Mittarfeqarfiit A/S-imik pilersitsineq

  § 1.  Aktiaateqarluni ingerlatseqatigiiffimmik Mittarfeqarfiit A/S-imik taaguutilimmik pilersitsinissamut Naalakkersuisut piginnaatinneqarput. Aktiatigut aningaasaatit Naalakkersuisunit aningaasaliissutigineqassapput.
  Imm. 2.  Ingerlatseqatigiiffik saniatigut allanik taaguuteqarluni suliassaminik ingerlatsisinnaavoq.

  § 2.  Suliffeqarfiup namminersortitap Mittarfeqarfiit tamakkiisumik ilaannakortumilluunniit akileeqataassutigineratigut aktiatigut aningaasaatinik aningaasaliinissaannut Naalakkersuisut piginnaatinneqarput. Mittarfeqarfiit pigisaat nalillit ingerlataallu suut akileeqataassutigineqarnissaat pillugu Naalakkersuisut erseqqinnerusumik aalajangersaassapput.
  Imm. 2.  Akileeqataassutitigut imm. 1-imi taaneqartutigut suliffeqarfimmut aningaasaliissutigineqartumut tunngatillugu pisinnaatitaaffiit pisussaaffiilu tamaasa Mittarfeqarfiit A/S-ip tigussavai.

  § 3.  Kalaallit Nunaanni mittarfinnik ingerlatanillu tassunga assingusunik attuumassuteqartunilluunniit piginnittuunissaq ingerlatsinissarlu ingerlatseqatigiiffiup siunertaraa.
  Imm. 2.  Ingerlatseqatigiiffik niuernermi atugassarititaasut tunngavigalugit ingerlanneqassaaq.

  § 4.  Mittarfeqarfiit A/S-imut ileqqoreqqusat taakkunanilu allannguutit Naalakkersuisunit akuerineqartassapput.
  Imm. 2.  Naalakkersuisut akuersiteqqaarnagit Mittarfeqarfiit A/S kattunnernut peqataananilu aggulunneqarsinnaanngilaq.

  § 5.  Mittarfiit, taakkunanilu napasuliat, tikittarfiit aallariartortarfiillu, sannaviit allaffeqarfiillu, timmisartunut qulimiguulinnullu iniliat il.il. taakkununngalu atatillugu aqqusernit nunaminertanullu pisinnaatitaaffiit, Mittarfeqarfiit A/S-imut akileeqataassutigineqartut Naalakkersuisut akuersiteqqaarnagit toqqaannartumik toqqaannanngitsumilluunniit tunniunneqarsinnaanngillat, tunineqarsinnaanngillat, piffissami sivisunerusumi attartortinneqarsinnaanngillat qularnaveeqqusiunneqarsinnaanatilluunniit. Ukiunik marlunnik sivisunerusumik attartortitsinissamik isumaqatigiissutit piffissami sivisunerusumi attartortitsinertut paasineqassapput.
  Imm. 2.  Pigisat nalillit imm.1-imi taaneqartut akiitsoqarfinnit malersorneqarsinnaanngillat, tamanna qularnaveeqqusiussineq Naalakkersuisunit akuerineqarsimasoq tunngavigalugu pinngippat.

Mittarfeqarfiit A/S-imi piginneqataassutinik tunniussineq

  § 6.  Mittarfeqarfiit A/S-imi piginneqataassutinik Kalaallit Airports Holding A/S-imut tunniussinissamut Naalakkersuisut piginnaatinneqarput. Tunniussineq isumaqatigiissuteqarnikkut imaluunniit aningaasaatinik qaffaanermut ilagitillugu aningaasaliissuteqarnikkut pissaaq.

Pigisat nalillit ingerlatallu akileeqataassutigineqanngitsut

  § 7.  Pigisat nalillit ingerlatallu Mittarfeqarfiit A/S-imut akileeqataassutigineqanngitsut siunissami ingerlanneqarnissaat aserfallatsaalineqarnissaallu pillugit Naalakkersuisut aalajangiissapput.
  Imm. 2.  Pigisat nalillit ingerlatalluunniit suliffeqarfiup namminersortitap Mittarfeqarfiit ingerlanneqarneranut ilaasimasut namminersortunut pisortalluunniit suliffeqarfiutaannut tunniunnissaannut Naalakkersuisut piginnaatinneqarput. Tunniussinermut atatillugu inuiaqatigiit angallannerluunniit eqqarsaatigalugit isiginiagassat isumagineqarnissaannut Naalakkersuisut piumasaqaatinik aalajangersaasinnaapput.
  Imm. 3.  Ingerlatanik Mittarfeqarfiit ingerlanneqarnerannut ilaasimasunik tigusinissaanik Naalakkersuisut kommune peqqusinnaavaa. Tigusineq Namminersorlutik Oqartussat kommunillu nammagassat suliassallu agguataarneqarnerat pillugu isumaqatigiissutaannut naapertuutissaaq.

  § 8.  Mittarfeqarfiit A/S ingerlatseqatigiiffimmut ileqqoreqqusat malillugit suliaminik ingerlatsissaaq.
  Imm. 2.  Ingerlataqarfiit atuuffiilluunniit avataanit isumagineqartussanngorlugit Mittarfeqarfiit A/S-ip suliariumannittussarsiuussinnaavai.

  § 9.  Ingerlatseqatigiiffiup mittarfiutaanik atuinermut akigititassanik Mittarfeqarfiit A/S aalajangersaassaaq.
  Imm. 2.  Ingerlatseqatigiiffiup mittarfiutaanik atuinermut akigititat akigititanullu tunngaviit Mittarfeqarfiit A/S-ip ingerlatsinera tamarmiusoq aamma § 3, imm. 2-mi § 8, imm. 1-imilu tunngavissat tunngavigalugit aalajangersarneqartassapput.
  Imm. 3.  Naatsorsuuserinermi nalinginnaasumik tunngavissat malillugit Mittarfeqarfiit A/S mittarfinnut ataasiakkaanut naatsorsuusiorlunilu missingersuusiussaaq. Nalinginnaasumik ingerlatsineq kiisalu aserfallatsaalinerit aningaasaliissuteqarnerillu mittarfiit ataasiakkaat inatsisinut naapertuullutillu ulluinnarni atorneqarsinnaanissaannut pisariaqartut mittarfinnut ataasiakkaanut naatsorsuutini missingersuutinilu pineqarput.
  Imm. 4.  Aallarnermut akigititat, ilaasunut akigititat, isumannaallisaanermut akigititat, uninnganermut akigititat ammatitsinermullu akigititat taakkunanilu allannguutit kiisalu akikilliliissuteqartarnermut akiliuteqartitsisannginnissamullu tungaviit Naalakkersuisunit akuersissutigineqassapput, taamaattorli imm. 6 takujuk. Akigititanik akigititanullu tunngavinnik akuersissuteqarnermut atatillugu paasissutissat tamaasa Naalakkersuisunit pingaarutilittut isigineqartut Mittarfeqarfiit A/S-ip Naalakkersuisunut nalunaarutigissavai.
  Imm. 5.  Akigititat akigitanulluunniit tunngaviit imm. 4-mut ilaatinneqartut allanngortinneqarnissaannik Naalakkersuisut piumasaqaateqarsinnaapput, taamaattorli imm. 6 takujuk.
  Imm. 6.  Pisortanut akitsuutini, akileraarutini akiliutigitinneqartartuniluunniit allannguutit Naalakkersuisut akuersitinnagit akigititanut ilanngunneqarsinnaapput. Akigititat tamatuma saniatigut Kalaallit Nunaanni atuisartunut akigitinneqartunut naleqqersuut malillugu ukiumoortumik iluarsiissuteqarfigineqartarsinnaapput Naalakkersuisunut saqqummiussinertaqanngitsumik.

  § 10.  Mittarfinni pineqartuni ingerlatsineq, aserfallatsaaliineq aningaasaliinissarlu pillugit kiffartuussinissamik isumaqatigiissuteqarnikkut ingerlatseqatigiiffiup mittarfiutaani ingerlatsinerup attatiinnarnissaanut Naalakkersuisut Mittarfeqarfiit A/S pisussaaffilersinnaavaat. Kiffartuussinissamik isumaqatigiissutit niuernermi atugassarititaasut tunngavigalugit isumaqatigiissutigineqartassapput.
  Imm. 2.  Kiffartuussinissamik isumaqatigiissutit ukiunut arlalinnut isumaqatigiissutigineqarsinnaapput ingerlatseqatigiiffiullu mittarfiutaasa qaqugukkulluunniit angallannermut atortulersuutinut tamarmiusunut, pisortat ilaasunik usinillu assartuinerata ingerlanneqarnissaa pillugu Naalakkersuisut suliffeqarfiullu akornanni kiffartuussinissamik isumaqatigiissutit ilanngullugit, ilaasinnaanissaat ikorfartuutaasinnaanissaallu qularnaassallugu.
  Imm. 3.  Ingerlatsineq, aserfallatsaaliineq aningaasaliinerillu ilanngullugit mittarfinnut ataasiakkaanut ukiunut arlalinnut missingersuutit tunngavigalugit kiffartuussinissamik isumaqatigiissutit isumaqatigiissutigineqassapput. Piffissamut kiffartuussinissamik isumaqatigiissutip atuuffissaanut ukiunut arlalinnut missingersuutit suliarineqassapput.

  § 11.  Ingerlatseqatigiiffiup mittarfiutaanut il.il. aningaasaliissuteqarnissamut immikkut ittumik aningaasaliissuteqarnissamik pisariaqartitsinerit taakkualu aningaasalersorneqarnissaat pillugit niuernermi atugassarititaasut tunngavigalugit isumaqatigiissuteqartarnissanut Naalakkersuisut Mittarfeqarfiit A/S pisussaaffilersinnaavaat. § 10, imm. 2 aamma 3, taamatuttaaq atuutissapput.

  § 12.  Mittarfeqarfiit A/S tamatuminnga piumasaqartoqartillugu ingerlatseqatigiiffiup mittarfiutai il.il. pillugit kisitsisitigut paasissutissanik assigisaannillu Naalakkersuisunut nassiussisassaaq.

Sulisut inatsiseqartitsinikkut inissisimanerat

  § 13. Mittarfeqarfiit ilaani § 2 malillugu Mittarfeqarfiit A/S-imut akileeqataassutigineqartuni sulisut Mittarfeqarfiit A/S-imi atorfinitsinneqassapput. Suliffeqarfinnik tunniussisoqartillugu sulisut inatsisitigut inissisimanerat pillugu Inatsisartut peqqussutaat atuutissaaq.

Inatsisiliornernut allanut pissutsit

  § 14.  Mittarfiit taakkununngalu atatillugu napasuliat, tikittarfiit aallariartortarfiillu, sannaviit allaffeqarfiillu, timmisartunut qulimiguulinnullu iniliat il.il., taakkununnga atatillugu aqqusernit nunaminertanullu pisinnaatitaaffiit kiisalu ingerlatsinermut atortut pigisallu nuunneqarsinnaasut mittarfiit ataasiakkaat ingerlanneqarnerinut ilaasut akileeqataassutigineqarnerannut atatillugu allagaatit, naqitat, uppernarsaatit il.il. pisortanut naqissusiinermut akitsuuserneqassanngillat.

Atuutilernera

  § 15.  Inatsisartut inatsisaat manna nalunaarutigineqarnerata aqaguani atuutilissaaq.

Namminersorlutik Oqartussat, ulloq 21. novembari 2022

Múte Bourup Egede
Naalakkersuisut Siulittaasuat