§ 1

Isiginnaartitsisarfeqarneq pillugu Inatsisartut inatsisaat nr. 23, 18. november 2010-meersoq imaattunik allannguuteqarpoq:

1. § 4, imm. 2, ima oqaasertalerneqassaaq:

“  Imm. 2. Naalakkersuisut inassuteqartoqareerneratigut ilaasortassanik imatut toqqaassapput:

1) Ilaasortaq ataaseq SILA-mit, Kalaallit Nunaanni Isiginnaagassiortut Peqatigiiffiannit, inassuteqartoqareerneratigut toqqarneqassaaq,

2) ilaasortaq ataaseq kommunit peqatigiillutik inassuteqareernerisigut, taamaattoq tak. imm. 4, 

3) ilaasortaq ataaseq Kalaallit Atuakkiortut inassuteqareernerisigut,

4) ilaasortaq ataaseq Sulisitsisut inassuteqareernerisigut, aamma

5) ilaasortaq ataaseq Nunatta Isiginnaartitsisarfiani sulisunit inassuteqartoqareerneratigut.”

2. § 4, imm. 4, ima oqaasertaqassaaq:

”  Imm. 4. Kommunit ataatsimut inassutigineqartut pillugit isumaqatigiissinnaanngippata kommunimit inassutigineqartut akornanneersumik Naalakkersuisut toqqaassapput.”

3. § 4-mi imm. 4-p kingorna immikkoortut nutaatut ilanngunneqassapput:

” Imm. 5. Kattuffiit imm. 2, nr. 1, 3 aamma 4-mi eqqaaneqartut arlaat taaguumminik allannguissagaluarpat inassuteqarneq taassumannga isumagineqassaaq.

  Imm. 6. Kattuffiit imm. 2, nr. 1, 3 aamma 4-mi eqqaaneqartut atorunnaarsinneqassagaluarpata Naalakkersuisut ilaasortamik toqqaassapput kattuffiup atorunnaarsinneqartup suliassaqarfigisimasaanik ilisimannittumik.”

Imm. 5-9 tamatuma kingorna imm. 7-11-nngussapput.

4. § 7-ip kingorna una ilanngunneqassaaq:

”  § 7 a. Nunatta Isiginnaartitsisarfia atorfinitsitsinermut tunngatillugu atugassarititaasut allallu pissutsit eqqarsaatigalugit, atorfeqarnermi soraarsitsinermilu pissutsinut tunngaviusumik isumaqatigiissummi Kalaallit Nunaata Isiginnaartitsisarfiata Naalakkersuisullu akornanni isumaqatigiissutaasumi isumaqatigiissutigineqartut iluanni sulissalluni pisussaaffeqarpoq, tak. imm. 2.

  Imm. 2.  Tunngaviusumik isumaqatigiissut minnerpaamik atorfinitseriaatsit, tunngaviusumik akissarsianut qaffasissutsit, tapit, akissarsiat iluarsiiffigisarnerat, pensionisianut ilanngussisarneq aamma atorfinitsitsinermi nalinginnaasumik atugassarititat pillugit aalajangersakkanik imaqassaaq.”

§ 2

Inatsisartut Inatsisaat manna 1. august 2019 atuutilissaaq.

Namminersorlutik Oqartussat, ulloq 12. juni 2019