§ 1

Unammilleqatigiinneq pillugu Inatsisartut Inatsisaanni nr. 1, 15. maj 2014-imeersumi (unammilleqatigiinnermut inatsit) allanngortinneqartumi Unammilleqatigiinneq pillugu Inatsisartut Inatsisaata allanngortinneqarneranik Inatsisartut Inatsisaanni nr. 24, ulloq 17. november 2017-imeersumi aamma Inatsisartut inatsisaanni nr. 8. ulloq 12. juni 2019-imeersumi imaattunik allannguuteqartitsisoqassaaq:

1.  § 15, imm. 1, imatut oqaasertalerneqassaaq:
”  § 15.  Kapitalimi uani aalajangersakkat atortinneqassapput kattunnerni, imaattuni:
1)  suliffeqarfiit peqataasut ataatsimut ukiumut nunat tamalaat akornanni minnerpaamik 100 mio. kr.-inik kaaviiaartitaqarsimappata,
2)  suliffeqarfiit peqataasut minnerpaamik 2-it tamarmik immikkut nunat tamalaat akornanni ukiumut 50 mio. kr.-inik kaaviiaartitaqarsimappata, aamma 
3)  suliffeqarfiit Kalaallit Nunaanni peqataasut ilaat 1 Kalaallit Nunaanni inissisimappat.”

2.  § 32-p kingorna kapitali 7-imi ikkunneqassaaq:
”  § 32 a.  Atuisartoqarnermut Unammilleqatigiinnermullu Aqutsisoqarfik quppersakkamik pilersitsisinnaavoq, kinaassutsiminnik isertuussillutik Inatsisartut inatsisaanni unioqqutitsinerit pillugit saaffiginniffiusartussamik.
  Imm. 2.  Atuisartoqarnermut Unammilleqatigiinnermullu Aqutsisoqarfik suliffeqarfimmut naammagittaalliutigineqartumut allamulluunniit ilisimatitsisinnaanngilaq imm. 1 naapertorlugu saaffiginnissummik tigusaqarsimanini pillugu. 
  Imm. 3.  Kinaassutsiminik isertuussilluni Atuisartoqarnermut Unammilleqatigiinnermullu Aqutsisoqarfimmut saaffiginnissimasoq aqutsisoqarfimmut akuersissuteqarsinnaavoq aqutsisoqarfiup suliffeqarfik naammagittaalliuutigineqartumut imaluunniit allanut ilisimatitsissutigisinnaagaa, aqutsisoqarfik saaffiginnissummik tigusaqarsimasoq. Pineqartoq akuersisinnaavoq Aqutsisoqarfik suliffeqarfimmut naammagittaalliutigineqartumut imaluunniit allanut saaffiginnissuteqarsimasup atianik ilisimatitsissutigineqarsinnaalluni. Pineqartoq tamakkiisumik imaluunniit ilaannakuusumik akuersisinnaavoq aqutsisoqarfik suliffeqarfimmut imaluunniit allanut saaffiginnissutaasup imaa pillugu ingerlatitseqqissinnaasoq.”

3.  § 38 -ip kingorna ikkunneqassaaq:
”  § 38 a.  Unammilleqatigiinnermut ataatsimiititaliaq Inatsisartut Inatsisaannik matuminnga unioqqutitsinermut imaluunniit malittarisassanik inatsimmik matuminnga tunngavilinnik unioqqutitsinernut nalilerneqartunut akiliisitsinermit annertunerusumik pineqaatsissiissutaasussaanngitsutut atatillugu nalunaarutigisinnaavaa suliaq eqqartuussissusilersuussinertaqanngitsumik aalajangiiffigineqarsinnaasoq, unioqqutitsisimasoq unioqqutitsisimanermut pisuulluni nassuerpat, nalunaarlunilu piffissap nalunaarneqartup iluani akiliisitsissutissatut nalunaarutigineqartoq naapertorlugu akiliisinnaalluni. 
  Imm. 2.  Kalaallit Nunaanni eqqartuussisarnermi inatsimmi malittarisassat unnerluussissuteqarnermi allakkiap qanoq imaqarnissaa pillugu piumasaqaataasut, aamma unnerluutigineqartoq oqaaseqarnissamut pisussaaffeqanngitsoq pillugu aamma assigisaanik atortinneqassapput akiliisussanngortitsinerni. 
  Imm. 3.  Akiliisitsissutissaq akuersissutigineqarpat, ingerlaqqittumik malersueqqinnissaq atorunnaassaaq.”

§ 2

Inatsisartut inatsisaat atuutilerpoq ulloq 1. januar 2021.

Namminersorlutik Oqartussat, ulloq 19. november 2020