Eqqumiitsuliornermik ingerlatsineq pillugu Inatsisartut inatsisaanni nr. 11 6. juni 2016-imeersumi § 16 a, imm. 2 aamma imm. 3, Inatsisartut inatsisaatigut nr. 25, 28. november 2019-imeersukkut aalajangersarneqarpoq:

Kapitali 1

Siunertaq, atorneqarfissaa aamma suliassat

  § 1.  Kalaallit Nunaanni eqqumiitsuliornermut aningaasaateqarfiup siunertaraa siuarsassallugit Kalaallit Nunaanni eqqumiitsuliornikkut ingerlatsineq, aamma kalaallit nunani allani eqqumiitsuliornikkut ingerlatsinerat, sapinngisamillu qularnaarniassallugu innuttaasut siammasissumik aamma tamatigoortumik kalaallit eqqumiitsuliaannik eqqumiitsuliornikkullu ingerlatsinerannik periarfissaqarnissaat, aamma eqqumiitsuliornikkut  nunani allaneersunik periarfissaqartinneqarnissaat.

  § 2.  Kalaallit Nunaanni eqqumiitsuliornermut aningaasaateqarfiup ingerlatsinerani ilaapput eqqumiitsuliornermik ingerlatsinerit tamakkiisut, Inatsisartut eqqumiitsuliornernut inatsisaanni ilaasut.

  § 3.  Kalaallit Nunaanni Eqqumiitsuliornermut Aningaasaateqarfiup suliassaraa ukununnga tapiissuteqarnissaq:
1)  eqqumiitsuliornermik ingerlatsinerup ingerlanneranut, tamatumunnga ilanngullugit angalanernut aningaasartuutit matussusernissaannut aamma ineqarnermut aningaasartuutinut,
2)  eqqumiitsuliorluni suliat inerisarnerinut suliarinerinullu, tamatumunnga ilanngullugit eqqumiitsuliornermik ingerlatsinermut atortussat aamma 
3)  eqqumiitsuliornermik ingerlatat saqqummersinnissaannut siammaannissaannullu.   
  Imm. 2.  Suliassat allat suliassat isumaginerinut attuumassuteqartut, matumani ilanngullugit eqqumiitsuliornermik ingerlatsineq pillugu apeqqutini siunnersuineq aningaasaateqarfiup suliarisinnaavai. 
  Imm. 3.  Takussutissatut katersugaateqalernissaq inillu tamanit tikinneqartartut pinnersarnissaat siunertaralugit kalaallit eqqumiitsuliaannik pisiortornissamut inniminniinissamulluunniit tunngatillugu aningaasaateqarfiup naalakkersuisoqarfimmik siunnersuinissaa pillugu Kultureqarnermut Naalakkersuisoqarfik aningaasaateqarfimmut qinnuiginnissinnaasoq.

Kapitali 2

Aningaasaateqarfiup siulersuisui

  § 4.  Kalaallit Nunaanni Eqqumiitsuliornermut Aningaasaateqarfik siulersuisunit tallimanik ilaasortalimmit aqunneqarpoq. 
  Imm. 2.  Siulersuisut ataatsimoorlutik eqqumiitsuliorneq, tapiissutinik aqutsineq pillugit ilisimasaqassapput kiisalu aningaasaqarnikkut, aqutsinikkut inuussutissarsiornikkullu piginnaaneqassallutik.  
  Imm. 3.  Siulersuisut ataatsimut sinniisuuffigisassaanni ilaasortat ataasiakkaat tamarmik suliassaqarfimmi arlariinniluunniit piginnaaneqartuussapput. 
  Imm. 4.  Siulersuisuni ilaasortat aalajangersimasumik Kalaallit Nunaanni najugaqassapput.

  § 5.  Kultureqarnermut Naalakkersuisoq siulersuisuni ilaasortanik ukiunut sisamanut atasussanik toqqaassaaq. Kattuffinnit aamma ingerlatsivinnit assigiinngitsunit inassuteqaateqartoqareerneratigut kingorna toqqaasoqassaaq, taakku tamarmik siulersuisuni ilaasortamik ataatsimik inassuteqaateqassapput, kisiannili Eqqumiitsuliortut kattuffiat EPI siulersuisuni ilaasortanik pingasunik inassuteqaateqassalluni:
1)  Sulisitsisut.
2)  Eqqumiitsuliortut kattuffiat EPI.
3)  Katuaq.
  Imm. 2.  Siulersuisuni ilaasortat ataasiarlutik toqqaqqinneqarsinnaapput.
  Imm. 3.  Siulersuisut inissitsiternerminni siulittaasoq siulittaasullu tullia toqqassavaat.

  § 6.  Siulersuisuni ilaasortap ataatsip toqqagaaffiup iluani tunuarneratigut, kattuffiup imaluunniit ingerlatsiviup inassuteqarsinnaatitaasup ilaasortaajunnaartumik toqqaasimasup inassuteqareerneratigut, piffissap sinnerani Kultureqarnermut Naalakkersuisoq siulersuisuni ilaasortaasussamik nutaamik toqqaassaaq. 
Imm. 2.  Toqqagaaffiup iluani siulersuisuni ilaasortaq siulersuisutut akisussaaffimminik annertuumik sumiginnaasoq, allatulluunniit siulersuisutut sulinissaminut naapertuutinngitsumik iliuuseqartoq Kultureqarnermut Naalakkersuisup soraarsissinnaavaa.

  § 7.  Siulersuisut aningaasaateqarfiup sulineranut pingaarnertigut najoqqutassanik aalajangersaassapput. Aningaasaateqarfiup atuunnermini ammasuunissaa paasiuminartuunissaalu siulersuisut qulakkiissavaat.
  Imm. 2.  Aningaasaateqarfiup sulinera pillugu Kultureqarnermut Naalakkersuisoqarfimmut ukiumoortumik siulersuisut nalunaarusiortassapput. Nalunaarut tamanut saqqummiunneqartassaaq.
  Imm. 3.  Ukiumoortumik nalunaarummi siulersuisut ukiumut tapiissutit nassuiassavaat, imatut agguaanneqassalluni: 
1)  eqqumiitsulioriaatsit ataasiakkaat, 
2)  tapeeriaatsit ataasiakkaat,
3)  pissarsisup najugaa, kommunikkaartumik naatsorsorlugu,
4)  pissarsisup suiaassusaa,
5)  pissarsisup ukiui, ukiut akuttussusaat naleqquttut naatsorsorlugit, 
6)  nutaat siusinnerusukkullu aningaasaateqarfimmit tapiissutinik pissarsisut, aamma
7)  nutaat siusinnerusukkullu aningaasaateqarfimmit tapiissutinik itigartinneqarsimasut.
  Imm. 4.  Tamatuma saniatigut aningaasaateqarfimmi aningaasaqarnermut sulisoqarnermullu pissutsit nalunaarummi nassuiarneqassapput.

  § 8.  Siulersuisut namminneq suleriaasissartik Kultureqarnermut Naalakkersuisoqarfimmit akuerineqartussaq aalajangersassavaat.
  Imm. 2.  Ataatsimiittarnerit, taasisarnermut malittarisassat, suliamut attuumassuteqarneq pillugu, nipangiussisussaassuseq, ataatsimiinnerit amerlassusaat imaqarniliortarnerlu malittarisassat pillugit ilaatigut suleriaatsimi allassimassapput.

  § 9.  Kalaallit Nunaanni Eqqumiitsuliornermut Aningaasaateqarfiup siulersuisui sulinerminnut ukiumoortumik akissarsisarput. Siulittaasup akissarsiai 50.000 kr.-upput. Ilaasortat sinnerisa akissarsiaat 25.000 kr.-upput. Akissarsiat qaammatikkaartumik kingumoortumik tunniunneqartassapput, ukiumut aqqaneq-marloriarluni tunniunneqartassallutik. 
  Imm. 2.  Siulersuisuni ilaasortaq qaammatip ingerlanerani ilaasortanngussappat siulersuisuni ilaasortap ullut atuuffii aallaavigalugit ullormut akissarsiaqassaaq, akissarsiat § 1-imi aningaasat amerlassusiisa taaneqartut 1/365-erutaannik. Taamatut assinganik atuuppoq siulersuisuni ilaasortaq qaammatip ingerlanerani ilaasortaajunnaarpat. 
   Imm. 3.  Akissarsianut aningaasartuutit aningaasaateqarfiup akilissavai.

Aningaasartuutinik taartisiaqarneq

  § 10. Aningaasartuutit, taakkununnga ilanngullugit angalanernut, nerisaqarnermut najugaqarnermullu aningaasartuutit, Kalaallit Nunaanni Eqqumiitsuliornermut Aningaasaateqarfiup sulinerani akilerneqartut Kalaallit Nunaanni Namminersorlutik Oqartussani tjenestemandinut malittarisassat qaqugukkulluunniit atuuttut naapertorlugit siulersuisuni ilaasortat aningaasartuutaanut taarsiissutaasassapput. Taakku aningaasaateqarfimmit akilerneqassapput.

Allattoqarfik

  § 11.  Aningasaateqarfiup sulineranut allattoqarfeqarnikkut ikiuuttoqarnissaa sulisunik imaluunniit allatut iliorluni tassunga atorfinitsitsinikkut siulersuisut qulakkiissavaat. 
  Imm. 2.  Atorfinitsitaanerni atugassarititaasut pissutsillu allat, atorfinitsinneqarnermi soraarsitsinernilu pissutsit eqqarsaatigalugit Kalaallit Nunaanni Eqqumiitsuliornermut Aningaasaateqarfiata pisussaaffigaa aalajangersakkat Namminersorlutik Oqartussani atorfeqartunut qaqugukkulluunniit atuuttut malissallugit.

Kapitali 3

Suliamik paasisimasallit

  § 12.  Siulersuisut eqqumiitsulioriaatsinut tamanut suliamut paasisimasalimmik sinniisussamillu ataatsimik ukiuni marlunni atuuffeqartussanik toqqaassapput, ukunani:   
1) Illussanik titartaaneq, 
2) assilissanik eqqumiitsuliorneq, 
3) filmiliorneq, 
4) assassukkanik eqqumiitsuliat ilusilersuinerlu, 
5) atuakkiorneq, 
6) nipilersorneq, aamma 
7) isiginnaartitsineq.
  Imm. 2.  Tamatumunnga suliamik paasisimasalik sinniisussaalu kalaallit eqqumiitsuliaannut aammalu suliamik paasisimasallip eqqumiitsulioriaatsimut aalajangersimasumut sammisaanut ilisimasaqangaatsiassapput.
  Imm. 3.  Suliamik paasisimasallit ataasiarlutik toqqaqqinneqarsinnaapput.

  § 13.  Suliamik paasisimasallit eqqumiitsulioriaatsimi ilisimasaminni qinnuteqaatinik tiguneqartunik nalilersuissapput aammalu tapiissutinik agguaassisarneq, matumani tapiissutit angissusiat, ilusiat piffissarlu tapiissuteqarfiusoq pillugit Kalaallit Nunaanni Eqqumiitsuliornermut Aningaasaateqarfimmi siulersuisunut inassuteqaasiussallutik. 
  Imm. 2.  Sulianik paasisimasalinnit inassuteqaatit tunngavigalugit siulersuisut tapiissutinik tunniussissapput. Suliamik paasisimasallit inassuteqaataannut siulersuisut pisussaaffeqanngillat.

  § 14.  Suliamik paasisimasallit akornanni ataqatigiissaarinissaq siulersuisut qulakkiissavaat.

  § 15.  Piffissami atuuffiusumi suliamik paasisimasalik tunuarpat, eqqumiitsulioriaatsimut pineqartumut sinniisussaq suliamik paasisimasalittut ilaasortanngussaaq. Matuma kingorna siulersuisut sinniisussamik nutaamik toqqaassapput.
  Imm. 2.  Piffissami atuuffiusumi sinniisoq tunuarpat siulersuisut sinniisumik nutaamik toqqaassapput.
  Imm. 3.  Suliamik paasisimasalik pineqartoq ilatsiinnarpallaarpat imaluunniit suliap ingerlannissaanut allatut qanoq iliuuseqarnermigut imminut naleqqukkunnaarsimappat tamatuminnga Siulersuisut soraarsitsisinnaapput.

  § 16.  Suliamik paasisimasalik attuumassuteqarnermi imaluunniit sivisuumik napparsimanermi kinguneranik qinnuteqaammik suliarinnissinnaanngippat, eqqumiitsulioriaatsimi pineqartumi qinnuteqaat sinniisup suliarissavaa.

  § 17. Suliamik paasisimasallit sinniisullu allit Nunaanni Eqqumiitsuliornermut Aningaasaateqarfimmit tapiiffigineqarnissamik qinnuteqaammik ataatsimik suliaqarnerit tamaasa akissarsisassapput. Akissarsiassat annertussusissaat Eqqumiitsuliornermut Aningaasaateqarfimmi siulersuisunit aalajangerneqassapput. Akissarsianut aningaasartuutit Eqqumiitsuliornermut Aningaasaateqarfimmit akilerneqassapput.

Kapitali 4

Aningaasaliineq, missingersuut, naatsorsuutit kukkunersiuinerlu

  § 18.  Eqqumiitsuliornermut Aningaasaateqarfiup sulinera Nunatta Karsiata ukiut tamaasa tapiissuteqarneratigut aningaasalersorneqarpoq.
  Imm. 2.  Aningaasaateqarfik kingornussanit tunissutisianilluunniit isertitanik pissarsiaqarsinnaavoq.
  Imm.  3. Aningaasaateqarfik avataaniit tapiissutinik qinnuteqarsinnaavoq.

  § 19.  Kalaallit Nunaanni Eqqumiitsuliornermut Aningaasaateqarfimmi siulittaasut ukiumut aningaasanut inatsiseqarfiusumut tullermut Naalakkersuisunit piffissalerneqartumik missingersuutinut siunnersuummik ukiut tamaasa Naalakkersuisoqarfimmut tunniussaqartassapput. Siunnersuut isertitassatut aningaasartuutissatullu naatsorsuutigineqartut missingerneqarnerannik imaqassaaq. Tamatuma peqatigisaanik ukiumi aningaasanut inatsisiliorfimmi taaneqartumi Nunatta karsiata tapiissutissaasa qanoq amerlatiginissaannik siunnersuut siulersuisut tunniuttassavaat.

  § 20.  Kalaallit Nunaanni Eqqumiitsuliornermut Aningaasaateqarfiup ukioq naatsorsuusiorfia tassaavoq ukioq aningaasanut inatsisiliorfik. Kommunit Namminersorlutillu Oqartussat missingersuutaat naatsorsuutaallu pillugit Inatsisartut Inatsisaat naapertorlugu Kalaallit Nunaanni Namminersorlutik Oqartussat missingersuutit, naatsorsuuserineq naatsorsuutinillu saqqummiineq pillugit malittarisassai qaqugukkulluunniit atuuttut Aningaasaateqarfiup malissavai.

  § 21.  Ukiumoortumik naatsorsuutit Kalaallit Nunaanni Namminersorlutik Oqartussat kukkunersiuisoqarfiannit kukkunersiorneqassapput. 
  Imm. 2.  Piffissaliussaq Kultureqarnermut Naalakkersuisoqarfimmit aalajangerneqartoq tikitsinnagu, ukiumoortumik naatsorsuutit kukkunersiorneqarsimasut siulersuisunit akuerineqarsimasut kukkunersiuisut oqaaseqaataannik ilaqartillugit, siulersuisunit Kultureqarnermut Naalakkersuisoqarfimmut akuersissutigisassatut saqqummiunneqartassapput. Kultureqarnermut Naalakkersuisoq ukiumoortumik naatsorsuutit tamatuma kingorna Inatsisartunut ilisimatitsissutitut ingerlateqqissavaat.
  Imm. 3.  Kultureqarnermut Naalakkersuisoqarfimmit naatsorsuutit akuerineqarsimasut siulersuisunit tamanut saqqummiunneqassapput.

Kapitali 5

Atuutilersitsinermut ikaarsaariartitsinermullu aalajangersakkat

  § 22.  Nalunaarut 1. september 2021 atuutilissaaq aammalu 1. januar 2022-miit qinnuteqaatinut atuutissalluni. 
  Imm. 2.  Tapiiffigineqarnissamut qinnuteqaatit 1. januar 2022 sioqqullugu tiguneqartut Kultureqarnermut Naalakkersuisoqarfimmit naammassillugit suliarineqarumaarput.
  Imm. 3.  Siulersuisut siullermeertumik piffissami 1. september 2021-miit 31. august 2025-p tungaanut toqqarneqassapput.
  Imm. 4.  Tamatumunnga tunngatillugu suliamik paasisimasallit sinniisussallu 1. januar 2022-miit atuutilersumik toqqarneqassapput.

Namminersorlutik Oqartussat, ulloq 13. august 2021

Peter Olsen
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq

/ Karsten Peter Jensen