Ilinniartut sungiusartullu atorfinitsinnerini suliffiit pisortanilu oqartussat inuiaqatigiinni akisussaaffeqarnerat pillugu Inatsisartut inatsisaanni nr. 17, 27. november 2020-imeersumi § 8, imm. 3, § 10, imm. 6, § 11, imm. 6 aamma 7, § 12, imm. 5, § 15, imm. 5 naapertorlugit aalajangersarneqarput:

Atuuffia

  § 1.  Ilinniartut sungiusartullu atorfinitsinnerini suliffiit pisortanilu oqartussat inuiaqatigiinni akisussaaffeqarnerat pillugu Inatsisartut inatsisaanni § 1-imi ilaasutut pisortanut suliffeqarfinnullu nalunaarut atuuppoq.

Smiley atorlugu aaqqissuussineq

  § 2.  § 3-mi najoqqutarisat aallaavigalugit Sulisoqarnermut Naalakkersuisoqarfiup suliffinnut aamma pisortaqarfinnut smiley qorsuk, sungaartoq imaluunniit aappalaartoq tunniuttarpai.
  Imm. 2.  Ilinniartunik sungiusartunillu najugaqavissunik suliffeqarfiit aamma pisortaqarfiit qanoq pitsaatigisumik imaluunniit qanoq pitsaanngitsigisumik atorfinitsitsisarnerannut smileyit tassaapput pitsaassutsimut naqissusiissutit.
  Imm. 3.  Smileyit ingerlaavartumik tunniunneqartarput, aammalu ukiut ilivitsut ataasiakkaat naaneranni.
  Imm. 4.  Ilanngussaq 1-imi takutinneqartutut smileyit ilusilersorneqarput.
  Imm. 5.  Sulisoqarnermut Naalakkersuisoqarfiup smileyit suliffissarsiornermut nittartakkamini (www.suli.gl-imi) tamanut saqqummiuttarpai.

Smileyinik tunniussinerni najoqqutassat

  § 3.  Najoqqutassat tullinnguuttut tunngavigalugit Sulisoqarnermut Naalakkersuisoqarfiup smileyit qorsuit, sungaartut imaluunniit aappalaartut tunniussinnaavai:
1)  Ilinniarfittut imaluunniit sungiusarfittut akuerineqarnissaq siunertaralugu suliffeqarfiup imaluunniit pisortaqarfiup www.suli.gl aqqutigalugu ilinniartitaanermik ingerlatsiviit attuumassutillit attaveqarfigai.
2)  Ilinniagaqarnernut sammiviit ataasiakkaat iluini inuussutissarsiutinut ilinniarfinnit akuerisaaffimminnut ilinniartut aamma sungiusartut qanoq amerlatiginissaat suliffeqarfiup imaluunniit pisortaqarfiup www.suli.gl aqqutigalugu nalunaarsortarpai.
3)  Suliffeqarfiup imaluunniit pisortaqarfiup www.suli.gl aqqutigalugu nalunaarsortarpai ilinniartut aamma sungiusartut qassit sulisorinerlugit, ilinniartitaanernik sammivinni ataasiakkaani, kiisalu kommunimi sorlermi ilinniartoqarfik imaluunniit sungiusartoqarfik inissisimanersoq.
4) Suliffeqarfiup imaluunniit pisortaqarfiup tamanut ammasunik takusassiaralugit suliffissat ilinniartutut aamma sungiusarfittut www.suli.gl -imi inuttassarsiuuttarsimavai.
5)  Suliffeqarfiup imaluunniit pisortaqarfiup ilinniartutut aamma sungiusartutut suliffissat akuerisaasut tamaasa inuttalertarsimavai. 
  Imm. 2. Suliffeqarfik imaluunniit pisortaqarfik tak. imm. 1, atugassarititaasunik naammassinninngitsoq nassuiaateqassaaq pissutaasunik, sooq ilinniartunik sungiusartunilluunniit akuerisaanermisut sulisitsinnginninni pillugu.
  Imm. 3.  Nassuiaataasoq imm. 2 naapertorlugu nalunaarneqassaaq suliffeqarfiup imaluunniit pisortaqarfiup quppersakkami saqqummiussisarfiani (www.suli.gl ).
  Imm. 4.  Suliffeqarfik imaluunniit pisortaqarfik Sulisoqarnermut Naalakkersuisoqarfimmut isumaqatigiissuteqarsinnaavoq imm. 1-imi atugassarititaasunik naammassinnikkumalluni imm. 2 naapertorlugu nassuiaataasumi atugassarititaasut naammassineqanngippata.

Smileyinik qorsunnik, sungaartunik aappalaartunillu tunniussinerit

  § 4.  § 3, imm. 1-imi najoqqutassat aallaavigalugit Sulisoqarnermut Naalakkersuisoqarfiup smileyit qorsuit, sungaartut aappalaartullu tunniussortarpai.
  Imm. 2.  Suliffeqarfik imaluunniit pisortaqarfik, § 3, imm. 1-imi najoqqutassanik tamanik piviusunngortitsisoq smileyimik qorsummik pissarsissaaq.
  Imm. 3.  § 3, imm. 2 aamma 3 malillugit piviusorsiortumik nassuiaammik tunniussippat suliffeqarfik imaluunniit pisortaqarfik, § 3, imm. 1-imi, nr. 1-4-mi najoqqutassanik tamanik piviusunngortitsisoq smileyimik sungaartumik pissarsissaaq.
  Imm. 4.  § 3, imm. 2 aamma 3 malillugit piviusorsiortumik nassuiaammik tunniussinngippat suliffeqarfik imaluunniit pisortaqarfik, § 3, imm. 1-imi, nr. 1-4-mi najoqqutassanik tamanik piviusunngortitsisoq smileyimik aappalaartumik pissarsissaaq
  Imm. 5.  Suliffeqarfik imaluunniit pisortaqarfik § 3, imm. 1, nr. 1-4-mi najoqqutassanik tamanik pinnani ilaannaanilli piviusunngortitsisoq smileyimik aappalaartumik pissarsissaaq.

Nakkutilliineq aalajangiisinnaassuserlu

  § 5.  Sulisoqarnermut Naalakkersuisoqarfik suliffeqarfiit aamma pisortaqarfiit ataasiakkaat smileyimik qorsummik, sungaartumik imaluunniit aappalaartumik tunineqarnissaat pillugit nakkutilliillunilu aalajangiisartuuvoq.
  Imm. 2.  § 3 malillugu suliffeqarfik imaluunniit pisortaqarfik paasissutissanik nalunaaruteqarlunilu uppernarsaatinik nassiussinissaanut Sulisoqarnermut Naalakkersuisoqarfik peqqusisinnaavoq.

Smileyimik tunniussaqarnissamut nalilersueqqinnerit

  § 6.  Suliffeqarfik imaluunniit pisortaqarfik smileyimik tunniunneqartumik naammaginninngitsoq smileyip tunniunneqartup nalilersoqqinnissaanik kissaateqaruni Sulisoqarnermut Naalakkersuisoqarfimmut allakkatigut saaffiginnissinnaavoq.
  Imm. 2.  Sulisoqarnermut Naalakkersuisoqarfiup suliffissarsiornermut nittartagaani (www.suli.gl -imi) qarasaasiakkut nalilersueqqinnissamut immersuiffikkut saaffiginnittoqassaaq.
  Imm. 3.  Nalilersueqqinnissamik kissaateqarluni suliassanngortitsisinnaanermut piffissaliussaq aalajangiinermik tigusinermiit sap. ak. 4-nik sivisussuseqarpoq.

Atuutilerfia

  § 7.  Nalunaarut ulloq 5. april 2022 atuutilerpoq.

Namminersorlutik Oqartussat, ulloq 7. marts 2022

Mimi Karlsen
Isumaginninnermut, Suliffeqarnermut Nunamullu
Namminermut Naalakkersuisoq

/ Isak Nielsen Kleist