Procenti aaqqiissutissaq aamma maannakkorpiaq aningaasarsiat pillugit Inatsisartut inatsisaat nr. 9, 1. juni 2017-imeersoq, Inatsisartut inatsisaat nr. 3, 24. maj 2019-imeersoq aamma Inatsisartut inatsisaat nr. 33, 28. november 2019-imeersoq malillugit allannguutai ilanngullugit, matumuuna nalunaarutigineqarpoq.

  § 1.  Procenti aaqqiissutissaq nuussinikkut isertitat, akileraarutit, akitsuutit il.il. ukiumoortumik aaqqinneqarnissaannut tunngaviusussaq ukiunut aningaasanut inatsiseqarfiusunut tamanut, inatsimmi matumani aalajangersakkat naapertorlugit angissusilerneqartassaaq. 
  Imm. 2.  Procenti aaqqiissutissaq atorlugu aaqqinneqartussat tassaapput kisitsisit manna tikillugu atuuttuusut.

Procenti aaqqiissutissaq

  § 2.  Ukiumi aningaasanut inatsiseqarfiusumi procenti aaqqiissutissaq tassaavoq pisortani atorfeqartut ukiumi akissarsiaqarfiusumi ukiumut akissarsiaasa, ukiumut akissarsiaqarfiusumut siulianut sanilliullugu procentinngorlugu allannguutaat. Procenti aaqqiissutissaq uniffiup talerpiani kisitsimmik ataatsimik kisitsiseqartillugu naatsorsorneqartassaaq.
  Imm. 2.  Ukioq akissarsiaqarfiusoq tassaavoq, ukioq aningaasanut inatsiseqarfiusoq ukiunik marlunnik sioqqullugu ukioq.
  Imm. 3.  Ukiumut akissarsiat pisortani atorfeqartut ukiumut akissarsiaasa tamarmiusut, soraarnerussutisiaqarnissamut aaqqissuussinernut il.il. akileeqataassutit sulisitsisunit isumagineqartut ilanngunnagit, ataatsimoortillugit sanilliunnerisigut naatsorsorneqartassapput.

  § 3.  Procentip aaqqiissutissap angissusissaa Naalakkersuisut ukiut tamaasa kingusinnerpaamik augustip qaammataani nalunaarutigisassavaat.

  § 4.  Procentip aaqqiissutissap il.il. naatsorsorneqarnissaat pillugu maleruagassat sukumiinerusut, matumani aamma maleruagassat ukiumut akissarsiat ineriartornerannik § 2 naapertorlugu naatsorsuinissami kisitsisitigut tunngavissat allannguuteqartarnissaannik aamma piffissap suliffiusup il.il. allannguuteqartarnissaannik naatsorsuutiginnittut Naalakkersuisunit aalajangersarneqarsinnaapput.

Maannakkorpiaq aningaasarsiat

  § 5.  Maannakkorpiaq aningaasarsiat tassaapput inuup qaammatini 12-ini aningaasarsiai akileraaruteqaataasussat aamma soraarnerussutisiai, Aningaasarsianit akileraarutit pillugit Inatsisartut inatsisaanni § 39 a-mi pineqartut.
Imm. 2.  Maannakkorpiaq aningaasarsianik naatsorsuinermi ilanngaatigineqartassaaq inuup ukiumi aningaasarsiorfiusumi, tapiissutinik tunniussinissaq pillugu aalajangiiffiusumi, akiliutissanik il.il. angissusiliiffiusumi ilanngaat aalajangersimasoq, Aningaasarsianit akileraarutit pillugit Inatsisartut inatsisaanni § 21, imm. 2-miittoq. Inoqutigiit maannakkorpiaq aningaasarsiaat tunngavigalugit aalajangiisoqassappat, inuit 18-it inorlugit ukiullit ilanngaataat aalajangersimasoq ilanngaatigineqartassanngilaq, soorluttaaq inoqutigiinnut ataatsinut inummut ilanngaatit annerpaamik marluk ilanngaatigineqarsinnaasut.
  Imm. 3.  Naatsorsuinermi makku isiginiarneqartassanngillat:
1)  soraarnerussutisianik katersanik aaqqissuussinernut akilersuutit akileraaruserneqartussaatitaasut, akissarsianik akileraarutit pillugit Inatsisartut inatsisisaanni § 39 a-mi taaneqartut,
2)  pisortanit ikiorsiissutit pillugit Inatsisartut peqqussutaat naapertorlugu ikiorsiissutit,
3)  ajunngitsorsiat, Politiit Isertortumik Paasiniaasartuisa immikkut kukkunersiuisarnerannut ilaatinneqartunit aningaasat tunniunneqartut, aamma
4)  ajunngitsorsiat, meeqqat tapersersorneqarnissaannut Inatsisartut inatsisaanni maleruagassat naapertorlugit angajoqqaarsianut, oqilisaasartunut ilaqutariinnulluunniit inissiigasuartarfinnut tunniunneqartut, matumani tigusisup ukiumi isertitaqarfiusumi pineqartumi nalinginnaasumik ilanngaatip saniatigut suliani taaneqartunut tunngatillugu akileraarusersugassatut isertitaminik naatsorsuinermini ilanngaatigisinnaasaasa annerpaaffissaat qaanginngippagu, takuuk aningaasarsianit akileraarutit pillugit Inatsisartut inatsisaanni § 21, imm. 2.
  Imm. 4.  Naalakkersuisut maannakkorpiaq aningaasarsiat naatsorsornissaat pillugu maleruagassanik erseqqinnerusunik aalajangersaassapput. Aamma soraarnerussutisiat § 39 a-mi pineqartut aamma akissarsiat, Aningaasarsianit akileraarutit pillugit Inatsisartut inatsisaanni § 70-imi § 71-imilu pineqartut akileraarutit ilanngaatigineqartinnagit nalinginut qanoq naatsorsorneqartarnissaat aammalu aningaasarsiat il.il. ilaasa ilanngunneqartannginnissaat Naalakkersuisut aalajangersarsinnaavaat.
  Imm. 5.  Inuk qaammatini 12-ini aningaasarsianik akileraaruteqaataasussanik akissarsiaqarsimanngippat imaluunniit Aningaasarsianit akileraarutit pillugit Inatsisartut inatsisaanni § 39 a-mi pineqartunik soraarnerussutisiaqarsimanngippat, Naalakkersuisut maannakkorpiaq aningaasarsiat naatsorsorneqarnissaat pillugu maleruagassanik erseqqinnerusunik aalajangersaassapput.

 § 6.  Maannakkorpiaq aningaasarsiat, aningaasarsianut aalajangiinermut tunngavigineqartunut naleqqiullugu, ukiup aningaasarsiaqarfiusup sinnerani 5 procentimik tassanngaaniilluunniit annertunerusumik allannguuteqarnissaat ilimagineqarpat, aningaasarsiassatut naatsorsuutigisat tunngavigalugit naatsorsorneqassapput.

Atortuulerfia

§ 7.  Inatsit 1. juli 2018-imi atortuulissaaq, atuutissallunilu ukiumut aningaasanut inatsiseqarfiusumut 2019-imut procentip aaqqiissutissap angissusilerneqarnera aallarnerfigalugu. 
  Imm. 2.  Inatsisip atortuulersinneqarneratigut Aningaasarsianit akileraarutit pillugit Inatsisartut inatsisaata allanngortinneqarneranik Inatsisartut inatsisaat nr. 29, 28. november 2016-imeersumi § 2, imm. 3 atorunnaarsinneqarpoq.

Inatsisartut inatsisaat nr. 3, 24. maj 2019-imeersoq (§ 6-imut oqaatsitigut imarisaatigullu erseqqissaat)[i] atuutilernissaanut aalajangersakkamik matuminnga imaqarpoq:

§ 2

Inatsisartut inatsisaat ulloq 1. juni 2019 atuutilissaaq.

Inatsisartut inatsisaat nr. 33, 28. november 2019-imeersoq (Maannakkorpiaq aningaasarsiat naatsorsorneqartarneranni tunngavigineqartup allanngortinneqarnera)[ii] atuutilernissaanut aalajangersakkamik matuminnga imaqarpoq:

§ 2

Inatsisartut inatsisaat ulloq 1. januar 2020-mi atuutilerpoq, taamaattorli takuuk imm. 2.

  Imm. 2.  § 5, imm. 3, nr. 3-tut § 1, nr. 1-imi aalajangersarneqartutut siunnersuut nalunaarutikkut atuutsinneqalissaaq.

Aningaasaqarnermut Naalakkersuisoqarfik, ulloq 14. februar 2020

Nikolai Sten Christensen

/

Morten W. Selvejer