Naalakkersuisoqarfiit pisortaqatigiivinut tunngasut

  § 1.  Naalakkersuisoqarfiit pisortaqatigiivi tassaapput Naalakkersuisoqarfinni suliaqarfiit akimorlugit qitiusumik allaffeqarfimmi ataqatigiissaarisartut.    Naalakkersuisunit aalajangikkat siumut isigisumik iliuuseqarfigineqarnersut Naalakkersuisoqarfiit pisortaqatigiivisa nakkutigissavaat.
  Imm. 2.  Suliassaqarfiit akimorlugit pissutsinik Naalakkersuisoqarfiit pisortaqatigiivi Naalakkersuisunut siunnersuisarput, suliaqarfimmiillu suliat ingerlanneqarnerannut ataqatigiissaarinissamut ataatsimullu isigalugu isumaginninnissamut ilapittuuteqartartuullutik.  
  Imm. 3.  Pissutsit naalakkersuinikkut aqutsinikkullu maanna, periusissiornikkut piffissarlu ungasinnerusoq eqqarsaatigalugu pisussat Naalakkersuisoqarfinni pisortaqatigiit sammisarisarpaat.
  Imm. 4.  Naalakkersuisoqarfiit pisortaqatigiivisa ataatsimiinneranni aalajangikkat allaffeqarfik tamakkerlugu pituttuisuupput.

  § 2.  Naalakkersuisoqarfiit pisortaqatigiivi tassaapput Naalakkersuisut Naalakkersuisoqarfiini pisortat aamma Naalakkersuisut Siulittaasuata Naalakkersuisoqarfiani pisortaq. 
  Imm. 2.  Naalakkersuisut Siulittaasuata Naalakkersuisoqarfiani Naalakkersuisoqarfimmut pisortaq Naalakkersuisoqarfiit pisortaqatigiivini siulittaasuuvoq. Siulittaasup pisinnaannginnerani Naalakkersuisut Siulittaasuata Naalakkersuisoqarfiani pisortaq sinniisutut inissittarpoq.
  Imm. 3.  Naalakkersuisoqarfiit pisortaqatigiivini  ilaasortaasut saniatigut attaveqaqatigiinnermik pisortaq aamma HR-imi ineriartortitsinermik pisortaq ataatsimiinnerni aalajangersimasumik peqataasarput. Inuit allat ataatsimiinnernut aamma peqataasinnaanerannik Siulittaasoq aalajangiisinnaavoq.

Ataatsimiinnerni peqataasussaatitaaneq aamma sinniisussat

  § 3.  Ataatsimiinnerni peqataasussaatitaaneq atuuppoq. Peqataaniannginneq ataatsimiinneq sioqqullugu siulittaasumut nalunaarutigineqassaaq.
  Imm. 2.  Utaqqiisaasumik peqannginnissami sinniisussaq ataatsimiigiaqqusaassanngilaq. Sivisunerusumik peqannginnissami susassaqarfimmeersumik sinniisussamik aalajangersimasumik ataatsimik ataatsimiigiartoqartassaaq.
  Imm. 3.  Inuit ullut 14-t sinnerlugit utaqqiisaasumik inissisimasut imaluunniit atorfimmut pineqartumut atorfininnissap tungaanut sulisuusut Naalakkersuisoqarfinni pisortaqatigiinni ilaasortanngortinneqassapput. 
  Imm. 4.  Naalakkersuisoqarfiit pisortaqatigiivini ilaasortat pissutsit kinguartinneqarsinnaanngitsut pissutigalugit peqataanissamik periarfissaqanngikkunik § 6 malillugu oqaluuserisassatut immikkoortunut allakkatigut oqaaseqaatinik nassiussisinnaapput.

Ataatsimiinnerit ingerlanneqarnerat:

  § 4.  Naalakkersuisoqarfiit pisortaqatigiivi ataasinngornerit tamaasa nal. 14:00 Naalakkersuisut Siulittaasuata Naalakkersuisoqarfiani ileqquusumik ataatsimiittassapput.
  Imm. 2.  Ataatsimiinnerit ukioq kaajallallugu sapaatip akunnikkaartumik juunilli qaammataa minillugu ingerlanneqartassapput.
  Imm. 3.  Ukiumut siullermik ataatsimiinneq januaarimi ataasinngornerup aappaani ingerlanneqassaaq, ukiumullu kingullermik ataatsimiinneq decembarimi ataasinngornerup aappaani ingerlanneqassalluni.
  Imm. 4.  Pisariaqarnerani Siulittaasoq immikkut ittumik ataatsimiinnissamut aggersaassaaq.

Allatseqarfik, ataatsimiinnernut atortussat il.il.

  § 5.  Allatseqarfimmik ingerlatsineq Siulittaasup Naalakkersuisoqarfianit isumagineqassaaq. 
  Imm. 2.  Tulliani ataatsimiinnissamut ataatsimiinnermi oqaluuserisassat atortussallu sisamanngornerit tamaasa allatseqarfimmit nassiussuunneqassapput. 
  Imm. 3.  Oqaluuserisassanut immikkoortunik oqaluuserisassanngortitat kiisalu taakkununnga atortussat kingusinnerpaamik pingasunngornermi nal. 16:00 sioqqullugu allatseqarfimmut tunniunneqarsimassapput.
  Imm. 4.  Tunniussinissamut piffissaliussaq kingoqqullugu oqaluuserisassallu nassiutereernerisigut immikkoortut tuaviussassatut pissusillit oqaluuserisassanut ilanngunnissai Siulittaasup akuerisinnaavai. 
  Imm. 5.  Atortussat il.il. nassiunneqassapput uunga DCGRUPPEN@nanoq.gl

Oqaluuserisassat

  § 6.  Naalakkersuisoqarfiit pisortaqatigiivi ileqquusunik ataatsimiinnissaannut aalajangersimasumik oqaluuserisassanut immikkoortut uku ilaatinneqartassapput: 
1)  Ataatsimiinnermit kingullermit imaqarniliap akuersissutigineqarnera.
2)  Naalakkersuisunut ilasortat aamma Naalakkersuisoqarfiit pisortaqatigiivisa suliassaat tulliuttut pillugit ilisimatitsinerit.
3)  Susassaqarfiit akimorlugit pissutsinik ilisimatitsinerit.
4)  Siunnersuutit tigusimasat.
5)  Pissutsit allat maanna pisut naatsumik ilisimatitsissutiginerat / Taasariallit allat.
6)  Ataatsimiinnermit maanna pisumit aalajangikkat pillugit imaqarniliap akuerineqarnera.

Attaveqarneq

  § 7.  Naalakkersuisoqarfiit pisortaqatigiivinit akuersissutigereernerisigut aalajangikkat pillugit imaqarniliaq Nanuaqqami pissarsiarineqarsinnaassaaq.

Kaajallaasitap aaqqissuuteqqinnera

  § 8.  Kaajallaasitap uuma imarisai ukiut tamaasa kvartalimi siullermi Naalakkersuisoqarfiit pisortaqatigiivinit nalilersugassanngorlugit qaqinneqartassapput.

  § 9.  Ulloq 30. maj 2022 Naalakkersuisoqarfiit pisortaqatigiivini ataatsimiinnermi taamaalillugit akuerineqarput.

Naalakkersuisut Siulittaasuata Naalakkersuisoqarfia ulloq 11. aggusti 2022

Hans-Peder Barlach Christensen
Naalakkersuisoqarfimmi pisortaq

/ Simigaq Broberg