Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, kingullermillu allannguuteqartinneqartumi Inatsisartut inatsisaatigut nr. 1, 1. april 2020-mi § 22, imm. 2 naapertorlugu aalajangersarneqarpoq:

 

Kapitali 1

Atuuffissaa pingaarnertullu isiginiagassat

 

  § 1.  Atuarfiit aamma ingerlatsiviit, Nappaatit tunillaassortut akiorniarlugit iliuutsit pillugit Inatsisartut peqqussutaanni aalajangersakkat tunngavigalugit iliuusissanik aallartitsiviusimasut, covid-19-ip kingunerisaanik nalinginnaasumillu atuartitsinermik ingerlatsisinnaanngitsut Inatsisartut meeqqat atuarfiat pillugu inatsisaat naapertorlugu, Tunngaviusumik atuarfiit namminersortitat angerlarsimaffimmilu atuartitaaneq il.il. pillugit Inatsisartut inatsisaat il.il. naapertorlugu, Efterskolit pillugit Inatsisartut peqqussutaat naapertorlugu, Meeqqat atuarfiat pillugu Inatsisartut inatsisaat naapertorlugu, Inuussutissarsiutinik ilinniartitsinerit aamma inuussutissarsiutinik ilinniartitsinerup iluani pikkorissaanerit pillugit Inatsisartut inatsisaat naapertorlugu, Ilinniarnertuunngorniartarneq pillugu Inatsisartut inatsisaat naapertorlugu aammalu Qaffasinnerusunik ilinniartitaanerit pillugit Inatsisartut inatsisaat naapertorlugu, pisussaaffilerneqarput piffissami ajornartoorfiusumi atuartitsinermik ingerlatsisarnissamik, misilitsinnernik ingerlatsisarnissamik aammalu soraarummeersitsisarnissanik uppernarsaatinullu suliaqartarnissanik, ilinniartussanik tigusisarnissanik aammalu ilitsersuinermik ingerlatsisarnissamik nalunaarut manna naapertorlugu, tak. taamaattoq imm. 4.
  Imm. 2.  Ilinniartitaanermut Naalakkersuisoqarfik atuartunut aamma ilinniartunut atugassarititaasunik assigiinnik peqarnissaa qularnaarumallugu atuarfinnut aamma ingerlatsivinnut ilitsersuutinik aalajangersaasinnaavoq, atuarfiit aamma ilinniarfiit suliassaminnik nalunaarut manna naapertorlugu suliaqartarnissaannut, minnerunngitsumik soraarummeersitsisarnernut aammalu misilitsinnernik ingerlatsisarnernut tunngasuni. Tamanna pisassaaq tamanna pillugu atuarfiit ilinniarfiillu pineqartut isumasioreerlugit. Atuarfiit eqqarsaatigalugit tamanna pisassaaq kommunalbestyrelsit sulianut atatillugu isumasioreerlugit, tak. taamaattoq imm. 4.
  Imm. 3.  Inatsisartut inatsisaanni imm. 1-imi eqqaaneqartuni akornutissaqanngilaq ajornartoorfiusumi atuartitsisarnermik, soraarummeersitsisarnermik, misilitsittoqartarneranik, tamatumani aamma svendinngussalluni misilitsinnerit ingerlanneqartarnissaannut nalunaarut manna naapertorlugu. 
  Imm. 4. Imm. 1 atuutinngilaq meeqqat atuarfianni inaarutaasumik misilitsinnermut, tak. Namminersorlutik Oqartussat nalunaarutaat angusanik karakteriliisarneq pillugu, taartitut meeqqat atuarfianni inaarutaasumik misilitsittarnermut, covid-19-ip kingunerisaanik.

 

  § 2.  Atuarfiit aamma ilinniarfiit § 1, imm. 1-imi eqqaaneqartut sapinngisamik annertunerpaamik aaqqissuuttassavaat aammalu ingerlattassallugit ilinniartitaanerup ingerlaasissaa, atuartitaaneq, soraarummeertarneq aamma misilitsittarneq, imatut aaqqissuullugit sapinngisamik annertunerpaamik atuartut ilinniagaqartullu nalinginnaasumik ingerlatsisoqartuuppat atugarisassaanniit ajornerunngitsunik. Tamatumuuna qularnaarneqassaaq atuartut aamma ilinniagaqartut sapinngisamik pitsaanerpaanik tunngavissaqartarnissaat ilinniagassaminnik ingerlatsinissaminnut, tamatumani aamma soraarummeertoqassappat soraarummeernerni, misilitsinnerni aammalu assassortunut svendinngussalluni misilitsittarnerni. 
  Imm. 2.  Aaqqissuussisarneq ingerlatsisarnerlu atuartitsinermik, soraarummeertarnernik aamma misilitsittarnernik pisassaaq oqartussat suliani susassaqartut allat qanimut suleqatigalugit.

 

  § 3.  Atuarfik imaluunniit ilinniarfik ingerlatsivimmit allamit noqqaasoqarnera tunngavigalugu pisariaqassusia naapertorlugu tamanna pillugu isumaqatigiissuteqarnikkut tamatumunnga ikiuuttassaaq aaqqissuussinermi piviusunngortitsinermilu ilinniartitaanermik, atuartitsinermik, soraarummeernernik aamma misilitsinnernik nalunaarut manna naapertorlugu. 
  Imm. 2.  Ikiorsiineq imm. 1 naapertorlugu ilaatigut ilaqarsinnaavoq atuartitsinermi atortussanik aamma ilisimasanik misilittakkanillu paarlaasseqatigiittarnernik, misilittakkanik ilisimasanillu avitseqatigiittarnermik aammalu qarasaasiakkut aaqqissuussamik atuartitsinermik ingerlatsisarnernik.

 

Kapitali 2

Ilinniartitaanerup ingerlanissaanik allannguuteqartitsisarneq

 

  § 4.  Ilinniartitaanerni paarlakaattumik aaqqissuussaasartuni, atuarfiup imaluunniit ilinniarfiup sungiusaammik suliffiusartumut ilinniartumullu isumaqatigiissuteqarnikkut, tamatumani aamma isumaqatigiissuteqarnikkut sungiusaammik sulinikkut ilinniarnissaq tamakkiisumik imaluunniit ilaannakuusumik sungiusaammik ilinniarfimmi sungiusaammik sulinertut ingerlassinnaavaat.
  Imm. 2.  Suliffeqarfiup sungiusaammik suliffiusartup aamma ilinniartup atuarfik imaluunniit ilinniarfik isumaqatigiissuteqarfigalugu piffissamik sungiusaammik suliffiusussamik sivitsuisinnaapput.

 

Kapitel 3

Ajornartoorfiusumi atuartitaaneq

 

  § 5.  Ajornartoorfiusumi atuartitsineq aaqqissuunneqassaaq ingerlanneqarlunilu ataatsimoorluni atuartitsisut, ilinniartitsisut, atuartut, ilinniagaqartut il.il. katersuuffiginngisaannik, tak. taamaattoq § 7, imm. 2.

 

  § 6.  Atuartut aamma ilinniagaqartut pisussaapput ajornartoorfiusumi atuartitaanermi taartaasumi eqeersimaarlutik peqataanissamut, nalinginnaasumik atuartitaanermi peqataanissamut pisussaaffeqareersimagunik. 
  Imm. 2. Atuarfiup imaluunniit ilinniarfiup nalunaarsortassavai atuartut aamma ilinniagaqartut ajornartoorfiusumi atuartitaanermi eqeersimaarlutik peqataannginneri.

 

  § 7.  Atuarfik imaluunniit ilinniarfik ajornartoorfiusumi atuartitsinermik aaqqissuussisassaaq atuartut ataasiakkaat aallaavigalugit, imaluunniit ilinniagaqartup pisariaqartitsinera aallaavigalugu, piffissami immikkut ittumi periarfissat tunngavigalugit. Tamanna atuuppoq immikkut atuartunut aamma ilinniagaqartunut immikkut ittumik atuartinneqarnissamik pisariaqartitsisunut, allatigullu perorsaanikkut immikkut ittunik pisariaqartitsisunut, immikkut tapersersorneqarnissamik pisariaqartitsisunut imaluunniit ineriartornermikkut immikkut isigineqarnissamik imaluunniit tapersersorneqarnissamik pisariaqartitsisunut. 
  Imm. 2.  Nalilerneqarpat pingaaruteqartutut atuartup atugarissaarneranut, timitalimmik specialklassini atuartitsisarneq atuartunut immikkut atuartinneqarnissamik pisariaqartitsisunut aamma allatigut perorsaanikkut immikkut ittunik aaqqissuussineq ingerlatiinnarneqarsinnaavoq, immikkut ikiorsiinissamik pisariaqartitsineq, imaluunniit ineriartornerup pisariaqartippagu immikkut isiginiaanissaq ikiorsiinissarluunniit. 
  Imm. 3.  Imm. 2 naapertorlugu atuartitsineq taamaallaat pisinnaavoq tamanna ingerlatissallugu ajornanngippat, Nappaatit tunillaassortut akiorniarlugit iliuutsit pillugit Inatsisartut peqqussutaata allanngortinneqarnera pillugu Inatsisartut inatsisissaanni imaluunniit taanna tunngavigalugu malittarisassiat naapertorlugit. 

 

  § 8.  Atuarfik imaluunniit ilinniarfik pisariaqartinneqartumik ilitsersuisassaaq ikiorsiisarlunilu atuartumut aamma ilinniartumut, ukiukinnernut, siunnerfigalugu angajoqqaat imaluunniit pilersuisuiusut piffissami ajornartoorfiusumi atuartitsinermik ilalersuisinnaanissaat, tamatumanissaaq iluaqutissanik immikkut ittunik atuisoqartarsimatillugu. 
  Imm. 2.  Ilitsersuisarnermi ilaapput apeqqutit atuartup imaluunniit ilinniartup pineqartup qarasaasiamut internetimut aqqutilimmik atuisinnaanera, ajornartoorfimmi atuartitsinermi pineqartumi pisariaqartitsinermut naapertuuttumik.

 

  § 9.  Ajornartoorfiusumi atuartitsineq ilaatigut ungasissumiittunik atuartitsinermik ilaqarsinnaavoq qarasaasiakkut aaqqissuussamik atuartitsisarneq, tamatumanissaaq angerlarsimaffigisami nammineq ilinniarneq, angerlarsimalluni suliassaqarneq atuartitsinermi atortussanik naleqquttunik atuilluni, tamatumani aamma atuartitsissutinik digitaliusunik atuilluni.

 

  § 10.  Ajornartoorfiusumi atuartitsinermi ilaanngillat naleqquttumik atuartitsisarneq, fagini, aaqqissuussinerni imaluunniit sillimaniarnermik peqquteqartumik naammassiniassallugit ajornakusoorsinnaasut, ilutigisaanik atuartitsisup kiisalu atuartut imaluunniit ilinniagaqartut najuuffigisaannik aaqqissuussinikkut ingerlanneqartussat. Atuartitsisarnerit taamaattut atuarfiup imaluunniit ilinniarfiup ingerlatissallugit aalajangiussinnaavai ajornartoorfiusumi atuartitsisarnissamut pisussaaffiusoq atorunnaareerpat. Atuarfiup imaluunniit ilinniarfiup paarlattuanik siuartissinnaavai atuartitsinissatut pilersaarutaareersut aaqqissuusseqqaarnissamik pisariaqartitsiviunngitsut, taamatut atuartitsineq ajornartoornermi atuartitsinertut ingerlallugu. 
  Imm. 2.  Atuarfiit aamma ilinniarfiit imm. 1 apeqqutaatinnagu immikkorluinnaq pisuni aaqqissuussilluni atuarfimmi imaluunniit ilinniarfimmi atuartitsinermik ingerlatsisarsinnaapput, tamatumani aamma sannavinni aamma misileraavinni laboratoriani, atuarfiup imaluunniit ilinniarfiup nalilerpagu fagitigut piumasaqaatini piffissamullu atatillugu tamanna pisariaqartoq, assersuutigalugu ilinniarfinni allani tiguneqarsinnaanermut atatillugu. 
  Imm. 3.  Atuartitsineq imm. 2 naapertorlugu taamaallaat pisinnaavoq tamanna ajornanngippat Nappaatit tunillaassortut akiorniarlugit iliuutsit pillugit Inatsisartut peqqussutaanni imaluunniit taanna tunngavigalugu malittarisassiat tunngavigalugit tamanna ingerlanneqarsinnaappat. 

 

  § 11.  Atuarfiit imaluunniit ilinniarfiit taarsiullugu atuartitsinermik atuartunut imaluunniit ilinniartunut ingerlatsissanngillat, ajornartoornermi atuartitsisussaaneq atorunnaarpat. 
  Imm. 2.  Atuarfiup imaluunniit ilinniarfiup pisortaasa imm. 1-imi aalajangersagaq apeqqutaatinnagu ilassutitut atuartitsineq imaluunniit fagitigut atuartunut tapersersuineq ingerlassinnaavaat, pisortaasut nalilerpassuk tamanna pisariaqartoq.

 

  § 12.  Ajornartoorfiusumi atuartitsisimaneq ilanngullugu naatsorsuunneqassaaq inatsisit naapertorlugit atuartitsinerup sivisussusissaanik naammassinninnissami.

 

Kapitali 4

Soraarummeernerit aamma misilitsinnerit, tamatumani aamma svendeprøvit.

 

  § 13.  Atuarfiit imaluunniit ilinniarfiit sanioqqussinnaavaat imaluunniit ilassusersinnaavaat malittarisassat soraarummeernissanik aamma misilitsinnissanik aaqqissuussinerminni ingerlatsinerminnilu, tamatumani aamma svendeprøvini pisuni imaattuni: 
1)  Ingerlatsinissamut piffissaliussami, tamatumani aamma kinguartitsinissani. 
2)  Ilusissaq, tamatumani aamma ungasissumiittunut ingerlatsineq, atortorissaarutit elektroniskiusut atorlugit.
3)  Imai, tamatumani aamma aaqqissuussinerit tigussaasut oqaluinnartarissanik imaluunniit allattarissanik taarserneqarneri.
4)  Misilitsinnerit soraarummeernermi ilaasut amerlassusissaanni.
5)  Censorinik, nakkutilliisunik, sanaanik nalilersuisartoq (skuemester) il.il. 
6)  Aalajangerneq atuarnermi pissarsiani karakterit misilitsinnermi imaluunniit soraarummeernermi karakterinngortissallugit fagini meeqqat atuarfiannik imaluunniit ilinniarfimmi matusinermi naammassineqartuni. 
7)  Misilitsinnissamik taamaatitsineq imaluunniit kinguartitsineq.
  Imm. 2.  Pisariaqartumik svendeprøvip ingerlanneqarnissaanut piffissaliussamik allannguineq, tamatumani aamma kinguartitsinertut, tunngaveqartussaavoq isumaqatigiissuteqarnermik ilinniarfiup, ilinniagaqartup aamma sungiusaammik suliffiusup akornanni. 
  Imm. 3.  Svendeprøvip kinguartinneqarnerani, tak. imm. 2, ilinniarfiup sungiusaammik suliffiusumiit inassuteqaammik tunngaveqartumik suliamik ilinniagaqarsimasutut allagartaq - svendetut allagartaq - imaluunniit ilinniagaqarsimanermut uppernarsaat allaffissornikkut suliarisinnaavaa, nalinginnaasumik suliamik ilinniagaqarsimasutut allatulli allagartartaartarnertulli, qularnaarneqarpat ilinniartoq piginnaaneqalersimasoq ilinniartitaanermi fagitigut angusassanik.

 

  § 14.  Ilinniartitaanermut Naalakkersuisoqarfiup misilitsinnernik aamma soraarummeernernik nalilersuinissaq naammassineqarsinnaanngippat atuarfik imaluunniit ilinniarfik pisussaaffilersinnaavaa angusanut karakteriliinissamik, naak ilinniakkamut pineqartumut angusanut karakteriliisoqartanngikkarluartoq.

 

Kapitali 5

Uppernarsaatit

 

  § 15.  Naalakkersuisoqarfiup uppernarsaatissanik suliaqartarnermut atuuttut malittarisassat sanioqquttarsinnaavai aaqqissuussinerit aammalu soraarummeernernik misilitsinnernillu ingerlatsinerit, tamatumani aamma svendeprøvinik naammassisaqartarnerit, tak. § 13, tamanna pisariaqartikkaangassuk.

 

Kapitali 6

Tiguneqartarneq

 

  § 16.  Ilinniartitaanermut Naalakkersuisoqarfiup tiguneqartarnermut malittarisassat sanioqqussinnaavai qularnaarumallugu ajornartoorfiusumi atuartitsineq aammalu soraarummeertarneq misilitsittarnerlu nalunaarut manna naapertorlugu atuartut ilinniagaqartullu ilinniakkani tiguneqarsinnaanerisa ajorseriannginnissaat. 
  Imm. 2.  Malittarisassanik imm. 1-mi aalajangersarneqartunik sanioqqutsineq pissaaq tamanna pillugu atuarfinnik ilinniarfinnillu tigusinissami aalajangiisussanik isumasiuereernermi. 
  Imm. 3.  Ilinniartitaanermut Naalakkersuisoqarfiup tamanut tusagassiarissavai sanioqqutsinerit imm. 1 naapertorlugu pisut. 
  Imm. 4.  Atuarfiit aamma ilinniarfiit tigusisarnerminnut malittarisassanik sanioqqutsiviusut imm. 1 naapertorlugu ilinniakkanut pineqartunut qinnuteqartut tamanna pillugu siunnersortassavaat. 

 

Kapitel 7

Pædagogikum-imik ingerlatsineq

 

  § 17.  Ilinniartitaanermut Naalakkersuisoqarfiup pædagogikum-imik ingerlatsisarnermi malittarisassanik sanioqqutsisinnaavoq atuarfiup imaluunniit ilinniarfiup ingerlatsinissami atugassarisaasa tamanna pisariaqartippagu. 
  Imm. 2.  Imm. 1-imi malittarisassanik sanioqqutsineq pissaaq atuarfimmik aamma ilinniarfimmik tamanna pillugu pædagogikum-imi kandidatip atorfeqarfigisaanik isumasiuereernikkut. 
  Imm. 3.  Imm. 1-imi malittarisassanik sanioqqutsineq imatut ingerlanneqassaaq sapinngisamik annertunerpaatigut isiginiaaffiusumik pædagogikum-imut kandidatip pædagogikum-imik naammassinnissinnaaneranik.
  Imm. 4.  Ilinniartitaanermut Naalakkersuisoqarfiup tamanut takusassiarissavaa imm. 1 naapertorlugu sanioqqutsinissaq pillugu aalajangerneq.

 

Kapitel 8

Ilinniagaqarnersiutit aamma tapiissutit

 

  § 18.  Ilinniagaqarnersiutit pillugit Inatsisartut inatsisaat naapertorlugu ilinniagaqarnersiuteqarsinnaaneq atorneqassanngilaq atuartup imaluunniit ilinniagaqartup atuartinneqarnerani imaluunniit soraarummeernerani, misilitsinnerani, tamatumani aamma inaarutaasumik misilitsinnerani aamma svendprøve-mik nalunaarut manna naapertorlugu ingerlatsinermi.

 

  § 19.  Akiliunneqarluni angalasinnaaneq Kalaallit Nunaata avataani illoqarfimmiit ilinniagaqarfiusumiit Kalaallit Nunaanni kingullermik aalajangersimasumik najugaqarfigisamut Namminersorlutik Oqartussat ilinniagaqarnersiutit pillugit nalunaarutaat naapertorlugu, imaluunniit Namminersorlutik Oqartussat Danmark-imi efterskolertarnernut tapiissuteqartarnermut nalunaarutaat naapertorlugu piumasaqaatitaqarpat ilinniagaqartoq imaluunniit efterskolimi atuartoq tamanna sioqqullugu covid-19-imut testerneqarsimassasoq, taava ilinniagaqartoq imaluunniit efterskolertoq tamatumunnga qinnuteqareernikkut akuerineqarsinnaavoq akiliunneqarluni angalanissamut, siumut utimullu illoqarfimmiit ilinniagaqarfigisamiit illoqarfimmut testeriffiusumut qaninnermut. 
  Imm. 2.  Imm. 1-imi pineqartoq akiliunneqarluni angalaneq misiligummik - testimik – tigusisoqarnissaa siunnerfigalugu imaqarpoq bilitsinut aningaasartuutinut tamakkiisumik matussusiinermik, aamma pisariaqartumik unnuinermut aningaasartuutinik, angalanissaq akikinnerpaaq atorlugu aaqqissuussaasumik.

 

Kapitali 9

Atortuulernera

 

  § 20.  Nalunaarut manna atortuulerpoq ullormi nalunaarutigineqarfiusumi.

 

 

Namminersorlutik Oqartussat, ulloq 28. april 2020

 

 

Ane Lone Bagger

/

Karsten Peter Jensen