Atuuffia

  § 1.  Inatsisartut inatsisaat una atuuppoq sulinermik inuussutissarsiuteqartunut tamanut, suliffeqarneq qaammat ataaseq sinnerlugu sivisussuseqarsimappat, sap.ak. piffissaq suliffiusartoq akunnerit 15-it qaangerlugilluunniit sivisussuseqartarpat. 
  Imm. 2.  Inatsisartut inatsisaat atortinneqanngilaq sulisitsisup minnerpaatut  ataatsimoorussanik isumaqatigiissutit naapertorlugit pisussaaffeqarfigisaani sulinermik inuussutissarsiuteqartumut paasissutissiisarnissamik, inatsisartut inatsisaanni matumani pisussaaffiusut assigisaannik.
  Imm. 3.  Inatsisartut inatsisaat atortinneqanngilaq inunnut imarsiornermik inuussutissarsiuteqartunut.
  Imm. 4.  Sulinermik inuussutissarsiuteqartutut isigineqassapput inuit suliffeqarnerminnut atatillugu akissarsiaqartitaasut.
  Imm. 5.  Pisussaaffiit aamma pisinnaatitaaffiit Inatsisartut inatsisaat manna naapertorlugu atuuttuusut sunniuteqarfiginngilaat atorfeqarnermut malittarisassiortarneq aamma atorfeqarnermi atugassarititaasunik allannguisarneq.
  Imm. 6.  Inatsisartut inatsisaat isumaqatigiissuteqarnikkut sanioqqunneqarsinnaanngilaq sulinermik inuussutissarsiuteqartumut ajoqutaasumik.
  Imm. 7. Naalakkersuisut aalajangersinnaavaat sulinermik inuussutissarsiuteqartut ilaannikkuinnaq suliffeqartartut imaluunniit immikkut ittunik suliaqartartut inatsimmi matumani aalajangersakkanik tunngavilimmik atugassaqartinneqannginnissaat.

Sulisitsisup paasissutissiinissamut pisussaaffii

  § 2.  Sulisitsisup kingusinnerpaamik atorfeqarnerup aallartinneraniit qaammatip 1-ip qaangiunnerani sulinermik inuussutissarsiuteqartoq paasissutissanik tunissavaa  atugassarititaasut imm. 3, nr. 1-10-mi nalunaarsorneqartut pillugit. Sulisitsisoq pisussaaffeqarpoq paasissutissanik tunniussinissamut oqaatsit sulinermik inuussutissarsiuteqartup paasisinnaasai atorlugit.
  Imm. 2.  Sulinermik inuussutissarsiuteqartup qinnutigippagu paasissutissat kalaallisut imaluunniit danskisut tunniunneqarnissaat, taava sulisitsisup kingusinnerpaamik qaammatip 1-ip qaangiunnerani oqaatsit atorneqartussatut kissaatigineqartut atorlugit sulinermik inuussutissarsiuteqartoq paasissutississavaa.
  Imm. 3.  Sulisitsisup paasissutissiinissamik pisussaaffianiipput paasissutissat makkua:
1)  Sulisitsisup aamma sulinermik inuussutissarsiuteqartup aqqa aamma najugaa.
2)  Suliffiup sumiiffia, imaluunniit aalajangersimasumik suliffeqarneq sumiiffeqarnerluunniit amigaataappata, suliffiunerusartut, paasissutissat sulinermik inuussutissarsiuteqartoq sumiiffinni assiginngitsuni sulisassasoq, suliffeqarfiullu qullersaqarfia imaluunniit sulisitsisup najugaa.
3)  Suliat suunerisa allaaserineqarnerat imaluunniit sulinermik inuussutissarsiuteqartup taaguutaa, atorfiup qaffasissusia taaguutaalu imaluunniit suliassaqarfiit suuneri. 
4)  Atorfeqarnerup qanga aallartissimanera.
5)  Atorfeqarnerup qanoq sivisutiginissaanik naatsorsuutigisaqarneq, piffissamik killiligaanngitsumik sulisitsisoqartinnagu. Tamatumani aamma piffissap misilitsiffiusup qaqugu naanissaa, aamma piffissami misilitsiffiusumi atugassarititaaasut immikkut ittut.
6)  Sulinermik inuussutissarsiuteqartup pisinnaatitaaffii akiliunneqarluni sulinngiffeqarnermi, matumani aamma sulinngiffeqarnermi akissarsiaqartitsisoqartarnersoq.
7)  Sulinermik inuussutissarsiuteqartup aamma sulisitsisup soraarnissamut soraarsitsinissamulluunniit piffissaligaanera, imaluunniit tamatumunnga atuuttut malittarisassat.
8)  Akissarsiat atuuttut imaluunniit akissarsiat isumaqatigiissutaasut, sulinermik inuussutissarsiuteqartup pisinnaatitaaffigisai sulinermik aallartitsinermini, aamma tapisiat akissarsianullu ilaasut allat, pineqartuni ilaariinngitsut, assersuutigalugit soraarnerussutisiassanut akiliutit, taamaattoqarpallu nerisaqarneq aamma ineqartitaaneq. Kiisalu aamma ilisimatitsissutigineqassapput qanoq akuttussusilimmik akissarsisitsisoqartarnersoq. Akissarsiat aalajangersimasuunngippata akissarsiat qanoq naatsorsorneqartarneri sulinermik inuussutissarsiuteqartumut paasissutissiissutigineqassapput.
9)  Ullormut imaluunniit sap. ak. nalinginnaasumik suliffiup sivisussusia.
10)  Nalunaarsuutit ataatsimoorussamik isumaqatigiissut suna imaluunniit isumaqatigiissut suna tunngavigalugu akissarsiassat aaqqissuunneqartarnerinik. Isumaqatigiissutit imaluunniit illuatungeriit akornanni isumaqatigiissut suliffeqarfiup avataani suliaasoq pineqarsimappat, illuatungeriit pineqartut kikkuuneri paasissutissiissutigineqassapput.
  Imm. 4.  Paasissutissat pappialanngorlugit imatut tunniunneqartassapput:
1)  allakkatigut nalunaarut imaqartoq imm. 3-mi pineqartunik paasissutissanik, kisianni pinnagit paasissutissat ataaniittut nr. 2-4-mi pappialaatit eqqaaneqartut,
2)  suliffeqarnermut isumaqatigiissut allagaasoq,
3)  atorfininnermut allakkat, imaluunniit
4)  pappiala pappialalluunniit arlaqartut tunngaviusimappat minnerpaamik paasissutissat tamarmiusut eqqaaneqarsimaneri imm. 3-miittut, nr. 1-4, 8 aamma 9-miittut.
  Imm. 5.  Paasissutissanut imm. 3-mi, nr. 6-9-mi pineqartunut tunngatillugu paasissutissiinissamik pisussaaffeqarneq naammassineqarsimasutut isigineqassaaq pappialaammi imm. 4-mi eqqaaneqartuni innersuussisoqarpat inatsisinut, allaffissornikkut aalajangersakkanut, malittarisassani aalajangersagaliaasunut imaluunniit ataatsimoorussanik isumaqatigiissutinut pissutsinut pineqartunut atuuttunik.

Sulinermik inuussutissarsiuteqartut suliartortitaasut

  § 3.  Sulinermik inuussutissarsiuteqartoq suliaminik nunami allami imaluunniit nunani allani ingerlatsissappat, sulianillu ingerlatsineq qaammatit pingasut sinnerlugit sivisussuseqassappat, taava pappialaatit pineqartut imaluunniit § 2, imm. 4-mi eqqaaneqartut sulinermik inuussutissarsiuteqartumut tunniunneqareersimassappat suliartorluni aallartinnagu.  Paasissutissat § 2, imm. 3-mi pineqartut saniatigut pappialat ilassutitut paasissutissanik imaattunik ilaqassapput: 
1)  suliat nunani allani ingerlanneqartussat sivisussusissaat,
2)  nunat allat aningaasaat akissarsiat tunniunneqarneranni tunngaviusussat,
3)  taamaattoqarsimappat iluaqutissat aamma nioqqutissat inuussutissat nunap pineqartup pigisai najugaqarnermi iluaqutissarsiarineqartussat,
4)  taamaattoqarsimappat sulinermik inuussutissarsiuteqartup nunaminut uternermini atugassarilerumaagai, aamma
5)  pisariaqartunik uppernarsaatinik suliaqartoqarsimanissaa, nunamut allamut suliartornermut atatillugu atorneqartussanik. 
  Imm. 2.  Paasissutissanut imm. 1-imi, nr. 2-mi aamma 3-mi pineqartunut atatillugu taakkua tunniunneqarsinnaapput pappialaammi § 2, imm. 4-mi eqqaaneqartumi, innersuullugit inatsisit, allaffissornikkut aalajangersakkat, malittarisassani aalajangersakkat imaluunniit ataatsimoorussanik isumaqatigiissutit, pissutsini pineqartuni atuuttuusut.

  § 4.  Sulinermik inuussutissarsiuteqartoq Kalaallit Nunaanni sumiiffimmut allamut suliartortinneqassappat, suliartortinneqarfimminilu qaammatinit 3-nit sivisunerusumik najugaqassappat, taava sulisitsisup paasissutissat makkua ilanngullugit tunniutissavai:
1)  suliartorfiusumi piffissap suliffiusussap sivisussusissaa,
2)  iluaqutissat aamma nioqqutissat sumiiffimmi allamiinnermi immikkut pissarsiarineqarsinnaasunik peqassappat, aamma
3)  sulinermik inuussutissarsiuteqartup sumiiffimmut angerlarsimaffigisaminut uternermini atugassarilerumaagai.
  Imm. 2.  Paasissutissat sulinermik inuussutissarsiuteqartumut tunniunneqassapput § 2, imm. 4-mi eqqaaneqartumi pappialaammi aallannginnermi.

Atorfeqarnermi atugassarititaasunik allannguineq

  § 5.  Sulisitsisoq pisussaavoq allannguinerni suniluunniit pissutsinik § 2, imm. 3, § 3, imm. 1 aamma § 4, imm. 1-miittuni sukkanerpaamik kingusinnerpaamillu allannguinerniit qaammatip ataatsip qaangiutinnginnerani pineqartut pillugit sulinermik inuussutissarsiuteqartoq allakkatigut ilisimatissallugu. Tamannali atuutissanngilaq allannguinerit inatsisinik, allaffissornikkut aalajangersakkanik, malittarisassanik imaluunniit ataatsimoorussamik isumaqatigiissutinik tunngaveqarpata, sulisitsisup § 2, imm. 5, imaluunniit § 3, imm. 2-mut innersuussinnaasaanik.

Paasissutissiisussaatitaanermik naammassinnittussaanermik sumiginnaaneq

  § 6.  Sulisitsisup paasissutissiisussaatitaanini eqqortissimanngippagu, sulinermik inuussutissarsiuteqartoq eqqartuussivitsigut taarsiivigineqarsinnaavoq. Taarsiissutit inummut pineqartumut sap. akunnerini 13-ini akissarsiat qaangerlugit annertussuseqarsinnaanngitsut, aalajangersarneqassapput suliami pineqartumi pissutsit tunngavigalugit, matumani aamma paasissutissiisimannginneq sulinermik inuussutissarsiuteqartumut qanoq sunniuteqarsimanersoq tunngavigalugu. Taarsiissutisiassat pissutsinik sakkortusaataasunik tunngaveqartuni qaffanneqarsinnaapput sap. akunnerini 20-ni akissarsiat angullugit. Taarsiissutisialli qaffasinnerpaamik 1.000 kr.-inik annertussuseqarsinnaapput, paasissutissiisimannginneq utoqqatsissutigineqarsinnaasumik pissuteqarpat, atorfeqarnermilu atugassarititaasunut tigussaasumik isumaqarsimanngippat.

Atortuulerfia

  § 7.  Inatsisartut inatsisaat atortuulersinneqarnissaa Naalakkersuisut nalunaarummik aalajangiinerisigut pissaaq.
  Imm. 2.  Inatsisartut inatsisaata piffissami atuutilersinneqarneraniiit, atorneqarnermi pissutsit pillugit isumaqatigiissutinut tunngatillugu Inatsisartut inatsisaata piffissaq atuutilerfianiit kingusinnerusukkulluunniit atsiorneqartut Inatsisartut inatsisaat atuutissaaq.

Piffissami ikaarsaariarfiusumi atugassarititaasut

  § 8.  Atorfeqarnermut atatillugu isumaqatigiissutaasunut Inatsisartut inatsisaata piffissami atuutilerfia, tak. § 7, imm. 1, sioqqullugu, sulilu Inatsisartut inatsisaata piffissami atuutilerfia kingornagut atuuttunut tunngatillugu sulisitsisoq sulinermik inuussutissarsiuteqartup tamatumunnga piumasaqarneranik tunngaveqartumik pisussaavoq kingusinnerpaamik qaammatit 2-ut qaangiunneranni sulinermik inuussutissarsiuteqartoq § 2, imm. 3, nr. 1-10-mi pineqartunik paasissutissanik tunissallugu, sulinermik inuussutissarsiuteqartup paasissutissat pineqartut pappialanngorlugit siusinnerusukkut tigoreersimanngippagit. §§ 3 aamma 4 taamaattoq atuupput najukkap avataanut suliartortitaasarnernut, Inatsisartut inatsisaata piffissami atuutilerfiani ingerlanneqartunut.
  Imm. 2.  Atorfeqarnernut imm. 1-imi pineqartunut ilaasunut sulisitsisup sulinermik inuussutissarsiuteqartumut § 2, imm. 3, nr. 1-10-mi pineqartunik paasissutissanik sulinermik inuussutissarsiuteqartup allaganngorlugit pigeriinngisaanik tunniussisussaatitaanera atuuppoq kingusinnerpaamik Inatsisartut inatsisaata piffissami atuutilersinneqarneraniit qaammatit 6.-it.

Namminersorlutik Oqartussat, ulloq 21. novembari 2022.

Múte Bourup Egede
Naalakkersuisut Siulittaasuat