Ilinniarnertuunngorniarfik pillugu Inatsisartut inatsisaanni nr. 13, 22. november 2011-meersumi § 20, imm. 2, § 21 aamma § 27 malillugit aalajangersarneqarpoq:

Kapitali 1

Nassuiaatit

  § 1.  Ilikkagassatut pilersaarutit ima paasineqassapput, tassaasut malittarisassat qaffasissutsini assigiinngitsuni ilinniartitsissutinut ataasiakkaanut atuuttut. Ilikkagassatut pilersaarutinut ilaapput ilinniartitsissutip inissisimanerata, siunertaata, ilikkagassatut anguniagaasa imarisaasa, ilinniartitsinerup aaqqissuunnerata nalilerneratalu allaaserinerat. Ilinniartitsissutini ataasiakkaani ilikkagassatut pilersaarutit nalunaarummut matumunnga ilanngussaq 1-imi atuarneqarsinnaapput.

  § 2.  Ilinniartitsissutip ilinniagaqarnermi inissisimanera imatut paasineqassaaq ilinniartitsissutip ilinniagaqarnermi siunertaanut tamarmiusumut ilinniartitsissutip pingaarnertut imarisaanut periutsimullu tapersiinera.

  § 3.  Ilinniartitsissutip siunertaa imatut paasineqassaaq ilinniartitsissutini ataasiakkaani ilinniartitsissutillu immikkoortuini ilinniartitsinerup siunertaa. Ilinniartitsissutit siunertai ilinniartitsissutini ataasiakkaani ilinniartitsissutillu immikkoortuini sammisanut sisamanut naligiinnut agguarneqarput, tassaallutillu:
1)  Ilisimasat pisinnaasallu.
2)  Ilikkagaqartarnermi sulinermilu piginnaasat.
3)  Inuttut inunnullu attaveqartarnermi piginnaasat.
4)  Kulturi inuiaqatigiillu pillugit piginnaasat

  § 4.  Ilinniartitsissutini ataasiakkaani ilikkagassatut anguniakkat imatut paasineqassapput anguniakkat immikkuualuttui, taakkunanilu ilinniartitsissutit naammassineranni ilinniagaqartut pisinnaasaqarfigiligassaattut ilimagisaasut. Ilinniartitsissutini anguniakkat ilinniartitsissutit imarisaat ilanngullugit ingerlaavartumik nalilersuisarnernut aammalu ilinniartitsissutit naammassineranni nalilersuisarnernut qitiusumit aalajangerneqartunut tunngaviliissapput.
  Imm. 2  Imarisaat imatut paasineqassapput pingaarnertut imarisaat  imarisaannullu ilassutit, tak. imm. 3 aamma 4. Pingaarnertut imarisaat aamma imarisaannut ilassutit ilinniartitsissutini anguniakkat anguneqarnissaannut pisariaqarput. Pingaarnertut imarisaannik aamma imarisaannut ilassutinik toqqaanermi ilinniartut peqataatinneqassapput.
  Imm. 3.  Pingaarnertut imarisaat imatut paasineqassapput qaffasissutsini pineqartuni ilinniartitsissutit imarisaat ilinniartut tamarmik pinngitsooratik ilinniagassaat.
  Imm.4.  Imarisaannut ilassutit imatut paasineqassapput kiffaanngissuseqarnerulluni sinaakkutit, taakkualu iluanni pingaarnertut imarisaannik itisiliisunik imminnullu atanerannik takutitsisunik ilinniartullu ilinniakkani paasisaannik annertusiliisunik ilinniartitsissutit imarisassaannik. toqqaaffiusut.

  § 5.  Ilinniartitsissutinik aaqqissuinernut ilaapput ilinniartitsinermi tunngavinnik, suleriaatsinik, ilinniakkami oqaatsinik ilinniartitsissutinullu allanut attaveqassutsimik allaaserinninnerit. Ilinniartitsissutinik ataasiakkaani ilinniartitsinermi ilinniartitsissutinut allanut attaveqarnerat ilaanngilaq.

  § 6.  Nalilersuinernut ilaapput ingerlaavartumik nalilersuisarnerit, misilitsitseriaatsit naliliinernilu piumasaqaatit soraarummeernerni atorneqartartut allaaserinerat. Imminnut ilinniartittunut namminnerlu ilinniartunut soraarummeernerni pissutsit immikkut ittut allaaserineqarnerat aammattaaq ilanngunneqarsinnaapput.

  § 7.  Qupperneq nalinginnaasoq imatut paasineqassaaq allagaq qupperneq ataaseq akunnequtit ilanngullugit 2400-nik naqinneqarpoq. Saqqummeeriaatsit allat ilaappata imarisaasa pitsaassutsimikkut annertussusaat nalilerneqassaaq, nalinginnaasumik quppernerit missiliuinikkut naatsorsornerisigut.

Kapitali 2

Ilinniartitsissutit

 § 8.  Ilinniarnertuunngorniarfimmi ilinniartitsissutit ilinniarnertuunngorniarfimmi qaffasissutsinut C, B aamma A-mut inissinneqarput, tassani A qaffasinnerpaajulluni, tak. §§ 13-15.
 Imm. 2  Ilinniarnertuunngorniarfimmi ilinniartitsissutit imatut paasineqassapput ilinniartitsissutit ilinniagaqarnermi anguniakkat anguneqarnissaannut tapersiisut, tamatumunnga ilanngullugu ilinniartitsissutit ingerlaqqiffiusumik ilinniagaqalernissamut piginnaasaqalersitsisuunissaat. Ilinniarnertuunngorniarfimmi ilinniartitsissutit qaffasissusiannut sanilliullugu ilinniartut tunngavilersorlugu isumaliuteqarsinnaanerisa, eqqarsaatinik tigussaasumit avissaartitsisinnaanerisa tamanullu tunngasunngortitsilersinnaanerisa ineriartortinneqarnissaat ilaatigut siunertaavoq.
  Imm. 3.  1. semesterimi ilinniarnermi ilinniartitsissutit ilinniarnertuunngorniarfimmi ilinniartitsissutit ilaannik imaqarsinnaapput.

  § 9.  Ilinniarnertuunngorniarfimmi ilinniartitsissutit tassaapput: 
1)  Ilinniartitsissutit, ilinniartunit tamanit pinngitsoorani ilinniarneqartussat (ilinniartitsissutit pinngitsoorani ilinniarneqartussat tamanut tunngasut).
2)  Ilinniartitsissutit, taamaallaat ilinniakkat sammiviini aalajangersimasuni pinngitsoorani ilinniarneqartussat (ilinniartitsissutit pinngitsoorani ilinniarneqartussat aalajangersimasut).
3)  Ilinniartitsissutit toqqarneqarsinnaasut.

  § 10.  Ilinniartitsissutit klassini ilinniarneqassapput, taamaattoq tak. imm. 2-4.
  Imm. 2.  Kalaallisut ilinniarneq holdikkaarluni ilinniartut ilitsoqqussaralugu oqaasii aallaavigalugit katiterneqartussani ingerlanneqassaaq. Ilinniartut kalaallisut ilitsoqqussaralugu oqaaseqanngitsut ilikkagassatut pilersaarut tunngavigalugu kalaallisut ilinnialerlaatut oqaatsillu aappaattut ilinniakkatut A-tut ingerlatissavaat, ilinniartullu kalaallisut ilitsoqqussaralugu oqaaseqartut ilikkagassatut pilersaarut tunngavigalugu ilitsoqqussaralugu oqaatsitut A-tut ingerlatissavaat. 
  Imm. 3.  Ilinniartitsissutit toqqarneqarsinnaasut ilinniartut toqqagaat malillugit pilersinneqartut ilinniakkat sammivii akimorlugit holdini ingerlanneqarsinnaapput.
  Imm. 4.  Ilinniartitsissutit ilinniartitsissutinik ataasiakkaanik ilinniartitsinertut aamma ingerlanneqarsinnaapput, tassani ilinniartitsineq klassini holdiniluunniit pioreersuni imaluunniit holdini immikkut pilersinneqartuni ingerlanneqarsinnaalluni.

  § 11.  Ilinniakkat sammivii sorliit pilersinneqassanersut ilinniarnertuunngorniarfiit kingusinnerpaamik 15. december aalajangissavaat. Ilinniartitsissutinik pinngitsoorani ilinniarneqartussanik immaqalu ilinniartitsissutinik toqqarneqarsinnaasunik ilinniakkat sammiviinut atasunik ilinniartut inaarutaasumik toqqaanerat tunngavigalugu aalajangiisoqassaaq.
  Imm. 2.  Ilinniakkap sammivia pilersinneqareerpat ilinniakkap sammivia holdini ilinniakkap sammiviani pilersinneqarsimasuni ingerlanneqassaaq.

  § 12.  Ilinniartitsisutit suut Ilinniarnertuunngorniarfiup semesterip nutaap aallartinnginnerani siumut aalajangertarpoq ilinniartitsissutigineqartussat sorliit pilersinneqassanersut.

Kapitali 3

Qaffasissutsit

  § 13.  Qaffasissutsimi A-mi ilinniartitsissutinut ilisarnaataavoq, ilinniartitsissutit ingerlanneqarnerini tamani nalinginnaasumik 250-inik taakkualuunniit sinnerlugit tiimeqarfiusarnerat. Ilinniartitsissutini ilikkagassatut anguniagassat oqaasertalersornerini piginnaasassanut uuttuutit qaffasissut atorneqartarput.  Ilinniartitsinerni inaarutaasumillu nalilersuinerni allattarissanik suliaqartarneq ilaavoq. Piumasaqaatitut ilimagisaavoq ilinniartut namminneerlutik eqqoqqissaartumillu sulissasut aamma ilinniartitsissutini taaguutit periutsillu atorsinnaassagaat – aamma ataqatigiiffinni ilisimaneqariinngitsuni.

  § 14.  Qaffasissutsimi B-ni ilinniartitsissutinut ilisarnaataavoq, ilinniartitsissutit ingerlanneqarnerini tamani 150-it 250-illu akornanni tiimeqarfiusarnerat. Ilinniartitsisummi ilikkagassatut anguniagassat oqaasertalersorneqassapput, piginnaasanut uuttuutit qaffasissut ilaatinnagit imaluunniit killilimmik atorlugit. Ilinniartitsinerni inaarutaasumillu naliliinerni allattariarsorluni sulineq ilaagajuttarpoq, taamaattoqartariaqaranili. Piumasaqaataavoq ilinniartut nammineersinnaassuseqangaatsiarlutik sulisinnaassasut, ilinniartitsissutinilu isummat imarisaat periutsillu nalinginnaasumik atorsinnaassagaat.
  Imm. 2.  Qaffasissutsimi B-mi ilinniartitsissutip aammattaaq imarisinnaavaa ilinniartut namminersorlutik allattariarsorlutik suliaat imaluunniit aalajangersimasumik qulequtsiillutik ingerlatsinerat, imm. 1-imi taaneqartunik ikinnerusunik tiimilik, ingerlatsinermut annertuumik ilinniartut namminneerlutik suliaqarnerat annertuumik allattariarsornertalik ilisarnaataappat. 

  § 15.  Qaffasissutsimi C-mi ilinniartitsissutinut ilisarnaataavoq, ilinniartitsissutit ingerlanneqarnerini tamani 75-it 150-illu akornanni tiimeqarfiusarnerat. Ilinniartitsissutini ilikkagassatut anguniagassat oqaasertalersorneqassapput, piginnaasassanut uuttuutit appasissut kisiisa atornissaat pingaartillugit. Ilinniartitsinerni allattariarsorluni sulineq sakkuusinnaavoq, inaarutaasumilli nalilersuinermi ilinniartut allattariarsornermi piginnaasaannik nalilersuineq ilaassanngilaq. Piumasaqaataavoq ilinniartut ilinniartitsissutini isummat imarisaat periutsillu atorsinnaassagaat.

 § 16.  Qaffasissutsit akimorlugit ilinniartitsisoqarsinnaanngilaq.

Kapitali 4

Sulisussarititaasut

  § 17.  Ilinniartitsissutini ilinniartitsinermi tiimit amerlassusaat, piffissaq ilinniartut atugaat ilinniartitsinissanullu piareersarnerit ilinniartut ilinniagaqarnermi sulinerannut ilaapput.

  § 18.  Ilinniartitsinermi tiimit atorneqassapput ilikkagaqarnissaq siunertaralugu, ilinniartitsisup ilinniartullu suleqatigiiffigisaannik, ilinniarnertuunngorniarfiup sammisaqartitsissutissatut aaqqissugaanut, tamatumani siunertaralugu ilinniartup ilinniartitsissummi ilikkagassatut anguniagassanik angusaqarnissaanut tapersiinissaq, tamatumunnga ilaatillugit suliniutit pissusiviusunillu assersuutit, ilinniartitsisup ilinniartumik ilitsersuiffigisai. Ilinniartitsinermi tiimit aamma ingerlaavartumik nalilersuinernut taakkununngalu atasumik ilitsersuisarnernut atorneqassapput.

  § 19.  Ilinniartitsissutini tiimit ingerlanneqassapput, piffissap soraarummeerfiusup - ilinniartitsissummi misilitsiffiusup imaluunniit misilitsinnissamut periarfissaqarfiusup - aallartinnginnerani.

  § 20.  Ilinniartitsissutini ataasiakkaani ilinniartut piffissaq atugassaat tassaavoq piffissaq ilinniartut ataasiakkaat ilinniartitsissutini allattariarsorlutik sulinissaannut immikkoortitaq, tassunga ilanngullugit ilinniartitsissutinut allanut ilinniartitsinerni tiimit avataanni ilinniartut ingerlattagaannut ilinniartitsisunillu immikkut nalilersorneqartartunut atassuteqartitsineq. 
 Imm. 2.  Ilinniartut allattariarsorlutik suliaannik nalilersuinermi nalilersueriaatsit assigiinngitsut atorneqassapput, tassunga ilanngullugit:
1)  Ilinniartut ataasiakkaarlutik suliassissutigineqartunik misilitsinnermilu suliaanik kukkunersiuineq.
2)  suleqatigiiaakkaarluni ataasiakkaarluniluunniit allattariarsorluni suliat naqqinneri oqaaseqaateqarfigineqarnerilu, tassunga ilanngullugit ilinniarfiup iluani misilitsinnerit,
3)  allannermi allattariarsorluni suliat ilaannakortumik naammassisat oqaaseqaateqarfiginerat,
4)  ilinniartunik ilinniartoqatigiinnillu oqaloqateqarnerit, aamma
5)  qulaaniittut akuleriissillugit.
  Imm. 3.  Allattariarsorluni suliaqarluni ilinniartunut piffissaliussamik atuinermi, ilinniarnertuunngorniarfiup piumasarisinnaavaa ilinniartut najuutissasut.

  § 21.  Ilinniartut allattariarsorlutik suliaat tassaasinnaapput allaaserinninnerit, nalunaarusiat, qarasaasiat atorlugit saqqummiinerit aamma multimediat atorlugit suliat il.il.

 § 22.  Ilinniartitsinernut piareersarnerit ilinniartut namminneq aaqqissuutissavaat.

 § 23.  Ilinniartitsissutini ilinniartitsinerni tiimit amerlassusaat piffissarlu ilinniartut atugassaat imatut agguarneqarput:

  Imm. 2.  Ilinniakkat sammiviini ilinniartitsissutini tiimit amerlassusaat imm. 1-imit allaanerusut Ilinniartitaanermut Naalakkersuisoqarfiup akuerisinnaavai.
  Imm. 3.  Ilinniarnertuunngorniarfiup ilinniakkami sammivinnik immikkut ittunik, taamaallaallu Nunatsinni Danmarkimilu ilinniakkani sivikitsuni akunnattumillu sivisussusilinni ilinnialernissamut atortussanik ingerlatsinissaa Ilinniartitaanermut Naalakkersuisoqarfiup akuerisinnaavaa.

  § 24.  1. semesterimi ilinniartitsissutit pinngitsoorani peqataaffigisassat makkuupput:
1)  Kalaallit oqaasii.
2)  Danskit oqaasii.
3)  Tuluit oqaasii.
4)  Matematik.
5)  Uumassusilerineq, fysik, nunalerineq, kemi imaluunniit science.
6) Kulturilerineq
7)  Ilinniarnermi periaatsit.
8)  Timersorneq.
  Imm. 2.  1. semesterimi ilinniarnermi ilinniartitsissutini tiimit amerlassusaat ilinniarnertuunngorniarfinnit aamma Ilinniartitaanermut Naalakkersuisoqarfimmit akuerineqartassapput.

  § 25.  Klassimi holdimiluunniit ataatsimi ilinniartitsinerni tiimit amerlassusissaattut aalajangersakkat akuerisalluunniit ilinniarnertuunngorniarfiit annikitsumik allanngortissinnaavaat, nikingassutit klassit holdilluunniit ilinniakkani pisariaqartitaannik tunngavilersorneqarpata. Ilinniartitsinermi tiimit amerlassusaasa tiimillu ilinniartunut piffissaliussat katinnerisa nikisinneqannginnissaat piumasaqaataavoq.
 Imm. 2.  § 23, imm. 1-imi ilinniartut piffissaat aalajangersarneqartoq ilinniartitsissummut ataatsimut annikillisinnerisigut ilinniarnertuunngorniarfiit ilinniartut piffissaannik pilersitsisinnaapput. Ilinniakkat sammiviisa akornanni sumiiffinni ilinniartitsissutini perorsaanermilu pissutsit tunngavigalugit  ilinniartut piffissaannik ilinniarnertuunngorniarfiit agguaasassapput.

 § 26.  Ilinniarnertuunngorniarfiit ilinniartunut immikkut aaqqissuussamik ilinniarnermik ingerlatsisunut tiiminik ilasisinnaapput.
 Imm. 2.  Kalaallit Nunaanni Danmarkimilu sivikitsumik akunnattumillu sivisussusilinnik ilinniarnernut isissutaasinnaasunik ilinniarnertuunngorniarfimmi holdinut immikkut ilinniarnermik ingerlatsisunut ilinniarnertuunngorniarfiit tiiminik ilasisinnaanerannik Ilinniartitaanermut Naalakkersuisoqarfik akuersisinnaavoq.

 § 27.  Piffissaq ilinniartut atugassaat ilinniartitsinertut ingerlanneqarsinnaavoq, tamanna nalileeriaatsitigut tunngavissaqarpat, tak. § 20, imm. 2, imaluunniit piffissap ilinniartut atugassaasa allattariarsorluni sulinertut atorneqartussanngornerani ilinniarnertuunngorniarfik ilinniartut najuunnissaannik piumasaqarpat, tak. § 20, imm. 3.

 § 28.  Ilinniartut pillugit pissutsit immikkorluinnaq ittut tunngavissaqartitsigaangata ilinniartut ataasiakkaat nalunaarummi aalajangersakkanik atuinnginnissaat Ilinniartitaanermut Ilisimatusarnermullu Naalakkersuisoqarfiup akuerisinnaavaa.

 § 29.  Ilinniartitaanermut Naalakkersuisoqarfiup misileraanermut atatillugu nalunaarummi aalajangersakkat sanioqqussinnaavai.

Kapitali 5

Atuutilersitsinermut, atorunnaarsitsinermut ikaarsaariarnermilu aalajangersakkat

 § 30.  Nalunaarut ilinniarnertuunngorniarfimmi ilinniartunut ulloq 1. august 2012-imi aallartissimasunut ulloq 1. august 2022-mi atuutilerpoq. 
  Imm. 2.  Tamanna ilutigalugu ilinniarnertuunngorniartunik ilinniartunngortitsisarneq pillugu Namminersorlutik Oqartussat nalunaarutaat nr. 7, 27. maj 2014-imeersoq atorunnaarsinneqarpoq.

Namminersorlutik Oqartussat, ulloq 5. juli 2022

Peter Olsen
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq

/ Karsten Peter Jensen