Kontomut akiliutinullu innersuussineq

  § 1.  Inuit 18-inik imaluunniit sinnerlugit ukiullit, Qitiusumik Inuit Allattorsimaffiat pillugu inatsisip atuutilernissaa pillugu peqqussut imaluunniit Qitiusumik Inuit Allattorsimaffiat pillugu Inatsisit malillugit inuup normuanik tunineqarsimasut, Kalaallillu Nunaannit aallarsimasutut nalunaarsorneqarsimanngitsut, aningaaserivimmi kontumik innersuussissapput (NemKonto), pisortani oqartussaasut iliuutsimik pisussaaffeerutsitsisumik aningaasanik akiliinermut atorsinnaasaannik. Tamanna aamma Namminersorlutik Oqartussanit, naalagaaffiup avataanut aallartitanut, kiisalu inunnut 18-it inorlugit ukiulinnut Qitiusumik Inuit Allattorsimaffiat pillugu inatsisip atuutilernissaa pillugu peqqussut imaluunniit Qitiusumik Inuit Allattorsimaffiat pillugu Inatsisit malillugit inuup normuanik tunineqarsimasunut, pisortani oqartussaasunit akiliinernik tigusisartunut atuuppoq.
  Imm. 2. Inatsisitigut pisinnaatitaasut, Qitiusumik Suliffeqarfinnik Nalunaarsuiffimmi nalunaarsuisarneq pillugu Inatsisartut inatsisaat imaluunniit Qitiusumik Suliffeqarfinnik Nalunaarsuiffiit pillugit inatsit naapertorlugu CVR-normumik tunineqarsimasut, aningaaserivimmi kontumik (NemKonto) innersuussissapput, pisortani oqartussaasut iliuutsimik pisussaaffeerutsitsisumik aningaasanik akiliinermut atorsinnaasaannik. Tamanna aamma inummut nammineq sulisitsisutut imaluunniit namminersorluni inuussutissarsiummik ingerlatsisuusutut qitiusumik suliffeqarfinnik nalunaarsuiffimmi normumik (CVR-normu) tunineqartumut, kiisalu suliffeqarfinnut akileraartarnermut ingerlatsivimmi inuussutissarsiummik ingerlatsisutut nalunaarsorsimasunut atuuppoq.
  Imm. 3. Inatsisitigut pisinnaatitaasut, Qitiusumik Suliffeqarfinnik Nalunaarsuiffimmi nalunaarsuisarneq pillugu Inatsisartut inatsisaat imaluunniit Qitiusumik Suliffeqarfinnik Nalunaarsuiffiit pillugit inatsit naapertorlugu CVR-normumik tunineqarsimanngitsut, pisortani oqartussaasunit akiliinernik tigusisinnaaniarunik:
1) nammineq nalunaarsuisussaaneq pillugu malittarisassat naapertorlugit Qitiusumik Suliffeqarfinnik Nalunaarsuiffimmi tiguneqarsimassapput, aamma
2) Imm. 2-mi malittarisassat naapertorlugit NemKontomik innersuussisimassapput.
  Imm. 4. Imm. 3-mi aalajangersagaq inatsisitigut pisinnaatitaasunut, Qitiusumik Suliffeqarfinnik Nalunaarsuiffimmi nalunaarsuisarneq pillugu Inatsisartut inatsisaanni nammineq nalunaarsuinissaq pillugu piumasaqaatinik, Qitiusumik Suliffeqarfinnik Nalunaarsuiffimmi nalunaarsuisarneq pillugu Inatsisartut inatsisaannik imaluunniit inatsisinut taakkununnga atatillugu aalajangersakkanik aalajangersarneqartunik naammassinninngitsunut atuutinngilaq.
  Imm. 5. NemKontomut akiliineq pissanngilaq, inuk imaluunniit inatsisitigut pisinnaatitaasoq kontumik akiliiffissamik allamik innersuussisimappat.
  Imm. 6. Imm. 1 imaluunniit 2 naapertorlugit kontumik innersuussineq pissaaq kingusinnerpaamik pisortani oqartussaasut akiliineranut siullermut atatillugu.
  Imm. 7. Naalakkersuisut malittarisassanik aalajangersaasinnaapput, Qitiusumik Inuit Allattorsimaffiannut imaluunniit Qitiusumik Suliffeqarfinnik Nalunaarsuiffimmut nalunaarsuinermut imaluunniit nalunaarsuinermik allanngortitsinermut atatillugu, NemKonto innersuussutigisaq pillugu nalunaaruteqartoqartassasoq.
  Imm. 8. Naalakkersuisut malittarisassanik aalajangersaasinnaapput, imm. 1-3-mi taaneqartunit nalunaarsuinerit allaanerusut innersuussinissamut pisussaaffeqarnermik imaqassasut. Naalakkersuisut ilanngullugu aalajangersinnaavaat, imm. 1-3-mi inuit aamma inatsisitigut pisinnaatitaasut taaneqartut saniatigut allat innersuussinissamut pisussaaffeqarnermut ilaassasut.

  § 2. § 1 naapertorlugu NemKontomik innersuussineq, aaqqissuussinermik akisussaasumut § 6 naapertorlugu Naalakkersuisut toqqagaannut pissaaq.
  Imm. 2. Inuit aamma inatsisitigut pisinnaatitaasut § 1-imut ilaasut, NemKontomik innersuussereersut, qaqugukkulluunniit nutaamik NemKontomik innersuussinissamut pisussaapput. Allannguutit paasissutissiissutigineqartut piffissaq nalunaarutiginniffik kingusinnerpaamik aningaaseriviup ammaneri ullut tallimassaata qaangiunneranit inatsisitigut kinguneqassapput.
 Imm. 3. Toqusoqarnerani, inatsisitigut pisinnaatitaasut taamaatinnerini, imaluunniit inuup sulisitsisutut imaluunniit namminersorluni inuussutissarsiuummik ingerlatsisutut taamaatinnerani, nalunaarsuivimmi konto § 5 naapertorlugu pilersinneqarsimasoq pillugu paasissutissaq nunguterneqassaaq.

  § 3. Nunami allami aningaaserivimmi kontumut akiliinerit pisortanit piffissaq eqqorlugu naammassineqarsimasutut isigineqassapput, nunami namminermi akiliinerit assingusut tiguneqarnerisa piffissap kingornatigulluunniit tigusisumit tiguneqarsimagaluarpataluunniit, imaappat
1) nunami namminermi kontunut akiliinerit assingusut assigalugit ulloq taanna suliarineqarsimappata, aammalu
2) nunami namminermi akiliinerit assingusut tigusisussamit piffissaq eqqorlugu tiguneqarsimappata.

  § 4. Naalakkersuisut malittarisassanik aalajangersaassapput, pisortat oqartussaasuisa iliuutsimik pisussaaffeerutsitsisumik inunnut aamma inatsisitigut pisinnaatitaasunut §1-imi ilaasunut, NemKontomik innersuussisimanngitsunut akiliinissamut pisinnaatitaaffeqarnerinik, taakkununnga ilaallutik pisortat oqartussaasuisa inunnut aamma inatsisitigut pisinnaatitaasut Naalakkersuisut aalajangersagaannik unioqqutitsisunut akiligassanik kinguartitsisinnaalluni.
 Imm. 2.  Imm. 1 naapertorlugu akiliinerit kinguartinneqartut, ima tulleriillutik Nunatta Karsianut kommunillu karsianut ingerlateqqinneqassapput, akiliiffissap ukiut tallimat siornatigut ullulerneqarfianit.
 Imm. 3. Naalakkersuisut malittarisassanik aalajangersaasinnaapput, NemKontonik amerlanerusunik innersuussisinnaanermut.

Nalunaarsuivik

  § 5. Naalakkersuisut nalunaarsuineq pillugu malittarisassanik aalajangersaassapput, paasissutissanik kontut § 1 aamma § 2 naapertorlugit imaqartunik.
  Imm. 2. Imm. 1 naapertorlugu nalunaarsuiffimmik pilersitsinermut atatillugu Naalakkersuisut, imaluunniit Naalakkersuisunit tassunga pisinnaatitaaneqartut, aningaaserivimmi kontut inunnik aamma inatsisitigut pisinnaatitaasunik pigineqartut pillugit paasissutissanik aallernissamut pisinnaatitaapput. Paasissutissat pisortat oqartussaasuinit allanit aamma akissarsialerivinnit aaneqarsinnaapput.

Aaqqissuusinermik akisussaasoq

  § 6. Naalakkersuisut aaqqissuussinermik akisussaasumik toqqaassapput, kontut pillugit paasissutissanik allaffissornermik suliaqartussamik. Aaqqissuussinermik akisussaasutut toqqarneqarsinnaavoq pisortani oqartussaasoqarfik imaluunniit suliffeqarfik namminersortoq, imaluunniit assigisaat, Danmarkimi, Savalimmiuni imaluunniit Kalaallit Nunaanni najugaqavissoq.
  Imm. 2.  Naalakkersuisut malittarisassanik sukumiinerusunik aaqqissuussinermik akisussaasup suliassai pillugit aalajangersaassapput, matuma ataani aaqqissuussaanermik akisussaasup suliassai aamma naammagittaalliorsinnaaneq nakkutilliinerlu pillugit.

Piginnaatitsineq

  § 7. Naalakkersuisut pisinnaatitaapput qallunaat nunaanni aamma savalimmiuni pisortaqarfiit isumaqatigiissusiorfigisinnaallugit, aaqqissuussat il. il. pisortaqarfinnit ilaatigut sulianik isumaginninnermi atorneqartut atorsinnaanerat §§ 5-6-imi taaneqartut pillugit.

Suliffeqarfiit imminnut pigisut

  § 8. §§ 1-6-imi suliffeqarfiit imminut pigisut il. il., ingerlatsinermi missingersuutaat aningaasaliissutinut inatsimmi akuerineqarsimasut ilaapput.
  Imm. 2. §§ 1-6-imi suliffeqarfiit imminut pigisut il. il., kommunip ingerlatsinissamut isumaqatigiissuteqarfigisimasai aamma ilaapput.
  Imm. 3. §§ 1-6 aamma taakku naapertorlugit malittarisassat atulersinneqartut suliffeqarfinnut, peqatigiiffinnut, aningaasaateqarfinnut il. il. atuupput:
1)  aningaasartuutit imaluunniit naatsorsuutitigut amigartoorutit pisortatigut tapiissutitigut imaluunniit ilapittuutitigut, akitsuutitigut imaluunniit inatsit naapertorlugu isertitatigut allatigut matussuserneqarpata, imaluunniit
2)  namminersorlutik oqartussanit imaluunniit suliffeqarfimmit il. il., aningaasaliissutinik, tapiissutinik, taarsigassarsianik, qularnaveeqqusiinernik imaluunniit tapiissutinik allanik tigusippat nr. 1-imut ilaasunik, tigusisumut aningaasaliissutit il. il. annertuumik pingaaruteqarpata.
  Imm. 4. Imm. 1-3-li atuutissanngillat, inatsimmi allami akiliisarnermik ingerlatsineq pillugu malittarisassanik, Inatsisartut inatsisaannut imaluunniit inatsit malillugu tassunga malittarisassanik aalajangersagaasunik kattussinnaanngitsumik peqarpat.
  Imm. 5. Kommunip pineqartup suliffeqarfiit imminnut pigisut §§ 1-6-imi imm. 2-mi taaneqartut ilaatinngissinnaavai.

Atuutilersitsineq

  § 9.  Naalakkersuisut piffissaq Inatsisartut inatsisaanni atuutilerfissaa aalajangersassavaat. Naalakkersuisut matuma ataani aalajangersarsinnaavaat, oqartussaasunut assigiinngitsunut aalajangersakkat piffissani assigiinngitsuni atuutilissasut.

Namminersorlutik Oqartussat, ulloq 19. november 2020