§ 1.  Uranimik misissueqqaarneq, uranisiorluni misissuineq aamma piiaaneq akuerisaanngillat.
  Imm. 2. Misissueqqaarneq, uranisiorluni misissuineq piiaanerluunniit uranimut sammitinneqarani allamut sammitinneqarpat, agguaqatigiissillugu uranimik akoqarnera 100 ppm inorlugu oqimaassuseqarpat, imm. 1-imi aalajangersagaq atuutissanngilaq.

  § 2.  § 1-imi inerteqquteqarneq pinngoqqaatinut qinngornernik ulorianartunik akulinnut allanut aamma atuutissasoq pillugu maleruagassanik Naalakkersuisut aalajangersaasinnaapput. Naalakkersuisut aalajangersaanerminni naliusunut killissaliussat akuerisaasut pillugit, aamma pinngoqqaatinik qinngornernik ulorianartunik akulinnik pineqartunik misissueqqaarnissamut, misissuinissamut piiaanissamulluunniit akuersissutinik annikillisitsisarnerit utertitseqqusisarnerillugu pillugit, maleruagassanik aalajangersaasinnaapput.

  § 3.  § 1-mut naapertuuttumik piiaasoqarsinnaanngippat, Naalakkersuisut aatsitassanik misissueqqaarnissamut, misissuinissamut imaluunniit piiaanissamut akuersissut sunaluunniit annikillisissinnaavaat imaluunniit uterteqqusinnaavaat.

  § 4.  § 1-imik unioqqutitsinermut akiliisitsinertut ilusilimmik pineqaatissiisoqarsinnaavoq. 
  Imm. 2.  Ingerlatseqatigiiffiit il.il. (pisinnaatitaallutillu pisussaatitaasut) pinerluttulerinermut inatsimmi kapitali 5-imi maleruagassat malillugit pinerluttulerinermut inatsisitigut akisussaatinneqarsinnaapput.
  Imm. 3.  Peqqussummi aalajangersakkanik unioqqutitsinermut akiliisitsinertut ittumik pineqaatissiinerit, allaffissornikkut peqqussutini Inatsisartut inatsisaat malillugu suliarineqartuni, aalajangersarneqarsinnaapput.
  Imm. 4.  Akiliisitsinerit Nunap karsianut tutsinneqassapput.

  § 5.  Inatsisartut inatsisaat manna Inatsisartut inatsisaata atuutilersussatut saqqummiunneqarnerata kingorna ullup tulliani atuutilerpoq.
  Imm. 2.  Inatsisartut inatsisaat akuersissutinut Inatsisartut inatsisaata atuutilernerata kingorna tunniunneqartunut atuuppoq.

Namminersorlutik Oqartussat, ulloq 1. december 2021

Múte Bourup Egede
Naalakkersuisut Siulittaasuat