Inatsisartut Naalakkersuisullu pillugit Inatsisartut inatsisaat nr. 26, 18. november 2010-meersumi § 23, imm. 1 naapertorlugu makkua aalajangersarneqarput:

 

Danskit naalagaaffiata aamma Naalakkersuisut akornanni paasissutissat immikkoortitat illuatungeriinnit tamanit illersorneqarnissaat paarlaasseqatigiiffiginissaallu, Nordatlantiske Tratats Organisation (NATO) kiisalu nunani tamalaani isumaqatigiissutit nunalu tamakkerlugu inatsisit eqqarsaatigalugit paasissutissat immikkoortitat sillimaniarnikkut illersorneqarnissaannik pisussaaffeqartoqarpoq.

 

Kaajallaasitaq una paasissutissanik immikkoortitanik Naalakkersuisut danskillu naalagaaffiata akornanni paarlaasseqatigiinnikkut imaluunniit suleqatigiinnerinut atatillugu suliarineqartut eqqarsaatigalugit atuutsinneqarpoq. Kaajallaasitartaaq paasissutissat immikkoortitat paarlaasseqatigiissutigineqarnerini qaqilerneqartut imaluunniit tamannga tunngavigalugu paasissutissanut atuutsinneqarpoq.

 

Paasissutissap ilusaa annertussusaalu atuutilernissaa, atorunnaarsinneqarnissaa, assartorneqarnissaa, attaveqaqatigiissutiginissaa, allagaatiginissaa toqqortaatiginissaaluunniit qanoq ikkaluarpat sillimaniarnikkut illersuinissamut malittarisassat atuutissapput.

 

Paasissutissat illersorneqarnerini sulisunit, timitalimmik najoqqutassatigullu suliniuteqarnikkut pissapput, ilaatigut susassaqanngitsunut illersorneqarlutillu allanngortinnissai eqqarsaatigalugit kiisalu atuisutut akuerisanit atorneqarnissaannut pissarsiassaritinneqartussanngorlugit.

 

Sillimaniarnikkut suliniutaasut atorneqarnissaasa qanoq annertutiginissai eqqarsaatigalugit kaajallaasitami immikkoortitatigut atortorissaarut malillugu aalajangersassapput.

 

I. Immikkoortitaanera

 

  § 1.  Paasissutissat suulluunniit NATO-mik ilisarnaatilersukkat kiisalu paasissutissat NATO-mi nunanit ataatsimut soqutigisarineqartut sillimaniarnikkut illersugassaasariaqartut immikkoortitaassapput malittarisassat ataani allaqqasut malillugit:
1)  ISERTUUSSAALLUINNARTOQ (»COSMIC TOP SECRET«): Taamatut immikkoortitsineq paasissutissanut atorneqassaaq pisinnaatitsissummillu pissarseqqaarnani ingerlatitseqqiineq pissappat Kunngeqarfik Danmarki imaluunniit NATO-mi nunat annertuumik ajoqusingaatsiarneqarsinnaapput.
2)  ISERTUUSSASSAQ (»NATO SECRET«): Taamatut immikkoortitsineq paasissutissanut atorneqassaaq pisinnaatitsissummillu pissarseqqaarnani ingerlatitseqqiineq pissappat Kunngeqarfik Danmarki imaluunniit NATO-mi nunat annertuumik ajoqusingaatsiarneqarsinnaapput.
3)  ISERTUUSSAQ (»NATO CONFIDENTIAL«): Taamatut immikkoortitsineq paasissutissanut atorneqassaaq pisinnaatitsissummillu pissarseqqaarnani ingerlatitseqqiineq pissappat Kunngeqarfik Danmarki imaluunniit NATO-mi nunat annertuumik ajoqusingaatsiarneqarsinnaapput.
4)  SULINERMUT ATATILLUGU ATUGASSAQ (»NATO RESTRICTED«): Taamatut immikkoortitsineq paasissutissanut atorneqassaaq tamanut saqqummiuteqqusaanngitsunut imaluunniit susassaqanngitsunut paasissutissiissutigeqqusaanngitsunut.
  Imm. 2.  Nunat allat NATO-mik immikkoortitatut nalunaaqutsersorsimasui imm. 1-imi immikkoortitatut assingusumik nalunaaqutsersorsimasutut inissinneqassapput. Nunamut immikkoortitatut nalunaaqutsersukkat nunanilu tamalaani aaqqissuussatigut immikkoortitatut nalunaaqutsersorsimasui sapinngisamik imm. 1-imi immikkoortitatut assingusumik nalunaaqutsersorsimasutut inissinneqassapput.

 

  § 2.  Immikkoortitatut inissisimaneq paasissutissat imarisaat paasissutissanillu pissarsiffiusut tunngavigalugit aalajangersaaffigineqassaaq. Paasissutissap qanoq immikkoortitamik imaqarnerata nalilernerani inaarutaasumik suliarisamik tunngaveqartumik paasissutissat ilaat attuumassuteqanngitsutut ittumik immikkoortitaanissaat pisariaqarsissaaq. Inaarutaasumik suliarisaq paasissutissat ilaattut immikkoortitap qaffasinnerpaajusup appasinnerusumik inissinnissaa pissanngilaq.

 

  § 3.  Allagaatini paasissutissat ilaat ataasiakkaatut immikkoortitaanissaat pisariaqarsinnaavoq (immikkoortitat ilaat). Immikkoortitat ataasiakkaajusut ersarissumik allaqqatinneqassapput.

 

  § 4.  Paasissutissat immikkoortitaanerini immikkoortitat inissisimanerat appasinnerpaajutillugu sillimaniarnikkut piumasaqaammut naapertuuttuutinneqassaaq.
  Imm. 2.  Paasissutissat iluani ilanngussamik assigisaannilluunniit imaqartinneqartoq iluani ilanngussatut immikkoortitat qaffasinnerpaanit appasinnerusutut inissisimatinneqassanngillat. Aktpak-it (charteques) aktpak-ini (charteque'et) paasissutissatut immikkoortitani qaffasinnerpaatut minnerpaamik immikkoortitaasimassapput.

 

  § 5.  Allakkiaq paasissutissatut ilanngunneqartoq immikkoortitaq qaffasinnerpaajusutut inissisimasutut qaffasitsigitinneqassaaq. Allakkiaq tassaasariaqarpoq paasissutissatut ilanngunneqartut immikkoortitat peerneqartillugit immikkoortitatut appartinneqarnerinut imaluunniit immikkoortitaajunnaarneratut uppernarsaataasut.

 

  § 6.  Paasissutissat sillimaniarnikkut illersortariaqartut § 1-imi allaaserineqartutut immikkoortitaaneri atuilersitsisup akisussaaffigissavai.

 

  § 7.  Atuilersitsisup paasissutissanik uppernarsaanermigut imaluunniit ilitsersuinermigut paasissutissat piffissaliilluni immikkoortitat appartinneqassasut imaluunniit immikkoortitaajunnaassasut aalajangersinnaavaa.
  Imm. 2.  Paasissutissat immikkoortitaasimasutut suliarereersimasut piumasaqaatitut immikkoortitaanissaat pisariaarussimatillugu immikkoortitaaneri appartinniarlugit imaluunniit immikkoortitaajunnaarnissaat siunertaralugit atulersitsisuusup akulikitsumik misissuataartassavai. Immikkoortitaanerisa appartinneqarneri immikkoortitaajunnaarnerilu paasissutissanik tigusisumut nalunaarutigisassapput.
  Imm. 3.  Paasissutissat immikkoortitaasut immikkoortitatut appartinneqarnissaannut aamma immikkoortitaajunnaarsinneqarnissaannut atatillugu immikkoortitaasut nalunaaqutsersimaqqaarneqarneri qaavisigut titarneqartassapput, ammalu immikkoortitamik nutaamik qaavatigut ilanngussisoqarsinnaalluni.

 

  § 8.  Paasissutissanik immikkoortitanik tigusisoq imaassanngilaq:
1)  paasissutissat suliakkiisup allakkatigut akuersiteqqaarnagu immikkoortitanik appartitsinani imaluunniit immikkoortitaajunnaarsitsilluni,
2)  suliakkiisup aalajangersagaanit siunertanut allanut tunngatillugu paasissutissat allanut atorlugit,
3)  paasissutissat taaguummik NATO-mik nalunaaqutsersorsimasut, kiisalu nuna tamakkerlugu paasissutissat NATO-mi nunani ataatsimut soqutigisarineqartut NATO-p avataanut imaluunniit nunani tamalaani kattuffeqarfinnut suliakkiisup allakkatigut akuersiteqqaarnagu nunalu pineqartup naleqquttumik isumaqatigiissuteqaqaartinnagu imaluunniit paasissutissat immikkoortitaasut illersorneqarnissaat pillugit kattuffiusumut ingerlateqqillugit.
  Imm. 2.  Paasissutissat suliakkiisup appasippallaartumik immikkoortissimappagit tigusisup qaffasinnerusumut immikkoortissinnaavai. Immikkoortitaasut qaffasinnerusunngortissappata suliakkiussisoq ernertumik nalunaarfigineqassaaq.

 

  § 9.  Digitalimik toqqorsiviusutut atorneqartut paasissutissanik elektronikkikkut atortorissaarutini danskit naalagaaffianit atukkiunneqartuni atorneqassanngillat, taamaattoq tak. § 25

 

II. Paasissutissat immikkoortitaasut takusinnaaneri

 

  § 10.  Paasissutissat immikkoortitaasut inunnut paasissutissanik immikkoortitatigut annertussusilikkat sillimaniarnikkut akuerisaanngitsunut pissarsiassanngortinneqasanngillat.

 

  § 11.  Oqartussani sulisut namminersortullu suliffeqarfiini sulisut pisortani oqartussaqarfinnik sullissisuusut sillimaniarnikkut akuerineqarnissaat pisortani oqartussaqarfiup aalajangiiffigisassavai.
  Imm. 2.  Paasissutissat ISERTUUSSAALLUINNARTUTUT immikkoortitaasutut sillimaniarnikkut suliarineqarnissaannut akuerisassat piffissami aalajangiinermiit sivisunerpaamik ukiut tallimat atuuttassapput. Paasissutissat ISERTUUSSASSATUT aamma ISERTUUSSATUT immikkoortitaasut piffissami aalajangiinermiit sivisunerpaamik ukiuni qulini atuuttassapput.
  Imm. 3.  Politiit isertortumik paasiniaasartui sulisut sillimaniarnikkut akuerineqarnissaat pillugit pisortani oqartussaqarfiup aalajangiiniarnerminut atugassaanik sillimaniarnikkut misissuisassapput.

 

  § 12.  Sillimaniarnikkut akuersinissamut aalajangerneq paasissutissat inummut tunngasut sukumiisumik naliliiffigineranik tunngaveqassaaq. Matumani immikkut pingaartinneqassaaq pineqartoq:
1)  assortugassaanngitsumik tunniusimasuunersoq aamma
2)  pissuseqarneratigut qanorlu ittuuneratigut, matumani ileqqui, attaveqaatai isertuussisinnaaneralu eqqarsaatigalugittaaq, paasissutissanik immikkoortitanik suliaqarneranut atatillugu pineqartup tutsuiginassusaa qularutigineqassanngitsoq.
  Imm. 2.  Katissimasap, inooqatigisap, aapparisap imaluunniit najugaqatigisap pissusilersornera, qanoq issusaa attuumassuteqarneralu sillimaniarnikkut akuersinissamut aalajangernermi ilanngullugu pingaartinneqassaaq.

 

  § 13.  Sillimaniarnikkut inunnut akuersineq taamaallaat pissaaq pineqartup paasissutissanut immikkoortitanik takunnissinnaanera pisariaqarsorineqarpat imaluunniit pineqartup atuuffiit isumagisassai pisariaqarsorineqarpata.
  Imm. 2.  Pisortani oqartussaqarfinni inuit sillimaniarnikkut akuerineqarsimasut pillugit allattorsimaffik nutartigaassaaq, assersuutigalugu sillimaniarnermi officerimi, tak. § 45. Immikkoortitsinermut paasissutissat pineqartumut akuerisaasut kiisalu sillimaniarnikkut akuersissuteqarnermi ulloq atulersitsiffik aamma piffissaq atuunnera allattorsimaffimmi allassimassapput.

 

  § 14.  Paasissutissatut immikkoortitat inunnut taamaallaat sulinermut atatillugu pisariaqavissumik takunnissinnaatitaasunut takunnissinnaatitaaneqassaaq (»Need to Know«).
  Imm. 2.  Paasissutissatut immikkoortitat sulinermut atatillugu pisariaqavissunngippat takunnissinnaatitaaneq pisariaqanngilaq (»Need to Know«).
  Imm. 3.  Paasissutissatut immikkoortitanik misissuisussaasut imaluunniit suliaqartussaasut paasissutissat imarisaannik takunninnissamik susassaqanngitsunut takutittannginnissaat qulakkiissallugu tamatigut qulakkiigassarivaat.

 

  § 15.  Sillimaniarnikkut akuersissuteqarnermut atatillugu kaajallaasitaq una aamma pinerluttuliornermut inatsimmi kapitali 7, 8 aamma 11 pineqartumut ilisimatitsissutigineqassapput.
  Imm. 2.  Inuit sillimaniarnikkut akuerineqartut tamarmik paasitinneqassapput sillimaniarnikkut akuersinermi paasissutissanik illersuinissaq pineqartillugu NATO-mi sillimaniarnikkut isumaqatigiissutinut tunngasut.

 

III. Paasissutissanik immikkoortitanik suliaqarneq

 

  § 16.  Paasissutissatut immikkoortitanik suliaqarnissaq inunnut pisortani oqartussaqarfimmit paasissutissanik immikkoortitatut pineqartumut suliarinnittussatut akuerineqartumut taamaallaat isumagisassanngortinneqartassapput.

 

  § 17.  Paasissutissatut immikkoortitaq sapinngisamik amerlassutsikkut killilersimaarneqassaaq.

 

  § 18.  Immikkoortitap qanoq ittuunera paasissutissatut immikkoortitami allaganngorlugu allakkap saqqaani kiisalu allakkap quppernerini allani tamani ersarissumik nalunaaqutsersimatillugu takussutissanngortissaaq, tak. ilanngussatut ilanngussaq.
  Imm. 2.  Allakkiaq arlalinnik qupperneqarpat, quppernerit illersorsinnaasumik katitersimassapput, aamma quppernerit normulersorsimassapput.
  Imm. 3.  Allakkiat ISERTUUSSAALLUINNARTUMIK imaluunniit ISERTUUSSASSAMIK nalunaaqutersimasut qupperneq siullermiit normulersugaassapput. Allakkiaq ataasiinnaanngitsumik assersuutitaqartinneqarpata assersuutitut ilanngussat tamarmik normulersorneqarsimassapput.

 

  § 19.  Paasissutissatut immikkoortitanik suliaqarneq, matumani assiliilluni allanneq, anillatsitsineq, assiliineq, nutserineq imaluunniit allatigut ingerlatitseqqiineq sulinermut atatillugu pisariaqavissumik pisoqarpat aatsaat pissaaq, taamaattoq tak. imm. 2.
Imm. 2. Paasissutissat ISERTUUSSAALLUINNARTUTUT immikkoortitat nalinginnaasumik suliakkiisumut pisinnaatitsissummik pissarsiniartoqaqqaartinnani tigusisup tamakkiisumik ilaannakortumilluunniit ingerlateqqissanngilai. Tigusisup suliakkiisup pisinnaatitsinissaa utaqqisinnaajunnaarsimaguniuk, aamma paasissutissat ingerlateqqinneqassasut pisariaqavissorpat, pineqartup pisortani oqartussaqarfimmi pisortarisaminit pisinnaatinneqarnermigut paasissutissat ingerlateqqissinnaavai. Ingerlatitseqqiinermi imaassaaq.
1)  paasissutissat ISERTUUSSAALLUINNARTUTUT immikkoortitat inummit suliarinninnissamut akuerisaasumit suliarineqassapput,
2)  nalunaarsuiffiit assersuusiallu allaqqaarneqartut suliakkiisup aqqa ersitsillugu normolersorneqarsimasunik ilaqartinneqassallutik,
3)  ingerlatitseqqiisup allakkiatut suliarinnittuanit immikkut assersuusiamik ilaqartinneqassaaq, aamma
4)  suliakkiisoq ingerlatitseqqiinerit qanoq amerlatigisut suliarineqarsimanersut nalunaarfissaq nalunaarfigalugu.
  Imm. 3.  Paasissutissat allakkatigut ingerlateqqinneqassappata, allakkat nalunaaqutsersimassapput imatut ISERTUUSSAALLUINNARTOQ, tak. § 18.

 

  § 20.  Siunnersuutitut allakkiat, oqaaseqaatit attaveqaatitigullu paasissutissat, assersuutigalugu digitalikkut toqqorsimasuutit paasissutissanik immikkoortitanik naammassinninnissamut tunngavissiisut, atorneqarnerisa kingorna paasissutissatut immikkoortitatut isumagineqassapput.

 

  § 21.  Paasissutissat immikkoortitat oqaasiinnakkut allatigulluunniit oqaatigalugu ingerlateqqinneqartut allanit tusarnaartoqartillugu ingerlateqqinneqassanngillat.

 

  § 22.  Pisortat oqartussaqarfiini inini ataasiakkaani paasissutissatut immikkoortitat inummiit inummut tunniunniarneqartillugit, inuit pineqartut sillimaniarnikkut akuerisaasuusimasut akornanni pissaaq, tunniunneqartullu matoqqatinneqarlutik tunniussisussatut toqqakkamik imaluunniit toqqissisimanartinneqartumik tunniussineq pissalluni. Paasissutissat matoqqasuutinneqaratik tunniunneqassappata, paasissutissat imarisaat susassaqanngitsunut takuneqarsinnaajunnaarlugit tunniunneqartassapput.

 

  § 23.  Paasissutissatut immikkoortitat tiguneqarnerini ernertumik nalinginnaasumik nalunaarsorsimatinneqassapput.
  Imm. 2.  Nalunaarsugaasut paasissutissatut immikkoortitanik imallit paasissutissatut immikkoortitatut qaffasinnerpaamik inissisimasutut nalunaarsorsimatinneqassapput.

 

IV. Paasissutissat elektronikkikkut atortutigut isumagineri

 

  § 24.  Paasissutissat immikkoortitaasut elektronikkikkut suliarineqartut paarlaasseqatigiissutaasut suleqatigiinnerminilu suliarineqartut paasissutissat elektronikkikkut atortut paasissutissat immikkoortitat suliarineqarnissaat siunertaralugit danskit naalagaaffianiit atortutigut atugassiissutaasut kisiisa atorlugit suliarineqassapput.
  Imm. 2.  Paasissutissat immikkoortitat elektronikkikkut suliarineqartussat SULINERMUT ATATILLUGU ATUGASSATUT immikkoortitaasut, paasissutissat elektronikkikkut atortut atorlugit suliarinerisa imm. 1-imi taaneqartut saniatigut, paasissutissat elektronikkikkut atortut Illersornissamut Oqartussanit akuerineqaqqaarsimasut atorlugit suliarineqartassapput. 
  Imm. 3.  Paasissutissat elektronikkikkut atortut danskit naalagaaffianiit atukkiussaasut saniatigut avataaniit paasissutissat elektronikkikkut atortunik ilanngussisoqassanngilaq. 
  Imm. 4.  Paasissutissat elektronikkikkut atortut avataaneersut paasissutissat elekrtornikkikkut atortunut imm. 2-mi taaneqartunut ilanngunneqarneri taamaallaat Illersornissamut Oqartussanit immikkut akuersissuteqarnikkut pisinnaavoq. 
  Imm. 5.  Paasissutissat elektronikkikkut atortuini danskit naalagaaffiannit atukkiussaasuni hardware aamma software iluaneereersut allanngorteqqusaanngillat.
  Imm. 6. Paasissutissat elektronikkikkut atortut atorlugit paasissutissat ISERTUUSSAALLUINNARTUMIK nalunaaqutsersimasut suliarineqarnissaanni tamatigut Illersornissamut Oqartussanit immikkut ittumik akuersissuteqarnikkut pisassaaq.

 

  § 25.  Digitalimik toqqorsimasuutit paasissutissanik immikkoortitanik suliaqarnissamut danskit naalagaaffianiit atukkiunneqartut taamaallaat § 24, imm. 1 aamma 2 malillugit paasissutissanik elektronikkikkut atortut suliarinerini atoqqusaapput. Digitalimik toqqorsimasuutit tunniunneqarneri Digitalimik Sullissinermut Aqutsisoqarfimmut saaffiginninnikkut pissaaq, tak. § 46.
  Imm. 2.  Digitalimik toqqorsimasuutit paasissutissat immikkoortitaasut imarisaasa qanoq ittuuneri naapertorlugit immikkoortinneqarlutillu illersorneqassapput. Toqqorsimasuutit taama ittut taamaammat paasissutissatut toqqorsimasuutigineqartutut imaluunniit toqqorsimasuutigineqarsimasutut qaffasinnerpaamik immikkoortitatut nalunaaqutsersimasapput. Toqqorsimasuutini paasissutissat immikkoortitaasut takussutissartai paasissutissat immikkoortitaasut allakkatigut suliarineqassapput. Matumani paasissutissat annertuujutillugit immikkoortitatut allassimasuusut qaffasinnerusumik immikkoortitaasussatut inissisimasariaqarneri eqqarsaatigineqassapput. 
  Imm. 3.  Digitalimik toqqorsimasuutit paasissutissanik ISERTUUSSASSANIK qaffasinnerusumilluunniit immikkoortitaasut, nalunaarsugaasassapput immikkut ilisarnaataanik normulerneratigut paasissutissartalimmik. Illersornissamulli Oqartussat sillimaniarnermut akuersissuteqarnerani nalunaarsorsimasussatut piumasaqaataasoq pinngitsoortissinnaavaa. 
  Imm. 4.  Digitalimik toqqorsimasuutitut immikkoortitaasut immikkoortitaaneri appartinneqassanngillat najoqqutassallu akuerisaasut naapertorlugit nungutinneqartassallutik, aamma qanorluunniit paasissutissat immikkortitaasut nungutinneqarsimasutut inissisimagaluarpata. 

 

  § 26.  Paasissutissat immikkoortitaasut SULINERMUT ATATILLUGU ATUGASSAT imaluunniit qaffasinnerusutut inissisimasut aamma pisortani tele-mi attaveqaatitigut allatigulluunniit attaveqaatitigut pisortani oqartussaqarfiit piginngisaatigut nassiussassaasut illersornissaannut paasiuminaallisarlugit periuseqarnermi, Illersornissamut Oqartussanit akuerineqaqqaassapput.

 

  § 27.  § 24, imm. 2-mi aamma § 26-mi sillimaniarnermut akuersinissaq naapertorlugu atulersitsineq pitinnagu paasissutissanut elektronikkikkut atortut sillimaniarnikkut piumasaqaataasut naammassisimassagai qulakkeerneqassapput. Taamaattumik paasissutissanut elektronikkikkut atortunik pissarsiniarnermi pilersaarusiornermut atatillugu, imaluunniit paasissutissanut elektronikkikkut atortunik akuerisaasimasunik allannguinermi Illersornissamut Oqartussat sapinngisamik siusinnerpaamik peqataatinneqassapput.

 

  § 28.  Sillimaniarnermik akuersissuteqarnissamut atatillugu sillimaniarnermut suliniutinut sillimaniarnikkut immikkut piumasaqaatit najoqqutassiallu Illersornissamut Oqartussanit akuerineqartussat Digitalimik Sullissinermut Aqutsisoqarfimmit suliarineqassasut akisussaaffigineqarpoq. Paasissutissanut elektronikkikkut atortunut tunngatillugu sillimaniarnikkut suliniutini minnerpaamik najoqqutassaniissapput
1)  sillimaniarnikkut aaqqissuussaaneq, matumani paasissutissanik isumannaallisaanikkut suliaqarnermut atuuffiit akisussaaffeqarfiillu,
2)  oqartussaqarfiup paasissutissanut elektronikkikkut atortui, matumani ingerlatsinermut tunngasut teknologiillu,
3)  qarasaasiatigut sillimaniarnermi ingerlatsinerit nalorninartunut qaffasissutsit akuersaarnartut attatiinnarnissaannut malittariaqakkat, aamma
4)  qarasaasiatigut sillimaniarnermi pisut isumaginissaannut najoqqutassat. 
  Imm. 2.  Sillimaniarnikkut piumasaqaatit atortutigut immikkut ittut suliarineqarneri sapinngisamik siusissukkut suliarineqarneri aallartinneqartassapput kingornami suliniutip ingerlannerani nutarterlugillu itisilerneqartassammata. 
  Imm. 3.  Sillimaniarnikkut piumasaqaatit atortutigut immikkut ittuni sillimaniarnikkut najoqqutassat sillimaniarnikkullu piumasaqaatit suut naammassineqassasut pillugit tamakkiisuullutillu allaaserisaassapput. Piumasaqaatit pineqartut atortunik allagaatinut ilaatinneqarput. 

 

V. Paasissutissanik immikkoortitanik allakkatigut elektronikkikkullu nassiussisarnerit il. il.

 

  § 29.  Paasissutissanik ISERTUUSSASSATUT qaffasinnerusumilluunniit immikkoortitaasunik allakkatigut nassiussinermi paasissutissat atortunik qaleriinnik marlunnik akimut takuneqarsinnaanngitsunik poorlugit nassiussisoqartassaaq.
  Imm. 2.  Puua ilorleq puuani paasissutissatut assinganik immikkoortitsinermik oqaaseqaateqartinneqassaaq, puualu taanna asserneqarsimassaaq.
  Imm. 3.  Immikkoortitami oqaaseqaataasup puua qalleq qalleqqassanngilaaq. Puua qalleq tigusisussap uppernarsarneqarnera siunertaralugu nassiunnerani normulersimassaaq.

 

  § 30.  Paasissutissanik ISERTUUSSASSAALLUINNARTUTUT imaluunniit ISERTUUSSASSATUT immikkoortitaasunik allakkatigut nassiussinermi taamaallaat inuit sillimaniarnikkut nassiussisusssatut immikkoortitaanermik akuerisaasunit isumagineqartassapput.
  Imm. 2.  Paasissutissanik ISERTUUSSATUT immikkoortitanik nassiussinermi nassiussisussamit minnerpaamik nassiussisussatut immikkoortitatut akuerisaasumit pisariaqarpoq. Allatigut nassiussinermi taamaattoq pisinnaavoq nassiussinerni ataasiakkaani imminut illersorsinnaasutut nalilerneqartillugu.
  Imm. 3.  Paasissutissanik ISERTUSSATUT immikkoortitanik Kunngeqarfiup Danmarkip iluani nassiussinermi tammatsaalisassatut nassiunneqarsinnaapput nassiussinerni tamani illersorsinnaasutut sukumiisumik naliliinikkut pisarsinnaavoq.

 

  § 31.  Paasissutissanik SULINERMUT ATATILLUGU ATUGASSANIK qaffasinnerusumilluunniit attaveqaatikkut nassiussinermi Illersornissamut Oqartussat akuerisaannik paasiuminaallisaanermik periuseqarneq taamaallaat atorneqassaaq, tak. § 26.

 

  § 32.  Paasissutissat immikkoortitanik imallit nassiunneqarniarpata inunnut nassiussap imarisaanut immikkoortitaasumut sillimaniarnikkut akuerisaasumut taamaallaat inuttalerneqarlutillu taakkunannga ammarneqartassapput.

 

  § 33.  Paasissutissanik ISERTUUSSAALLUINNARTUTUT imaluunniit ISERTUUSSATUT immikkoortitaasunik allakkatigut nassiussinermi paasissutissap tigunerani immikkut uppernarsaammik immersuiffissamik ilaneqartassaaq. Allatigut immikkoortitanut tunngatillugu suliakkiisup piumasaqarneratigut uppernarsaat immersugassaq atorneqarsinnaavoq. Uppernarsaat immersuiffissaq puuanut iluanut ikisassaq tigusisumit ernertumik atsiorneqassaaq nassiussisumullu utertinneqarluni. Uppernarsaat immikkoortitaanngitsoq nalunaarsuinermut assersuutitullu normunut paasissutissat pillugit taamaallaat imaqartinneqassaaq, assersuutigalugu taaguutinut tunngasunik imaqartinneqassanngilaq. Paasissutissanik nassiussisup uppernarsaat tigunngippagu, imaluunniit kingusinaartumik tiguneqarpat, suna pissutaanersoq ernertumik misissuiffigalugu aallartinneqassaaq.

 

  § 34.  Nassiussisut nassiussanillu isumaginnittut atuakkami immikkut ittumi paasissutissanut immikkoortitanik imalimmi nassiussami tunniunnera uppernarsarniarlugu qulakkeertassavaat. Tamatumunnga atatillugu nassiussinermut normu poorisaata qaavani allaqqasuusoq atussavaat.

 

  § 35.  Digitalimik attaveqaatitigut paasissutissanik immikkoortitanik nassiussinermi, imaluunniit atortutigut attaveqaatit taama ittuniittut, paasissutissanik immikkoortitanik allanik nassiussinermi immikkoortinneqassapput.

 

VI. Uninngasuuteqarneq, allakkat isumannaarneri aamma nungutitsineq il. il.

 

  § 36.  Allaffinni ininilu paasissutissatut immikkoortitanut uninngasuutiginissaanut paasissutissanillu elektronikkikkut atortunik uninngasuutiginissaanut atortuni, matumani kabelit krydsfelterillu, susassaqanngitsunut pissarsisinnaajunnaarsinniarlugit isumannaarneqassapput.
  Imm. 2.  Allaffinni ininilu paasissutissatut immikkoortitanik takunniffiusinnaasuni sulisunit paasissutissanut tunngatillugu sillimaniarnikkut akuerisaasunit nakkutigineqassapput.

 

  § 37.  Paasissutissat ISERTUUSSATUT qaffasinnerusumilluunniit immikkoortitaasut toqqorsivimmi parnaartartumi toqqorsimasuutigineqassapput inilu kalerrisaaruteqarluni. Sillimaniarnikkut atortut tamarmik Politiit isertortumik paasiniaasartuinit akuerineqarsimassapput.
  Imm. 2.  Toqqortaateqarnermut atortuni paasissutissat ISERTUUSSAALLUINNARTUT imaluunniit ISERTUUSSASSAT toqqortaatigineqartillugit, taakku silataanni sillimaniarneq immikkut ittuussaaq kalerrisaaruteqarluni kalerrisaarutillu sanaartortuat akuerisaasimassalluni ajortoqartillugu ulloq unnuarlu kalerrisaarivimmut nalunaartartussamik.
  Imm. 3.  Parnaarsaatit kalerrisaarutillu akulikitsumik misissorneqartassapput.

 

  § 38.  Aningaasaasivinnut imaluunniit assingisaannut parnaartartunut paasissutissat immikkoortitaasut toqqortaatigineqartunut matuersaatit illu qimanneqartillugu matuersaasivik Politiit isertortumik paasiniaasartuinit akuerisaasumik ilisarnaatit atorlugit parnaartartumiitinneqassapput. Matuersaatit illumiit anninneqanngisaannassapput.
  Imm. 2.  Matuersaatit annaaneqarpata imaluunniit aningaasaasivimmut imaluunniit assingisaanut parnaartartumut kode paasineqartillugu, pisortamut attuumassuteqartumut imaluunniit sillimaniarnermi officerimut ernertumik nalunaarutigineqassaaq, tak. § 45, taassuma parnaartaatip kode-ata allanngortinnissaa taarserneqarnissaaluunniit iliuuseqarfigissammagu.

 

  § 39.  Paasissutissat immikkoortitaasut suliffigisamiit allamukaanneqartut tamat tikissinnaasaannukaanneqassanngillat nakkutigineqaratillu qimaannarneqassanatik, matumani timmisartuni, umiatsiani, qamutini motoorilinni, akunnittarfinni imaluunniit atisaajartarfinni.
  Imm. 2.  Paasissutissat ISERTUUSSASSAALLUINNARTUTUT imaluunniit ISERTUUSSASSATUT immikkoortitaasut suliffimmiit assartorneqartillugit, assartorneqarnerisa nalaanni toqqorsimasuutigineqassapput toqqorsivimmi Politiit isertortumik paasiniaasartuinit akuerisaasumi.
  Imm. 3.  Paasissutissat ISERTUUSSATUT imaluunniit qaffasinnerusumik immikkoortitat suliffimmiit assartulersinnagit paasissutissat assersuutinut marlunnut nalunaarsuuteqartinneqassapput. Siulleq suliffimmiitinneqassaaq, aammaalu nassarneqassalluni katersugassaassappat nassarneqarluni. Allagaatit elektronikkikkoortut sillimaniarnikkut assilinera suliffimmi toqqortaatigineqarlunilu nalunaarsussaaq, taamaaliorneqassaarlu katersugassaannginnami.

 

  § 40.  Paasissutissat immikkoortitaasut annaaneqarsimappata, imaluunniit imarisai susassaqanngitsumit ilisimaarineqalersimasut pasitsaassisoqassappat, pisortamut attuumassuteqartumut imaluunniit sillimaniarnermi officerimut nalunaarutigineqassaaq, tak. § 45, taassuma pisortamut ingerlateqqissavaa misissuisoqarnissaannillu iliuuseqarluni paasissutissanik suliakkiisoq nalunaarfigineqarniassammat, aammalu susassaqanngitsup imarisaanik ilisimaarinnilersimaneratigut kingunerisassai killilersimaarniarlugit imaluunniit paasissutissat imarisaanik ilisimannilersimappat kingunerisassai killilersimaarniarlugit pisarialimmik suliniuteqartoqarnissaanik aalajangiisoqassalluni, taamaattoq tak. imm. 2.
  Imm. 2.  Paasissutissat immikkoortitat Danmarkimit imaluunniit NATO-mit suliakkiutigineqartut annaaneqassappata, imaluunniit susassaqanngitsumit imarisaanik ilisimannilertoqarsimassasoq pasitsaassisoqassappat, suliakkiisoq aamma Politiit isertortumik paasiniaasartui ernertumik nalunaarfigineqassapput.

 

  § 41.  Sorsuttuni imaluunniit ajorluinnartumik pisuni paasissutissat immikkoortitaasut susassaqanngitsunit tiguneqarnissaannut navianartorsiortinneqarlutik, paasissutissanut akisussaasoq ernertumik suliniuteqarnermigut isumannaatsumukaanniassavai, tamannali ajornarpat nungutinneqarnissai isumagissallugit.
  Imm. 2.  Digitalimik Sullissinermut Aqutsisoqarfik ajornartoortoqartillugu pilersaarusiussaaq isumannaatsumiilernissai imaluunniit nungutinneqarnissai imm. 1-imi taaneqartutut siunertaralugu.

 

  § 42.  Pisariaqanngitsumik annertusiartuinnarnissai pinngitsoortinniarlugit paasissutissat immikkoortitaasut annertuallaalertumik pilerpata nungutinneqartariaqarput, inatsisip malitsigisaanik inatsit alla aalajangersagarluunniit alla aalajangersakkatut atuuttoq malinneqanngippat.
  Imm. 2.  Sillimaniarnermi officeri, tak. § 45, taannaassaaq nungutinnissaannut iliuuseqartoq.
  Imm. 3.  Nungutitsinermi malinnaaqqissaartoqassaaq ikuallaanermi, qalipaatit atornerini, makulering atorlugu aserorterinermi allatigulluunniit aseruinnissaannik isumannaarinermi Politiillu isertortumik paasiniaasartuinit imaluunniit Illersornissamut Oqartussat akuerisaannik pissalluni.
  Imm. 4.  Paasissutissat ISERTUUSSASSAALLUINNARTUTUT imaluunniit ISERTUUSSASSATUT immikkoortitaasut nungutinneqarnerini atsiorfissaqarpoq inunnit marlunnit atsiugassamik, taakkuussappullu aserorterinermi najuullutik isumannaarisuusut. Atsiukkami allaqqassaaq nalunaarsuinermi normu, paasissutissanut tunngasoq, assersuusiap normui aamma aserorternerani periuserineqartoq.

 

  § 43.  Aammattaaq paasissutissat immikkoortitaasut pisariaqanngitsumik amerlavallaannginnissaat siunertaralugu isiinnarmik takuneqarsinnaanngitsumik assiliineq pisinnaavoq, allaqqaagarlu § 42-mi aalajangersagaq naapertorlugu nungutinneqassalluni. Isiinnarmik takuneqarsinnaanngitsumik assiliinermi immikkoortitatut pineqartumut sillimaniarnikkut akuerisaasumit taamaallaat isumagineqassaaq, aamma assilisat filmitai sillimaniarneq eqqarsaatigalugu allaqqaakkatulli illersorneqassallutik.

 

VII. Suliarinera nakkutilliinerlu

 

  § 44.  Digitalimik Sullissinermut Aqutsisoqarfimmiit innersuussisoqarnerata kingorna kaajallaasitami matumani aalajangersakkat malinneqarnissaat siunertaralugu sillimaniarnikkut suliniutit pisariaqartut pillugit allaaserinertalimmik najoqqutassamik Naalakkersuisoqarfinni pisortaqatigiit atulersitsissapput.
  Imm. 2.  Pisortani oqartussaqarfiit ataasiakkaat nalorninartoqartillugu naliliineq tunngavigalugu pisariaqarsorigunikku sillimaniarnikkut suliniuteqartoqassaaq taannalu Politiit isertortumik paasiniaasartui isumasiorlugit pisortani oqartussaqarfik najoqqutassaliussaaq.
  Imm. 3.  Sillimaniarnermi suliniutinut najoqqutassat ilaat attuumassuteqartut pisortani oqartussaqarfinni ataasiakkaani sulisunit pissarsiarineqarsinnaanngortinneqassapput.

 

  § 45.  Digitalimik Sullissinermut Aqutsisoqarfik sillimaniarnermi officerimik toqqaassaaq aalajangersakkat suliarinerinik ikiuuttussamik aalajangersakkallu malinneqarnersut pillugit malinnaasussamik. Pisortani oqartussaqarfinni ataasiakkaani sulisut sillimaniarnermi officerimut attuumassuteqarfimminnut sillimaniarnermut tunngatillugu saaffiginnittarsinnaapput.

 

  § 46.  Kaajallaasitami malittarisassat naammassineqarnissaat pillugit suleqatigiinnissamut Politiit isertortumik paasiniaasartui aamma Illersornissamut Oqartussat Digitalimik Sullissinermut Aqutsisoqarfik isumaqatigiissusiorfigissavaat, matumani qarasaasiaqarnikkut teknikkimut tunngasut aamma digitalimik toqqortaasiviit § 25 malillugu tunngasut ilanngullugit.

 

  § 47.  Kaajallaasitami matumani aalajangersakkat suliarineqarnerini aamma pisortani oqartussaqarfinni ataasiakkaani § 44, imm. 2 malillugu najoqqutassiornermi Politiit isertortumik paasiniaasartui siunnersuisassapput.

 

  § 48.  Sillimaniarnikkut iliuuserineqartut malinneqarneri Kunngeqarfiup Danmarkip suliarineqarnissaanut pisussaaffigisai Politiit isertortumik paasiniaasartuinit aamma Illersornissamut Oqartussat nakkutilliisassapput, piffissamilu aalajangersimasumi alakkarterisassallutik, periarfissaappallu NATO-miit immikkut ilisimasallit peqatigalugit.

 

VIII. Atuutilerfia

 

  § 49.  Kaajallaasitaq una atuutilerpoq ulloq 21. april 2022.

 

 

 

Naalakkersuisut Siulittaasuata Naalakkersuisoqarfia, ulloq 20. april 2022

 

 

 

Múte Bourup Egede
Naalakkersuisut Siulittaasuat

 

 

 

/ Hans-Peder Barlach Christensen