Kalaallit Nunaanni annaassiniarnissamut upalungaarsimaneq aamma ikuallattoornissamik qaartoornissamillu pitsaaliuinermi iliuusissat pillugit Inatsisartut inatsisaat nr. 14., 26. maj 2010-meersumi § 1, imm. 3, aamma § 2 naapertorlugit aalajangersarneqarpoq:

Annertussusiliinerup minnerpaaffissai

  § 1.  Kommunini annaassiniarnermut upalungaarsimasut inuttaliinermut aamma suliaqarnermut atortunut annertussusiliinermi minnerpaaffissat pillugit piumasaqaatit nalunaarummi matumani aalajangersarneqartut naammassinissaannut akisussaasuupput. 
  Imm. 2.  Illoqarfinnut annaassiniarnermut upalungaarsimasunut inuttaliinermut aamma suliaqarnermut atortunut annertussusiliinermi minnerpaaffissanik agguataarineq ilanngussaq 1-imut naapertuuttumik pissaaq. 
  Imm. 3.  Nunaqarfinnut annaassiniarnermut upalungaarsimasunut inuttaliinermut aamma suliaqarnermut atortunut annertussusiliinermi minnerpaaffissanik agguataarineq ilanngussaq 2-mut naapertuuttumik pissaaq.

  § 2.  Upalungaarsimanermut pisortaq inuttat amerlassusissaannut piumasaqaatini aalajangersagaasuni ilaatinneqanngilaq.

  § 3.  Upalungaarsimasut isumannaatsumik suliaqarnissamut pisinnaasaqarnissaat, kommunini annaassiniarnermut upalungaarsimasut sukkulluunniit qulakkiissavaat.
  Imm. 2.  Kommunini annaassiniarnermut upalungaarsimasut. imm. 1 naapertorlugu isumannaatsumik suliaqarnissaq qulakkeerniarlugu tamanna pisariaqarpat, annertussusiliinernut minnerpaaffissatut aalajangersagaasut qaangerlugit inuttat suliaqarnermullu atortut amerlanerulersinnissaannut pisussaaffeqarput, ilanngullugu illoqarfimmi imaluunniit nunaqarfimmi sanaartukkanik, suliffeqarfinnik imaluunniit illuni immikkut navianaateqarsinnaasunik peqarpat, imaluunniit pissutsit allat assingusut imaluunniit siusinnerusukkut upalungaarsimanermi pisut, annertussusiliinermut minnerpaaffissat naammanngitsut, ersarissisippassuk.

Immikkut ittumik akuersissuteqarneq

  § 4.  Pisut aalajangersimasut tamanna pisariaqartippassuk, upalungaarsimanermut Naalakkersuisoq kommunini annaassiniarnermut upalungaarsimasunut nalunaarummi matumani piumasaqaatit saneqqunneqarnissaannut akuersissuteqarsinnaavoq. Nalilersuinermi pissutsit ilaatinneqarsinnaapput, soorlu:
1)  Attaveqaateqannginnera.
2)  Inuussutissarsiortut ineriartornerat.
3)  Nunami sumiiffinni aamma innuttaasut ineriartorneranni pissutsit. 
  Imm. 2.  Immikkut ittumik akuerineqarnissamut qinnuteqaat upalungaarsimanermut Naalakkersuisumut allaganngorlugu tunniunneqassaaq aammalu imarissallugit: 
1)  Illoqarfiup imaluunniit nunaqarfiup aqqa kiisalu qinnuteqaatip ullua. 
2)  Pisunut aalajangersimasunut qinnuteqaammut tunngavigineqartunut nassuiaat. 
3)  Pissutsit aalajangersimasut immikkut ittumik akuersissuteqarfigineqartussatut kissaatigineqartut pillugit paasissutissat.
4)  Suliniutissanut nalunaarummi annertussusiliinermut minnerpaaffissat naammassineqarneranni qulakkeerniarneqartut assinginik isumannaallisaanerup annertussuseqartinnissaata qulakkeernissaanut naleqquttutut kommunini annaassiniarnermut upalungaarsimasut isigisaannut nassuiaat tunngavilersugaasoq. 
  Imm. 3.  Upalungaarsimanermut Naalakkersuisoq allatut aalajangiisimanngippat, immikkut ittumik akuersissuteqarneq ukiut 4-t qaangiunneranni atorunnaassaaq.

  § 5.  Illoqarfimmi imaluunniit nunaqarfimmi aarlerinartoqartuni annertuunik allanngortoqarsimappat, tamanna upalungaarsimanermut Naalakkersuisumut nalunaarutigineqassaaq, taassuma tamatuma kingorna § 4 malillugu immikkut ittumik akuersissuteqarnerit tunuartinneqassanersut aalajangissallugu.
  Imm. 2.  Immikkut ittumik akuersissuteqarnerit tunuartinneqarpata, kommunini annaassiniarnermut upalungaarsimasut § 4 malillugu immikkut ittumik akuersissuteqarnissamik nutaamik qinnuteqarsinnaapput. 
  Imm. 3.  § 3, imm. 1 malillugu annaassiniarnermut upalungaarsimasut pisussaaffimminnik naammassinninnissamut tamanna akornusiippat, § 4 malillugu immikkut ittumik akuersissuteqarnerup atuutsinnginnissaanut kommunini annaassiniarnermut upalungaarsimasut sukkulluunniit pisussaaffeqarput. Annaassiniarnermut upalungaarsimasut naliliippata § 4 malillugu immikkut ittumik akuersissuteqarneq annaassiniarnermut upalungaarsimasut § 3, imm. 1 malillugu pisussaaffimminnik naammassinninnissaannut akornusiisoq annaassiniarnermut upalungaarsimasut naliliippata, aammattaaq kommunini annaassiniarnermut upalungaarsimasut upalungaarsimanermut Naalakkersuisoq ilisimatissavaat.

Atuutilernera

  § 6.  Nalunaarut ulloq 1. maj 2022 atuutilerpoq.
  Imm. 2.  Peqatigisaanik nalinginnaasumik orniguttarneq aamma sulisut amerlassusilerneqarnerat pillugu kaajallaasitaq nr. 1, 15. marts 1994-imeersoq atorunnaarsinneqarpoq.

Namminersorlutik Oqartussat, ulloq 28. Oktober 2021

Kalistat Lund
Nunalerinermut, Imminut Pilersornermut, Nukissiutinut Avatangiisinullu Naalakkersuisoq

/Mette Skarregaard Pedersen