§ 1

Imigassat ilaannut Kalaallit Nunaanni sananeqarsimasunut akitsuutit pillugit Inatsisartut inatsisaat nr. 20, 11. december 2003-mi Inatsisartut inatsisaanni nr. 1, 26. april 2007-imeersumi aamma Inatsisartut inatsisaanni nr. 9, 19. oktober 2007-imeersumi allanngortinneqartumi, makkua allannguutigineqarput:

1. § 19, imm. 1, ima oqaasertalerneqassaaq:

“Kinaluunniit piaaraluni imaluunniit mianersuaalliorujussuarluni iliuuseqartoq akiliinissamik pineqaatissinneqassaaq:

1) paasissutissanik akitsuutinik nakkutilliinermut atugassanik eqqunngitsunik paatsoorneqarsinnaasunilluunniit tunniussisoq imaluunniit paasissutissanik nipangiussisoq,

2) § 1, § 1 a, § 2, § 3, imm. 1, § 6, imm. 1, § 8, imm. 1, § 9, imm. 1, § 10, imm. 1-imik unioqqutitsisoq, imaluunniit unioqqutitseriaraluartoq,

3) § 11, imm. 1 naapertorlugu peqquneqarnermik malinninngitsoq,

4) nalunaarsorneqarnerup Akileraartarnermik Aqutsisoqarfimmit § 9, imm. 2 imaluunniit § 12, imm. 1 aamma 2 naapertorlugit arsaarinnissutigineqareernerata kingorna ingerlatamik akitsuuteqarfiusumik ingerlatsiinnartoq, imaluunniit

5) nioqqutissanik inatsit naapertorlugu akitsuutaannik akilerneqarsimasussaagaluanik akitsuuserneqarsimanngitsunilli tunniussisoq, pissarsisoq, paarsisoq, atuisoq, assartuisoq imaluunniit pisoq.”

§ 2

Inatsisartut inatsisaat 1. juni 2019-imi atuutilerpoq.

Namminersorlutik Oqartussat, ulloq 24. maj 2019