Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20 12. november 2001-imeersumi, Nappaatit tunillaassortut akiorniarlugit iliuutsit pillugit Inatsisartut inatsisaatigut nr. 1, 1. april 2020-meersutigut allanngortinneqartumi, §§ 6, 6 a, 12 a, 12 b, 12 c, 21 a aamma 21 b aamma § 29 imm. 2 malillugit aalajangersarneqarpoq:

Atuuffii

  § 1.  Nalunaarut Kalaallit Nunaannukartunut atuutissaaq.

Atuuffiata killilerneqarnera

  § 2.  Nalunaarummi matumani aalajangersakkat ilaat tamarmilluunniit inunnut inuiaqatigiinnut pingaarutilimmik sulialinnut atuutsinneqassanngitsut aalajangerneqarsinnaavoq.
  Imm. 2.  Inunnut Kalaallit Nunaanni Politiini sulisunut Kalaallit Nunaanni Politimesteri imm. 1 naapertorlugu aalajangiisassaaq.
  Imm. 3.  Inunnut Issittumi Sakkutooqarfimmi tassanilu immikkoortortaqarfinni sulisunut Issittumi Sakkutooqarfimmi pisortaasoq imm. 1 naapertorlugu aalajangiisassaaq.
  Imm. 4.  Inunnut Peqqinnissaqarfimmi sulisunut Nunatsinni Nakorsaaneqarfik imm. 1 naapertorlugu aalajangiisassaaq.
  Imm. 5.  Inunnut imm. 2-4-mi taaneqanngitsuni sulisunut, Nunatsinni Nakorsaaneqarfik imm. 1 naapertorlugu aalajangiisassaaq. Tamatuma saniatigut Nunatta Nakorsaaneqarfianut qinnuteqarnikkut inunnut inuiaqatigiinnut pingaarutilimmik sulialinnut § 7-imit immikkut akuersissuteqarsinnaavoq.
  Imm. 6.  Nunatsinni Nakorsaaneqarfiata nalunaarummi matumani aalajangersakkat ilaat tamaasaluunniit peqqinnissaqarfimmi katsorsarneqartunut atuutinneqassanngitsut aalajangersinnaavaa.
  Imm. 7.  Nunatsinni Nakorsaaneqarfiup angalasut taakku Covid-19-imik tunillatsissimanerannik ilimanarsisinnaappagit §§ -init3 aamma 7-imit immikkut akuerisinnaavai. Angalasut aallarnissaq sivikinnerpaamik ullunik qulinik sioqqutsillugu uppernarsaatissanik nakorsaanermut nassiussissapput. Immikkut akuersissuteqarnissaq akuersissutigineqarpat qinnuteqartoq aallartinnani allakkatigut uppernarsaammik nakorsaanermit tunineqassaaq.
  Imm. 8.  Meeqqat aqqaneq-marluk ataallugit ukiullit §§-ini 3-mi 7-imilu ilaatinneqanngillat. Meeqqat aqqaneq-marluk ataallugit ukiullit § 6, imm. 1-imi allattorneqarsimasut avataannut illoqarfinnut nunaqarfinnullu allanut angalasinnaapput angalaqataat taamaaliorsinnaappata.

Angallammi Kalaallit Nunaannukartussami ilaasunut piumasaqaatit

  § 3.  Angalasut Covid-19-imik nappaateqannginnerminnik uppernarsaammik takutitsisut kisimik timmisartumut Kalaallit Nunaannukartussamut ilaaqqusaapput. Oqaaseqatigiinni siullermi taaneqartup naammassinninnissaa angallatip piginnittuata akisussaaffigaa.
  Imm. 2.  Covid-19-imut misiligut napparsimmavimmi peqqissaavimmiluunniit assigisaanilu Nunat Avannarliit ilaanni suliarineqarsimassaaq Kalaallillu Nunaannut aallarnermi ullut tallimat (akunnerit 120-t) sinnerlugit pisoqaanerussanngilaq.
  Imm. 3.  Covid-19-imut misissortinnissamut piumasarineqartut Nunatsinni Nakorsaaneqarfimmit aalajangersarneqartut naammassineqarsimassapput. 
  Imm. 4.  Nunatsinni Nakorsaaneqarfik imm. 1-imik 2-millu immikkut akuersissuteqarsinnaavoq.
  Imm. 5.  Inuit Savalimmiunit imaluunniit Islandimit Kalaallit Nunaannut angalasut aamma Kalaallit Nunaannut aallarnissaq sioqqullugu ulluni 14-ini kingullerni Savalimmiuniissimasut, Islandimiissimasut imaluunniit Kalaallit Nunaanniissimasut imm. 1-imi ilaatinneqanngillat.

Umiarsuarni il.il. Kalaallit Nunaannukartussani ilaasinnaanermut piumasaqaatit

  § 4.  Umiarsuit ilaasartaatit, matumanilu ilaallutik umiarsuit takornarianik angallassissutit Nunatsinnukartigatik ulluni kingullerni 14-ini nunat allat umiarsualiviini tulaqqasimappata Nunatsinni tulassinnaanngillat, matumani Savalimmiuniissimappata Islandimiissimappataluunniit allatulluunniit iliornikkut ilaasunik ikiffigineqarsimappata. Nunap immikkoortuanut tamarmut atuuppoq, matumanilu imartamut, taamaattoq nunat tamalaat akornanni pisussaaffiit ataqqillugit. Oqaaseqatigiinni siullermi aappaanilu taaneqartup naammassinninnissaa angallatip piginnittuata akisussaaffigaa.
  Imm 2.  Umiarsuit ilaasartaatit, matumanilu takornarianik angallassissutit Nunatsinnukartigatik ulluni kingullerni 14-ini nunat allat umiarsualiviini tulassimanngitsut § 3-mi, § 6, imm. 2-mi aamma § 7-mi ilaatinneqanngillat, kisianni nunat tamalaat akornanni angalaartut pillugit aalajangersakkanut ilaatinneqarlutik.
  Imm. 3.  Imm. 1 aamma 2 angallatinut nuannaariartaatinut aamma atuupput. Nunatta Nakorsaaneqarfia tassannga immikkut akuersissuteqarsinnaavoq.
  Imm. 4.  Imm. 1 aamma 2 umiarsuarnut aalajangersimasumik aqquteqarlutik Nunatta umiarsualiviinut tulattartunut taakkunanngalu avalattartunut atuutinngilaq.

Timmisartut Nunatsinnukartut paasissutissiisussaatitaanerat

  § 5.  Angalasut Immersugassamik Sumut-mik immersuisimasut kisimik timmisartumut Nunatsinnukartussamut ilaaqqusaapput. Angalasoq Immersugassamik Sumut-mik immersuisimanermut nassiussisimanermullu uppernarsaammik timmisartumi sulisumut timmisartumut ikinnginnermini takutitsissaaq. Oqaaseqatigiinni siullermi aappaanilu taaneqartup naammassinninnissaa angallatip piginnittuata akisussaaffigaa.

Illoqarfiit nunaqarfiillu Nunatsinnukartunut killilersuiffiunngitsut

  § 6.  Illoqarfinni nunaqarfinnilu tulliuttuni Nunatsinnukartunut killilersuiffiunngilaq:
1)  Avannaata Kommuniani:
a)  Ilulissat.
2)  Kommune Qeqertalimmi:
a)  Aasiaat.
b)  Qasigiannguit.
c)  Qeqertarsuaq.
3)  Qeqqata Kommuniani:
a)  Kangerlussuaq.
b)  Maniitsoq.
c)  Sisimiut.
4)  Kommuneqarfik Sermersuumi:
a)  Nuuk.
b)  Paamiut.
5)  Kommune Kujallermi:
a)  Narsaq.
b)  Narsarsuaq.
c)  Qaqortoq.
  Imm. 2.  Taamaattoq nunatsinnukartut tikiffissami tungaanut qanermut assiaquteqassapput. Oqaaseqatigiinni siullermi taaneqartup naammassinninnissaa angallatip piginnittuata akisussaaffigaa.

Tikiffissat ilaannut angalanermi mianerisassat

  § 7.  Nunatsinnukartut § 6, imm. 1-imi illoqarfiit, nunaqarfiit najugaqarfiilluunniit allanneqarsimasut avataannut angalasut tassunnaqqusaanngillat Covid-19-imik tunillatsissimannginnermut uppernarsaaqqaartigatik.
  Imm. 2.  Inuit imm. 1-imi pineqartut Nunatsinnut tikereernerup kingorna ullut tallimassaani kingusinnerusukkulluunniit Covid-19-imik napparsimanermut misissortinneqarsinnaapput. Misissortinneranni tunillatsissimanngitsut paasineqarpat inuit Covid-19-imik tunillatsissimanngitsutut naatsorsuutigineqassapput angalaqqilersinnaallutillu.
  Imm. 3.  Misissuinermi nappaammik nassaartoqarpat inuk pineqartoq tamanna pillugu malittarisassat nalinginnaasut malillugit katsorsarneqalissaaq, takuuk Nappaatit tunillaassortut akiorniarlugit iliuutsit pillugit Inatsisartut peqqussutaat.
  Imm. 4.  Inuk Covid-19-imut misilitsinngikkuni angalaqqissanngilaq pineqartoq ulluni 14-ini Nunatsinneereerluni Covid-19-imillu tunillatsissimanermik ersiuteqarani angalaqqilersinnaavoq.
  Imm. 5.  Inuit Savalimmiunit imaluunniit Islandimit Kalaallit Nunaannut angalasut aamma Kalaallit Nunaannut aallarnissaq sioqqullugu ulluni 14-ini kingullerni Savalimmiuniissimasut, Islandimiissimasut imaluunniit Kalaallit Nunaanniissimasut imm. 1-imi ilaatinneqanngillat.

Tunillatsinnissamut aarlerinartorsiorfimmiit Nunatsinnukartunut malittarisassat

  § 8.  Nunatsinnukartut ulluni 14-inik sioqqutsillutik Danskit Nunanut Allanut ministeriaqarfianit angalanermut ilitsersuutaanni tunillatsinnissamut aarlerinartorsiorfiusutut nassuiarneqartuniissimasut katerittarfinni, aaqqissuussinerni, pisussani il.il. peqataassanngillat § 7, imm. 2 aamma 4 naapertorlugit Covid-19-imik tunillatsissimannginnermut uppernarsaaqqaaratik. Matumani illup iluani, silami, pisortat inuillu katerittarnerat, aaqqissuussinerit pisussallu il.il. pineqarput.
  Imm. 2.  Pisortat suliffeqarfiutaani assigisaanilu isersimanermut, inuussutissarsiortut inigisaanni tamanut ammasuni isersimanermut aamma pisortat namminersortullu utoqqarnik paaqqutariallit angerlarsimaffiat napparsimavinnulluunniit isersimanermut inerteqqussut aamma atuutinneqassaaq. Taamaattoq ulluinnarni nioqqutissanik pisiniarnerit allatullu pisariaqavissumik pisiniarnissat allanit isumagineqarsinnaanngitsut isumaginissaat akuerineqarput.
  Imm. 3.  Inerteqqut illoqarfinni nunaqarfinnilu § 6, imm. 1-imi taaneqartunut aamma atuuppoq. Angalasut taakku § 6, imm. 1-imi illoqarfiit nunaqarfiillu taaneqartut avataannut angalaqqusaanngillat § 7, imm. 2 aamma 4 naapertorlugit Covid-19-imik tunillatsissimannginnermut uppernarsaaqqaaratik.
  Imm. 4.  Peqataasut taamaallaat inoqutigiiuppata imm. 1 inissiamut atuutissanngilaq.
  Imm. 5.  Immikkoortut 1 aamma 2 katersuunnernut politikikkut allatulluunniit isummersornissamik siunertalinnut atuutinngillat.

Pineqaatissiissuteqartarneq

  § 9.  § 3, imm. 1, § 4, imm. 1-3, § 5, § 6, imm. 2, § 7, imm. 1, 2 aamma 4-mik aamma § 8, imm. 1-3-mik unioqqutitsisoq pinerluttulerinermik inatsit malillugu pineqaatissinneqarsinnaavoq.
  Imm. 2.  Ingerlatseqatigiiffiit il.il. (inatsisilerinermi inuttut immikkoortutut isigineqartut) pinerluttulerinermik inatsimmi kapitali 5-imi malittarisassat malillugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.
  Imm. 3.  Akiliisitsissutit Nunap Karsianut tutsinneqassapput.

Atuutilerfia

  § 10.  Nalunaarut 21. juli 2020-mi atuutilissaaq.
  Imm. 2  Nalunaarut malillugu killilersuinerit, inerteqquteqartitsinerit, peqqusinerit il.il. 31. december 2020 tikillugu atuutissapput.

Ikaarsaariarnermi malittarisassat

  § 11.  Inuit 21. juli 2020 sioqqullugu nunatsinnukartut Nunatta avataanniit timmisartukkut Kalaallit Nunaannut angalanermi piumasaqaatit pillugit Namminersorlutik Oqartussat nalunaarutaat nr. 25, 3. juli 2020-meersumi (Immikkoortoq 1) ilaatinneqarput. Inunnut taakkununnga killilersuinerit, inerteqqutit, peqqussutit il.il. Namminersorlutik Oqartussat nalunaarutaat nr. 25, 3. juli 2020-meersoq naapertorlugu atuupput nalunaarummi uani § 7, imm. 2 aamma 4 naapertorlugit Covid-19-imik tunillatsissimannginnermut uppernarsaaqqaaratik.

Namminersorlutik Oqartussat, ulloq 20. juli 2020

Anna Wangenheim

/

Tine Pars