Innuttaasut siulersuisuinik pilersitsineq aamma atorunnaarsitsineq

  § 1.  Naalakkersuisut sumiiffinni kommunit aggornerisa avataaniittuni inoqarfiusuni, Namminersorlutik Oqartussat sinnerlugit suliassanik imaluunniit taakkua ilaannik isumaginnittussanik innuttaasut siulersuisuinik pilersitsisinnaapput aammalu taakkununnga suliakkiisinnaallutik.
  Imm. 2.  Naalakkersuisut suliassat innuttaasut siulersuisuinit suliarineqarnissaat pisariaqartikkunnaarpassuk, innuttaasut siulersuisui atorunnaarsinniarlugit Naalakkersuisut aalajangersinnaapput.
  Imm. 3.  Innuttaasut siulersuisuinik atorunnaarsitsineq pisinnaavoq:
1)  innuttaasut siulersuisoqarnissaannut sumiiffimmi innuttaasut amerlassusaat naammakkunnaarpata,2)  sumiiffinni innuttaasunik sullissivimmik allatut iluseqartumik pilersitsisoqarpat, imaluunniit
3)  innuttaasut siulersuisui atorunnaarsinneqassasut allanik tunngaveqartumik naliliisoqarpat.

Ilaasortat amerlassusaat aamma piffissaq qinigaaffik

  § 2.  Innuttaasut siulersuisuinut qinersinermi kommunit aggornerisa avataanni sumiiffiit tamarmik immikkut qinersiviupput. 
  Imm. 2.  Innuttaasut siulersuisuinut ilaasortat 3 imaluunniit 5 qinerneqassapput. Amerlassusissai aalajangersarneqarsimatinnagit ilaasortat 3-t qinerneqassapput.
  Imm. 3.  Ilaasortat amerlassusissaat piffissamut qinigaaffiusussamut tullermut innuttaasut siulersuisuinit aalajangersarneqassaaq. Ilaasortat amerlassusissaat ulloq qinersiviusoq kingusinnerpaamik qaammatinik 3-nik sioqqullugu aalajangerneqassaaq.
  Imm. 4.  Innuttaasut siulersuisuini ilaasortat ukiunut 4-nut qinerneqassapput, aammalu ilaasortat tamarmik ataatsikkut ilaasortaajunnaartassallutik.
  Imm. 5.  Piffissaq qinersiviusoq juunip aallaqqaataaniit naatsorsorneqassaaq. Qinersineq maajip qaammataani marlunngorneq siulleq ingerlanneqassaaq. Tullianik qinersineq 2025-mi pissaaq.

Qinersisinnaatitaaneq aamma qinigaasinnaatitaaneq

  § 3.  Najukkami innuttaasunut siulersuisunut qinersisinnaatitaapput: 
1)  kinaluunniit danskisut innuttaassusilik, 18-inik ukioqalereersimasoq qinersinissarlu sioqqullugu minnerpaamik qaammatini 6-ini Kalaallit Nunaanni aalajangersimasumik najugaqarsimasoq, qinersinissaq sioqqullugu minnerpaamik sapaatit akunnerini 6-ini sumiiffimmi aalajangersimasumik najugaqarsimasoq, pineqartoq eqqartuussivikkoortumik Kalaallit Nunaanni atuuttussatut aalajangikkamik nammineersinnaajunnaarsitaasimanngikkuni.
2)  kinaluunniit nunat avannarliit arlaanni innuttaassuseqartoq, 18-inik ukioqalereersimasoq, qinersinissaq sioqqullugu minnerpaamik ukiuni 3-ni naalagaaffimmi aalajangersimasumik najugaqarsimasoq qinersinissarlu sioqqullugu minnerpaamik qaammatini 6-ini Kalaallit Nunaanni aalajangersimasumik najugaqarsimasoq qinersinissarlu sioqqullugu sapaatit akunnerini kingullerni 6-ini sumiiffimmi aalajangersimasumik najugaqarsimasoq, pineqartoq eqqartuussivikkoortumik Kalaallit Nunaanni atuuttussatut aalajangikkamik nammineersinnaajunnaarsitaasimanngikkuni.   
  Imm. 2.  Kinaluunniit qinersisussat allassimaffiannut ilanngunneqarsimatinnani qinersisinnaatitaanngilaq.

  § 4.  Innuttaasut siulersuisuinut qinigaasinnaavoq kinaluunniit § 2 naapertorlugu innuttaasut siulersuisuinut qinersisinnaatitaasoq, tamatumani pineqartoq ukiut kingulliit 5-ini ingerlaneranni inaarutaasumik eqqartuussinikkut akiliisitsissutissamilluunniit akuersinikkut pinerluttulerinermi inatsisit tunngavigalugit pineqaatissinneqarsimanngikkuni imaluunniit ukiut kingulliit 4-ini ingerlaneranni pissutsimut nalinginnaasumik isigineqarnermi innuttaasut siulersuisuinut ilaasortaanissamut naleqqukkunnaarsitsisumik pinerluttulerinermi inatsisit tunngavigalugit pineqaatissinneqarsimanngikkuni. Piffissamut killiliussat ulloq qinersiviusoq aallarnerfigalugu naatsorsorneqassapput.
  Imm. 2.  Taamaattoq pinerluttulerinermi inatsisit malillugit pineqaatissinneqarsimaneq pissutigalugu qinigaasinnaatitaannginneq pillugu akerliliissuteqarnerit apeqqutaatinnagit, inuk tamatigut qinigassanngortissinnaavoq.
  Imm. 3.  Qinersinissamut qinigassanngortillutik akueralugu nalunaarutigalugu, kiisalu Qinigaasinnaassuseq pillugu Ataatsimiititaliaq qinigaasinnaassutsip misilinneqarnissaanut atorneqartussamik, takukkit kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit Inatsisartut inatsisaanni qinigaasinnaassuseq pillugu ataatsimiititaliamut maleruagassat atuuttut, Kalaallit Nunaanni Politimestereqarfimmut pinerluttulerinermut nalunaarsuiffimmut paasissutissanik piniarsinnaasoq akuersaarlugu, qinigassanngortittoq namminneq atsiorluni uppernarsaasimassaaq. Atsiornerit nalunaarummi namminermi imaluunniit taassuma assilineqarnerani pisinnaapput.
  Imm. 4.  Innuttaasut siulersuisuinut ilaasortanik qinersisarneq pillugu maleruagassanik erseqqinnerusunik Naalakkersuisut aalajangersaasinnaapput.

Atuunnera

  § 5.  Inissitsiterluni ataatsimiinnermi innuttaasut siulersuisui ilaasortat akornanni siullittaasumik qinersissapput. Innuttaasut siulersuisuinut siulittaasoq, piffissamut innuttaasut siulersuisuinut qinersiviusumut, qinerneqassaaq.
  Imm. 2.  Innuttaasut siulersuisuisa suleriaasissartik nammineerlutik akuerissavaat.
  Imm. 3.  Innuttaasut siulersuisuisa suleriaasissaata assinga innuttaasut siulersuisuisa Naalakkersuisunut nassiutissavaat. 
  Imm. 4.  Naalakkersuisut innuttaasut siulersuisuisa atuunnissaat pillugu maleruagassanik erseqqinnerusunik aalajangersaasinnaapput.

Aningaasaqarneq

  § 6.  Innuttaasut siulersuisuisa naatsorsuutinik saqqummiussisarnissaat, taakkua kukkunersiuisui, missingersuutinut siunnersuummik saqqummiussisarneq, aammalu allatigut aningaasaqarnikkut susassaqarfinnik allatigut ingerlatsineq pillugu maleruagassanik Naalakkersuisut aalajangersaassapput.

  § 7.  Aningaasat suliassat § l-imi pineqartut tamakkiisumik ilaannaasumilluunniit suliarinissaannut aammalu innuttaasut siulersuisuisa allaffissornerannut aningaasartuutinut matussutissatut innuttaasut siulersuisuinut tunniunneqartussat, ukiumoortumik aningaasanut inatsimmi Inatsisartunit aalajangersarneqartassapput.

Atuutilernera

  § 8.  Inatsisartut inatsisaat ulloq 1. januar 2022 atuutilerpoq. Peqatigisaanik kommunet aggorneqarnerisa avataanniittut nunaqqatigiit siunnersuisoqatigiivi pillugit Inatsisartut inatsisaat nr. 13, 20. oktober 1988-imeersoq atuukkunnaassaaq.
  Imm. 2.  Nunaqqatigiit Siunnersuisoqatigiivinut ilaasortassanik qinersisarneq pillugu Namminersornerullutik Oqartussat nalunaarutaat nr. 8, 21. marts 2005-imeersoq maleruagassanit Inatsisartut inatsisaat manna naapertorlugu aalajangersagaasunit atorunnaarsinneqarnissami tungaanut, atuutiinnassaaq.

Namminersorlutik Oqartussat, ulloq 19. november 2021

Múte Bourup Egede
Naalakkersuisut Siulittaasuat