Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, allannguuteqartinneqartumi Inatsisartut inatsisaatigut nr. 1, ulloq 1. april 2020-meersumi § 22, imm. 2 naapertorlugu aalajangersarneqarpoq:

Atuuffissaa isiginiagassallu pingaarnerit

  § 1.  Nappaatit tunillaassortut akiorniarlugit iliuutsinik Inatsisartut peqqussutaat naapertorlugu innuttaasunut iliuusissanik aallartitsinerit kingunerisaannik meeqqat atuarfianni inaarutaasumik misilitsinnerit ingerlanneqassanngillat, tak. meeqqat atuarfianni inaarutaasumik naliliisarneq pillugu Namminersornerullutik Oqartussat nalunaarutaat, naapertorlugu ukiumi atuarfiusumi 2019-2020-mi. Tamannali aalajangersimasunik qulequtsiilluni sammisaqarluni suliani atuutinngilaq. 
  Imm. 2.  Meeqqat atuarfianni atuartut angajulliit ukiumi atuarfiusumi 2019-2020-mi naammassinerannut atatillugu angusat tunngavigalugit karakteeriliisarneq inaarutaasumik nalilersuinermi atuartut misilitsissimanermut uppernarsaataannut imm. 1-imi inaarutaasunik misilitsinnernut taaneqartunut taarsiullugit nuunneqassapput. 
  Imm. 3.  Angusat tunngavigalugit inaarutaasumik nalilersuinerit ukiumi atuarfiusumi sapinngisamik kingusissukkut tunniunneqassapput.

  § 2.  Ukiumi atuarfiusumi 2019-2020-mi atuarsimanermi inaarutaasumik uppernarsaat, Namminersornerullutik Oqartussat Meeqqat atuarfianni inaarutaasumik naliliineq pillugit nalunaarutaanni § 93 naapertorlugu, inaarutaasunik misilitsissimanermut karakterinik nalunaagaqarani suliarineqassaaq, taamaattoq tak. imm. 2. 
  Imm. 2.  Imm. 1 apeqqutaatinnagu aalajangersimasunik qulequtsiilluni sulianut inaarutaasumik karakterit ukiumut atuarfiusumut 2019-2020-mut tunniunneqassapput.

  § 3.  Misilitsissimanermut protokolimi aamma inaarutaasumik misilitsissimanermut uppernarsaammi nalunaarneqassaaq meeqqat atuarfianni inaarutaasumik misilitsinneq ukiumi atuarfiusumi 2019-2020-mi covid-19-ip kingunerisaanik ingerlanneqarsimanngitsoq. 

Atortuulerfia

  § 4.  Nalunaarut manna atortuulerpoq ullormi nalunaarutigineqarfiusumi.

Namminersorlutik Oqartussat, ulloq 17. april 2020

Ane Lone Bagger

/

Karsten Peter Jensen