Kapitali 1

Suliffeqarfinnik innuttaasunik tapersersortarialinnik suliffissaqartitsisutut nalunaarsugaasunik akuersisarneq

 

Suliffeqarfittut innuttaasunik tapersersortarialinnik suliffissaqartitsisutut nalunaarsugaasutut akuerineqarnissaq pillugu qinnuteqaat

 

  § 1.  Suliffeqarfik §§ 6-8-mi piumasaqaatinik naammassinnittoq suliffeqarfittut innuttaasunik tapersersortarialinnik suliffissaqartitsisutut suliffeqarfiup nalunaarsorneqarnissaata akuerineqarnissaa pillugu Atuisartoqarnermut Unammilleqatigiinnermullu Aqutsisoqarfimmut qinnuteqarsinnaavoq, takuuk§ 4.
Imm. 2.  Suliffeqarfiup suliffeqarfittut innuttaasunik tapersersortarialinnik suliffissaqartitsisutut nalunaarsorneqarnissap akuerineqarnissaa pillugu qinnuteqarnerani suliffeqarfiup allagartat uku Atuisartoqarnermut Unammilleqatigiinnermullu Aqutsisoqarfimmut nassiutissavai:
1)  Ukunannga uppernarsaatit, suliffeqarfik nammineq CVR-normoqarnermut, Kalaallit Nunaanni angerlarsimaffeqarnermut aammalu inummit ataatsimit ingerlanneqartuunnginnermik imaluunniit suliffeqarfik piginneqatigiinnikkut pilersinneqarsimasuunngitsuuneranik uppernarsaatit, takuuk § 6.
2)  Ukunannga uppernarsaatit, suliffeqarfiup inunnik tapersersortarialinnik siunertaqarnera, takuuk § 7, imm. 1, nr. 1, aamma suliffeqarfiup malittarisassaanit imaluunniit malittarisassaqanngippat pilersinneqarnerani uppernarsaammit takuneqarsinnaalluni inunnik tapersersortarialinnik siunertaqarneranut uppernarsaat.
3)  Suliffeqarfiup inuussutissarsiutigalugu ingerlanneqarneranut uppernarsaat, takuuk § 7, imm. 1, nr. 2.
4)  Suliffeqarfiup pisortanut attuumassuteqannginneranut uppernarsaat, takuuk § 7, imm. 1, nr. 3.
5)  Suliffeqarfiup sulinermini qanoq akuutitsineranut akisussaaneranullu nassuiaat, takuuk § 7, imm. 1, nr. 4.
6)  Suliffeqarfiup sinneqartoorutiminit inunnik tapersersortarialinnik suliaqarneranut uppernarsaat, takuuk § 7, imm. 1, nr. 5.

 

  § 2.  Suliffeqarfittut innuttaasunik tapersersortarialinnik suliffissaqartitsisutut nalunaarsugaasutut akuerineqarnissaq pillugu suliffeqarfiup qinnuteqaataa Atuisartoqarnermut Unammilleqatigiinnermullu Aqutsisoqarfimmit suliarineqartumik tamanullu saqqummiunneqarsimasumik qinnuteqarnermi immersugassamik atuilluni nassiunnissaa, aamma qinnuteqaatip emailip allatigulluunniit digitalikkut atassuteqaatit atorlugit nassiunneqarnissaa pillugu aalajangersakkanik Naalakkersuisut aalajangersaasinnaapput.

 

  § 3.  Suliffeqarfik suliffeqarfittut innuttaasunik tapersersortarialinnik suliffissaqartitsisutut nalunaarsugaasutut akuerineqarnissaq pillugu qinnuteqartoq, qinnuteqaatip suliarineqarneranut suliamilu aalajangiinissamut pisariaqartunik paasissutissanik tamanik uppernarsaatinillu tamanik nassiussissaaq.
Imm. 2. Paasissutissanik uppernarsaatinillu Atuisartoqarnermut Unammilleqatigiinnermullu Aqutsisoqarfiup pisariaqartutut isigisaannik, aammalu Atuisartoqarnermut Unammilleqatigiinnermullu Aqutsisoqarfiup pisariaqartutut isigisaatut aammalu pisariaqartitaatut iluseqartumik, nassiusseqqullugu, Atuisartoqarnermut Unammilleqatigiinnermullu Aqutsisoqarfiup qinnuteqaatip suliarineqarnerani aalajangiiffigineqarneranilu suliffeqarfik peqqusinnaavaa.

 

Suliffeqarfittut innuttaasunik tapersersortarialinnik suliffissaqartitsisutut nalunaarsuinermut akuersissuteqarneq

 

  § 4.  Suliffeqarfik §§ 6-8-imi piumasaqaatinik naammassinnissimappat, suliffeqarfittut innuttaasunik tapersersortarialinnik suliffissaqartitsisutut suliffeqarfiup nalunaarsorneqarnissaa akuerineqartoq suliffeqarfik nalunaarfigineqassasoq, Atuisartoqarnermut Unammilleqatigiinnermullu Aqutsisoqarfik aalajangiisinnaavoq.
  Imm. 2.  Imm. 1 malillugu akuersissuteqarneq atugassarititaasut aalajangersimasut malillugit nalunaarutigineqarsinnaavoq, ilanngullugit §§ 6-8-imi suliffeqarfiup piumasaqaatinik naammassinnittuarnissai.

 

Suliffeqarfittut innuttaasunik tapersersortarialinnik suliffissaqartitsisutut nalunaarsorneqarnissamut akuersissuteqarnerup utertinneqarnera

 

  § 5.  Suliffeqarfiup § 4 malillugu akuerineqarsimasup, §§ 6-8-imi piumasaqaammik ataatsimik arlalinnilluunniit naammassinninngippat, suliffeqarfiup tamanna ingerlaannartumik Atuisartoqarnermut Unammilleqatigiinnermullu Aqutsisoqarfimmut nalunaarutigissavaa. Nalunaaruteqarnissamut pisussaaffeqarnermut ilaapput suliffeqarfimmi qitiusumik aqutsisutut oqartussani ilaasortat tamarmik.
  Imm. 2. Suliffeqarfiup §§ 6-8-imi nalunaarsorneqarnissamut piumasaqaatit tamaasa naammassisimanngippagit, § 4 malillugu akuersissuteqarnerup utertitsinneqarnissaa pillugu Atuisartoqarnermut Unammilleqatigiinnermullu Aqutsisoqarfik aalajangiisinnaavoq. Akuersissuteqarnerup utertitsinneqarnissaa pillugu Atuisartoqarnermut Unammilleqatigiinnermullu Aqutsisoqarfik aalajangiitinnagu, suliffeqarfiup tamanna qinnutigippagu, aammalu piffissaliussap naammaginartup iluani suliffeqarfik iluarsiisinnaasoq Atuisartoqarnermut Unammilleqatigiinnermullu Aqutsisoqarfik naliliippat, §§ 6-8-imi nalunaarsugaanissamut piumasaqaatit naammassineqarsimanngitsut iluarsineqarnissaannut suliffeqarfimmut nalunaarsugaasimasumut Atuisartoqarnermut Unammilleqatigiinnermullu Aqutsisoqarfik piffissamik naammaginartumik piffissaliisinnaavoq.

 

Kapitali 2

Suliffeqarfittut innuttaasunik tapersersortarialinnik suliffissaqartitsisutut nalunaarsorneqarneq

 

Suliffeqarfittut innuttaasunik tapersersortarialinnik suliffissaqartitsisutut nalunaarsugaanissamut piumasaqaatit

 

  § 6. Suliffeqarfik Kalaallit Nunaanni suliffeqarfiit nalunaarsuiffianni nammineq nalunaarsugaanermi normoqarpat (CVR-normu), aamma Kalaallit Nunaanni najugaqarpat, Inatsisartut inatsisaat malillugu suliffeqarfittut innuttaasunik tapersersortarialinnik suliffissaqartitsisutut nalunaarsorsimasinnaavoq, taamaattoq takuuk imm. 2 aamma §§ 7-9.
  Imm. 2. Suliffeqarfik inummit ataatsimit ingerlanneqartoq aamma suliffeqarfik piginneqatigiinnikkut pilersinneqarsimasoq, Inatsisartut inatsisaat malillugu suliffeqarfittut innuttaasunik tapersersortarialinnik suliffissaqartitsisutut nalunaarsorneqarsinnaanngilaq.

 

  § 7. Suliffeqarfik piumasaqaatit makkua tamaasa naammassisimagunigit aatsaat, suliffeqarfittut innuttaasunik tapersersortarialinnik suliffissaqartitsisutut nalunaarsorneqarsinnaavoq:
1) Suliffeqarfik innuttaasunik tapersersuiniarnermik siunertaqassaaq. Suliffeqarfiup innuttaasunut ikiuiniarnermik siunertaqarnera suliffeqarfiup malittarisassaani imaluunniit malittarisassaqanngippat pilersinneqarnerani uppernarsaammi takuneqarsinnaassaaq.
2) Suliffeqarfik inuussutissarsiornermik ingerlataqartuussaaq.
3) Suliffeqarfik pisortanut attuumassuteqassanngilaq.
4) Suliffeqarfik sulinermini akuutitsisuussaaq akisussaassuseqartuussallunilu.
5) Suliffeqarfik akileraaruteqareernermi angusaminik ingerlatat uku arlaannut ataatsimut arlalinnulluunniit atuinermigut sinneqartoorutiminit innuttaasunik tapersersortarialinnik isumaginnissaaq:
a) Nammineq suliffeqarfimmini aningaasaleeqqinneq.
b) Suliffeqarfittut innuttaasunik tapersersortarialinnik suliffissaqartitsisutut nalunaarsugaasimasunut allanut aningaasaliineq imaluunniit tunissuteqarneq.
c) Kattuffinnut tamanut iluaqutaasussanik imaluunniit tamanut ajunngitsuliornissamik siunertaqartunut tunissutit.
d) Suliffeqarfimmik piginnittunut iluanaarutinik allatigulluunniit agguagarsiassanik killeqartumik akiliineq, takuuk § 8.

 

  § 8. Suliffeqarfittut innuttaasunik tapersersortarialinnik suliffissaqartitsisutut nalunaarsugaasumi piginnittut, aallaqqaammut aningaasaliissutaaqqaartut annertoqataannik aallaqqaammut aningaasaliissutaaqqaarsimasut ukiumut naammaginartumik erniaqartinneranut naapertuuttunik suliffeqarfimmi piffissami pigisimasaminni ataatsimut ajunngitsorsiassanik taamaallaat tigusisinnaatitaapput. Qanoq ernialersuineq naammaginartuunersoq pisunik ataasiakkaanik tamaginni naliliisoqarneratigut tamanna aalajangerneqartassaaq, taamaattoq takuuk imm. 2.
  Imm. 2.  Pisortat erniatut kisitsisut qaqugukkulluunniit aalajangiinerat 15 procentimik tapeqartillugu qaangerlugu ukiumut erniortinneqarsimappat, imaluunniit akileraaruteqareernermi suliffeqarfiup angusaanit 35 procentit sinnerlugit iluanaarutitut akilerneqarpata, erniortitsineq naammaginassanngilaq.
  Imm. 3.  Pissarsiassanik tunniussisoqassappat, pissarsiassanut aalajangersakkanut suliffeqarfiup inatsisit allat, taassuma malittarisassai imaluunniit malittarisassaqarsimanngippat pilersitsinermut uppernarsaat immaqalu tamatumunnga isumaqatigiissut, malillugit malitassaannut naapertuuttumik tamanna pissaaq.

 

Suliffeqarfittut innuttaasunik tapersersortarialinnik suliffissaqartitsisutut nalunaarsuineq

 

  § 9.  Suliffeqarfiup suliffeqarfittut innuttaasunik tapersersortarialinnik suliffissaqartitsisutut nalunaarsorneqarnissaa akuerineqarsimappat, takuuk § 4, aammalu suliffeqarfittut innuttaasunik tapersersortarialinnik suliffissaqartitsisutut nalunaarsugaanissamut piumasaqaatinik naammassinnilluni, takuuk §§ 6-8, suliffeqarfik aatsaat suliffeqarfittut innuttaasunik tapersersortarialinnik suliffissaqartitsisutut nalunaarsorneqarsinnaavoq.
  Imm. 2.  Suliffeqarfimmik suliffeqarfittut innuttaasunik tapersersortarialinnik suliffissaqartitsisutut nalunaarsorneqarnissamut akuerineqarsimasumik Atuisartoqarnermut Unammilleqatigiinnermullu Aqutsisoqarfik nalunaarsuivoq, takuuk § 4.

 

Suliffeqarfittut innuttaasunik tapersersortarialinnik suliffissaqartitsisutut nalunaarsugaajunnaarneq

 

  § 10.  Suliffeqarfik, suliffeqarfittut innuttaasunik tapersersortarialinnik suliffissaqartitsisutut nalunaarsuiffimmi suliffeqarfittut innuttaasunik tapersersortarialinnik suliffissaqartitsisutut nalunaarsugaasimasoq, takuuk kapitali 4, §§ 6-8-mi nalunaarsuinissamut piumasaqaatinik tamanik naammassinnikkunnaarpat, suliffeqarfiup sapinngisamik piaartumik suliffeqarfittut innuttaasunik tapersersortarialinnik suliffissaqartitsisutut nalunaarsuiffimmi nalunaarsorsimanini allanngortissavaa, taamaalilluni suliffeqarfik tamatuma kingorna suliffeqarfittut innuttaasunik tapersersortarialinnik suliffissaqartitsisutut nalunaarsorsimajunnaassalluni. Taamaattoq suliffeqarfiup §§ 6-8-mi nalunaarsorneqarnissamut piumasaqaatit naammassineqarsimanngitsut piffissaliussap naleqquttup malillugu Atuisartoqarnermut Unammilleqatigiinnermullu Aqutsisoqarfimmit imm. 2 malillugu aalajangersarneqartup iluani, iluarsisimappagit, suliffeqarfiup taamatut nalunaarsorsimajunnaarnissaq isumagissanngilaa.
  Imm. 2. Suliffeqarfik tamatuminnga qinnuteqarpat, aamma suliffeqarfik piffissaliussap naammaginartup iluani iluarsiisinnaasoq Atuisartoqarnermut Unammilleqatigiinnermullu Aqutsisoqarfillu naliliippat, §§ 6-8-mi nalunaarsugaanissamut piumasaqaatit naammassineqarsimanngitsut iluarsineqarnissaannut suliffeqarfimmut nalunaarsugaasimasumut Atuisartoqarnermut Unammilleqatigiinnermullu Aqutsisoqarfik piffissamik naammaginartumik piffissaliinermik aalajangiissaaq.

 

Suliffeqarfittut innuttaasunik tapersersortarialinnik suliffissaqartitsisutut nalunaarsugaanermut taaguutip atorneqarnissaanut suliffeqarfiit nalunaarsorsimasut kisermaassisussaatitaanerat

 

  § 11.  Suliffeqarfiit kapitali 4 naapertorlugu suliffeqarfinnut innuttaasunik tapersersortarialinnik suliffissaqartitsisunut nalunaarsuiffimmi nalunaarsorsimasut, atiminni nittarsaanerminnilu suliffeqarfittut innuttaasunik tapersersortarialinnik suliffissaqartitsisutut nalunaarsugaanermut taaguutip atornissaanut kisermaassisussaatitaapput.
  Imm. 2. Suliffeqarfik § 4 naapertorlugu nalunaarsorneqarnissaq Atuisartoqarnermut Unammilleqatigiinnermullu Aqutsisoqarfimmit akuerineqarsimappat, aammalu kapitali 4 naapertorlugu suliffeqarfinnut innuttaasunik tapersersortarialinnik suliffissaqartitsisunut nalunaarsuiffimmi suliffeqarfittut innuttaasunik tapersersortarialinnik suliffissaqartitsisutut nalunaarsorsimalluni, aatsaat suliffeqarfittut innuttaasunik tapersersortarialinnik suliffissaqartitsisutut nalunaarsorsimasutut taaguutip atorneqarnissaanut suliffeqarfik pisinnaatitaavoq.

 

Kapitali 3

Suliffeqarfiup pisussaaffii

 

Qitiusumik aqutsisutut oqartussaasut pisussaaffii

 

  § 12. Suliffeqarfiup oqartussanut paasissutissanik tunniussinerani aammalu pissutsit Inatsisartut inatsisaanni pineqartunut ilaasut pillugit paasissutissanik nalunaarsuinermi, suliffeqarfiup eqqortunik tamakkiisunillu paasissutissanik tunniussinissaanut, suliffeqarfimmi qitiusumi aqutsisutut oqartussaasoq akisussaaffeqarpoq. Akisussaaffeqarnermi ilatigut suliffeqarfiup suliffeqarfittut innuttaasunik tapersersortarialinnik suliffissaqartitsisutut nalunaarsorneqarnissaanik akuersissuteqarnissamik qinnuteqarnermi, suliffeqarfiup suliffeqarfinnut innuttaasunik tapersersortarialinnik suliffissaqartitsisunut nalunaarsuiffimmi suliffeqarfittut innuttaasunik tapersersortarialinnik suliffissaqartitsisutut nalunaarsorneqarnerani, suliffeqarfiup pissutsit Inatsisartut inatsisaanni pineqartunut ilaasut pillugit nalunaarusiornerani, suliffeqarfiup oqartussat suliffeqarfimmut tassungalu tunngasunik ingerlataannillu nakkutilliineranni paasissutissanik tunniussinerani, suliffeqarfiup paasissutissanik tunniussinera pineqartunut ilaavoq.
  Imm. 2.  Suliffeqarfimmi nalunaarsorsimasumi qitiusumi aqutsisutut oqartussap § 10-imi tamanna pillugu aalajangersakkat malillugit suliffeqarfinnut innuttaasunik tapersersortarialinnik suliffissaqartitsisunut nalunaarsuiffimmi suliffeqarfiup nalunaarsorsimajunnaarsinnissaa akisussaaffigaa, takuuk kapitali 4.

 

Nalunaarusiorneq aamma nalunaarusianik nalunaarsuineq

 

  § 13. Suliffeqarfik innuttaasunik tapersersortarialinnik suliffissaqartitsisutut nalunaarsorsimasoq ukiumoortumik naatsorsuutit pillugit inatsisip Kalaallit Nunaannut atuutilersinneqarnera pillugu peqqussut naapertorlugu ukiut tamaasa ukiumut nalunaarusiamik saqqummiussisassaaq minnerpaamillu naatsorsuusiornermi malitassanut B-nut maleruagassat malissallugit.
  Imm. 2. Suliffeqarfiup innuttaasunik tapersersortarialinnik suliffissaqartitsisutut nalunaarsorsimasup imm. 1 naapertorlugu ukiumoortumik nalunaarusiaq, kingusinnerpaamik suliffeqarfiup ukiumoortumik naatsorsuutit pillugit inatsisip Kalaallit Nunaannut atuutilersinneqarnera pillugu peqqussummi tamanna pillugu aalajangersakkat naapertorlugit ukiumoortumik nalunaarusiamik Inuussutissarsiornermut Aqutsisoqarfimmut nassiussineranut peqatigitillugu, Atuisartoqarnermut Unammilleqatigiinnermullu Aqutsisoqarfimmut nassiutissavaa.
  Imm. 3. Ukiumoortumik naatsorsuutit pillugit inatsisip Kalaallit Nunaannut atuutilersinneqarnera pillugu peqqussut malillugu ukiumoortumik nalunaarusiamut piumasaqaatit saniatigut, ukiumoortumik nalunaarusiamik nassiussinermut atatillugu ukiut tamaasa suliffeqarfittut innuttaasunik tapersersortarialinnik suliffissaqartitsisutut nalunaarsugaasimasup pissutsit uku pillugit nalunaarusiussaaq:
1) Aqutsisuni maannakkut siusinnerusukkullu ilaasortat sulinerannut akissarsiat tamarmiusut aqutsisuni oqartussanut ataasiakkaarlugit agguarlugit aamma suliffeqarfiup pilersitsisuinut piginnittuinullu akissarsiat.
2) Qanittumik suleqatigisanut isumaqatigiissutit.
3) Aningaasat tigoriaannaat pigisallu nalillit allat suliffeqarfiup pisuussutaanit agguagarsiaasut imaluunniit agguaanneqartut.
4) Suliffeqarfiup § 7, imm. 1, nr. 1 naapertorlugu innuttaasunik ikiortarialinnut siunertani qanoq naammassineraa, § 7, imm. 1, nr. 3 naapertorlugu qanoq pisortanut attuumassuteqannginnersoq, aamma § 7, imm. 1, nr. 4 naapertorlugu sulinermini qanoq akuutitsinersoq akisussaassuseqarnersorlu.
  Imm. 4. Suliffeqarfik innuttaasunik tapersersortarialinnik suliffissaqartitsisutut nalunaarsorsimasoq pissarsiassanik akiliippat, suliffeqarfik naatsorsuinermik akiliinermut atatillugu aningaasaatini aningaasaliissutaasimasut erniortinneqarnerannik takutitsisumik, Atuisartoqarnermut Unammilleqatigiinnermullu Aqutsisoqarfimmut nassiussissaaq.
  Imm. 5. Paasissutissat imm. 3, nr. 1-4-imi taaneqartut suliffeqarfiup ukiumoortumik nalunaarusiaani takuneqarsinnaappata, paasissutissat imm. 3 malillugu nalunaarutigineqarsimasutut isigineqassapput.

 

  § 14.  Suliffeqarfiup ukiumoortumik nalunaarusiaa aamma § 13 malillugu allatigut nalunaarusiaa suliffeqarfinnut innuttaasunik tapersersortarialinnik suliffissaqartitsisunut nalunaarsuiffimi nalunaarsorneqassaaq, takuuk kapitali 4.

 

Akissarsiat

 

  § 15. Akissarsianik tunniussinerup aningaasanit, suliaqarnerup suussusaa suliaqarnerullu annertussusaa malillugu nalinginnaasutut isigineqartunit, aammalu suliffeqarfiup innuttaasunik tapersersortarialinnut siunertaanut sanilliullugu isumannaatsutut isigineqartariaqartunit, annertunerunnginnissaa, suliffeqarfimmi innuttaasunik tapersersortarialinnik suliffissaqartitsisutut nalunaarsorneqartumi qitiusumik aqutsisutut oqartussat nakkutigissavaat.

 

Atorunnaarsitsineq, aningaasaatit appartinneri aamma nalunaarsorsimajunnaarneq

 

  § 16. Suliffeqarfittut innuttaasunik tapersersortarialinnik suliffissaqartitsisutut nalunaarsorsimasup atorunnaarsinnerani sinneqartoorutaasimasut § 7, imm. 1, nr. 5 naapertorlugit atorneqassapput.
  Imm. 2. Suliffeqarfittut innuttaasunik tapersersortarialinnik suliffissaqartitsisutut nalunaarsugaasimasumi aningaasaatit appartinnerini agguagarsiat § 7, imm. 1, nr. 5-imi aalajangersarneqarsimasut killiliussat iluanni tunniunneqassapput.
  Imm. 3.  § 7, imm. 1, nr. 5 malillugu suliffeqarfiup sinneqartoorutaannit innuttaasunik tapersersortarialinnik isumaginnissamut pisussaaffeqarneq, sinneqartoorutinit suliffeqarfiup, suliffeqarfittut innuttaasunik tapersersortarialinnik suliffissaqartitsisutut nalunaarsorsimanerani katersorneqarsimasunut tunngatillugu, suliffeqarfittut innuttaasunik tapersersortarialinnik suliffissaqartitsisutut nalunaarsorsimajunnaarnerata kingorna aamma atuutissaaq.

 

Kapitali 4

Suliffeqarfinnut innuttaasunik tapersersortarialinnik suliffissaqartitsisunut nalunaarsuinermut nalunaarsuiffik

 

  § 17.  Naalakkersuisut inatsisartut inatsisaat malillugu suliffeqarfiit suliffeqarfittut innuttaasunik tapersersortarialinnik suliffissaqartitsisutut nalunaarsugaanerannut atugassamik nalunaarsuiffimmik pilersitsillutillu ingerlatsissapput, taamaattoq takukkit imm. 2 aamma 3.
Imm. 2. Naalakkersuisut sinnerlugit oqartussaq imaluunniit suliffeqarfik imm. 1 malillugu nalunaarsuiffimmik pilersitsissasoq ingerlatsissasorlu, Kalaallit Nunaanni imaluunniit Danmarkimi pisortani oqartussamut imaluunniit pisortat suliffeqarfiutaannut Naalakkersuisut isumaqatigiissuteqarsinnaapput.
Imm. 3. Inatsisartut inatsisaat malillugu suliffeqarfittut innuttaasunik tapersersortarialinnik suliffissaqartitsisutut suliffeqarfiit nalunaarsornissaannut atugassatut, oqartussap imaluunniit suliffeqarfiup nalunaarsuiffia Naalakkersuisunit atorneqassasoq, pillugu Kalaallit Nunaanni imaluunniit Danmarkimi pisortani oqartussamut imaluunniit pisortat suliffeqarfiutaannut Naalakkersuisut isumaqatigiissuteqarsinnaapput.

 

§ 18.  § 17 malillugu nalunaarsuiffimmik pilersitsinissaq ingerlatsinissarlu aammalu tassunga atatillugu pissutsit attuumassuteqartut tamaasa pillugit aalajangersakkanik erseqqinnerusunik Naalakkersuisut aalajangersaasinnaapput. Naalakkersuisut ilaatigut pissutsit makkua pillugit aalajangersakkanik erseqqinnerusunik aalajangersaasinnaapput:
1)  Nalunaarsuiffimmik pilersitsineq ingerlatsinerlu.
2)  Nalunaarsuiffimmut isersinnaaneq atorneqarneralu.
3)  Inatsisartut inatsisaat malillugu nalunaarsuineq nalunaarsugaajunnaarsitsinerlu.
4)  Inatsisartut inatsisaat malillugu nalunaarusiornerit.
5)  Inatsisartut inatsisaat malillugu nalunaarsuinerni, nalunaarsugaajunnaarsitsinermi nalunaarusiornermilu IT atorlugu periaatsinik aalajangersimasunik, immikkut digitalikkut ilutsinik, digitalikkut atsiornernik aamma ilusissaannut imarisassaannullu piumasaqaatinik allanik atuinissaq.
6)  Paasissutissat nalunaarsuiffimmiittussat paasissutissallu qanoq annertutigisumik tamanit pissarsiarineqarsinnaaneri.
7)  Inatsisartut inatsisaat malillugu nalunaarsuinermut, nalunaarsugaajunnaarsitsinermut nalunaarusiornermullu akisussaaneq, ilanngullugit ilaatigut nalunaarsuinerup, nalunaarsugaajunnaarsitsinerup nalunaarusiornerulluunniit isumaginissaanut pissusissamisoortumik piginnaatitsissut aamma tassunga atatillugu uppernarsaatit atuuttuuneri.
8)  Nalunaarsuiffimmut isersinnaanermut atorneqarneranullu atatillugu aningaasartuutinik akiliineq, ilanngullugit ilaatigut nalunaarsuinermut akiliutit akilerneqarneri, kingusinaartumik akiliinermi akileeqqusinermut allakkiat aamma kingusinaartumik akiliinermi ernianik akiliinerit.

 

Kapitali 5

Atuisartoqarnermut Unammilleqatigiinnermullu Aqutsisoqarfiup nakkutilliinera aamma oqartussat suliarinninnerat ilaalu ilanngullugit

 

  § 19.  Atuisartoqarnermut Unammilleqatigiinnermullu Aqutsisoqarfik inatsisartut inatsisaanni pineqartunut ilaasunut tunngasunut nakkutilliisuuvoq.
  Imm. 2. Inatsisartut inatsisaata, aalajangersakkat inatsisartut inatsisaat malillugu aalajangersagaasut aamma akuersissuteqarnermi tunngavissarititaasut naammassineqarnissaat pillugu Atuisartoqarnermut Unammilleqatigiinnermullu Aqutsisoqarfik peqqussuteqarsinnaavoq. Peqqusissuteqarneq suliffeqarfinnut aamma inunnut Inatsisartut inatsisaanni pineqartunut ilaasunut nalunaarutigineqarsinnaavoq.
  Imm. 3. Suliffeqarfiit aamma inuit inatsisartut inatsisaanni pineqartunut ilaasut paasissutissat oqartussatut suliarinninnissamut aamma inatsisartut inatsissaanni pineqartunut ingerlataqarnernut pisariaqartut tamaasa Atuisartoqarnermut Unammilleqatigiinnermullu Aqutsisoqarfimmut nalunaarutigissavaat aammalu allakkiat tamaasa nassiutissallugit. Atuisartoqarnermut Unammilleqatigiinnermullu Aqutsisoqarfiup inatsisartut inatsisaat malillugu oqartussatut suliarinninnerup ingerlanneqarnissaanut suliffeqarfiit aamma inuit inatsisartut inatsisaanni pineqartunut ilaasut paasissutissanik allakkianillu Atuisartoqarnermut Unammilleqatigiinnermullu Aqutsisoqarfiup pisariaqarsorisaannik, aammalu Atuisartoqarnermut Unammilleqatigiinnermullu Aqutsisoqarfiup pisariaqartitaatut iliorlutik aammalu iluseqartillugit, nassiussinissamik peqqusinnaavai.
  Imm. 4. Suliffeqarfiit aamma inuit inatsisartut inatsisaanni pineqartunut ilaasut, pissutsit ingerlatallu Inatsisartut inatsisaanni akuersissuteqarnernilu pineqartunut ilaasut pillugit nalunaarusianik Atuisartoqarnermut Unammilleqatigiinnermullu Aqutsisoqarfimmut nassiussissapput. Suliffeqarfittut innuttaasunik tapersersortarialinnik suliffissaqartitsisutut nalunaarsorsimasut ukiut tamaasa § 13 malillugu ukiumoortumik nalunaarusiamik Atuisartoqarnermut Unammilleqatigiinnermullu Aqutsisoqarfimmut nassiussisassapput, tamatumalu saniatigut tamanna Atuisartoqarnermut Unammilleqatigiinnermullu Aqutsisoqarfimmit pisariaqartutut isigineqarpat, nalunaarusianik Atuisartoqarnermut Unammilleqatigiinnermullu Aqutsisoqarfimmut nassiusissallutik.
  Imm. 5. Nalunaarusiorneq pillugu aalajangersakkanik erseqqinnerusunik Naalakkersuisut aalajangersaasinnaapput.
  Imm. 6. Atuisartoqarnermut Unammilleqatigiinnermullu Aqutsisoqarfik inatsisartut inatsisaat malillugu akuersissuteqarnerni aalajangiinernilu nalunaarusiortarneq pillugu piumasaqaatinik aalajangersaasinnaavoq.

 

  § 20.  Suliffeqarfiit inuillu inatsisartut inatsisaanni pineqartunut ilaasut suliamik suliarinninnermut allatigullu inatsisartut inatsisaat malillugu oqartussatut suliarinninnermut atatillugu aningaasartuutinik akiliissapput. Akiliineq akiliutitut imaluunniit aningaasartuutit utertinnerisigut akileeqqusinikkut pisinnaavoq.
  Imm. 2. Imm. 1 malillugu oqartussat aningaasartuutaannik suliffeqarfiit inuillu akiliinissaat pillugu aalajangersakkanik erseqqinnerusunik Naalakkersuisut aalajangersaasinnaapput.
  Imm. 3. Imm. 1 malillugu oqartussat aningaasartuutaannik suliffeqarfiit inuillu akiliisarnerat pillugu atugassarititaasunik erseqqinnerusunik, inatsisartut inatsisaat malillugu akuersissuteqarnerni aalajangiinernilu Atuisartoqarnermut Unammilleqatigiinnermullu Aqutsisoqarfik aalajangersaasinnaavoq.

 

  § 21.  Ingerlatat pissutsillu inatsisartut inatsisaanni pineqartunut ilaasut pillugit ukiumoortumik nalunaarusiamik aamma ukiup siuliani inatsisartut inatsisaat malillugu Atuisartoqarnermut Unammilleqatigiinnermullu Aqutsisoqarfiup nakkutilliinera aalajangiinerilu pillugit ukiut tamaasa kingusinnerpaamik februarip aallaqqaataani Atuisartoqarnermut Unammilleqatigiinnermullu Aqutsisoqarfik Naalakkersuisunut nassiussisassaaq.
  Imm. 2.  Ingerlatat pissutsillu inatsisartut inatsisaanni pineqartunut ilaasut pillugit nalunaarusianik allanik aamma paasissutissanik allanik aamma inatsisartut inatsisaat malillugu Atuisartoqarnermut Unammilleqatigiinnermullu Aqutsisoqarfiup nakkutilliinera aalajangiisarneralu pillugit Atuisartoqarnermut Unammilleqatigiinnermullu Aqutsisoqarfiup Naalakkersuisunut nassiussisarnissaa pillugu Naalakkersuisut aalajangersakkanik aalajangersaasinnaallutillu aalajangiisinnaapput.

 

Kapitali 6

Naammagittaalliorsinnaaneq

 

  § 22. Inatsisartut inatsisaat malillugu imaluunniit aalajangersakkat inatsisartut inatsisaat malillugu aalajangersarneqartut malillugit Atuisartoqarnermut Unammilleqatigiinnermullu Aqutsisoqarfimmit aalajangiiffigineqartut Naalakkersuisunut suliassanngortinneqarsinnaapput, taamaattoq takuuk imm. 3.
  Imm. 2.  Naammagittaalliuut aalajangiinerup pineqartumut nalunaarutigineraniit kingusinnerpaamik sapaatit akunneri 4 qaangiutsinnagit Naalakkersuisunit tiguneqarsimassaaq.
  Imm. 3. Imm. 1-imi taama aalajangersagaqaraluartoq Atuisartoqarnermut Unammilleqatigiinnermullu Aqutsisoqarfiup § 5, imm. 2 imaluunniit § 10, imm. 2 malillugit iluarsiinissamut piffissaliussap aalajangersarneqarnera pillugu aalajangiineri Naalakkersuisunut suliassanngortinneqarsinnaanngillat.
  Imm. 4. Imm. 1 naapertorlugu naammagittaalliuut Naalakkersuisunit suliarineqarnissaa itigartinneqarsinnaavoq naammagittaalliuteqartoq taperserneqassanngitsoq Naalakkersuisunit qularineqanngippat.

 

  § 23. Naalakkersuisunit aalajangiussat allaffissornikkut oqartussamut allanut suliakkiunneqarsinnaanngillat.

 

Kapitali 7

Pineqaatissiisarnermut aalajangersakkat

 

  § 24. Inatsisartut inatsisaata matuma unioqqutinneranut pisuni makkunani akiliisitsisoqarsinnaavoq:
1)  Inuk imaluunniit suliffeqarfik tamatumunnga § 4 malillugu Atuisartoqarnermut Unammilleqatigiinnermullu Aqutsisoqarfimmit akuersissuteqarfigineqarsimanani, kapitali 4 naapertorlugu suliffeqarfinnut innuttaasunik tapersersortarialinnik suliffissaqartitsisunut nalunaarsuiffimmi, suliffeqarfimmik suliffeqarfittut innuttaasunik tapersersortarialinnut suliffissaqartitsisutut nalunaarsuisimasoq.
2)  Inuk imaluunniit suliffeqarfik § 4 malillugu Atuisartoqarnermut Unammilleqatigiinnermullu Aqutsisoqarfimmit akuersissuteqarfigineqarsimanani atimini, nittarsaanermini allatigulluunniit suliffeqarfittut innuttaasunik tapersersortarialinnik suliffissaqartitsisutut nalunaarsugaasumut taaguummik atuisoq.
3) Suliffeqarfik kapitali 2-mi piumasaqaammik ataatsimik arlalinnilluunniit naammassinninngitsoq ingerlaannaq Atuisartoqarnermut Unammilleqatigiinnermullu Aqutsisoqarfimmut nalunaarutiginagu, suliffeqarfimmi innuttaasunik tapersersortarialinnik suliffissaqartitsisutut nalunaarsugaasumi qitiusumik aqutsisutut oqartussat § 5, imm. 1-imi aalajangersakkamik unioqqutitsisut.
4)  Suliffeqarfik innuttaasunik tapersersortarialinnik suliffissaqartitsisutut nalunaarsugaasoq, akileraaruteqareernermi suliffeqarfiup sinneqartoorutaanik innuttaasunik tapersersortarialinnik isumaginninnani, § 7, imm. 1, nr. 5-imi aalajangersakkamik unioqqutitsisoq.
5)  Suliffeqarfik innuttaasunik tapersersortarialinnik suliffissaqartitsisutut nalunaarsugaasoq, atorunnaarsitsinermi sinneqartoorutinik imaluunniit aningaasaatit appartinneqarnerini agguagarsisitsinikkut innuttaasunik tapersersortarialinnik isumaginninnani, § 16, imm. 1-imi aamma 2-mi aalajangersakkanik unioqqutitsisoq.
6)  Siusinnerusukkut suliffeqarfittut innuttaasunik tapersersortarialinnik suliffissaqartitsisutut nalunaarsugaasimasoq, sinneqartoorutinik suliffeqarfiup inatsisartut inatsisaat malillugu nalunaarsorsimanerata nalaani katersorneqarsimasut atorlugit innuttaasunik tapersersortarialinnik isumaginninnani, § 16, imm. 3-mi aalajangersakkamik unioqqutitsisoq.
7) Inuk imaluunniit suliffeqarfik inatsisartut inatsisaanni pineqartunut ilaasoq paasissutissanik eqqunngitsunik imaluunniit paatsuungatitsisunik imaluunniit paasissutissanik pisortani oqartussap inatsisartut inatsisaat imaluunniit aalajangersakkat inatsisartut inatsisaat malillugu aalajangersagaasut malillugit piumasaqaatigisaannik nipangiussiinnartoq, takuuk § 3, imm. 1 aamma 2, § 12, imm. 1, § 13 aamma § 19, imm. 2 aamma 3.
8)  Suliffeqarfimmi innuttaasunik tapersersortarialinnik suliffissaqartitsisutut nalunaarsugaasumi qitiusumik aqutsisutut oqartussat, suliffeqarfinnut innuttaasunik tapersersortarialinnik suliffissaqartitsisunut nalunaarsuiffimmi kapitali 4 naapertorlugu suliffeqarfik nalunaarsorsimajunnaartinnagu, § 10-mi aamma § 12, imm. 2-mi aalajangersakkanik unioqqutitsisut.
9)  Suliffeqarfik innuttaasunik tapersersortarialinnik suliffissaqartitsisutut nalunaarsugaasoq, suliffeqarfittut innuttaasunik tapersersortarialinnik suliffissaqartitsisunut nalunaarsuiffimmi § 13 malillugu suliffeqarfiup ukiumoortumik nalunaarusiaanik allatigulluunniit nalunaarusianik nalunaarsuinani, § 14-imi aalajangersakkamik unioqqutitsisoq.
  Imm. 2.  Unioqqutitsinermut Kalaallit Nunaanni pinerluttulerinermi inatsit malillugu akiliisitsisoqarsinnaasoq, aalajangersakkani inatsisartut inatsisaat malillugu aalajangersarneqartuni aalajangersarneqarsinnaavoq.
  Imm. 3.  Imm. 1 imaluunniit aalajangersakkat inatsisartut inatsisaat malillugu aalajangersarneqartut malillugit akiliisitsineq, takuuk imm. 2, Kalaallit Nunaanni pinerluttulerinermi inatsimmi malittarisassat malillugit inatsisitigut pisinnaatitaasunut pisussaatitaasunullu peqqussutaasinnaavoq.
  Imm. 4.  Inatsisartut inatsisaat imaluunniit aalajangersakkat inatsisartut inatsisaat malillugu aalajangersarneqartut malillugit akiliisitsinerit nunatta karsianut tutsinneqassapput.

 

Kapitali 8

Atuutilernera

 

  § 25.  Inatsisartut inatsisaat ulloq 1. januar 2020 atuutilerpoq.

 

 

 

Namminersorlutik Oqartussat, ulloq 28. november 2019

 

 

 

Kim Kielsen