Nalunaarasuartaatitigut atassuteqarneq nalunaarasuartaatitigullu kiffartuussinerit pillugit Inatsisartut inatsisaanni nr. 31-mi, 23. november 2017-imeersumi § 2, imm. 6 aamma § 5, imm. 3, nr. 7 naapertorlugit aalajangersarneqarput:

Nalunaarasuartaatinik neqerooruteqartartunut piumasaqaatit

  § 1.  Nalunaarasuartaatinik neqerooruteqartartut nalunaarasuartaatinut attaveqaatinik nalunaarasuartaatitigullu kiffartuussinernik namminersortunngorsaanermut atugassanik pilersitsinissamut, ingerlatsinissamut neqerooruteqarnissamullu akuersissummik peqartussaapput.
  Imm. 2.  Nalunaarut qarasaasiatigut attaveqaatinit ledningeqanngitsuniit hotspot (WAS/RLAN) atorlugu kiffartuussinernut atuutinngilaq.
  Imm. 3.  Akuersissummik tunniussisoqarsimatinnagu nalunaarasuartaatinik neqerooruteqartartutut sulianik aallartitsinissaq inerteqqutaavoq. Tamanna aamma nalunaarasuartaatinut attaveqaatinik ikkussuinermut atuuppoq.

  § 2.  Nalunaarasuartaatinik neqerooruteqartartoq akuersissummik tunineqassaguni aktianik piginneqatigiiffittut, piginneqatigiiffittut imaluunniit inuussutissarsiutinik ingerlataqartut peqatigiiffiattut, Kalaallit Nunaanni angerlarsimaffeqartutut nalunaarsorsimassaaq.
  Imm. 2.  Kiisalu ulluinnarni aqutsinermi minnerpaamik ilaasortaq ataaseq suliassaqarfimmi sulianut attuumassutilinnut ilisimasaqassaaq, soorlu neqerooruteqartartumi pioreersumi, suliffeqarfimmi IT-mut kiffartuussiffiusumi imaluunniit IT-mut immikkoortortaqarfiup annerusup aqutsisuini IP-mut attaveqaatinik annerusunik ingerlatsinermik sivisunerusumik misilittagaqassaaq.

  § 3.  Nalunaarasuartaatinik neqerooruteqartartup § 2, imm. 1-imi piumasaqaatinik naammassinninngitsup immikkut ittumik akuerineqarnissamik Nalunaarasuartaatinut Aqutsisoqarfik qinnuigisinnaavaa, nalunaarasuartaatinik neqerooruteqartartup pisariaqartitat, inuiaqatigiinnut pingaarutilittut isigineqartariaqartut naammassisimagunigit.

  § 4.  Aamma akuersissummik pigisaqartup neqerooruteqartut kikkut attaveqaatinik atueqatigiinnissamik, taakkununngalu piumasaqaatinik isumaqatigiissuteqarfigineqarsimanersut pillugu Nalunaarasuartaatinut Aqutsisoqarfik ilisimatissavaa.

Akuersissummik qinnuteqarneq

  § 5.  Akuerineqarnissamut qinnuteqaat Nalunaarasuartaatinut Aqutsisoqarfimmut nassiunneqassaaq.
  Imm. 2.  Qinnuteqaatip imarissavai: 
1)  suliffeqarfik pillugu nassuiaat,
2)  suliassaqarfimmi misilittakkat pillugit nalunaarut, 
3)  suliffeqarfimmi nalunaarasuartaatinut attaveqaatissatut nalunaarasuartaatitigullu kiffartuussinissamut naatsorsuutigisanut nassuiaat, aamma
4)  suliffeqarfiup qanoq iliorluni sukkulluunniit eqqartuussisarnermut inatsimmi kapitali 36, politiinit ikiorserneqartarnermut tunngasoq naapertorlugu nalunaarasuartaatitigut kiffartuussisarnernik neqerooruteqartartunut piumasaqaatinik naammassinnissinnaaneranut nassuiaat.

  § 6.  Nalunaarasuartaatinut Aqutsisoqarfik akuersissummi paasissutissiisussaatitaanermut piumasaqaatinik allanngortitsisinnaavoq, nalunaarasuartaatinik neqerooruteqartartup suliaani annertuumik allannguisoqarpat.
  Imm. 2.  Aamma akuersissut uku pillugit maleruagassanik imaqarsinnaavoq:
1)  malitassanik akuersissutinillu naammassinninnissaq, aamma
2)  nunani tamalaani piumasaqaatinik maleruagassanillu naammassinninnissaq.

  § 7.  Akuersissut ukiuni tallimani atuutissaaq, tamatumalu kingorna nalunaarasuartaatinik neqerooruteqartartoq akuersissummik nutaamik qinnuteqassaaq. 
  Imm. 2.  Nalunaarasuartaatinik neqerooruteqartartup akuersissummi inatsimmiluunniit aalajangersakkat annertuumik unioqqutippagit, Nalunaarasuartaatinut Aqutsisoqarfiup akuersissutit utertissinnaavai.
  Imm. 3.  Nalunaarasuartaatinik neqerooruteqartoq akiliisinnaajunnaarluni nalunaaruteqarpat akuersissut atorunnaassaaq.

  § 8.  Nalunaarasuartaatinut Aqutsisoqarfik nalunaarasuartaatinik neqerooruteqartartut allattorsimaffianik tamanut ammasumik saqqummiussissaaq.

Atuutilerfia

  § 9.  Nalunaarut manna saqqumersinneqareerpat aqaguani atuutilersinneqassaaq. 
  Imm. 2.  Nalunaarutip atuutilerneranit kingusinnerpaamik qaammatit arfinillit qaangiutsinnagit neqerooruteqartartut tamarmik nalunaarut manna naapertorlugu akuersissummik pissarsisimassapput.

Erik Jensen
Ineqarnermut Attaveqaasersuutinullu Naalakkersuisoq

/ Ruth Lindhardt