Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi, § 12 a aamma § 29, imm. 2 aamma 3 malillugit aalajangersarneqarpoq:

  § 1.  Nunatta kangianut timmisartuussisarneq Namminersorlutik Oqartussanut kiffartuussinissamik isumaqatigiissutit naammassinissaannut pisartoq timmisartuni amerlanerpaanik ilaasoqarnissaq pillugu nalunaarummut ilaatinneqanngilaq.

Sapaatip akunneranut nunatsinnut tikittut amerlanerpaaffissaat

  § 2.  Naalakkersuisut akuersinerisigut Coronamut allattoqarfik Air Greenlandimut aamma timmisartortitseqatigiiffinnut allanut aalajangersimasumik Kalaallit Nunaannukartartunut nalunaaruteqassaaq, Kalaallit Nunaannut tikissinnaasut sapaatip akunneranut amerlanerpaamik qassiunersut. Nalinginnaasumik tikittunut aamma oqartussaasunik timmisartuussinernut tikittussat amerlassusissaannut nalunaaruteqartoqarsinnaavoq. 
  Imm. 2.  Oqartussanik timmisartuussisoqarnerani tikittussat amerlassusissaannut nalunaaruteqarnermi taakkununnga immikkut piumasaqaatinik coronamut allattoqarfimmiit aalajangersaasoqarsinnaavoq.

 Timmisartukkut aqqutit aalajangersimasuunngitsut aqqutigalugit nunatsinnut angalanerit

  § 3.  Timmisartut allat § 2-imi taaneqanngitsut nunatsinnut angalasunik ilaasoqaqqusaanngillat, taamaattorli imm. 2 takuuk. 
  Imm. 2.  Timmisartuutileqatigiiffiit § 1-imi ilanngitsunik aammalu inuiaqatigiinnut pingaarutilimmik siunertaqarlutik nunatsinnukartunik angallasserusukkunik nunatsinnut angalanissamut akuersissummik Corona pillugu allatseqarfimmut qinnuteqarsinnaapput. Timmisartuutileqatigiiffilli tikinnginnermi akuersissummik tigusaqareersimassaaq.

Pineqaatissiissuteqartarneq

  § 4. §§ 2-imik imaluunniit 3-mik unioqqutitsisoq pinerluttulerinermik inatsit malillugu pineqaatissinneqarsinnaavoq.
  Imm. 2.  Ingerlatseqatigiiffiit il.il. (inatsisilerinermi inuttut immikkoortutut isigineqartut) pinerluttulerinermik inatsimmi kapitali 5-imi malittarisassat malillugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.
  Imm. 3.  Akiliisitsissutit Nunap Karsianut tutsinneqassapput.

Atuutilersitsineq aamma atuunneranut piffissaliussaq

  § 5.  Nalunaarut ullormi 25. august 2021 atuutilissaaq. 
  Imm. 2.  Nalunaarut 31. oktober 2021 ilanngullugu atuutissaaq.

Namminersorlutik Oqartussat, ulloq 23. august 2021

Kirsten Fencker
Peqqinnissamut Naalakkersuisoq

/ Aka Olesen