoq ataasiartumik akissarsisitsinermut tunngavigineqartut pisullu aalajangersimasut tunngavigineqartut pillugit ammasumik pissusilersortoqassaaq. Tamanna tunngavigalugu ataasiartumik akissarsititsisarneq taamaalilluni suleqatigiiffiup immikkuullarissuuneranut immikkut ittumik ataqqinninnerussaaq, taamaammallu immikkoortortami sulisut amerlassusaat 10 %-imik qaangernissaat pisariaqassanani.

Ataasiartumik akissarsisinnaaneq

§ 1.  Kaajallaasitaq manna Namminersorlutik Oqartussani suliffeqarfinni tullinnguuttuni makkunani atorneqareerpoq:

1)  Qitiusumik Allaffeqarfik, tassunga ilanngullugit Naalakkersuisoqarfiit, Aqutsisoqarfiit pisortallu suliffeqarfiutaat tamakku ataaniittut

2)  Naatsorsueqqissaartarfik

3)  Nakorsaaneqarfik

4)  Pinngortitaleriffik

5)  Nunatta Katersugaasivia Allagaateqarfialu

6)  Suliffeqarfiit namminersortitat

§ 1 § 1, imm. 1, nr. 1-6 naapertorlugit sulisut tamarmik ataasiartumik akissarsititsinissamut piukkunneqarsinnaapput. Sulisutut inuit sulisunut akisussaanngitsut atorfimmilu allaffimmi pisortatut assigisaannilluunniit appasinnerullutik sulisut paasineqassapput

§ 2  Sulisup nammineq sulianik naammassisaqarnera imm. 2-4-mi piumasaqaatit naammassineqarsimatillugit ataasiartumik akissarsissutigineqarsinnaavoq.

Imm. 2.  Sulisumit nalinginnaasumik naatsorsuutigisat qaangerlugit immikkorluinnaq sulianik naammassisaqarsimaneq.

Imm. 3. Sulisumit nalinginnaasumik naatsorsuutigisat qaangerlugit immikkorluinnaq angusaqarsimaneq.

Imm. 4.  Suliassamik immikkut ittumik suliaqaqqusaaneq qaangiuttoornermut pioreersumut uppernarsarneqartumullu qaangiinertut nalilerneqartoq.

Imm. 5. Pisut ataasiartumik akissarsisitsinissamut tunngaviusut pillugit ilitsersuiffiusumik kaajallaasitamut ilitsersuusiortoqassaaq. Ataasiartumik akissarsititsisarnerit tunniunneqartarnerat kaajallaasitami siunertarineqartunut aamma Namminersorlutik Oqartussani soqutigisanut naapertuuttumik naapertuuttumik ineriartortinnissaat siunertaralugu ilitsersuut Aningaasaqarnermut Sulisoqarnermullu Aqutsisoqarfimmiit suliarineqarlunilu nutarterneqartassaaq.

Ataasiartumik akissarsititsinerup annertussusaa

  § 3.  Ataasiaannarluni akissarsitsinermi kr.-t amerlanerpaat tassaassapput 20.000. Aningaasat tusindinut qaninnernut ilivitsunngortillugit tunniunneqassapput.

  Imm. 2. Ataasiartumik akissarsiaritinneqartut pensionisiaqaataanngillat.

Imm. 3. Immikkoortortap ataasiartumik akissarsisitsinissamut periarfissai aningaasaqarnikkut killeqartinneqarput kaajallaasitamullu matumunnga ilitsersuummi aalajangersaaffigineqarlutik. Ataasiartumik akissarsisitsisarnermut malittarisassat Aningaasanut Inatsimmi aningaasaliissutit ilaneqarnissaannik kinguneqanngillat.

Periaaserineqartoq

§ 4 Ataasiartumik akissarsisitsinerit tunniunnissaat pillugit inassuteqarnermi § 2 naapertorlugu akissarsisitsinissamut allakkatigut tunngavilersuuteqartoqassaaq ataasiartumik akissarsiarititassat annertussusissaat taallugit.

Imm. 2. Ataasiaannarluni akissarsisitsisoqarnissaanik inassuteqarnermi tusarniaaffigineqartutut najukkami sulisut sinniisaat peqataatinneqassaaq, periarfissatut allatut sulisut sinniisuunerat.

Imm. 3.  Sulisup ataasiaannarluni akissarsisinneqarnissaanik inassuteqaat sulisunut aqutsisutut akisussaasutullu qaninnerpaatut atsiorneq ilanngunneqassaaq.

Imm. 4. § 1, imm. 1, nr. 1-3-t naapertorlugit inassuteqaatit sulisunut tunngasut oqartussaaffimmik akisussaasumit Naalakkersuisoqarfimmi pisortamit aamma aqutsisoqarfimmi pisortamit allakkatigut akuerineqassaaq.

Imm. 5. § 1, imm. 1, nr. 4-6-t naapertorlugit inassuteqaatit sulisunut tunngasut suiffeqarfimmi pineqartumi aqutsisumit qullersaasumit allakkatigut akuerineqassaaq.

Imm. 6. Imm. 4 aamm 5 napertorlugit inassuteqaammik akuersissut akissarsianik tigusisumit atsiorneqassaaq, taassuma atsiornermigut § 5, imm. 3-5-t naapertorlugit tamanut saqqummiussineq isumaqataaffigalugu uppernarsarpaa.

§ 5 Ataasiaannarluni akissarsisitsinissamut tunngavilersuut akuerisaq Aningaasaqarnermut Sulisoqarnermullu Aqutsisoqarfimmut nalunaarutigineqassaaq. Immikkoortortaqarfimmi akissarsiat Aningaasaqarnermut Sulisoqarnermullu Aqutsisoqarfimmit isumagineqanngippata tunngavilersuut akuerineqarsimasoq akissarsialeriffimmi akisussaasumut nassiunneqassaaq.

Imm. 2. Aningaasaqarnermut Sulisoqarnermullu Aqutsisoqarfimmi, akissarsialeriffimmi akisussaasoq, ullormi akissarsiffissami ataasiaannarluni akissarsiassat akilerneqarnissaat aallartinneqassaaq.

Imm. 3. Ataasiaannarluni akissarsisinneqartussat tamarmik inassuteqaammik tamakkiisumik tunngavilersuutitalerlugit akissarsiassallu amerlassusilikkat ilanngullugit aamma tigusisussat aqqi atorfeqarfiilu Nanuaqqakkut nalunaarutigineqassapput, taamaattorli imm. 4 takuuk.

Imm. 4. Immikkoortortaqarfimmi nalinginnaasumik Nanuaqqamut attaveqanngitsuni immikkoortortaqarfiup inassuteqartup najukkami intranetikkut imaluunniit tassunga assingusumik attaveqaatinut isaaffikkut kalaallit danskisullu tamanut saqqummiussisoqarnissaa qulakkeerneqassaaq. Imm. 3 naapertorlugu tamanut saqqummiussinissamut piumasaqaatit assigiipput.

Imm. 5. <immikkoortortaqarfimmi inassuteqartumi akisussaasut inassuteqaatip kalaallisuunngortillugu danskisuunngortillugu intranetimi attuumassuteqartumi imaluunniit ataatsimut attaveqaatinut isaaffikkut tamanut saqqummiunneqarnissaa akisussaaffigineqarpoq.

Immikkut akuersissuteqarnissamut periarfissiineq

§ 6 Imm. 2 naapertorlugu pisortaq immikkorluinnaq pisoqarsimatillugu ataasiartumik akissarsisinneqarsinnaavoq.

Imm. 2. Inassuteqaatip § 4, imm. 1 aamma 6-imi piumasaqaatit oqaatigineqartut naammassisimasussaavai.

Imm. 3. Inassuteqaat atorsinnaassaguni Naalakkersuisoqarfimmi attuumassuteqartumi pisortamit atsiorneqarsimassaaq.

Imm. 4. Inassuteqaat Naalakkersuisut Siulittaasuata Naalakkersuisoqarfiani pisortamit allakkatigut akuerineqassaaq.

Imm. 5. Ilisimatitsissutitut inaarutaasumik atsiorneq aamma inassuteqaat akuerisaq Aningaasaqarnermut Naalakkersuisumut nassiunneqassaaq.

Atortuulersitsineq

§ 7. Kaajallaasitaq 1. april 2023-mi atuutilissaaq.

Imm. 2. Kaajallaasitap matuma Namminersorlutik Oqartussani, Qitiusumik Allaffeqarfimmi immikkoortortaqarfiinilu sulisunut ataasiartumik akissarsisitsisarneq pillugu Kaajallaasitaq 16. juni 2020-meersoq atorunnaarsillugulu taarsissavaa.

Naalakkersuisoqarfinni pisortaqatigiinnit 13. marts 2023-mi akuerineqarpoq.

Uloq: 29. marts 2023

Hans-Peder Barlach Christensen (atsior.)

Naalakkersuisoqarfimmi pisortaq

Naalakkersuisut Siulittaasuata Naalakkersuisoqarfia

/ André Guttesen (atsior)

Aningaasaqarnermut Sulisoqarnermullu Aqutsisoqarfik