§ 6, imm 1 naapertorlugu Sanaartukkat innaallagissamut atugassat, innaallagissamut ikkussuinerit aamma atortut innaallagiatortut pillugit Inatsisartut peqqussutaat nr. 12, 3. november 1994-imeersumi, Inatsisartut inatsisaanni nr. 19, 12. juni 2019-imeersumi allanngortinneqartumi, Innaallagissiornermut Oqartussanit aalajangersaneqassaaq:

 

Kapitali 1

Siunertaq

 

§ 1. Nalunaarummi siunertaavoq Kalaallit Nunaanni innaallagiatortut ikkussukkat isumanaassuseqartumik suliarineqarnissaat aamma suliaritinneqartarnissaat qulakkeerniarlugu isumannaallisaaneq, peqqissuseq aamma avatangiisit mianeralugit.

 

Kapitali 2

Atuutsinneqarfia

 

  § 2. Innaallagiatortut ikkussukkat inaallagissamut sakkortuumut tunngasut aammattaaq < 50 V-nik aqutsinermut aamma iluarsiinermut atortunik ikkussuineq, taakkua > 50 V-p atuunneranik aqutsinermut aamma suliaritinneqartarneranut aqutsinermut atorneqarpata, tamakku elinstallatøritut suliffeqarfinnit, akuersissummik pigisaqalersimasunit imaluunniit tapiliussatut/ killeqartumik akuersissummik pigisaqartunit suliap pineqartup suliarineqarnissaanut taamaallaat suliarineqarsinnaapput, taamaattorli tak. immikkoortut 3-6.
  Imm. 2. Suliassat akuersissummik pigisaqarnissamik piumasaqaateqarfiusutut naatsorsuussat tassaapput innaallagissamik pilersuinermut atortumut aalajangerlugit aallartitaatitut ikkunneqartussat imaluunniit attaviikkatut/piikkatut kiisalu taakkununnga ilaapput ledninginut atortut aalajangikkat, tavlit, uuttuutit, ikkussuiffissat aamma ikkussuinermut atortut aalajangikkat allat aalajangerlugit maskiinanut aamma atortussianut innaallagissamik ingerlasunut ikkussukkamiit aalajangerlugit ikkullugit aallartitaatitut ikkunneqartussat imaluunniit attaviikkatut/piikkatut atorneqartussat. 
  Imm. 3. Suliffeqarfiit inuussutissarsiutigalugu aqutsinermut aamma iluarsiinermut atortunik nioqqutissiortut imaluunniit suliarinnittartut, imm. 1 apeqqutaatinnagu, < 50 V-nik aqutsinermut aamma iluarsiinermut atortunik ikkussuisinnaapput aamma suliarinnissinnaapput.
  Imm. 4.  Suliffeqarfiit inuussutissarsiutigalugu maskiinanik aamma atortunik innaallagiatortunik nioqqutissiortut imaluunniit suliarinnittartut, imm. 1 apeqqutaatinnagu,  aalajangerlugit maskiinanut aamma atortussianut innaallagissamik ingerlasunik aalajangerlugit ikkullugit aallartitaatitut imaluunniit attaviikkatut/piikkatut atorneqartussanik ikkussuisinnaapput aamma suliarinnissinnaapput. 
  Imm. 5.  Tavlinik nioqqutissiortut, imm. 1 apeqqutaatinnagu, tavlinik ikkussorneqarsimasunik attaviikkatut/piikkatut atortuinik ikkussuisinnaapput aamma suliarinnissinnaapput. 
  Imm. 6.  Atortut innaallagiatortut ikkussukkat umiarsuarni, angallatit illutut atorneqartuni aamma timmisartut, qimuttuitsut qamutitaat pinnagit aamma qamutit motorillit, campingvognit aamma qamutit inigisassatut naatsorsuussat pinnagit, inatsimmut ilaatinneqanngillat.

 

§ 3. Nioqqutissiortut § 2-mi piumasaqaatit apeqqutaatinnagit makku suliarisinnaavaat: 
1)  innaallagissap aqqutai aalajangerlugit ikkussukkat fabrikini sulianut atortunut nuunneqarsinnaasunut, 
2)  ikkussukkat innaallagiatortut illuliassat ilaannik sananermut atatillugu piareersaatitut ikkussuineq.

  

  § 4. Suliassat tulliuttut § 2-mi piumasaqaatit apeqqutaatinnagit kikkunnilluunniit suliarineqarsinnaapput:
1)  Qamittaatinik aamma ikkuffinnik iikkamiittunik taarsiineq sakkortunerpaamik 250 V-nik sumiiffinni ussissusia IP20-mit qaffasinnerunissaa piumasaqaataanngippat, imaappat ikkussorneqarsimasoq RCD-mit (HPFI qamittaat) illersugaalluni. 
2)  Qaammaqqusersuutit (armatur) ikkussineq aamma piigaqarneq sumiiffinni ussissusia IP20-mit qaffasinnerunissaa piumasaqaataanngippat aammattaaq uffarfinni.
3)  Allanngortitsineq aamma iluarsaaneq < 50 V-nik aqutsinermut aamma iluarsiinermut atortunik illuni nammineq (privatimik) pigineqartuni.
  Imm. 2. Illuni nammineq (privatimik) pigineqartuni atuisut taamatuttaaq atortunik ikkussisinnaapput aamma piigaqarsinnaapput, taakkunani pussuttartut aalajangersimasut atugassatut naatsorsuunneqartuni, aalajangerlugit ikkussuunneqarsimasut attornagit. Aammattaaq inigisamut atasut qaammaqqusersuutit (armatur) taarserneqarsinnaapput taakku ussissusaat IP20-mit qaffasinnerugaluarpat.

 

Kapitali 3

Akuersissummik pigisaqalernissamik qinnuteqaateqarneq

 

Ataatsimut isigalugu

 

  § 5.  Akuersissut inunnut aamma suliffeqarfinnut suliassanik § 2-mi taaneqartunik suliaqarsinnaanermut, Innaallagissiornermut Oqartussanit tunniunneqartarpoq, inuttut akuersissutitut pigisassatut aamma suliffeqarfimmut akuersissutitut.
  Imm. 2.  Akuersissut ukiumi ataatsimi atuuttuuvoq aamma Kalaallit Nunaat tamakkerlugu atuutsinneqarluni, imaangippat akuersissummik atugassarititaasunik allaannernik aalajangersaasoqarsimanngikkuni. Akuersissut automatiskiusumik nutarterneqartarpoq ukiut tamaasa akuersissummik pigisaqarnermut akitsuutip akilerneqarneratigut.
  Imm. 3.  Inuttut aamma suliffeqarfittut akuersissummik qinnuteqaat Innaallagissiornermut Oqartussanut nassiunneqassaaq qinnuteqaateqarnermut immersugassaq atorlugu, taanna aaneqarsinnaavoq uani www.elmyndighed.gl.
  Imm. 4.  Suliffeqarfik pillugu akuersissummik peqalernissamut qinnuteqaammut makku ilanngunneqassapput:

1)  Suliffeqarfiup qinnuteqaateqartup CVR normua.

2)  Suliffeqarfiup sumiiffimmi inissisimaffigalugu najugaqarfia.

3)  Ateq aamma CPR normu inuup imaluunniit inuit pineqartut, suliffeqarfiup inuttut akuersissummik pigisaqartussatut suliatigut sammisami akuersissummik pigisaqalernissamut qinnuteqaassunneqartut imaluunniit akuerineqartussaasut.

4)  Suliffeqarfiup inuttut nammineq akisussaassuseqartua pillugu paasissutissat, pineqartoq suliffeqarfimmi atorfeqartuunersoq, kisimiilluni suliffeqarfimmik ataasiinnarmik pigineqartumik piginnittuunersoq imaluunniit ingerlatsivimmi peqataasutut inissisimanersoq.

5) Suliffeqarfiup pitsaassutsimik qulakkeerinninnermut atortoqarnera pillugu uppernarsaasersuutit, nakkutilliinermik suliaqartartumit akuerisaasumit akuersissutaajunnartoq, kiisalu nakkutilliinermik suliaqartartup pitsaassutsimik qulakkeerinninnermut atortumit misissuigallarnermini atortup naammaginartuunera pillugu uppernarsaat.

6)  Suliffeqarfik akiliisinnaajunnaartussatut imaluunniit sulianik unitsitsisussatut sulissutigineqannginneranut uppernarsaat.
  Imm. 5.  Inuttut nammineq akuersissummik pigisaqalernissamut qinnuteqaateqarnermut tunngasumut makku ilanngunneqassapput:
1)  Qinnuteqaateqartup aqqi tamaasa aamma CPR normua.
2)  Qinnuteqaateqartup najugaa aamma telefoniata normua pillugit paasissutissat. Tamakkiisumik akuersissummik pigisaqalernissamut tunngatillugu Innaallagissiornermut Oqartussat piumasarisinnaavaat sumi najugaqarnermut uppernarsaatip assingata ilanngunneqarnissaa. 
3)  Qinnuteqaateqartup e-mailikkut allaffigineqarfissaa pillugu paasissutissat.
4) Piginnaasaqarnermik pigisaqalernissamut misilitsissimanerup naammassineqarneranut uppernarsaasersuut.
5)  Akuersissummik pigisaqalernissamut misilitsinnerup angusiffigineqarsimanera pillugu uppernarsaasersuut.

 

Suliffeqarfiup akuersissummik pigisaqarnera

 

  § 6. Innaallagissiornermut Oqartussat elinstallatøritut suliffeqarfimmut akuersissummik pigisaqalerneq nalunaarutigissavaat, qinnuteqaateqartup uppernarsaasersoreerpagit, tassa
1)  suliffeqarfimmi inuk ataaseq imaluunniit inuit arlallit inuttut akuersissummik pigisaqartut suliffeqarfimmut attuumassuteqartut atorfeqartuunersut, kisimiilluni suliffeqarfimmik ataasiinnarmik pigineqartumik piginnittuunersoq imaluunniit ingerlatsivimmi peqataasutut inissisimanersoq,
2)  suliffeqarfik pitsaassutsimik qulakkeerinninnermut atortumik atorsinnaasumik pigisaqarnersoq,
3)  suliffeqarfik akiliisinnaajunnaartussatut imaluunniit sulianik unitsitsisussatut sulissutigineqanngitsoq,
4)  suliffeqarfiup Kalaallit Nunaanni najugaqartutut inissisimanera.
Imm. 2. Suliffeqarfiup piginnittua imaluunniit suliffeqarfik ingerlatsivittut ingerlanneqarpat, taava pisortaanera, suliffeqarfik imaluunniit inuk nammineq pineqartoq allaganngorlugu uppernarsaammik tunniussissaaq ukiut kingulliit pingasut ingerlanerini nalunaarummik matuminnga, siusinnerusukut elinstallatørinik il.il. akuersissuteqartarneq pillugu ilitsersuummik imaluunniit sanaartukkat innaallagissamut atugassat, innaallagissamut ikkussuinerit aamma atortut innaallagiatortut pillugit Inatsisartut Peqqussutaat nr. 12-imik, imaluunniit maleruaqqusanik peqqussutip taasuma malitsigisaanik saqqummersinneqartunik unioqqutitsisimanini pissutigalugu pillarneqarsimaneranut imaluunniit taamaattoqarsimannginneranut tunngasumik.
  Imm. 3.  Innaallagialiornermut Oqartussat akuersissutinik pigineqartunik nalunaarsuiffeqarpoq. Nalunaarsuiffik tamanit takuneqarsinnaavoq Innaallagissiornermut Oqartussat nittartagaanni.

 

  § 7. Innaallagissiornermut Oqartussat ilassutitut akuersissutit aamma killimmik akuersissutit nalunaarutigisinnaavai, tassa sammisami akuersissummik pigisaqarnissamut piumasaqaateqarfiup ilaanik suliassanik suliarinninnissamut, tamanna taamatuttaaq atuuppoq suliffeqarfik Kalaallit Nunaanni inissisimasutut najugaqarfeqanngippat.
  Imm. 2.  Suliffeqarfiit imm. 1 tunngavigalugu akuersissummik pigisaqartut Innaallagissiornermut Oqartussat akuersissummik pigisaqartut allattorsimaffiutaanni ilanngunneqassapput, tassani allallugu suliassat sorliit imaluunniit akuersissummik pigisaqarnermi piffissaq pineqartoq.
  Imm. 3.  Akuersissut tunniunneqarsinnaavoq akuersissummi atugassarititaasut killilerlugit,
1) piffissaq sivisussusilerlugu 
2)  suliassanut ataasiakkaanut tunngatillugu
3)  suliassamut immikkorluinnaq ittumut
4)  nunami sumiinneq apeqqutaatillugu 
Imaluunniit matuma siuliani allattorneqartut akuleriissillugit.

 

§ 8. Suliffeqarfimmit inuttut akuersissummik pigisaqalersimasup pisinnaatitaanernik pisariaqartunik pigisaqarnissaa qulakkeerneqassaaq, tassa inuttut akuersissummik pigisaqalersimasup suliassaminik suliaqarsinnaaneranut.
  Imm. 2.  Imaappat inuttut akuersissummik pigisaqalersimasoq suliffeqarfimmut atorfeqartitaasutut attuumassuteqarluni, taava pineqartoq atorfeqartinneqarsimassaaq sivikinnerpaamik qaammatinik pingasunik ilimasaarneqarluni soraarsinneqarsinnaassaaq qaammatini arfinilinni atorfeqareernermigut.

 

Inuk inuttut akuersissummik pissarsineq

 

  § 9. Inuk inuttut akuersissummik pigisaqalerneq Innaallagissiornermut Oqartussanit nalunaarutigineqassaaq uppernarsaasersorneqareerpat, tassa
1)  qinnuteqaateqartup piginnaasaasanik peqalernissamut misilitsinnermut angusereerpat, tak. ilanngussaq 1,
2)  qinnuteqaateqartoq nammineersinnaassuseqarpat aamma nammineersinnaanngitsutut nakkutigineqanngippat,
3)  qinnuteqaateqartoq suliffeqarfimmut attuumassuteqarpat atorfeqartutut, piginnittutut imaluunniit ingerlatsivimmi peqataasutut,
4)  qinnuteqaateqartoq suliffeqarfiup aaqqissuussaanerani imatut inissisimappat sulisunik aamma suliassanut akisussaassuseqarfigisassanut aqutsisutut pisinnaatitaanerit pisariaqartut pigalugit. 
  Imm. 2. Qinnuteqaateqartoq allaganngorlugu uppernarsaammik tunniussissaaq nammineq ukiut kingulliit pingasut ingerlanerini innaallagissamut ikkussuinerit aamma atortut innaallagiatortut pillugit Inatsisartut Peqqussutaat nr. 12-imik, siusinnerusukut elinstallatørinik il.il. akuersissuteqartarneq pillugu ilitsersuummik imaluunniit sanaartukkat innaallagissamut atugassat, imaluunniit atortut sakkortuumik innaallagiatortut aamma atortussiat innaallagiatortut pillugit inatsimmik, imaluunniit maleruaqqusanik inatsisit taakkua malitsigisaannik saqqummersinneqarsimasunik unioqqutitsisimanini pissutigalugu pillarneqarsimaneranut imaluunniit taamaattoqarsimannginneranut tunngasumik.
  Imm. 3. Innuttaasunut nunanit allaneersunut imm. 1, normu 1 atuutinngilaq, qinnuteqaateqartut nunanit allaneersut piginnaasat, ilanngussaq 1-imi taaneqartut assingannik, pigisaqarlutik uppernarsaasiisussaapput.

 

Itigartitsineq

 

  § 10. Akuersissummik pigisaqalernissamut piumasaqaatit § 9-miittut apeqqutaatinnagit Innaallagissiornermut oqartussat itigartitsissuteqarneq nalunaarutigisinnaavaat, imatut pisoqartillugu:
1)  Qinnuteqaateqartoq nunami allami iliuusereriikkaminut kingunerititaasunik, § 9, imm. 2-mi taaneqartunut sanilliunneqarsinnaasunut pillaatisitinneqarsimappat.
2)  Qinnuteqaateqartoq atorfimmini imaluunniit allatut pisortanit pisussaatinneqarsimanermit imatut ileqqulersorsimappat, tamanna tunngavigalugu isumaqartoqarsinnaalluni suliffeqarfik isumannaatsumik ingerlanneqarsinnaanngitsoq.

 

Immikkut akuerineqarneq

 

  § 11. Innaallagissiornermut Oqartussat immikkut ittumik pisoqartillugu piumasaqaatinit, § 9-mi taaneqartunit, immikkut akuersissuteqarsinnaapput.

 

 

Akuersissummik pigisaqarnermut akitsuut

 

  § 12. Innaallagissiornermut Oqartussat ukiumoortumik akitsuummik akiliisitsisassapput suliffeqarfiup akuersissummik pigisaqarnerminik atatitsiinnarnissaanut.

 

Kapitali 4

Ilisimatitsinissamut pisussaaffik aamma pisussaaffiit allat

 

§ 13. Suliffeqarfik akuersissummik pigisaqartoq, tak. §§ 9-11, ingerlaannartumik Innaallagissiornermut Oqartussanut ilisimatitsissaaq inuk akuersissummik pigisaqartoq alla suliffeqarfimmut attuumassuteqalerpat. Taamatuttaaq suliffeqarfik Innaallagissiornermut Oqartussanut ingerlaannartumik ilisimatitsissaaq inuk nammineq inuttut akuersissummik pigisaqartoq, suliunnaarpat imaluunniit suliffeqarfimmit ilisimaneqarpat inuk nammineq inuttut akuersissummik pigisaqartoq sapaatit akunnerini arfinilinni imminnut malittuinnarni qimagussimasussanngortoq.
  Imm. 2. Suliffeqarfik akuersissummik pigisaqartoq, tak. §§ 9-11, Innaallagissiornermut Oqartussanut ilisimatitsissaaq paasissutissani, akuersissummik pigisaqalernermut atatillugu nalunaarutigineqarsimasuni, allannguuteqartoqarpat.

 

Inuit namminneq inuttut akuersissummik pigisaqartut pisussaaffii

 

  § 14. Inuk namminneq inuttut akuersissummik pigisaqartut suliffeqarfimmut sapaatit akunneri tamaasa nal. akunnerini 30, suliffeqarfimmut attuumassuteqassapput suliffeqarfiup nalinginnaasumik ammasarfigisaata nalaani, taamaattorli tak. imm. 2.
  Imm. 2. Innaallagissiornermut Oqartussat imm. 1-imi piumasaqaataasumit immikkut akuersissuteqarneq nalunaarutigisinnaavaat, pissutsit immikkut ittut pissutaappata kiisalu suliffeqarfimmi suliassat akuersissummik pigisaqarnissamut piumasaqaateqartartut annertussusiat pisariaqartinngippassuk, sapaatit akunneri tamaasa nal. akunnerini 30-ni akuersissummik pigisaqartup suliffeqarfimmut attuumassuteqarnissaa pisariaqartinngippassuk. 

 

  § 15. Inuup nammineq inuttut akuersissummik pigisaqartup suliassarivaa suliffeqarfiup suliassaasa akuersissummik pigisaqarnissamik pisariaqartitsisut eqqortumik inuttaqarnissaat akisussaaffigaa, aammattaaq suliap suliarineqarnerani naammaginartumik nakkutigineqarnissaat. 
  Imm. 2. Inuup nammineq inuttut akuersissummik pigisaqartup isumagisussaavaa suliap maleruaqqusat atuuttut naapertorlugit suliarineqarnissaa.

 

Suliffeqarfiit akuersissummik pigisaqartut pisussaaffiat

 

  § 16. Suliffeqarfiup aalajangersakkat aalajangersimasut malissavai aamma Innaallagissiornermut Oqartussat aamma innaallagissamik nioqquteqartumit, kommunalbestyrelsit aamma ledninginik piginnittut immikkut ilitsersuutaat malissavaat.
  Imm. 2. Suliffeqarfik pisussaaffeqarpoq imm. 1 naapertorlugu innaallagissamut tunngasut suliamik naammassineqarnerat nalunaarutigissallugu.

 

  § 17. Suliffeqarfiup akuersissummik pigisaqartup innaallagissamut ikkunneqarsimasumik kukkusoqarsimasoq imaluunniit tamanna amigaateqartoq paasiguniuk aamma taakkua iluarsineqarsimanngippata, taava suliffeqarfiup piginnittoq imaluunniit atuisoq tamakkua pillugit ilisimatissavaa aamma navianarsinnaasut pillugit, kiisalu akisussaassuseqarneq tamatumunnga tunngatillugu kukkuneqarsimasut imaluunniit amigaataasut aaqqissuunneqarsimanngippata.

 

Kapitali 5

Pitsaassutsimik qulakkeerinninnermut atortoq

 

  § 18. Suliffeqarfik akuersissummik pigisaqalerniarluni qinnuteqaateqartoq uppernarsaasersuummik saqqummiussissaaq, tassa suliffeqarfik atorneqarsinnaasumik pitsaassutsimik qulakkeerinninnermut atortoqarluni. Atortoq suliffeqarfiup niuernermini tunngavigisaanut sammisuussaaq, tassa suliassanut akuersissummik pigisaqarnissamik piumasaqaateqarfiusunut.  Imm. 2. Innaallagissiornermut Oqartussat pitsaassutsimut qulakkeerinninnissamut atortumik, imatut pisoqartillugu suliffeqarfiup suliassanik ikkussuinermut tunngasunik sumiginnaasimappat, misissuisinnaapput. 
  Imm. 3. Suliffeqarfik nunami allameersoq uppernarsaasersuummik saqqummiussissaaq, tassa suliffeqarfik pitsaassutsimik qulakkeerinninnermut pigisaqarluni suliffeqarfiup Kalaallit Nunaanni suliarisartagaanut tunngatillugu.

 

Kapitali 6

Atorunnaarsitsineq aamma utertitsineq

 

Atorunnaarsitsineq

 

  § 19.  Suliffeqarfiup akuersissut pigisaa atorunnaassaaq suliffeqarfik akiliisinnaajunnaartutut suliarineqarpat, aningaasassaaleqilluni suliamik unitsitsippat, atorunnaarpat imaluunniit suliffeqarfimmut inuk nammineq inuttut akuersissummik pigisaqartoq attuumassuteqarunnaarpat imaluunniit inuk nammineq inuttut akuersissummik pigisaqartoq sapaatit akunnerini arfinilinni imminnut malittuinnarni qimagussimappat.

 

  § 20.  Toqusoqartillugu tassani pineqarluni suliffeqarfimmit piginnittoq tamatumunnga ilutigitillugu taanna inuttut nammineq akuersissummik pigisaqarluni, taava qimataasut ingerlaannartumik tamanna pillugu Innaallagissiornermut Oqartussanut nalunaaruteqassapput.
  Imm. 2.  Imaappat suliffeqarfik ingerlatiinnarneqarnissaa kissaatigineqarluni, taava Innaallagissiornermut Oqartussanut qinnuteqaateqarnikkut immikkut akuersissuteqartoqarsinnaavoq, piffissami sivikitsumi akuersissut pigineqareersoq atorlugu sulisoq tatigisaasoq aqutsisoralugu.

 

  § 21. Akuersissutip pigineqartup piffissaq atuutsinneqarfia qaangiuppat taava taanna automatiskiusumik atorunnaassaaq, imaanngippat piffissamut aggersumut akuersissummik pigisaqarnermut akitsuut Innaallagissiornermut oqartussaasunut akilerneqarsimalluni.

 

  § 22. Inuup inuttut nammineq akuersissut pigisaa atorunnaassaaq inuup pineqartup § 9-mi piumasaqaataasut naammassisinnaajunnaarpagit.

 

Utertitsineq

 

  § 23. Innaallagissiornermut Oqartussat akuersissummik utertitsisinnaapput, imatut pisoqartillugu 
1)  suliffeqarfik ikkussuinermi suliassanik suliaqarnermini annertuumik sumiginnaanermut imaluunniit uteqqiattumik pisuusimappat.
2)  Innaallagissiornermut Oqartussat pitsaassutsimik qulakkeerinninnermut atortup misissornerani taanna akuerisinnaanngippassuk imaluunniit immikkut ittumik misissueqqinnermini suliffeqarfiup nammineq misissuisussaatitaanerminik annertuumik amigaateqarsimappat, 
3)  suliffeqarfiup nammineq najugaqarfittut sumiiffia Kalaallit Nunaanniikkunnaarpat, imaluunniit 
4)  akuersissummik pigisaqarnissamut piumasaqaataasut allatut naammassineqarsinnaanngippata.
  Imm. 2. Utertitsinissamik aalajangiineq imm. 1 naapertorlugu pisoq suliffeqarfimmit aalajangiinermi pineqartumit eqqartuussivikkut suliarisassanngortinneqarnissaa piumasaqaatigineqarsinnaavoq. Eqqartuussivinnut suliassanngortitsinissamik qinnuteqarneq Innaallagissiornermut Oqartussanut saqqummiunneqassaaq, kingusinnerpaamik aalajangiinerup suliffeqarfimmut nalunaarutigineqarnerata kingornatigut sapaatit akunnerisa sisamaanni. 
  Imm. 3. Eqqartuussisunut suliassanngortitsinissamut piumasaqaat imm. 1 naapertorlugu utertitsinermut tunngasoq kinguartitsinissamik kinguneqarpoq. Taamaattorli eqqartuussiviup aalajangiinermigut aalajangersinnaavaa suliffeqarfik pineqartoq suliap ingerlanneqarnerata nalaani akuersissummik pigisaqartut suliassaanik suliaqarsinnaanngitsoq.

 

Kapitali 7

Peqqussuteqarneq

 

  § 24. Suliffeqarfik § 2, imm. 3-5, tunngavigalugu imaluunniit maleruaqqusat § 3, imm. 1, normu 1 aamma 2 tunngavigalugit innaallagialerinermik suliassanik suliaqartup ingasattumik imaluunniit arlaleriarluni inatsimmik atuuttumik, imaluunniit isumannaallisaanermut piumasaqaatinik allanik unioqqutitsippat, taava Innaallagialiornermut Oqartussat suliffeqarfimmut peqqussuteqarsinnaavoq suliassat taamatut ittut akuersissummik pigisaqartumik suliariteqqullugit.
  Imm. 2. Imaappat peqqussuteqarnermut piumasaqaatit, tak. imm. 1, allannguuteqarlutik taava suliffeqarfiup Innaallagissiornermut Oqartussat qinnuigisinnaavai nalileeqqullugit, peqqussuteqarnerup suli atuutiinnarnissaanik nalileeqqullugit.
Imm. 3. Peqqussuteqarnermut aalajangiineq imm. 1 naapertorlugu pisoq suliffeqarfimmit aalajangiinermi pineqartumit eqqartuussivikkut suliarisassanngortinneqarnissaa piumasaqaatigineqarsinnaavoq. Eqqartuussivinnut suliassanngortitsinissamik qinnuteqarneq Innaallagissiornermut Oqartussanut saqqummiunneqassaaq, kingusinnerpaamik aalajangiinerup suliffeqarfimmut nalunaarutigineqarnerata kingornatigut sapaatit akunnerisa sisamaanni. 
Imm. 4. Eqqartuussisunut suliassanngortitsinissamut piumasaqaat imm. 3 naapertorlugu kinguartitsinissamik kinguneqarpoq. Taamaattorli eqqartuussiviup aalajangiinermigut aalajangersinnaavaa eqqartuussisunut suliassanngortitsineq kinguartitsinermik kinguneqassanngitsoq.

 

Kapitali 8

Ussassaaruteqarneq il.il.

 

  § 25. Suliffeqarfik akuersissummik pigisaqarnissamut angusisimanngitsoq imaluunniit suliffeqarfiup akuersissut pigisaa atorunnaarsimappat imaluunniit utertinneqarsimalluni, taava ussassaaruteqarnermi imaluunniit aallatut iliorluni iliuuseqarnikkut, isumaqalersitsisoqassanngilaq suliffeqarfiup akuersissummik pigisaqarneranik.

 

Kapitali 9

Nakkutilliineq

 

  § 26. Innaallagissiornermut Oqartussat, nalunaarummit matuminnga aamma maleruaqqusanik nalunaarutip matuma malitsigisaanik aalajangersarneqarsimasunit, nakkutilliisuuvoq.
  Imm. 2. Innaallagissiornermut Oqartussat piumasaqaatigisinnaavaat paasissutissat tamaasa nalunaarutigineqarnissaat, tassa imm. 1 naapertorlugu nakkutilliinermik suliaqarnerminut pisariaqartitatik.

 

  § 27. Innaallagissiornermut Oqartussat imaluunniit inuit Innaallagissiornermut Oqartussanit pisussaaffilerneqarsimasut, qaqugukkulluunniit kinaassutsiminnik uppernarsaallutik eqqartuussisup aalajangiinera tunngaviginngikkaluarlugu innaallagissamut atortunut imaluunniit ikkussuunneqarsimasunut aamma sumiiffinnut taakkuninnga nioqqutissiorfiusunut, nioqquteqarfiusunut, toqqorsiviinut imaluunniit innaallagissamut atortussianut isersinnaatitaapput.
  Imm. 2. Pisariaqarnera tunngavigalugu Innaallagialiornermut Oqartussat tamatumunnga politiinit ikiorneqarsinnaapput.

 

  § 28. Nalunaaruteqarnernut atatillugu tamakku piumasaqaataasinnaapput, taava innaallagissamik nioqquteqartup misissussavaa, suliassat nalunaarummi matumani maleruaqqusat imaluunniit maleruaqqusap matuma malitsigisaanik maleruaqqusat aalajangersarneqarsimasut naapertorlugit, suliffeqarfinnit taamatut suliaqarnissamut pisinnaatinneqartunit suliarineqarsimanersut.

 

  § 29. Innaallagissamik nioqquteqartup, kommunalbestyrelsip imaluunniit suliffeqarfiup pilersuisuusup Innaallagissiornermut Oqartussaanut nalunaaruteqassapput, qularnaarlugu paasineqarpat nalunaarummi matumani maleruaqqusat imaluunniit maleruaqqusap matuma malitsigisaanik maleruaqqusat aalajangersarneqarsimasut unioqqutinneqarsimasut, suliarisap suliarineqarnerani sumiginnaasoqarsimasoq imaluunniit suliffeqarfik akuersissummik pigisaqartoq iliuuseqarsimasoq imatut, tamatuma malitsigisaanik akuersissutip pigineqartup utertinneqarnissaanik kinguneqarsinnaasumik.

 

  § 30. Ikkussuinissamik suliassap piareersarneqarneranut aamma suliarineqarneranut atatillugu nalunaaruteqarnermi, suliffeqarfik akuersissummik pigisaqartoq pisussaaffeqarpoq Innaallagialiornermut Oqartussat inassuteqarnerisigut ikkussorneqartussap annertussusia aamma qanoq ittuunera pillugit paasissutissanut ilassutissanik tunniussissaaq.

 

  § 31.  Sumiiffimmi misissuinermi suliffeqarfik akuersissummik pigisaqartoq tamanna piumasarineqarpat sumiiffimmut suliassamik suliaqarfiusumut ornigutsitsissaaq.

  

  § 32.  Innaallagissiornermut Oqartussat atortunik, ikkussukkanik aamma/imaluunniit titartakkanik misissuinerata suliffeqarfik akuersissummik pigisaqartoq akisussaaffiata ilaanit sumilluunniit pisussaajunnaarsinngilaa, suliassat maleruaqqusat aamma aalajangersakkat atuuttut eqqortillugit suliarineqarsimanissaannut.

 

  § 33.  Innaallagissamik nioqquteqartoq pisinnaatitaavoq naaggaarsinnaanerminut, tassa ikkussukkanik ikkussinissaminut aamma/imaluunniit uuttuutinik ikkussinissaminut ikkussorneqarsimasunut, taakkua nalunaarutinik atuuttunik unioqqutitsilluni suliarineqarsimappata imaluunniit eqqunngitsumik nalunaarutigineqarsimappata aamma naammassinerat nalunaarutigineqarsimappat. 

 

§ 34.  Innaallagissiornermut Oqartussat innaallagissamik nioqquteqartoq pisinnaatissinnaavaa ikkussukkanut ingerlasunut unioqqutitsilluni aamma kukkuneqartumik suliarineqarsimasunut pilersuinermik qamitsinissamut, pineqartut iluarsineqarnissaasa tungaanut.

 

  § 35.  Suliffeqarfiup akuersissummik pigisaqartup sukumiinerisumik kingusinnerpaamik piffissarititaasup nalunaarutigineqarsimasup ingerlanerani ikkussorneqarsimasut pineqartut iluarsisimanngippagit, taava Innaallagissiornermut Oqartussat suliassat suliaritissinnaavai suliffeqarfiup akuersissummik pigisaqartup akiligassaanik.

 

  § 36.  Taamatut pisoqartillugu Innaallagissiornermut Oqartussat pisinnaatitaapput suliamut tunngatillugu aningaasartuutitik suliffeqarfimmit akuersissummik pigisaqartumit matussusertissallugit.

 

Kapitali 10

Maalaaruteqarnissamut periarfissat

 

  § 37. Innaallagialiornermut Oqartussaasut nalunaarut manna napertorlugu imaluunniit nalunaarutip matuma malitsigisaanik maleruaqqusat naapertorlugit aalajangigai oqartussaasunut allanut allaffissornikkut suliassanngorteqqinneqarsinnaanngillat.

 

Kapitali 11

Pineqaatissiissutit

 

  § 38. Pillaammik akiliisinneqarsinnaavoq imatut iliortoq
1)  §§ 2-4 unioqqutitsisoq,
2)  nalunaarutigisassanik nalunaaruteqanngitsoortut, tak. § 13.
3)  nalunaarutigisassanik § 13, imm. 2 naapertorlugu nalunaaruteqanngitsoortoq imaluunniit paasissutissanik kukkusunik nalunaaruteqartoq, imaluunniit
4)  § 25-mik unioqqutitsisoq.
  Imm. 2. I­nu­it i­nat­si­si­ti­gut pi­sin­naa­ti­taa­sut aamma pi­sus­saa­ti­taa­sut pil­laam­mik a­ki­li­gas­sa­mik a­ki­lii­sus­san­ngor­tin­ne­qar­sin­naap­put Ka­laal­lit Nu­naan­ni pi­ner­lut­tu­le­ri­ner­mi I­nat­sim­mi maleruaqqusat naa­per­tor­lu­git.
  Imm. 3.  Pil­laam­mik a­ki­lii­sit­si­ne­rit na­joq­qu­tas­saq man­na naa­per­tor­lu­gu Nu­nat­ta Kar­si­a­nut nakkartinneqassap­put.

 

Kapitali 12

Atuutilersitsineq aamma ikaarsaariarnermi aalajangersakkat

 

  § 39. Nalunaarut 1. januar 2020 atuutilerpoq.
  Imm. 2. Kalaallit Nunaanni installatørit pillugit ilitsersuut aamma akuersissummik pigisaqarnissamut aalajangersakkat 1. januar 2020 atorunnaarsinneqarput.

 

 

 

Innaallagialiornermut Oqartussat, ulloq 12. december 2019

 

 

 

Michael Petersen

/

Jane Lynge Hansen