§ 1

Kalaallit Nunaata Aatsitassarsiornermi Aningaasaateqarfia pillugu Inatsisartut inatsisaanni nr. 6, 5. december 2008-meersumi, Inatsisartut inatsisaanni nr. 25, 9. december 2015-imeersukkut, Inatsisartut inatsisaanni nr. 31, 28. december 2016-imeersukkut  kingornalu Inatsisartut inatsisaanni nr. 49, 23 november 2017-imeersukkut allanngortinneqartumi, makku allanngortinneqassapput:

1. § 6, imm. 8 ima oqaasertalerneqassaaq
”  Imm. 8. Nunatta Karsiata aamma aningaasaateqarfiup akornanni aningaasanik nuussineq kommunit Namminersorlutillu Oqartussat missingersuutaat naatsorsuutaallu pillugit Inatsisartut Inatsisaat aamma Aningaasanut inatsit kisimi naapertorlugit pisinnaavoq.”

2.  §§ 51 aamma 52 ima oqaasertalerneqassapput: 
"  § 51.  Ukioq ilivitsumi piumasaqaatit naammassineqarnissaasa tungaanut, aningaasaateqarfik Naalakkersuisunit aqunneqassaaq:
1)  Aningaasaateqarfiup aningaasaataasa 1 milliard kr.-nit annertunerulernissaannut.
2)  Aningaasaateqarfiup aningaasaataanit ukiumut iluanaarutisiat 50 million kr.-nit annertunerulernissaannut.
  Imm. 2.  Naalakkersuisut aningaasaateqarfimmik aqutsinerat ukiumi piumasaqaatit tamarmik naammassineqarneranni ulloq 31. december kingorna atorunnaassaaq.
  Imm. 3.  Naalakkersuisut aningaasaateqarfiup aningaasaataanik ingerlatsisunik ataatsimik amerlanernilluunniit toqqaassapput.
  Imm. 4.  Naalakkersuisut aqutsinerisa atorunnaarnissaata tungaanut, § 1, imm. 2-3, § 6, imm. 7, § 7, imm. 4, uniffiit pingajuat, § 8, § 9, §§ 11-27, § 28, imm. 1, §§ 31-41, § 43, §§ 45-48 aamma § 49, nr. 1-13 aamma 18-24 aalajangersakkat atuutissanngillat.

  § 52.  Naalakkersuisut aningaasaateqarfik siulersussavaat, ingerlatissavaat aqullugulu.
  Imm. 2.  Naatsorsuuserinermi teknikikkut aningaasaateqarfiup aqunneqarnera aningaasanillu inissiineq ima pissasoq Naalakkersuisut isumannaassavaat:
1) Toqqissisimanartumik isumannaatsuunissaq annertunerpaamillu iluanaaruteqarnissaq anguniarlugu,
2) aningaasaatinik aqutsinermi aningaasaliisarnernilu nunat tamalaat akornanni pitsaasumik periutsit naapertorlugit, aamma
3) ileqqorissaarnikkut malitassiat toqqissisimanartut naapertorlugit.
  Imm. 3.  Aningaasaateqarfiup ingerlanneqarneranut ineriartorneranullu sunniuteqarsinnaasutut paasissutissat nalilerneqartut pillugit nalunaarutinik ukiumoortumik Naalakkersuisut saqqummiussisassapput.”

§ 2

Inatsisartut inatsisaat 1. januar 2022-mi atuutilissaaq.

Namminersorlutik Oqartussat, ulloq 1. december 2021

Múte Bourup Egede
Naalakkersuisut Siulittaasuat