Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi §§ 6, 6 a, 12 a, 12 b, 12 c, aamma 21 b aamma § 29 imm. 2 aamma 3 malillugit aalajangersarneqarput:

Atuuffia

  § 1.  Nalunaarut manna atuuppoq:
1)  Kommuneqarfik Sermersuumi Nuummi
  Imm. 2.  Nalunaarut Kalaallit Nunaanni Peqqinnissaqarfimmut imaluunniit nakorsiartarfinnut kiisalu nakorsiartarfinnut namminersortunut niuertarfinnilu peqqissaannermik naalagaaffimmit akuerisaallutik ingerlatani ingerlatsisunut atorfeqartitsiffiusunullu atuutinngilaq. 
  Imm. 3.  Nalunaarut katersuunnernut, politikikkut allatulluunniit isummersornissamik sunniiniarnissamik siunertalinnut atuutinngilaq.
  Imm. 4. Nalunaarut eqqartuussivinnut atuutinngilaq.
  Imm. 5.  Nalunaarut namminersortunut pisortaniillu ulluunerani neqeroorutinut, atuarfinnut, ilinniarfeqarfinnut il.il. nappaatit tunillaassortut akiorniarlugit iliuutsit pillugit Inatsisartut peqqussutaanni § 22 naapertorlugu atuutsinngilaq.  
  Imm. 6.  Nalunaarut angerlarsimaffinni aaqqissuussanut il.il. atuutinngilaq. 
  Imm. 7.  Nunatsinni Nakorsaaneqarfik nalunaarummit immikkut akuersissuteqarsinnaavoq.

Illup iluani aaqqissuussinerni il.il. peqataasinnaasunut killilersuineq

  § 2.  Illup iluani aaqqissuussinerit, nalliuttorsiornerit, sammisaqartitsinerit assigisaalluunniit amerlanerpaamik inunnik 20-nik peqataasoqaqqusaapput, § 4-mullu naapertuutissallutik.

Silami aaqqissuussinerni il.il. peqataasinnaasunut killilersuineq

  § 3.  Aaqqissuussat, nalliuttorsiornerit, sammisaqartitsinerit assigisaalluunniit silami ingerlanneqartussat amerlanerpaamik 20-nik peqataasoqaqqusaapput.

Ininut kikkunnilluunniit iserfigineqarsinnaasunut piumasaqaatit

  § 4.  Inuit aamma inatsisit naapertorlugit ingerlatsiviusut, tassunga ilanngullugu pisortat oqartussaaffii aamma suliffeqarfii, ininik kikkunnit tamanit iserfigineqarsinnaasunik pigisallit piumasaqaatinik makkuninnga naammassinnissimassapput: 
1)  Inuit inini isersinnaatitaasut amerlanerpaamik 20-iusinnaapput, piumasaqaammi timmisartoqarfiit aamma init pisiniarfiusut ilaatinneqanngillat. Inini sulisut inunnut 20-inut ilanngullugit naatsorsoneqanngillat.
2)  Ajornanngippat init imatut pequsersorsimassapput suliffeqarfiillu imatut ingerlanneqassallutik tuniluunnissaq minnerpaaffianiitinneqassalluni, tassunga ilanngullugu pisisartut pulaartullu imminnut qanillinnginnissaat periarfissaqartillugu. 
3)  Inimi ininiluunniit tamanit iserfigineqarsinnaasuni eqqiliusaarnissaq ileqqorissaarnissarlu pillugit Nunatta Nakorsaaneqarfianiit paasissutissanik nivinngaasoqassaaq.  
4)  Sulisut tamarmik Nakorsaaneqarfiup eqqiluisaaqqissaarnissamik ileqqorissaarnissamillu innersuussutaanik malinninnissaat qulakkeerneqassaaq. 
5)  Pisisartunut pulaartunullu ajornanngippat imermik qaqorsaammillu imaluunniit assammut spritimik peqassaaq. 
6)  Nerisassanik poortorneqarsimanngitsunik tuniniaanermi sulisut aaqqateqassapput.

  § 5.  Inuussutissarsiummik ingerlatalik politiit naliliinerat malillugu § 4-mik unioqqutitsisimappat, inuussutissarsiummillu ingerlatalik § 4-mik malinninnissaa ilimagineqanngippat, inuussutissarsiummik ingerlatalik inip piffissami aalajangersimasumi tamanut matoqqatitsinissaanik politiinit peqquneqarsinnaavoq.

Nuumminngaanniit angalanermi piumasaqaatit

  § 6.  Inuit Nuummiit nunatta sinneranut angalaniarlutik aallartussat Covid-19-imut naammassillugu akiuussuserneqarsimassapput PCR-imillu misissortinnermi tunillatsissimannginnermik imaluunniit Covid-19-imik tunillatsissimannginnermik uppernarsaammik angallassisussamut takutitsissallutik. 
  Imm. 2.  Inuit tullinnguuttut makku imm. 1-imi piumasaqaatinut ilaatinneqanngillat:
1)  Inuit angerlarsimaffimminnukarlutik angalasut. 
2)  Inuit ilinniariartorlutik assigisaanilluunniit angalasut.
3)  Inuit inuiaqatigiinni suliassaqartitaallutik angalasariaqalersut. 
4)  Inuit Covid-19-imut akiuussutissamik kapitinnissamut Nunatta Nakorsaaneqarfianit nalinginnaasumik innersuunneqanngitsut. 
5)  Inuit 11-nik ukiullit ukiukinnerusulluunniit. 
6)  Sulisut tamanut angallassissummi pineqartumi aallartussanik atorneqartussanik sulisut.
7)  Inuit Nuummiit nunatta avataanut angalasussat nunatta iluani pisariaqanngitsumik uninngaffiunngitsumik aallartussat. 
  Imm. 3.  Inuit imm. 2-mi ilaatinneqartut Covid-19-imut PCR-imik misissortinnermi tunillatsissimannginnermik angallassisussamut takutitsissapput Nuummiit aallannginnerminni. 
  Imm. 4.  Imm. 1-ip maleruarneqarnissaata qulakkeernissaa angallassissummik piginnittup akisussaaffigaa.
  Imm. 5.  PCR-imik misissortinneq aallarnermiit annerpaamik 48 tiiminik pisoqaanerussanngilaq.

  § 7.  Inuk Covid-19-imut tamakkiisumik akiuussuserneqarsimasutut isigineqassaaq inuup akiuussuserneqarsimanerup ingerlarngata naammassisimanera uppernarsarsinnaappagu.
  Imm. 2.  Nunatta Nakorsaaneqarfiata akiuussuserneqarsimanermut uppernarsaatit sorliit akuerisaanersut aalajangissavai.

  § 8.  Inuit siusinnerusukkut Covid-19-imik tunillatsinnikuusimasut PCR-ilu atorlugu misissortereernermikkut Covid-19-imik tunillatsissimanerminnillu minnerpaamik ulluni 14-ini annerpaamik sapaatit akunnerini 12-inik pisoqaassusilinnik uppernarsaasinnaasut, inatsisitigut tamakkiisumik akiuussuserneqareersimasutut isigineqassapput. 
  Imm. 2.  Uppernarsaat suna uppernarsaatitut akuerisatut atorneqassanersoq Nunatta Nakorsaaneqarfiata aalajangersinnaavaa.

Qanermut imaluunniit kiinnamut assiaquteqarnissamut piumasaqaat

  § 9.  Inuit aqqaneq-marlunnik sinnerlugillu ukiullit qanermut imaluunniit kiinnamut assiaquteqassapput:
1) inini kikkunnit tamanit iserfigineqarsinnaasuni isersimagunik.
2)  pisiniarfinni kiffartuussinermillu ingerlatsivinni sulisut pisisartunik attaveqarnerminni.  
3)  assartuutini kikkunnit tamanit ilaaffigineqarsinnaasuni, tassunga ilanngullugit bussini taxanilu ilaagunik.  
  Imm. 2.  Qanermut imaluunniit kiinnamut assiaquteqarnissamut piumasaqaat ilisimassutsimik annikillisimasunut, timikkut tarnikkulluunniit sanngiitsunut, allamilluunniit peqquteqarlutik qanermut kiinnamulluunniit assiaquteqarsinnaanngitsunut atuutinngilaq.
  Imm. 3.  Pisiniarfinni kiffartuussivinnilu sulisut qanermut kiinnamulluunniit assiaqutit atunngikkaluarlugit pisiniat sulisullu akornanni plastikimik assiaqutit atorsinnaavaat.
  Imm. 4.  Qanorluunniit immikkoortumi 1-imi allaqqasoqaraluarpat, peqqutissaqarluarpat qanermut kiinnamulluunnniit assiaqutit ilaannakortumik tamakkiisumilluunniit peeqqaneqarallarsinnaapput, pisuni imaattuni:
1)  Nerinermi imaluunniit imernermiUnder.
2)  Nakorsaatitornermi.
3)  Qarngit aalaneratigut atuaasartumik oqaloqateqarnermi.
4)  Qanermut kiinnamulluunniit assiaqutit anersaartorniarnermut ajoqutaagunik ipianngulersitsippataluunniit.
5)  Politiit kinaassutsimik uppernarsaaneranni.

  § 10.  Qanermut assiaqutitut taaneqartut tassaapput qanermut qinngamullu assiaqutit ataasiartakkat imaluunniit annoraaminermit sanaat allunaasamillu tasisartumilluunniit siutinut ikkuttartut imaluunniit niaqqup tunuatungaani qilertartoq kiinnamullu attuumasoq. 
  Imm. 2. Kiinnamut assiaqutitut tassaapput isinut, qanermut qingamullu assiaqutit plastikimik sanaat kiinnamut attuumanngitsut.

                                       Inuit pillugit paasissutissanik suliarinninnerit

  § 11.  Nalunaarut una naapertorlugu inuup akiuussuserneqarsimaneranut inissisimaffia uppernarsarniarlugu inuit pillugit paasissutissanik suliarinnittoqarsinnaavoq.

Pineqaatissiissutit

  § 12.  §§ 2, 6 aamma 9-mik unioqqutitsisoq pinerluttulerinermik inatsit malillugu pineqaatissinneqarsinnaavoq. 
  Imm. 2.  Ingerlatseqatigiiffiit il.il. (inatsisilerinermi inuttut immikkoortutut isigineqartut) pinerluttulerinermik inatsimmi kapitali 5-imi malittarisassat malillugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.

Atuutilersitsineq aamma atuunneranut piffissaliussaq

  § 13.  Nalunaarut ulloq 13. november 2021 nal. 8:00 atuutilissaaq, taamaattorli takuuk imm. 2.
  Imm. 2.  § 6 træder 15. november 2021 atuutilissaaq.
  Imm. 3.  Nalunaarut malillugu killilersuinerit, inerteqquteqarnerit, peqqusinerit il.il. 27. november 2021 ilanngullugu atuutissapput.

Namminersorlutik Oqartussat, ulloq 12. november 2021

Kirsten Fencker
Peqqinnissamut Naalakkersuisoq

/ Aka Olesen