§ 1

Qamutit motoorillit akileraarutaat pillugit Inatsisartut inatsisissaat nr. 3, 16. juni 1987-imeersumi, kingullermik qamutit motoorillit akileraarutaat pillugit Inatsisartut inatsisaata allanngortinneqarnera pillugu Inatsisartut inatsisaanni nr. 10, 3. december 2012-imeersumi allanngortinneqartumi, makkua allanngortinneqarput:

1.  § 2, imm. 1, imatut oqaasertalerneqarpoq:
”  § 2.  Akileraarutit ukiumut annertussuseqassapput:
1)  Qamutit motoorillit 1.000 kg-t angullugit oqimaassusillit: kr. 6.554.
2)  Qamutit motoorillit 1.001 kg-niit 1.200 kg-t angullugit oqimaassusillit: kr. 10.049.
3)  Qamutit motoorillit 1.201 kg-niit 1.500 kg-t angullugit oqimaassusillit: kr. 10.747.
4)  Qamutit motoorillit 1.501 kg-niit 1.800 kg-t angullugit oqimaassusillit: kr. 15.231.
5)  Qamutit motoorillit 1.800 kg sinnerlugit oqimaassusillit: kr. 17.575.
6)  Motorcykelit: kr. 3.540.
7)  Qamutit motoorillit nunakkoorutit minnerusut sisamanik amerlanernilluunniit assakaasullit: kr. 2000.”

2.  § 2-imi imm. 2-tut nutaatut ilanngunneqarpoq:
”  Imm. 2.  Qamutinut motoorilinnut, taamaallaat innaallagissamik imaluunniit brintimik ingerlateqartunut, kiisalu plug-in-hybridbiilinut, batterinik innaallagissamik immeqqinneqarsinnaasunik ingerlatilinnut akileraarut ukiumut kr. 6.554-nik annertussuseqarpoq.”

Imm. 2-4 tamatuma kingorna imm. 3-5-inngorput.

3.  § 2, imm. 2, imm. 3-nngortoq, imatut oqaasertalerneqarpoq: 
”  Imm. 3.  Akileraarut siumoortumik ukiup affakkaarlugu akilerneqartartoq, ulloq 1. april aamma 1. oktober akiligassanngortarpoq aammalu kingusinnerpaamik ulloq 30. april aamma 31. oktober akilerneqassalluni. Piffissaq eqqorlugu akiliiffissaq ulloq kingulleq arfininngorneruppat, sapaataappat imaluunniit nalliuttuuppat, piffissamut killiliussat ulluinnarmut tullermut sivitsorneqassaaq.”

§ 2

Inatsisartut inatsisaat ulloq 1. januar 2020 atuutilerpoq aammalu siullermeertumik piffissamut akileraaruteqarfiusussamut 1. april 2020-miit 30. september 2020-mut, akileraarutip ulloq 1. april 2020 akiligassanngorfiani, atuutissalluni, taamaattoq takuuk imm. 2.
  Imm. 2.  Nr. 1-imi aalajangersagaq ulloq 1. januar 2021 atuutilerpoq aammalu siullermeertumik piffissamut akileraaruteqarfiusussamut 1. april 2021-mit 30. september 2021-mut, akileraarutip ulloq 1. april 2021 akiligassanngorfiani, atuutissalluni.

Namminersorlutik Oqartussat, ulloq 18. november 2019

Kim Kielsen