Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi §§ 6, 6 a aamma 12 a, 12 b kiisalu § 29, imm. 2 aamma 3 naapertorlugit uku aalajangersarneqarput:

Atuuffia

  § 1.  Nalunaarut Kalaallit Nunaat tamakkerlugu atuuppoq.
  Imm. 2.  Nalunaarut Kalaallit Nunaanni Peqqinnissaqarfimmut imaluunniit nakorsiartarfinnut kiisalu nakorsiartarfinnut namminersortunut niuertarfinnilu peqqissaannermik naalagaaffimmit akuerisaallutik ingerlatani ingerlatsisunut atorfeqartitsiffiusunullu atuutinngilaq.
  Imm. 3.  Nalunaarut katersuunnernut, politikikkut allatulluunniit isummersornissamik sunniiniarnissamik siunertalinnut atuutinngilaq.
  Imm. 4. Nalunaarut eqqartuussivinnut atuutinngilaq.
  Imm. 5.  Nalunaarut mittarfinnut, tikittarfinnut/aallartarfinnut assigisaannullu atuutinngilaq.
  Imm. 6.  Nalunaarut ulluunerani neqeroorutinut namminersortunut pisortaniillu pigineqartunut, atuarfinnut, ilinniarfeqarfinnut il.il. atuutinngilaq, nappaatit tunillaassortut akiorniarlugit iliuutsit pillugit Inatsisartut peqqussutaanni § 22 takuuk.
  Imm. 7.  Nalunaarut angerlarsimaffinni aaqqissuussanut il.il. assigisaannut atuutinngilaq. 
  Imm. 8.  Nunatsinni Nakorsaaneqarfik nalunaarummit immikkut akuersissuteqarsinnaavoq.

Illup iluani aaqqissuussani il.il. peqataasinnaasut amerlassusaannik killilersuinerit

  § 2.  Illup iluani aaqqissuussinerit, nalliuttorsiornerit, sammisaqartitsinerit assigisaalluunniit, inunnik 20-it sinnerlugit peqataasussallit inerteqqutaapput.
  Imm. 2.  Imm. 1-ip maleruarneqarnissaata qulakkeernissaa aaqqissuussisup il.il. akisussaaffigaa.

Aaqqissuussani il.il. silami ingerlanneqartussani peqataasinnaasut amerlassusaannik killilersuinerit

  § 3.  Silami aaqqissuussat, nalliuttorsiornerit, sammisaqartitsinerit assigisaalluunniit, inunnik 20-it sinnerlugit peqataasussallit inerteqqutaapput.
  Imm. 2.  Imm. 1-ip maleruarneqarnissaata qulakkeernissaa aaqqissuussisup il.il. akisussaaffigaa.

Ininut kikkunnilluunniit iserfigineqarsinnaasunut piumasaqaatit

  § 4.  Inuussutissarsiummik ingerlatallit aamma suliffeqarfiit pisortanit pigineqartut ininik kikkunnit tamanit iserfigineqarsinnaasunik pigisallit piumasaqaatit tullinnguuttut maleruassavaat:
1)  Inuit inimi sulisussat saniatigut, inuit amerlanerpaamik 20-it isersimaqqusaapput.  Piumasaqaat ulluinnarni niuertarfinnut atuutinngilaq.
2)  Inuit ininut qatserisartoqarfinni oqartussaasunit akuerineqarsimasunut isersinnaatitaasut amerlanerpaaffissaasa affaannaat isersimaqqusaapput, taamaattorli nr. 1 takuuk.
3)  Inini qatserisartoqarfinni oqartussaasunit akuersissutitaqartinneqanngitsuni, natermi 4 m2-iusumi amerlanerpaamik inuk ataasiinnaaqqusaavoq. Nateq 4 m2-imik mikineruppat oqaaseqatigiit siulliit apeqqutaatinnagit inuup ataatsip isersimanissaa akuerineqarpoq. Nateq qanoq pequteqartiginera apeqqutaatinnagu iikkamiit iikkamut naatsorsorneqassaaq.
Imm. 2.  Imm. 1-ip maleruarneqarnissaata qulakkeernissaa inimik pigisallip akisussaaffigaa.

Tamanut angallassissutini amerlassutsinik killilersuinerit

  § 5.  Tamanut angallassissutit issiaffiusinnaasut sinnerlugit ilaasoqaqqusaanngillat.
  Imm. 2.  Imm. 1-ip maleruarneqarnissaata qulakkeernissaa angallassissummik piginnittup akisussaaffigaa.

Tamanut angallassissutini ilaanermut piumasaqaatit

  § 6.  Inuit inunnut angallassissutini imm. 3-mi taaneqartuni ilaaniarunik Covid-19-imut akiuussutissamik kapitereersimassapput, taamaattorli imm. 4 aamma 5 takukkit.
  Imm. 2.  Akiuussutissamik kapitissimasut tassaapput inuit Covid-19-imut tamakkiisumik akiuussuserneqarsimasut imaluunniit Covid-19-imut siullermeerlutik kapitissimasut.
  Imm. 3.  Tamanut angallassissutit tamarmik imm. 1-imi ilaapput, tassunga ilanngullugit assersuutigalugu:
1)  Timmisartut Kalaallit Nunaanni aallartut imaluunniit tikittut.
2)  Bussit.     
3)  Umiarsuit inoqutigiinnit arlalinnit ilaasoqartartut.
  Imm. 4.  Inuit tullinnguuttut imm. 1-imi piumasaqaammit ilaatinneqanngillat:
1)  Inuit najukkaminnut tikinniarlutik umiarsuarmik timmisartumilluunniit angalasut.
2)  Inuit Covid-19-imut akiuussuserneqarnissaminnut peqqissaavimmut qaninnerpaamut umiarsuarmik timmisartumilluunniit angalasut.
3)  Inuit inuiaqatigiinni suliassaqartitaasut tamanullu angallassissutinik angalasariaqalersut.
4)  Inuit Covid-19-imut akiuussutissamik kapitinnissamut Nunatta Nakorsaaneqarfianit nalinginnaasumik innersuunneqanngitsut.
5)  Inuit 17-inik ukiullit ukiukinnerusulluunniit.
6)  Sulisut suliaminnik suliaqarniarlutik tamanut angallassissummiittut.
  Imm. 5.  Nunatta Nakorsaaneqarfia imm. 1-imit immikkut akuersisinnaavoq, tamanna pisariaqarpat peqqissutsikkullu illersorneqarsinnaasutut nalilerneqarpat.

Qanermut imaluunnit kiinnamut assiaquteqarnissamut piumasaqaat

  § 7.  Inuit aqqaneq-marlunnik sinnerlugillu ukiullit kiinnamut assiaquteqassapput:
1)  inini kikkunnit tamanit iserfigineqarsinnaasuni isersimagunik, taamaattorli imm. 2-4 takukkit.
2)  tamanut angallassissutini taxanilu ilaagunik, taamaattorli imm. 2-4 takukkit.
Imm. 2.  Qanermut imaluunniit kiinnamut assiaquteqarnissamut piumasaqaat ilisimassutsimik annikillisimasunut, timikkut tarnikkulluunniit sanngiitsunut, allamilluunniit peqquteqarlutik qanermut kiinnamulluunniit assiaquteqarsinnaanngitsunut atuutinngilaq.
Imm. 3.  Imm. 1-imi allassimasut apeqqutaatinnagit qanermut kiinnamulluunniit assiaqutit tamakkiisumik ilaannakortumilluunniit peeqqaneqarallarsinnaapput, tamanna peqqutissaqarluarpat, tassunga ilanngullugu ima pisoqarnerani:
1)  Piffissami sivikitsumi nerinermi imernermilu.
2)  Nakorsaatitornermi.
3)  Qarngit aalaneratigut atuaasartumik oqaloqateqarnermi.
4)  Qanermut kiinnamulluunniit assiaqutit anersaartorniarnermut ajoqutaappata ipianngulersitsippataluunniit.
5)  Politiit kinaassutsimik uppernarsaaneranni.
  Imm. 4.  Niuernermik kiffartuussinermillu ingerlatsiviit qanermut kiinnamulluunniit assiaqutinik atuinatik sulisut sullitallu akornanni plastikkiusumik igalaaminermiusumilluunniit assiaqusersinnaapput.

  § 8.  Qanermut assiaqutit tassaapput qanermut qinngamullu assiaqutit ataasiartakkat imaluunniit annoraaminermik sanaat allunaasamik, tasisartumik assigisaanilluunniit siutinut imaluunniit niaqqup tunuatungaanut sukarutillit kiinnamullu attuumasut.
  Imm. 2.  Kiinnamut assiaqutitut tassaapput isinut, qinngamut qanermullu imaluunniit qinngamut qanermullu assiaqutit plastikimik sanaat kiinnamut attuumanngitsut.

Pineqaatissiissuteqartarneq

  § 9.  §§ 2-6-inik unioqqutitsisoq pinerluttulerinermik inatsit malillugu pineqaatissinneqarsinnaavoq.
  Imm. 2.  Ingerlatseqatigiiffiit il.il. (inatsisilerinermi inuttut immikkoortutut isigineqartut) pinerluttulerinermik inatsimmi kapitali 5-imi malittarisassat malillugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.

Atuutilersitsineq aamma atuunneranut piffissaliussaq

  § 10.  Nalunaarut 20. juli 2021-mi atuutilissaaq.
  Imm. 2.  Nalunaarut malillugu killilersuinerit, inerteqqutit, peqqussutit il.il. 30. juli 2021 tikillugu atuutissapput.

Namminersorlutik Oqartussat, ulloq 19. juli 2021

Kirsten Fencker
Peqqinnissamut Naalakkersuisoq

/ Martin Pedersen