Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi §§ 6, 6 a, 12 b, § 21 b aamma § 29, imm. 2 aamma § 3 naapertorlugit uku aalajangersarneqarput:

Atuuffia

  § 1.  Nalunaarut manna atuuppoq:
1)  Kommuneqarfik Sermersuumi Nuummi.
2)  Qeqqata Kommuniani Sisimiuni.
  Imm. 2.  Nalunaarut Kalaallit Nunaanni Peqqinnissaqarfimmut imaluunniit nakorsiartarfinnut kiisalu nakorsiartarfinnut namminersortunut niuertarfinnilu peqqissaannermik naalagaaffimmit akuerisaallutik ingerlatani ingerlatsisunut atorfeqartitsiffiusunullu atuutinngilaq. 
  Imm. 3.  Nalunaarut katersuunnernut, politikikkut allatulluunniit isummersornissamik sunniiniarnissamik siunertalinnut atuutinngilaq.
  Imm. 4.  Nalunaarut eqqartuussivinnut atuutinngilaq.
  Imm. 5.  Nalunaarut namminersortunut pisortaniillu ulluunerani neqeroorutinut, atuarfinnut, ilinniarfeqarfinnut il.il. nappaatit tunillaassortut akiorniarlugit iliuutsit pillugit Inatsisartut peqqussutaanni § 22 naapertorlugu atuutsinngilaq.  
  Imm. 6.  Nalunaarut angerlarsimaffinni aaqqissuussanut il.il. atuutinngilaq. 
  Imm. 7.  Nunatsinni Nakorsaaneqarfik nalunaarummit immikkut akuersissuteqarsinnaavoq.

Nuummiit Sisimiuniilluunniit aallarnermi piumasaqaatit

  § 2.  Inuit Nuumminngaanniit Sisimiuniilluunniit nunatsinni sumiiffinnut allanut angalasut Covid-19-imik tunillanneqarsimannginnertik uppernarsaqqaartinnagu katerisimaarnernut, aaqqissuussanut, sammisassaqartitsinernut il.il. peqataaqqusaanngillat. Matumani illup iluani, silami, pisortat inuillu katerittarnerat, aaqqissuussinerit sammisassaqartitsinerillu il.il. tamanna atuuppoq.
  Imm. 2.  Pisortat suliffeqarfiutaanni assigisaanilu isersimanermut, inuussutissarsiortut inigisaanni tamanut ammasuni isersimanermut aamma pisortat namminersortullu utoqqarnik paaqqinnittarfiinut napparsimavinnulluunniit isersimanermut imm. 1-imi inerteqqut aamma atuutsinneqassaaq. Taamaattorli qanermut kiinnamulluunniit assiaqutit atorlugit Covid-19-imut misissortinnissaq, ulluinnarni nioqqutissanik pisiniarnissaq allallu pisariaqavissut allanit isumagineqarsinnaanngitsut isumaginissaat akuerineqarput.
  Imm. 3.  Inuit Covid-19-imut akiuussutissamik tamakkiisumik kapitissimasut imm. 1-imut ilanngunneqanngillat. kapitissimanermulli uppernarsaatit takutinneqarsinnaasariaqarput. 
  Imm. 4.  Meeqqat 11-nik ukiullit ukiukinnerusulluunniit piumasaqaammi imm. 1-imi ilaatinneqanngillat.
  Imm. 5.  Inuit imm. 1-imi pineqartut Nuumminngaanniit Sisimiuniilluunniit angalasut ullut tallimassaanni kingusinnerusukkulluunniit Covid-19-imut misissortissinnaapput. Misissuinermut akissut tunillatsissimanngitsutut nalilerneqarpat, Covid-19-imut tunillatsissimanngitsutut isigineqassaaq.
  Imm. 6.  Inuk Covid-19-imut misissortinngippat imm. 1-imi inerteqquteqarneq Nuumminngaanniit Sisimiuniilluunniit angalanerup kingorna ulluni 14-ini atuutissaaq, taamaattorli § 8, imm. 2 takuuk. Inuk ullut 14-it sinnerlugit Covid-19-imik nappaateqarnermut ersiuteqarsimanngikkuni Covid-19-imik tunillanneqarsimanngitsutut naatsorsuutigineqassaaq.

Init ilaannut taakkununngalu attuumassutilinnut nunaminertanut, kikkunnilluunniit iserfigineqarsinnaasunut tunngatillugit piumasaqaatit

  § 3.  Inuit imm. 2-mi taaneqartut inineeqqusaanatillu taakkununngalu attuumassutilinni nunaminertaneeqqusaanngillat, aatsaalli taakkunaniissinnaassallutik: 
1)  Covid-19-imut naammassillugu akiuussuserneqarsimagunik, imaluunniit
2)  Covid-19-imut misissortissimanermut uppernarsaammik akunnernik sivisunerpaamik 48-nik pisoqaatigisumik takutitsisinnaagunik. 
  Imm. 2.  Init taakkununngalu attuumassuteqartut nunaminertat kikkunnilluunniit iserfigineqarsinnaasut aamma nalinginnaasumik inunnit sivikitsuinnaanngitsumik isersimaffigineqarsinnaasut imm. 1-imut ilaatinneqarput, assersuutigalugu:
1)  Sutorniartarfiit, cafiit, imerniartarfiit, diskotekit assigisaallu aamma tamakkununnga attuumassuteqartut silami nunaminertat.
2)  Kulturikkut suliffeqarfiit - tassunga ilanngullugit ilaatigut Kulturikkut Illorsuit, filmeriartarfiit, katersugaasiviit inersuillu saqqummersitsiviit.
3)  Innuttaasut Illui assigisaallu
4)  Atuakkanik atorniartarfiit.
5)  Illut iluini silamilu timersornermut atorneqartartut - tassunga ilaatigut ilanngullugit init timersortarfiit aamma Illorsuit Timersortarfiit, naluttarfiit, timigissartarfiit isikkamillu arsaattarfiit. 
6)  Nujalerisut, tagiartuisartut, pinnersartarfiit assigisaallu. 
Imm. 3.  Suliffeqarfiit, paaqqinnittarfiit il.il., imm. 2 takuuk, akiuussuserneqarsimanermut uppernarsaammik imaluunniit Covid-19-imik nappaateqannginnermut uppernarsaammik qinnuiginnissinnaapput.
  Imm. 4.  Init tamakkununngalu attuumassuteqartut nunaminertat tullinnguuttut makku imm. 1-imi piumasaqaatinut ilaatinneqanngillat:
1)  Init tamakkununngalu attuumassuteqartut nunaminertat niuertarfittut atorneqartut.
2)  Allakkeriviit.
3)  Mittarfiit
4)  Pisortatut oqartussani pilersuiffiusunilu init sullissiviit, saaffiginnittarfiit il.il. 
5)  Pisortat angallassissutaannut tunngatillugit utaqqisarfiit.
  Imm. 5.  Inuit tullinnguuttut makku imm. 1-imi piumasaqaatinut ilaatinneqanngillat:
1)  Sulisut inini pineqartuni imaluunniit tamakkununnga attuumassuteqartuni nunaminertani suliallit.
2)  Inuit Covid-19-imut akiuussutissamik kapitinnissamut Nunatta Nakorsaaneqarfianit nalinginnaasumik innersuunneqanngitsut. 
3)  Inuit 11-nik ukiullit ukiukinnerusulluunniit.

  § 4.  Inuk Covid-19-imut tamakkiisumik akiuussuserneqarsimasutut isigineqassaaq inuup akiuussuserneqarsimanerup ingerlarngata naammassisimanera uppernarsarsinnaappagu. 
  Imm. 2.  Nunatta Nakorsaaneqarfiata akiuussuserneqarsimanermut uppernarsaatit sorliit akuerisaanersut aalajangissavai.

Pingaartumik inunnut Covid-19-imik siusinnerusukkut tunillatsinnikunut

  § 5.  Inuit siusinnerusukkut Covid-19-imik tunillatsinnikuusimasut PCR-ilu atorlugu misissortereernermikkut Covid-19-imik tunillatsissimanerminnillu minnerpaamik ulluni 14-ini annerpaamik sapaatit akunnerini 12-inik pisoqaassusilinnik uppernarsaasinnaasut, inatsisitigut tamakkiisumik akiuussuserneqareersimasutut isigineqassapput.
  Imm. 2.  Uppernarsaat suna uppernarsaatitut akuerisatut atorneqassanersoq Nunatta Nakorsaaneqarfiata aalajangersinnaavaa.

Inuit pillugit paasissutissanik suliarinninnerit

  § 6.  Nalunaarut una naapertorlugu inuup akiuussuserneqarsimaneranut inissisimaffia uppernarsarniarlugu inuit pillugit paasissutissanik suliarinnittoqarsinnaavoq.

Iliuusissat

  § 7.  §§ 2 aamma 3-mik unioqqutitsisoq pinerluttulerinermik inatsit malillugu pineqaatissinneqarsinnaavoq. 
  Imm. 2.  Ingerlatseqatigiiffiit il.il. (inatsisilerinermi inuttut immikkoortutut isigineqartut) pinerluttulerinermik inatsimmi kapitali 5-imi malittarisassat malillugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.

Atuutilersitsineq aamma atuunneranut piffissaliussaq

  § 8.  Nalunaarut ulloq 1. november 2021-mi atuutilissaaq.
  Imm. 2.  Nalunaarut malillugu killilersuinerit, inerteqquteqarnerit, peqqusinerit il.il. 30. november 2021 ilanngullugu atuutissapput.

Namminersorlutik Oqartussat, ulloq 29. oktober 2021

Kirsten Fencker
Peqqinnissamut Naalakkersuisoq

/ Aka Olesen