Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi, § 12 c naapertorlugu aalajangersarneqarpoq:

Atuuffii

  § 1.  Tunillaassortunik nappaalanersuaqarneranut ataatsimiititaliarsuaq , COVID-19-ip tunillaassuunnissaa pinngitsoortinniarlugu utoqqaat illuini assigisaannilu aamma napparsimmavinni pulaartunut killilersuigallarnernik atuuttunngortitsisinnaavoq.
  Imm. 2.  Suliffeqarfimmut pineqartumut killilersuinermik atuuttunngortitsineq pissaaq. Killilersuinermik atuutunngortitsinermi killilersuinerit annertussusaat aalajangersarneqassapput.
  Imm. 3.  Killilersuineq Nunatta Nakorsaaneqarfiata nittartagaani saqqummiunneqassaaq.
  Imm. 4.  Killilersuineq sapinngisamik piaarnerpaamik atuukkunnaassaaq.

Utoqqaat illui, inissiat il.il.

  § 2.  Utoqqaat illuinut pulaartut isersinnaanerannut inerteqquteqarnermik killilersuinernilluunniit Tunillaassortunik nappaalanersuaqarneranut ataatsimiititaliarsuaq atuuttunngortitsisinnaavoq, matumani inissat oqilisaataasut, inissiat imaluunniit allatut init sulisunut ataatsimoortumillu najugaqarfinnut attuumassutillit ilanngullugit, tamanna nunami maani nappaammik nalinginnaasumik inunnut ulorianaateqartup pinaveersaartinnissaa imaluunniit siammarnerata killilersimatinnissaa pisariaqarpat. Tamanna atuuppoq isumaginninnermik suliassaqarfimmi pissaanermik atuineq pillugu Inatsisartut inatsisaanni §§-ini 37-mi aamma 39-mi maleruagassaqaraluartoq.
  Imm. 2.  Inerteqquteqarnerit killilersuinerilluunniit atuutsinneranni pineqartut tassaasinnaapput init ataatsimoorfiusartut, inissiallu ilaa najugaqartup nammineq atorsinnaasaa.
  Imm. 3.  Pulaartut isersinnaanerannut inerteqquteqarneq killilersuinerilluunniit neqeroorutinut aalajangersimasunut, neqeroorummut ataatsimut imaluunniit nunap ilaani arlalinni imaluunniit nalinginnaasumik neqeroorutinut tunngassuteqartinneqarsinnaapput.

Napparsimmaviit

  § 3.  Napparsimmavinnut peqqinnissaqarfiullu immikkoortuinut pulaartut isersinnaanerannut inerteqquteqarnermik killilersuinernilluunniit Tunillaassortunik nappaalanersuaqarneranut ataatsimiititaliarsuaq atuuttunngortitsisinnaavoq, nunami maani nappaammik nalinginnaasumik inunnut ulorianaateqartup pinaveersaartinnissaa imaluunniit siammarnerata killilersimatinnissaa pisariaqarpat. 
  Imm. 2.  Pulaartut isersinnaanerannut inerteqquteqarnerit killilersuinerilluunniit napparsimmavinnut peqqinnissaqarfiullu immikkoortuinut aalajangersimasunut imaluunniit napparsimmavinnut peqqinnissaqarfiullu immikkoortuinut tamanut, peqqinnissaqarfiup nunami immikkoortuani pineqartumiittunut tunngasinnaapput.

Inerteqquteqarnermut killilersuinermullu ilaanngitsut

  § 4.  Tunillaassortunik nappaalanersuaqarneranut ataatsimiititaliarsuaq aalajangiisinnaavoq §§-it 2 aamma 3 malillugu inerteqquteqarneq killilersuinerluunniit, najugaqartup imaluunniit katsorsarneqartup qanigisaata perulunnerata nalaani pulaarnissamut atuutinngitsoq.
  Imm. 2.  Perulunneq ima paasineqassaaq, assersuutigalugu napparsimaruluttumut imaluunniit inummut toqulersumut imaluunniit angajoqqaat qanigisaasulluunniit meeqqamut mikisumut allamulluunniit pinngitsoorani pulaartariaqarnerit.
  Imm. 3.  Suliffeqarfimmi najugaqarfimmiluunniit aqutsisut imaluunniit napparsimmavimmi peqqinnissaqarfiulluunniit immikkoortortaani aqutsisut, perulunnerup nalaani illersorneqarsinnaasumik pulaarnerup ingerlanneqarsinnaanerata qulakkeernissaanut pisussaaffeqarput.

  § 5.  Nalunaarut saqqummiussinerup aqaguani atortuulissaaq.

Namminersorlutik Oqartussat, ulloq 7. april 2020

Martha Abelsen

/

Tine Pars